Corsiche: sît par judâ a cjacarâsi par cors

E à za passât i 4 mil euros che si veve proponût tant che obietîf, la campagne popolâr di racuelte di fonts par svilupâ un sît internet che al fasi di pont di contat tra cui che al vûl fevelâ par cors. La idee di fonde e je une vore semplice, ven a dî meti in comunicazion tra di lôr dutis lis personis che, sei su la isule che ator pal mont, a àn gust di podê fevelâ in lenghe corse e di fâlu in maniere flessibile, o sei daûr dai oraris e dal nivel di competence di ognidun. Chest sisteme al è za stât metût in vore cun altris lenghis e al à puartât a risultâts positîfs.

Font: Corsica Oggi, 30/04/18

Aragon: in vore par prontâ imprescj digjitâi pal aragonês

Il guvier dal Aragon al è daûr a sburtâ il svilup di un dizionari e di un tradutôr in linie par aragonês inte suaze dal program “Linguatec” su la digjitalizazion des lenghis minorizadis che al gjolt di un finanziament di un milion e 200 mil euros, pe plui part metûts de UE. Il program si fonde su la colaborazion tra la Comunitât Autonome Basche, la Comunitât Autonome dal Aragon e la Regjon aministrative de Ocitanie. L’aragonês al è une vore indaûr sul plan de normalizazion linguistiche, massime sul plan digjitâl, e chest progjet si propon di tacâ a recuperâ chest ritart.

Font: Heraldo, 26/04/18

Ucraine: plui spazi al bulgar intes scuelis

La ministre ucraine pe istruzion e à sotscrit une declarazion che e impegne il guvier di Kiev a incressi i dirits de minorance bulgare te scuele. Plui in detai, si larà a mendâ la leç su la educazion jentrade in vore tal 2017 che e incrès in maniere progressive la presince dal ucrain ancje tes scuelis des minorancis nazionâls ricognossudis. L’obietîf al è di garantî ai fruts che a partegnin ae minorance bulgare di imparâ la lôr lenghe e di vêle tant che lenghe di insegnament. Ucraine e Bulgarie si son impegnadis ancje a lavorâ suntun protocol di cooperazion gnûf su la educazion che al cjapi dentri i prossims cuatri agns scolastics.

Font: Unian, 26/04/18

Paîs Catalans: progjet par fâ cognossi i libris par catalan

Cul mês di Avrîl si à inviât il progjet “El seu llibre” che si propon di fâ cognossi i libris par catalan a pene publicâts. Si trate di une ativitât gjestide di volontaris che e ven svilupade in gracie dal sît internet elseullibre.cat e di un boletin mensîl inviât vie pueste eletroniche a ducj i iscrits. Si pues ricevi lis informazions ancje daûr di areis di interès specifichis: chês za in vore a son leterature, educazion, siencis sociâls, storie e art, plui indenant si varà ancje la sezion dedicade ai libris par fruts e par fantats. A man a man che la ativitât e larà indenant dutis lis schedis dai libris gnûfs a saran disponibilis sul sît. Il servizi nol cjape dentri dome i libris publicâts par catalan dentri dal stât spagnûl, ma ancje chei jessûts in Catalogne Nord, in Andorra e tal Alguer.

Font: Generalitat de Catalunya, 25/04/18

Paîs Basc: acuardi par sburtâ l’euskara in Ipar EH

Ai 25 di Avrîl il guvier de Comunitât Autonome Basche, tal stât spagnûl, e l’Ufici public de lenghe basche (Euskararen Erakunde Publikoa) che al opere in Ipar Euskal Herria, o sei il Paîs Basc setentrionâl sot aministrazion francese, a àn ratificât l’acuardi par promovi in maniere unitarie l’euskara. Tra lis liniis di azions che lis dôs istituzions si son impegnadis a svilupâ in maniere coordenade si à il plen ricognossiment dai sistemis in vore pe certificazion linguistiche e la publicazion des relazions finâls su la seste inchieste sociolinguistiche sul basc. Cun di plui, pal 2018, si previôt un impegn finanziari di un milion e 930 mil euros che a laran pe plui part a organizazions dal Paîs Basc setentrionâl che a lavorin a pro de lenghe basche te educazion, tai mieçs di comunicazion e te culture.

Font: EiTB, 25/04/18

Bretagne: 1.800 chilometris di corse pe lenghe

E je daûr a davuelzisi la seste edizion de Redadeg, la corse bienâl pe lenghe bretone, in program dai 4 ai 12 di Mai. Nassude intal 2008 su ispirazion de Korrika basche, la corse si propon di tirâ sù bêçs par finanziâ progjets a pro de lenghe bretone. Associazions, ents, impresis e citadins a puedin partecipâ cul comprâ un o plui chilometris di corse. Chest an il percors si disvuluçarà par 1.800 chilometris, di Kemper / Quimper a Plouguerneau, scjavaçant ducj i dipartiments de Bretagne storiche. La corse e je compagnade dilunc vie dal so davuelzisi di apontaments inmaneâts di aministrazions e associazions locâls. La edizion di chest an e je dedicade ai “colôrs dal breton” (Brezhoneg liesliv) cun chê di valorizâ lis diversitâts internis de lenghe, sei sul plan des varietâts locâls, sei pe sô evoluzion intal timp.

Font: Ar-redadeg, 24/04/18; Ouest-France, 01-03/05/18

Asturiis: in place pe uficialitât dal asturian

Ai 22 di Avrîl diviers miârs di personis a àn manifestât pes stradis di Uviéu par domandâ la uficialitât dal asturian. Ancjemò tal Setembar dal an passât il Consei pe difese de lenghe asturiane (XDLA) al à presentât un progjet di modifiche dal Statût di autonomie de Comunitât des Asturiis che al meti sul stes plan l’asturian e il castilian. Par cumò a pro de uficialitât de lenghe proprie a àn za cjapât posizion in maniere esplicite Podemos, Izquierda Unida e une part dal Partît Socialist. Lis fuarcis de diestre spagnoliste invezit a calcolin avonde lis misuris di tutele previodudis de leç dal 1998 sul ûs e su la promozion dal asturian: leç che, dut câs, par diviers aspiets e reste ancjemò dome su la cjarte.

Font: Jornalet, 24/04/18

Tatarstan: militant sot acuse pal so impegn pe lenghe proprie

La Costituzion dal Tatarstan e ricognòs il tatar e il rus come lenghis uficiâls di cheste Republiche de Federazion Russe, ma inte realtât la lenghe proprie di chest teritori si cjate ben lontane dal gjoldi dai stes dirits dal rus. Un citadin di cheste Republiche, Almaz Imamov, al à provât a denunciâ par discriminazion la sezion locâl de agjenzie tributarie federâl e di un istitût bancjari par vie che no garantivin i lôr servizis ancje par tatar. Pe magjistrature però, cundut de uficialitât de lenghe, i sogjets di nivel statâl no son tignûts a garantî i lôr servizis in lenghis diviersis dal rus. Cun di plui, par vie de sô iniziative, Imamov si à fintremai ricjatât sot acuse par vie che cu la sô denuncie al varès “stiçât l’odi etnic”.

Font: RFE/RL, 23/04/18

Paîs Basc: ETA pronte pe sô dissoluzion

A passe sîs agns de fin de sô ativitât armade e a un an di distance de consegne dal so arsenâl, la organizazion armade basche ETA e comunicarà la sô dissoluzion sul prin tacâ dal mês di Mai. Si sierarà cussì une pagjine di storie tacade intal 1958, in plene ete franchiste, cuant che un grup di zovins bascs al decideve di meti sù Euskadi Ta Askatasuna. La gnove e je stade anticipade di rapresentants dal grup internazionâl di contat che, intune cun Bake Bidea e Foro Social, a son daûr a lavorâ cui membris de organizazion par rivâ a chest obietîf e par cjatâ une soluzion politiche al conflit che par agns al à segnât i rapuarts tra la societât basche e i stâts spagnûl e francês.

Paîs Catalans: gnovis crepis te strategjie repressive spagnole

Lis autoritâts spagnolis a van dilunc cu la repression dal indipendentisim catalan ma si cjatin a frontâ critichis simpri plui marcadis sul plan internazionâl e fintremai contrascj internis che a gjavin inmò plui credibilitât ae lôr azion. Dongje de ofensive judiziarie, la repression si palese ancje cui atacs dal guvier Madrid aes istituzions catalanis e ai siei funzionaris. Par mieç dal control diret su la Catalogne che si à cjapât cu la metude in vore dal articul 155 de Costituzion spagnole, l’esecutîf vuidât di Mariano Rajoy al va indenant a parâ fûr des istituzions catalanis ducj i funzionaris che al stime masse leâts al indipendentisim: i ultins a jessi parâts vie a son la diretore dal servizi pes relazions internazionâls dal guvier catalan, Marina Borrell, e il diretôr de scuele de aministrazion publiche de Catalogne, Agustí Colomines. Par justificâ la lôr destituzion il guvier di Madrid al à dome dite che «i lôr compuartaments no son compatibii cu la incarghe che a davuelzin».

Europe: assemblee gjenerâl de EFA in Baviere

Si à tignude tra i 12 e i 15 di Avrîl a Landshut, in Baviere, la assemblee gjenerâl de Aleance Libare Europeane (EFA), partît politic internazionâl nassût intal 1981 e che in dì di vuê al met adun 47 moviments politics indipendentiscj e autonomiscj che a operin in 21 stâts diferents. La discussion si à centrade plui voltis su la situazion catalane cun variis mostris di solidarietât pai militants impresonâts, esiliâts o perseguitâts e cu la poie plene ae bataie pe autodeterminazion de Catalogne. Intant dai siei lavôrs si à fat bon il manifest eletorâl pes elezions europeanis dal 2019 che, in dîs cjapitui, al disvilupe la vision de Aleance su la Europe. A son stadis po aprovadis diviersis declarazions e mozions là che si poie la domande di une rapresentance des isulis Åland intal Parlament european e il ricognossiment dal prin Parlament serbian de Lusazie, e si pant la solidarietât ai curdis sot atac in Sirie e in Turchie, ae minorance macedone in Grecie e in Bulgarie e a chê turche in Grecie. La assemblee di chest an e à vût tant che paron di cjase il Bayernpartei (Partît Bavarês).

Font: EFA, 17/04/18

Galizie / León: la situazion dal Bierzo a Bruxelles

Il coletîf culturâl Fala Ceibe al ponte a fâ cognossi al Parlament european la situazion che si cjate a vivi il galizian intal Bierzo, provincie di lenghe galiziane cjapade dentri te comunitât di Castilie e León. Par chest la associazion e à contatât la eurodeputade Ana Miranda (BNG) par che e sburti i siei coleghis a fâ buine une risoluzion a pro di une tutele plui fuarte de lenghe proprie ta chest teritori. Il statût de comunitât autonome di Castilie e León al garantìs un ricognossiment juridic al galizian tai teritoris là che al è fevelât, ma cheste tutele e reste pe plui part su la cjarte.

Font: Diario de León, 15/04/18

Galizie: campagne di A Mesa sul audiovisîf par galizian

Ai 15 di Avrîl si à tignude a Sant Jacum di Galizie la assemblee gjenerâl de organizazion A Mesa pola Normalización Lingüística. E je stade la ocasion sei par fâ il pont su lis azions davueltis de organizazion pai dirits linguistics vie pal 2017, ma soredut par presentâ lis ativitâts in program par chest an. In particolâr si ponte a slargjâ la rispueste sociâl ai atacs patîts de lenghe galiziane. Sul plan legjislatîf A Mesa e à fat savê che e promovarà une propueste di leç pe normalizazion linguistiche intal setôr audiovisîf.

Font: La Opinión, 15/04/18

Bretagne: indenant cu lis mobilitazions pes Diwan

A van indenant in Bretagne lis mobilitazions par domandâ soluzions stabilis pes dificoltâts che a tocjin lis scuelis a imersion Diwan. Ai 14 di Avrîl plui di 300 personis si son dadis adun a Lannion e a àn manifestât denant dal palaç dal comun e di chel de sotprefeture par domandâ, tra lis altris robis, la cjolte in caric de bande dal stât dal personâl no docent e la parificazion dai insegnants des scuelis a imersion cun chei dai istitûts publics. La rêt Diwan e scolarize passe 4 mil fruts e fantats, des scuelis de infanzie fintremai lis superiôrs, e e impegne plui di 500 personis tra professôrs e personâl tecnic e aministratîf. L’ultin colp dât a chescj istitûts al è il tai dai contrats assistûts de bande dal guvier francês che al oblee lis Diwan a ridusi il personâl no docent che al covente pal funzionament des scuelis. La prossime mobilitazion e varà une dimension provinciâl e si davuelzarà ai 26 di Mai a Roazhon / Rennes.

Font: Le Télégramme, 14/04/18

Paîs Basc: enciclopedie in rêt par euskara pai fruts

La associazion dai utents di lenghe basche di Wikipedia (Euskal Wikilarien Elkartea) e à presentât il so ultin progjet, o sei une enciclopedie libare in rêt fate su misure pai fruts dai 8 ai 13 agns. Simpri plui dispès, di fat, i fruts a doprin Wikipedia par preparâ i compits e i lavôrs che a àn di fâ pe scuele: Txikipedia – chest il non dal progjet – si propon duncje di judâju cun tescj plui adats par lungjece e complessitât a cheste fasse di etât. Il progjet si propon ancje di ufrî contignûts plui acessibii su diviersis tematichis ai utents plui grancj.

Font: EiTB, 13/04/18

Paîs Catalans: pratiche linguistiche ancje tes buteghis

Dilunc vie dal 2017 a son stâts 1.325 i students dai cors di catalan par adults che a àn fat pratiche linguistiche in ativitâts economichis di prossimitât ator pe Catalogne. La pratiche linguistiche e je une ativitât comunicative fûr de aule che e jude a svilupâ lis competencis orâls par catalan e a incressi la confidence tes propriis capacitâts. Lis buteghis e lis ativitâts comerciâls di prossimitât a son lis miôr par davuelzi la pratiche linguistiche. L’an passât il consorzi pe normalizazion linguistiche al à fat acuardis cun plui di 3.600 ativitâts economichis catalanis par dâi acet ai partecipants dal program di volontariât pe lenghe e ai students dai cors par adults.

Font: Diari de Girona, 12/04/18

Paîs Catalans: sburt ae industrie catalane de lenghe

In Catalogne si àn uns 250 impresis che a operin intal setôr linguistic cuntun faturât complessîf che al passe i 150 milions di euros ad an e a dan di vore a plui o mancul 1.500 personis. Il setôr al cjape dentri traduzions e interpretariât, dopleament, sottitulazions e tecnologjie de vôs, insegnament des lenghis e altris ativitâts ancjemò. La direzion gjenerâl pe politiche linguistiche dal guvier catalan e previôt za une linie contributive di pueste par voltâ e produsi contignûts par catalan di prodots tecnologjics tant che aplicazions, programs informatics e videozûcs cun chê di slargjâ la presince de lenghe intal mont digjitâl. Chel istès cumò si ponte a incressi inmò di plui i jutoris pe industrie de lenghe. In Avrîl i rapresentants de direzion si son cjatâts cun chei di Clusterlingua, la associazion catalane che e met adun lis impresis dal setôr, par viodi des formis miôr par sburtâ il setôr.

Font: Generalitat de Catalunya, 12/04/18

Irlande: 178 milions pes politichis linguistichis

La ministre irlandese pe culture, pal patrimoni storic e pes areis gaelichis, Josepha Madigan, e à anunciât un invistiment straordenari di 178 milions di euros tai prossims dîs agns pe lenghe irlandese inte suaze dal progjet “Irlande 2040”. Plui de metât des risorsis – o sei 105 milions di euros – a laran par Údarás na Gaeltachta, la agjenzie che e gjestìs il lavôr intes areis gaelicofonis. Si stime che cun chescj fonts si podaran creâ un miâr di puescj di vore al an intes parts de isule là che l’irlandês al è ancjemò lenghe ambientâl. Simpri ta chestis areis, ma pai procès di planificazion linguistiche, a varessin di lâ invezit sù par jù 33 milions, intant che altris 13 milions a saran impleâts par svilupâ i servizis e lis rêts pe lenghe gaeliche intes citâts principâls. Ta cheste prospetive si pense ancje a di un centri di incuintri e di svilup linguistic a Dublin par vignî incuintri ae incressite de comunitât di lenghe irlandese de capitâl.

Font: CnaG, 10/04/18; The Journal, 11/04/18

Paîs Catalans: la strategjie repressive e piert colps in Europe

La ofensive repressive metude in at des autoritâts spagnolis cuintri dal indipendentisim catalan e va indenant ma la sô credibilitât e piert colps a nivel internazionâl. Dopo di jessi stât arestât in Gjermanie ai 25 di Març, Carles Puigdemont – president dal guvier catalan destituît des autoritâts spagnolis – al è jessût de preson di Neumünster su cauzion ai 6 di Avrîl. Un tant dopo che i judiçs todescs a àn decidût che la domande di estradizion rivade di Madrid e podeve jessi acetade dome pe acuse di malversazion, ma no par chê di ribelion. Chest secont reât, par stâ in pîts, al à bisugne di jessi puartât indenant cun ats violents e pai magjistrâts todescs nol è ce che al è sucedût in Catalogne. Cun di plui, cundut dal mandât di arest des autoritâts spagnolis, a son stâts lassâts in libertât de magjistrature belgjiche i ex membris dal guvier catalan Meritxell Serret, Lluís Puig e Toni Comín e di chê scozese la ex conseiere pe educazion Clara Ponsatí. I ultins doi, ancje lôr acusâts di ribelion. La acuse plui penze, doprade de magjistrature spagnole par tignî impresonâts nûf dirigjents dal indipendentisim catalan, no cjate duncje nissun acet ator pe Europe. Fintremai il referent ONU su la libertât di opinion, David Kaye, al à invidât la Spagne a no perseguî i dirigjents catalans par ribelion. La ONU si mostre preocupade par une acuse di cheste fate doprade par ats politics no violents parcè che, ta cheste maniere, si va a colpî la libertât di espression che e je une des fondis de democrazie.

Paîs Basc: sburt al euskara ancje tes declarazions dai redits

La normalizazion di une lenghe minorizade e passe pe pussibilitât di doprâle pardut, fintremai te declarazion dai redits. Par chest ancjemò cul 2009 trê aministrazions locâls dal Paîs Basc – Beasain, Lazkao e Ordizia – a àn decidût di imbastî campagnis di sensibilizazion su chest teme. Chest an, te conference stampe di presentazion de iniziative, i aministradôrs dai trê comuns a àn fat savê che la campagne si inviarà cui 16 di Avrîl. In gracie di chestis campagnis dal 2009 a vuê lis personis che a presentin la lôr declarazion dai redits par basc a son passadis dal 8% al 18% a Beasain e a Ordizia, e dal 15% al 28% a Lazkao.

Font: Diario Vasco, 06/04/18