27/04/18

Paîs Basc: ETA pronte pe sô dissoluzion

A passe sîs agns de fin de sô ativitât armade e a un an di distance de consegne dal so arsenâl, la organizazion armade basche ETA e comunicarà la sô dissoluzion sul prin tacâ dal mês di Mai. Si sierarà cussì une pagjine di storie tacade intal 1958, in plene ete franchiste, cuant che un grup di zovins bascs al decideve di meti sù Euskadi Ta Askatasuna. La gnove e je stade anticipade di rapresentants dal grup internazionâl di contat che, intune cun Bake Bidea e Foro Social, a son daûr a lavorâ cui membris de organizazion par rivâ a chest obietîf e par cjatâ une soluzion politiche al conflit che par agns al à segnât i rapuarts tra la societât basche e i stâts spagnûl e francês.
Chest event storic al è stât anticipât di une comunicazion cence precedents là che ETA e ricognòs ad in plen il dam e il dolôr causât par vie de sô ativitât armade, e pant il so rispiet par dutis lis vitimis causadis e e domande perdon aes vitimis che no vevin nuie a ce viodi cul conflit e aes lôr fameis. Si trate di un pas che, par chel che al rivuarde il conflit basc, nissun altri dai sogjets cjapâts dentri al à fat. Pe plui part dai partîts e des istituzions baschis si trate di un pas impuartant che al zove al superament dal conflit. Dut câs, se par EH Bildu si trate di un pas storic e impuartanton, par PNV, Elkarrekin-Podemos, Geroa Bai, Izquierda-Ezkerra e socialiscj al coventave che la domande di perdon e fos slargjade a dutis lis vitimis e no dome a chês judicadis “inocentis”. Pai partîts de diestre spagnoliste invezit cheste declarazion no cambie nuie. Il guvier spagnûl, de bande sô, al fâs savê che cheste assunzion di responsabilitât e la dissoluzion de organizazion no puartaran a nissun cambi tes politichis metudis in at cuintri dai passe 250 presonîrs bascs. A front dai pas fats di ETA, contrari de inazion dal guvier di Madrid, l’esecutîf francês al à invezit tacât a trasferî i presonîrs bascs in centris detentîfs plui dongje dal Paîs Basc.
Font: EiTB, 18/04/18; Naiz:, 19-21/04/18; Ara, 18-21/04/18

Nessun commento: