La
ofensive repressive metude in at des autoritâts spagnolis
cuintri dal indipendentisim catalan e va indenant ma la sô
credibilitât e piert colps a nivel internazionâl. Dopo
di jessi stât arestât in Gjermanie ai 25 di Març,
Carles Puigdemont – president
dal guvier catalan destituît des autoritâts spagnolis –
al è jessût de preson di Neumünster su cauzion ai 6 di Avrîl. Un
tant dopo che i judiçs todescs a àn decidût che la domande di
estradizion rivade di Madrid e podeve jessi acetade dome pe acuse di
malversazion, ma no par chê di ribelion. Chest secont reât, par stâ
in pîts, al à bisugne di jessi puartât indenant cun ats violents e
pai magjistrâts todescs nol è ce che al è sucedût in Catalogne.
Cun di plui, cundut dal mandât di arest des autoritâts spagnolis, a
son stâts lassâts in libertât de magjistrature belgjiche i ex
membris dal guvier catalan Meritxell Serret,
Lluís Puig e Toni Comín
e di chê scozese la ex conseiere pe
educazion Clara Ponsatí. I ultins doi, ancje lôr
acusâts di ribelion. La acuse plui penze, doprade de magjistrature
spagnole par tignî impresonâts nûf dirigjents dal indipendentisim
catalan, no cjate duncje nissun acet ator pe Europe. Fintremai il
referent ONU su la libertât di opinion, David Kaye, al à invidât
la Spagne a no perseguî i dirigjents catalans par ribelion. La ONU
si mostre preocupade par une acuse di cheste fate doprade par ats
politics no violents parcè che, ta cheste maniere, si va a colpî la
libertât di espression che e je une des fondis de democrazie.
Cundut
dai patafs che a rivin sul plan internazionâl, lis autoritâts
spagnolis a van indenant cu la lôr strategjie di criminalizazion dal
indipendentisim catalan e fintremai di chei che no lu àn
perseguitât. Cussì la judice Carmen Lamela e à decidût di
processâ par sedizion e par partecipazion a organizazion criminâl
sei l’ex responsabil pal interni dal guvier catalan, César Puig,
che l’ex comandant e l’ex diretôr dai Mossos
d’Esquadra – la polizie autonomiche
catalane – Josep Lluís Trapero e Pere Soler. Par sedizion e sarà
processade ancje la ex intendente dai Mossos,
Teresa Laplana.
Font:
Ara,
05-06/04/18;
VilaWeb, 05-06/04/18;
Naiz:, 05-06/04/18
Nessun commento:
Posta un commento