Bretagne: sburt di Div Yezh pal insegnament public bilengâl

Intune conference stampe che si è tignude ai 28 di Jugn, i rapresentants de Div Yezh, la associazion dai gjenitôrs impegnâts pal ûs dal breton intal sisteme educatîf public, a àn fat il pont su la situazion dal insegnament bilengâl intes scuelis publichis de Bretagne e a àn segnalât i ponts critics che a varessin di jessi frontâts par prins. In dì di vuê, intal sisteme scolastic public si àn 80 istitûts che a ufrissin une educazion bilengâl intes primariis e 26 intes secondariis, par un totâl di plui o mancul 6 mil arlêfs. Si trate di une cifre che e va dilunc a cressi – tal 1991 i arlêfs a jerin 545 e tal 2001 a jerin 2.650 – ma che e à di frontâ cetancj pidiments.

Paîs Catalans: tes Baleârs nol coventarà savê il catalan par lavorâ tal public

La comission pai afârs istituzionâi dal Parlament des isulis Baleârs e à fat bon, dome cul vôt dal PP (diestre spagnoliste), il disen di modifiche de leç de funzion publiche in maniere che la cognossince dal catalan nol sarà plui un element necessari par podê lavorâ intes aministrazions e intai servizis publics des isulis ma dome un titul di merit. Inte stesse riunion al è stât boçât, cul vôt dal PP e la astension dai socialiscj, un emendament che al proponeve la avualiance juridiche jenfri catalan e castilian. Lis oposizions a son cumò za daûr a lavorâ par che il test di leç al vegni fermât par incostituzionalitât dal moment che, intai fats, al larà a penalizâ i dirits linguistics dai citadins che a fevelin par catalan che no varan plui la garanzie di vê a ce fâ cun funzionaris publics che a capissin e che ur rispuindin inte lôr lenghe proprie.

Font: Europa Press, 27/06/12

Stât spagnûl: lenghis minorizadis e justizie, rapuart simpri plui dificil

La comission culture dal Parlament spagnûl e à dite di no a di une propueste là che si domandave che, almancul intes comunitâts autonomis che a ricognossin la uficialitât di une altre lenghe dongje dal spagnûl, la cognossince de lenghe locâl e fos un recuisît e no dome un titul di merit par podê lavorâ inte aministrazion judiziarie di chei teritoris. La propueste e nas dal fat che, cundut che la leç e garantìs paritât di tratament des lenghis, cuant che si à a ce fâ cu la magjistrature e cui uficis judiziaris i dirits linguistics dai citadins che a fevelin par basc, par catalan o par galizian no son rispietâts. La iniziative si è però scuintrade cul no sec dal PP, che al à la maiorance intal Parlament spagnûl, e des perplessitâts dai socialiscj.

Font: El Correo, 27/06/12

Paîs Catalans: catalan veicolâr inte scuele de infanzie sot atac

Il guvier catalan al tignarà ancje intal prossim an scolastic il model linguistic in vore cumò te scuele de infanzie, cundut de sentence dal tribunâl suprem spagnûl che e impon di doprâ ancje il castilian tant che lenghe veicolâr. In particolâr, la sentence dal tribunâl e à anulât chei articui dal regolament dal secont cicli dal insegnament infantîl (3-6 agns) che a previodin in maniere esplicite l’ûs dal catalan tant che lenghe veicolâr e preferenziâl. La assessore pe scuele, Irene Rigau (Convergència Democràtica de Catalunya), e spieghe che chel istès si àn avonde fondis legâls par lâ indenant cul model di insegnament a imersion par catalan. La Rigau e zonte ancje che nol coventarà sostituî i articui dal test di leç anulâts dal tribunâl dal moment che ce che al mancje al sarà cuviert de leç de educazion de Catalogne. I partîts politics catalans a àn criticât cun fuarce la sentence che a judichin un atac cuintri dal model scolastic catalan, dome la diestre spagnoliste (PP) e je intervignude in difese dal at dal tribunâl suprem.

Font: Vilaweb, 26/06/12; Europa Press, 26/06/12; Diario de Cadiz, 26/06/12

Asturiis: aleance tra fuarcis nazionalitariis

Al à non Compromisu por Asturies il gnûf sogjet politic nazionalitari che al diven de federazion tra il Bloque por Asturies, la UNA (Unitât Nazionaliste Asturiane) e un altri piçul grup indipendentist. Il gnûf moviment si declare asturian, di çampe e ecologjist e al à chê di ufrî ae int une prospetive nazionalitarie unitarie. Si à però di dî che intes elezions che si son tignudis sul principi di chest an intes Asturiis la aleance jenfri Bloque e UNA no à rivât a lâ plui innà dal 0,32% des preferencis. Inte federazion nol è invezit jentrât il moviment Andecha Astur che al à miôr lâ indenant di bessôl cul so progjet politic (intes ultimis elezions al à vût a pene il 0,13% dai vôts).

Font: Nationalia, 26/06/12

Bosgne: discriminazions pussibilis cul censiment gnûf

Diviersis organizazions no governativis a àn domandât ae agjenzie bosgnache di statistiche di cambiâ il formulari dal censiment gjenerâl in program intal Avrîl dal 2013 dal moment che l’implant di ciertis domandis al sarès discriminatori. Ancje su la fonde des indicazions de conference europeane dai esperts di statistiche, lis organizazions a segnalin che ciertis domandis no permetin une plene libertât di rispueste cun consecuencis seriis sei pai citadins che pes stessis politichis de federazion. Par esempli cuant che si fevele di partignince etniche, la formulazion de domande e podarès puartâ la int a confusionâsi e, intun stât plurinazionâl tant che chel bosgnac, i dâts su la composizion etniche no son robe di pôc. Par chel che al rivuarde la lenghe si pues dâ dome une rispueste, ma i organisims internazionâi di statistiche a invidin a permeti simpri rispuestis multiplis su chest teme. Di chi duncje l’invît a cambiâ il formulari dal censiment in maniere di evitâ efiets discriminatoris o coercitîfs su la int.

Font: Balkan Insight, 26/06/12

Russie: lenghis nativis couficiâls margjinalizadis in rêt

Une ricercje dal laboratori interregjonâl di informazion de Academie de republiche dai Komis e mostre che lis lenghis propriis des republichis e des regjons autonomis de Federazion russe, ancje cuant che a àn un ricognossiment uficiâl, a àn une presince margjinâl intai sîts istituzionâi. Par esempli in Mordvinie e in Mari-El i sîts istituzionâi a son dome par rus, cundut che intes republichis ancje il moksja e il mari a àn il status di lenghis uficiâls. Il sît uficiâl de Udmurtie al è par rus e par inglês, ma nol à nuie inte lenghe proprie dal paîs. Ancje inte regjon autonome dai khantis, il sît uficiâl al è dome par rus. Divierse la situazion inte tiere dai Komis, là che sei il sît uficiâl de republiche, sei chel dal consei di stât a doprin ancje la lenghe komi. In Carelie, là che la uniche lenghe uficiâl e je il rus, il sît di riferiment al à ancje contignûts par finlandês e par rus. Il cuadri gjenerâl al è duncje avonde negatîf. Chest al dipent ancje dal fat che, cemût che e spieghe la ricercje, a mancjin scuelis e servizis di interpretariât intes lenghis propriis di chescj teritoris, cence dismenteâ che in mancjance di intervents smirâts i standards alfabetics diferents di chestis lenghis a crein problemis di leture dai simbui sui sîts internet.

Font: Finugor, 25/06/12

Irlande: tancj dubis su la gnove leç sul Gaeltacht

A van dilunc a cressi i dubis e lis protestis su la gnove leç pal Gaeltacht, o sei lis areis de Irlande là che la lenghe gaeliche e à ancjemò une presince significative. Il test prontât dal guvier irlandês al è cumò al esam des dôs ramis dal Parlament. Si trate dal prin mudament de leç sul Gaeltacht dal 1956 incà e plui di cualchidun al acuse il guvier di jessi intervignût plui par taiâ lis spesis, che no par adatâ la legjislazion ae situazion diferente che la lenghe gaeliche si cjate a vê in dì di vuê. Altris a fevelin invezit di riduzion de democrazie dal moment che il test al previôt che i membris de Údarás na Gaeltachta, la agjenzie di svilup dai teritoris che a fasin part dal Gaeltacht, no saran plui elets de int, ma nomenâts dal guvier e dai ents locâi.

Jamalie - Nenetsie: promozion des lenghis nativis ancje in rêt

Il program 2012 – 2015 pe tutele des tradizions, de culture e des lenghis des popolazions nativis de regjon autonome de Jamalie – Nenetsie, intal Nord de Federazion russe, al previôt ancje il svilup di un portâl internet dut dedicât aes popolazions nativis di chest teritori. Intal sît si cjataran spazis di aprofondiment su la culture, la leterature, lis tradizions des popolazions cjapadis dentri tal progjet, ma ancje ricercjis e articui gjornalistics su di lôr, adun cuntun cuadri de lôr situazion educative e artistiche. In plui che par rus, il portâl al sarà disponibil ancje intes lenghis dai nenets, dai khantis e di chei altris popui natîfs de regjon. In Jamalie – Nenetsie, une des autonomiis plui atentis ai dirits des comunitâts minorizadis, i rus a rapresentin la plui part dai residents (61,7%) e lis comunitâts nativis no rivin nancje al 10% de popolazion totâl. Il grup plui numerôs al è chel dai nenets (5,9%) seguît di khantis (1,9%) e komis (1%) che a partegnin ducj ae famee linguistiche uraliche, i prins intal grup samoideic e i seconts inta chel ugrofinic.

Font: Finugor, 21/06/12

Galizie: galizian discriminât inte justizie

Un judiç di Vigo al à refudât une domande che i jere rivade par vie che e jere stade scrite par galizian e al à fat savê che al larà dilunc a fâlu fintremai che il document nol sarà metût jù par castilian. No je la prime volte che un magjistrât si rint responsabil di un fat dal gjenar, e ricuarde A Mesa pola Normalización Lingüística, organizazion in prime linie inte difese dai dirits linguistics. Chest gnûf câs di discriminazion cuintri di une lenghe che in Galizie e gjolt di un status di couficialitât al à puartât A Mesa a denunciâ la vicende denant dal tribunâl superiôr di justizie de Galizie, dal consei gjenerâl dal podê judiziari, dal guvier galizian e di chel spagnûl. “No si pues acetâ – a spieghin i dirigjents de organizazion galiziane – che la aministrazion che e à di viodi dai nestris dirits, ancje chei linguistics, e sedi la prime a dineâju”.

Font: Galicia Hoxe, 21/06/12

Paîs Catalans / Paîs Basc: al rive twitter par catalan e par basc

Cui 5 di Lui a saran a disposizion sul marcjât ancje lis versions di twitter par catalan e par basc. Dopo di diviers mês di campagne, i aministradôrs di twitter a àn vierzût il lôr centri di traduzion ai utents che a vevin chê di dâ il lôr contribût par voltâ cheste rêt sociâl par catalan e par basc. In pôc plui di un mês la operazion e je rivade insom e cun Lui ducj chei che a volaran a varan a disposizion la version di twitter ancje ta chestis dôs lenghis. Adun cun basc e catalan, la configurazion de rêt dai “vuits” e je stade voltade ancje par afrikaans, grêc e ucrain.

Font: El Pais, 20/06/12

Aragon: il guvier dal PP al vûl ridusi la presince des lenghis propriis

La assessore pe culture dal guvier dal Aragon, Dolores Serrat, e à presentât i contignûts dal disen di leç che al larà a cjapâ il puest de leç su lis lenghis fate buine a pene tal 2009. Il test al varès di rivâ al esam dal parlament regjonâl intal mês di Setembar. La leç cumò in vore e calcole l’aragonês e il catalan lenghis propriis dal teritori e a ‘nt garantìs l’ûs intai rapuarts cu lis aministrazions publichis e, in maniere parziâl, ancje tes scuelis. Il guvier regjonâl, cumò intes mans de diestre spagnoliste (PP) e dai lôr aleâts regjonaliscj dal PAR, al à però decidût di limitâ i dirits che la leç su lis lenghis e previodeve, cussì chei che prime a jerin dirits garantîts cumò a dipendaran de volontât des diviersis istituzions. Par esempli i citadins a podaran doprâ lis lôr lenghis propriis par comunicâ cu lis aministrazions locâls, ma chestis no saran obleadis a rispuindi te stesse lenghe. Catalan e aragonês a restaran inte scuele, ma no tant che lenghis veicolârs pal insegnament. Cun di plui, intal test de propueste, e sparìs la peraule “catalan” e al so puest si dopre “lenghe aragonese de aree orientâl dal Aragon”. A sparî a son ancje i doi organisims di riferiment pes lenghis propriis dal paîs, o sei la Academie de lenghe aragonese e la Academie aragonese dal catalan, che a vegnin sostituîts di une sole Academie aragonese de lenghe. La iniziative e à jevât daurman la proteste des associazions ativis intal cjamp de promozion dal catalan, unidis inte organizazion Iniciativa Cultural de la Franja, che e denuncie sei lis limitazions ai dirits di cui che al fevele par catalan o par aragonês, sei la disparizion dal non “catalan” che pûr al è ricognossût di dute la comunitât sientifiche.

Font: VilaWeb, 19/06/12; La Vanguardia, 19/06/12; Europa Press, 18/06/12

Paîs Basc: l’indipendentisim al jes dai tribunâi vincidôr

Il suspiet nol è un argoment juridic suficient par condizionâ l’esercizi dal dirit di associazion. E je cheste la motivazion principâl che e sta daûr de sentence dal tribunâl costituzionâl spagnûl che e ricognòs a Sortu, partît de çampe indipendentiste basche, il dirit di davuelzi la sô ativitât politiche in maniere legâl. Sortu al jere nassût cun chê di cjapâ sù il testemoni di Batasuna, partît metût fûr leç cu la acuse di jessi part de organizazion armade basche ETA. La politiche di ilegalizazion metude in at dal guvier e de magjistrature spagnole cuintri di ducj i sogjets de çampe indipendentiste basche e veve colpît ancje Sortu e i veve impedît di regjistrâsi tant che partît politic legâl e di presentâsi aes elezions. La sentence dal tribunâl costituzionâl e ribalte però il judizi dal tribunâl suprem, organisim che al à cjapât sù la ereditât dai tribunâi speciâi di ete franchiste, e i da a Sortu la pussibilitât di davuelzi ae lûs dal soreli la sô ativitât politiche. La decision e à cjatât il bon acet de grande maiorance dai partîts politics dal Paîs Basc, ma no je stade cjapade par nuie ben dal guvier di Madrid che al è intes mans de diestre spagnoliste dal PP. Cun di fat, sei il ministri pe justizie, sei chel pal interni, a àn dite a clâr di no condividi la decision dal tribunâl costituzionâl.

Montenegro: lis aministrazions no metin in at lis politichis pai rom

Il vicepresident dal Consei Nazionâl dai Rom dal Montenegro, Muhamed Ukovic, al à acusât il guvier centrâl e lis aministrazions locâls dal stât balcanic di no vê fat nuie par miorâ lis condizions di vite dai rom montenegrins. Diviers comuns, par esempli, a àn za cjapât i bêçs par miorâ la situazion abitative dai rom, ma no àn ancjemò spindût un franc par fâlu. Il stes guvier centrâl al varès spindût sì e no il 30% des risorsis che al à a disposizion par chest obietîf. La situazion e je ancjemò piês pai 3 mil sfolâts rom, scjampâts dal Cossovo ancjemò tal 1999, che a vivin pe plui part intal cjamp di Konik, dongje Podgorica. Il Consei de Europe al calcole “disumanis” lis condizions di vite ta chest sît e al à metût a disposizion 3 milions di euros par cjatâ une soluzion abitative divierse pai rom, pal moment però cence nissun risultât.

Font: Balkan Insight, 18/06/12

Stât francês: prin autonomist breton elet intes legjislativis

E je la Bretagne a vignî fûr miôr dal secont turni des elezions legjislativis intal stât francês che si è tignût ai 17 di Jugn. Cun di fat, pe prime volte, un candidât espression dal nazionalisim breton moderât al è stât elet inte Assemblee francese. Si trate di Paul Molac, su posizions une vore dongje de UDB (Union Democratiche Bretone) ma che al coreve pe liste Europe Écologie cu la poie ancje di verts e socialiscj. Elet inte cuarte circoscrizion dal Morbihan cul 52,56% des preferencis, Molac al rive di une lungje militance bretoniste che lu à puartât ancje ae presidence des Div Yez, lis scuelis publichis bilengâls, e dal Consei culturâl de Bretagne. Simpri intes filis di Europe Écologie, cun cuasi il 59% des preferencis, al è stât confermât François de Rugy, un dai deputâts a pro de riunificazion aministrative de Loire Atlantiche cul rest de Bretagne. Nuie di fâ, invezit, pai doi candidâts di Femu a Corsica che a vevin rivât a passâ al secont turni. Jean-Christophe Angelini si è fermât al 46,8% dai vôts, intant che Gilles Simeoni si è plaçât secont inte sfide a trê cui candidâts de UMP e dal Parti Radical de Gauche. Chel istès, sul front dai vôts racuelts, si trate dal miôr risultât dal nazionalisim cors intes legjislativis.

Font: Ministère de l'Intérieur, 17/06/12; Le Monde, 17-18/06/12; Agence Bretagne Presse, 18/06/12; Alta Frequenza, 18/06/12

Irlande: riforme de television publiche, servizis par gaelic adun

Nancje la radiotelevision di stât si gjave fûr de politiche di riduzion des spesis metude in vore intal setôr public irlandês. Cussì Radio Telefís Éireann (RTE), dopo vê ridusût lis paiis dai siei dipendents di plui dal 10%, e je cumò daûr a ridusi il numar dai siei uficis sul teritori. Sul front dai servizis in lenghe irlandese, si calcole di limitâ lis spesis cul meti adun i diviers sogjets che a operin ta chest setôr, o sei Radio na Gaeltachta, TG Ceathair e il servizi di informazion gjornalistiche Nuacht. Pai dirigjents de radiotelevision irlandese cheste unificazion no puartarà a di une riduzion dai servizis par gaelic, ma al varès di infuartîju.

Font: Gaelport, 17/06/12

Sardegne: discriminatori il test di ratifiche de Cjarte europeane pes lenghis

L’assessôr regjonâl pe istruzion de Sardegne, Sergio Milia, al à scrit a ducj i parlamentârs elets inte isule par domandâ che a intervegnin par modificâ il test di ratifiche de Cjarte europeane des lenghis regjonâls o minoritariis che al à di jessi esaminât de Cjamare dai deputâts. Cun di fat, il test cussì cemût che al è al ven judicât discriminatori tai confronts di ciertis lenghis minorizadis feveladis dentri dal stât talian. Par esempli, cundut che il sart e il furlan a sedin lis lenghis minoritariis plui feveladis, – al spieghe il rapresentant de Regjon Sardegne – intal test de ratifiche a son une vore penalizadis a front des lenghis bielzà tuteladis di tratâts internazionâi tant che il todesc dal Sud Tirôl o il francês de Val di Aoste. A mobilitâsi par che la aministrazion regjonâl e fasès sintî la sô vôs su chest teme al jere stât massime il Comitadu pro sa limba sarda.

Font: Italian Network, 14/06/12

Irlande: il gnûf dean di Derry al sburte il gaelic

Il conseîr comunâl dal Sinn Féin, Kevin Campbell, al è stât elet tant che gnûf dean di Doire / Derry, la seconde citât par impuartance de Irlande dal Nord. Par un an a dilunc al varà di vuidâ il Consei comunâl e davuelzi lis funzions di prin citadin. La sô nomine e ven a colâ intun moment une vore impuartant pe citât che, dilunc vie dal 2013, e sarà la capitâl de culture dal Ream Unît. Par disfrutâ di cheste oportunitât une vore impuartante – al spieghe Campbell – la citât e à di lavorâ adun par valorizâ il so patrimoni storic e culturâl unic. Ta cheste logjiche al è impuartant promovi ancje il gaelic irlandês, al à po zontât il dean che al pues svantâ une lungje dade di militance a pro de lenghe. Un segnâl une vore fuart se si pense che Derry, cu la sô storie, e à rapresentât un dai esemplis plui grues de discriminazion, ancje linguistiche, che la comunitât unioniste e à imponût a chê nazionaliste irlandese, cundut che cheste ultime e rapresente la maiorance de popolazion de citât.

Font: Gaelport, 12/06/12

Slovachie: violencis razistis, gnove condane de Cort europeane

Ai 12 di Jugn la Cort europeane pai dirits umans e à condanât lis autoritâts slovachis par no vê perseguît i responsabii di une agression di stamp razist puartade indenant intal Fevrâr dal 2002 cuintri di un grup di rom e par no vê proviodût a nissun gjenar di risarciment pes vitimis. Nol è tant che l’organisim judiziari european al veve condanât la Slovachie pal compuartament de sô magjistrature intal câs di une fantate de minorance ongjarese pacade di doi estremiscj di diestre par vie de sô partignince etniche.

Font: ERRC, 12/06/12

Romanie: tes aministrativis i ongjarês a sielzin la UDMR

Intes elezions aministrativis che si son davueltis ai 10 di Jugn in Romanie e je stade la Union Sociâl Liberâl a otignî i risultâts miôr. La coalizion – che e met adun il Partît Sociâl Democratic, il Partît Nazionâl Liberâl e il Partît Conservadôr – e à sfiliât il 50% dai vôts e concuistât 36 dai 41 conseis provinciâi rumens e plui di un tierç dai comuns dal paîs. Tra i partîts de comunitât ongjarese, une vore numerose in Transilvanie, a imponisi e je stade la UDMR (Union Democratiche Magjare in Romanie). In plui di otignî cuasi 470 mil vôts, o sei il 5,45% su scjale statâl, e à otignût la maiorance in doi conseis provinciâi – chei di Hargita / Harghita e di Kovászna / Covasna – e in 202 comuns, tra chescj o cjatìn la citât di Marosvásárhely / Târgu Mureş e altris centris impuartants tant che Sepsiszentgyörgy / Sfântu Gheorghe, Csíkszereda / Miercurea Ciuc e Székelyudvarhely / Odorheiu Secuiesc, ducj logâts tal cussì clamât Székelyföld là che la popolazion ongjarese e je ancjemò maioritarie. La UDMR e à po concuistât diviersis citadinis ancje te aree dongje dal confin cu la Ongjarie tant che Margitta / Marghita, Nagyszalonta / Salonta e Nagykaróly / Carei. Il Partît Popolâr dai Ongjarês de Transilvanie e il Partît Civic Ongjarês, doi grups di diestre che a vevin vût une poie massive de bande dal guvier di Budapest, no àn rivât a passâ l’un par cent dal vôt e no àn vinçût in nissun centri significatîf. Miôr di lôr al à fat il Forum Democratic dal Todescs de Romanie che al à sfiliât i 70 mil vôts e concuistât vot comuns e tra chescj ancje la citât di Hermannstadt / Sibiu, capitâl de omonime provincie.

Font: Balkan Insight, 11/06/12; Politics.hu, 12/06/12