Gales: Leanne Wood, prime femine ae vuide dal Plaid Cymru

Leanne Wood e je stade elete tant che gnove segretarie dal Plaid Cymru, partît nazionalist galês che al rapresente la tierce fuarce plui votade dal Gales, daûr di laburiscj e conservadôrs. E cjape il puest di Ieuan Wyn Jones che al veve decidût di dimetisi dopo dai ultins risultâts eletorâi là che il so partît al veve pierdût un pôc di teren dentri de Assemblee nazionâl galese. Si trate de prime femine sielte par cuvierzi cheste incarghe intai cuasi novante agns di storie dal Plaid Cymru. “Fâ sù un avignî che al vedi lis sôs fondis te sperance e no te pôre, lavorâ in maniere coletive par tirâ fûr ducj chei che a son colâts te puaretât cence lassâ nissun daûr, cheste e je la vere indipendence” e à dite Leanne Wood intal so prin discors di segretarie, invidant ducj a dâsi dongje par costruî un Gales gnûf, just e libar. Leanne Wood e je cumò daûr a imparâ il galês, sei come segnâl di rispiet pe lenghe proprie de sô tiere, sei come sburt par chê part di popolazion che no à vût la pussibilitât di imparâle.

Font: BBC, 15/03/12

Paîs Basc: acuardi strategjic tra lis fuarcis nazionalitariis

Intune conference stampe che si è tignude ai 14 di Març a Baiona / Bayonne, cinc fuarcis politichis nazionalitariis baschis a àn comunicât l’impegn par rivâ in curt a di un acuardi strategjic nazionâl pal svilup politic e sociâl dal Paîs Basc. I rapresentants de çampe indipendentiste basche, di Eusko Alkartasuna, Aralar, Alternatiba e Abertzalean Batasuna a àn spiegât che la gnove clime che si vîf in Euskal Herria ju à za viodûts a lavorâ adun par superâ lis divisions che a esistevin e cumò ju puarte a impegnâsi par meti jù un program che al vedi tant che obietîf la costruzion di un Paîs Basc in pâs, cun ducj i siei dirits nazionâi ricognossûts e cuntun model sociâl e politic alternatîf al sisteme capitalistic dal dì di vuê.

Font: Gara, 15/03/12

Irlande: prime trasmission par gaelic dal Parlament di Stormont

Ai 14 di Març si à vude la prime trasmission radiofoniche par gaelic dal Parlament nordirlandês. Si è tratât di dôs oris di trasmission su Raidió Fáilte, emitente radiofoniche in lenghe irlandese nassude intal 2006. Al centri de direte radio e je stade la campagne “Líofa 2015” che e ponte a sburtâ la cognossince e l’ûs dal gaelic irlandês. A intervignî inte trasmission a son stâts ancje la ministre pe culture Carál Ní Chuilín e il sindic di Béal Feirste / Belfast, Niall Ó Donnghaile. Pai protagoniscj si à tratât di une zornade storiche sei pe lenghe gaeliche in Irlande dal Nord, sei pal Parlament di Stormont, par agns simbul di setarisim cuintri di ogni aspiet leât ae identitât irlandese, a tacâ propit de lenghe.

Font: Gaelport, 14/03/12

Romanie: gnovis azions a pro des minorancis

Il guvier rumen al à comunicât la sô intenzion di inviâ dôs azions par facilitâ l’acès des minorancis ae educazion. Su sburt de UDMR (Union Democratiche Magjare in Romanie) al à decidût di vierzi une facoltât di medisine in lenghe ongjarese inte citât di Marasovasarhely / Targu Mures, une des areis là che la comunitât magjare e je plui numerose. In Romanie i ongjarês a son plui di un milion e 200 mil, ven a dî il 6,5% de popolazion totâl. Chê altre misure decidude dal esecutîf rumen e je la nassite dal prin istitût superiôr di Bucarest pai rom. Daûr dai dâts uficiâi i rom rumens a saressin 650 mil, ma daûr di stimis plui dongje de realtât a saressin almancul il dopli. La gnove e je stade cjapade in maniere positive des organizazions impegnadis pai dirits dai rom, ancje se par un judizi precîs a spietin di vê plui informazions su cemût che e sarà organizade la struture.

Font: Balkan Insight, 14/03/12

Serbie - Cossovo: scuintri su lis elezions aministrativis

La Serbie e à decidût di cjapâ dentri ancje il Cossovo intai teritoris là che ai 6 di Mai si davuelzaran lis elezions aministrativis. Un tant par vie che la Costituzion serbe dal 2006 e calcole il Cossovo tant che part dal teritori statâl e che la risoluzion ONU che e veve autorizât la presince di trupis internazionâls inte aree a maiorance albanese no prejudicave, di un pont di viste formâl, la sovranitât serbe. La decision e ven duncje incuintri ae posizion de comunitât serbe che e vîf ancjemò in Cossovo, ma e crearà diviers problemis ae Serbie intal so percors par jentrâ inte Union Europeane. Il svilup di relazions diplomatichis normâls cul Cossovo e je di fat une des condizions metudis des autoritâts europeanis par cjapâ dentri la Serbie te Union. L’esecutîf cossovan al à za protestât a nivel internazionâl pe decision dal guvier di Belgrât e al à fat savê di calcolâ di ilegâls chestis elezions.

Font: Balkan Insight, 13-14/03/12

Gales: a coventin plui invistiments pal galês

L’Ufici pe lenghe galese, che al sierarà la sô ativitât dentri de fin dal mês par trasferî lis sôs competencis part a di un comissari pe lenghe e part al guvier galês, al à invidât l’esecutîf a incressi in maniere graduâl i invistiments su la lenghe. Par evitâ pas indaûr inte politiche linguistiche si calcole che, tal zîr di cinc agns, si vedi di rivâ a puartâ lis risorsis disponibilis tor dai 20 milions di sterlinis. Si trate di invistiments che a varessin di coventâ massime par creâ gnûfs puescj di lavôr intes areis là che il galês al è ancjemò la lenghe doprade de maiorance de int. Un tant par cirî di mantignî sul puest ducj chei zovins che a sbandonin chestis areis par cirî un puest di vore in lûcs là che dispès no àn plui la pussibilitât di mantignî la lenghe. Il dispopolament dai teritoris là che il galês al è plui vîf al è di fat une des menacis plui fuartis pal avignî de lenghe.

Font: Wales Online, 12/03/12

Galizie: centenârs di events di promozion de lenghe cun “FalaRedes”

Ta chestis zornadis l’assessorât galizian pe culture e pe educazion al à presentât il progjet “FalaRedes” che, dilunc vie dal an, al previôt uns 250 apontaments intes localitâts che a fasin part de rêt dai ents locâi impegnâts intal promovi la lenghe proprie de Galizie. Il bacin potenziâl di chestis iniziativis al è di 750 mil personis, ven a dî plui di un cuart de popolazion galiziane. L’intindiment dal progjet al è chel di creâ dai spazis par imparâ e par doprâ il galizian cul infuartî l’ûs de lenghe framieç di chei che za le fevelin e cul ufrî modei par doprâle a chei che ancjemò no le fevelin. I apontaments, che a saran ducj sore nuie, a son di trê gjenars. Si trate di proiezions di curtmetraçs dedicâts massime ai fruts tra i 6 e i 12 agns. Si varà po un contestoriis che al zire pai paîs compagnât di un ilustradôr. Pai fantats tra i 13 e i 17 agns, invezit, si à pensât a apontaments là che a podaran scrivi tescj di cjançons compagnâts, tant che mestri di ecezion, di un dai rappers galizians plui innomenâts.

Font: Xunta de Galicia, 12/03/12

Paîs Basc: azions a pro de lenghe basche in Navare

La convergjence tra Bildu, NafarroaBai, Izquierda-Ezkerra e Partît Socialist de Navare e à permetût di svilupâ dôs iniziativis a pro de lenghe basche. Intal Comun di Iruñea / Pamplona e je stade fate buine une risoluzion che e impegne la aministrazion comunâl a intervignî par garantî che il basc al sedi presint cu la stesse dignitât dal spagnûl su lis tabelis stradâls e su la cartelonistiche publiche de citât. Intal Parlament de Navare, invezit, lis stessis fuarcis politichis a àn votât a pro di une mozion che e domande al guvier de comunitât autonome di proviodi par che, cui che lu domande, al puedi vê la cjarte di identitât e la patente di vuide no dome par spagnûl, ma ancje par basc.

Font: Diario de Navarra, 09 e 14/03/12

Paîs Basc: inte CAB al cres l’ûs dal euskara

Inte Comunitât Autonome Basche il 32% des personis cun plui di 16 agns e je in stât di fevelâ sei par basc che par spagnûl, intant che il 17,2% si cjate intune situazion di bilinguisim passîf, ven a dî e capìs l’euskara ma no lu fevele. Si trate di plui o mancul 600 mil personis, o sei 180 mil in plui di vincj agns indaûr. Al è il dât principâl che al ven fûr de cuinte inchieste sociolinguistiche che e cjape dentri ducj i teritoris che a formin Euskal Herria, ancje se par cumò i unics risultâts comunicâts a son chei che a interessin la CAB. Par savê cuale che e je la situazion in Navare e inte part setentrionâl dal Paîs Basc, ven a dî chê cjapade dentri intal stât francês, si varà invezit di spietâ ancjemò cualchi mês. Rispiet al 1991, la incressite plui significative di personis bilengâls si le à vude inte provincie di Araba, ma chê là che l’euskara al è fevelât di plui e je la Gipuzkoa (cuasi il 50% di bilinguis atîfs e plui dal 16% di passîfs). A dimostrazion dai risultâts positîfs de politiche linguistiche puartade indenant ta chescj agns, la fasse di etât là che la lenghe e je plui fevelade e je chê dai fantats jenfri i 16 e i 24 agns. Daûr de inchieste al ven fûr che uns 20% de popolazion al dopre l’euskara in maniere continuative e che la lenghe e je simpri plui doprade in setôrs tant che i servizis sanitaris e chei comunâi.

Font: Noticias de Gipuzkoa, 08/03/12

Paîs Catalans: nassude la Assemblee Nazionâl Catalane

Ai 10 di Març, intal Palau Sant Jordi di Barcelone denant di un public di sù par jù 7 mil personis, e je nassude la Assemblee Nazionâl Catalane. L’obietîf principâl di chest gnûf sogjet al è chel di slargjâ il consens pe indipendence framieç dai catalans e di rivâ, dentri dal 2014, a celebrâ un referendum pe autodeterminazion de Catalogne. Daûr dal statût che si è dade, la Assemblee Nazionâl Catalane e ponte a jessi une organizazion trasversâl e no un gnûf partît politic e, par chest, e à decidût che no podarà presentâsi aes elezions. Ae sô nassite però a jerin presints ancje i rapresentants di diviers partîts politics (Solidaritat, ERC, CDC, UDC) che a àn mostrât di jessi a pro o atents ae opzion de indipendence.

Paîs Basc: ETA e domande al guvier francês di partecipâ al procès di pâs

A distance di cuatri mês de fin de lote armade, ETA e à domandât al guvier francês di no gjavâsi fûr des responsabilitâts intal conflit basc e di inviâ des tratativis par risolvi lis cuistions che a son su la taule, a tacâ di chê dai presonîrs. Pocjis zornadis prime, intant di une visite intal Paîs Basc setentrionâl, il president francês, Nicolas Sarkozy, si veve mostrât disponibil a misuris distensivis tant che il svicinament dai presonîrs bascs ai lôr lûcs di divignince, ma la politiche francese e à simpri cirût di sbolognâ il conflit basc tant che un probleme dut “spagnûl”. Une linie che e je confermade ancje dal fat che, par cumò, la uniche rispueste al messaç di ETA e je rivade dal ministeri francês pai forescj che al à declarât di no vê in man nissune propueste uficiâl. ETA e ricuarde però che no dome une part dal Paîs Basc e je cjapade dentri intal stât francês, ma ancje che la France e à contribuît in maniere ative aes azions cuintri dal moviment armât basc e che intes presons francesis a son 140 presonîrs politics bascs. Un apel al guvier di Parîs par che al vierzi un confront sul superament dal conflit al jere rivât ancje intant de conference stampe tignude ai 9 di Març dai rapresentants de çampe indipendentiste basche e di Eusko Alkartasuna, Aralar e Alternatiba.

Font: Gara, 09-10/03/12; Avui, 10/03/12

Paîs Basc: procès di pâs, delusion pes propuestis dal lehendakari

La gnove clime politiche che si respire intal Paîs Basc dopo de fin de lote armade decidude di ETA e oblee dutis lis fuarcis politichis a fâ indenant des propuestis par superâ lis causis che a àn puartât al conflit e i siei efiets su la societât basche. Par chest e jere gruesse la spiete pes declarazions che il lehendakari, o sei il president dal guvier de Comunitât Autonome Basche, il socialist Patxi López, al varès fat ai 8 di Març denant dal Parlament de Comunitât. Ae fin dal so intervent però, la plui part des reazions e je stade di delusion.

Italie: pas indenant pe ratifiche de Cjarte europeane des lenghis

Inte riunion dai 9 di Març il Consei dai ministris talian al à fat bon il disen di leç pe ratifiche de Cjarte europeane des lenghis regjonâls o minoritariis, document che la Italie e veve firmât agns indaûr cence mai ratificâlu. Pai membris dal guvier vuidât di Mario Monti i contignûts de leç statâl 482 dal 1999, che e previôt misuris di tutele par dodis lenghis di minorance ricognossudis in maniere uficiâl, a son suficients par permeti ae Italie di ratificâ la Cjarte. In spiete che il Parlament talian al dedi il so vie libare al proviodiment, i prins coments che a rivin des comunitâts minorizadis a son positîfs, ancje se si ricuarde che chest passaç al è dibant se po si tain lis risorsis par meti in vore la leç 482 come che al à fat propit il guvier Monti.

Font: Consiglio dei Ministri, 09/03/12; Comitât 482, 10/03/12

Paîs Catalans: il model scolastic imersîf in tribunâl

Il model di insegnament a imersion in vore intal principât de Catalogne si cjate a vê di frontâ l’esam dai tribunâi. Dut al jere partît de denuncie dai gjenitôrs di trê fruts che a domandavin che pai lôr fîs si dopràs il spagnûl e no il catalan tant che lenghe veicolâr a scuele. Ai 8 di Març il tribunâl superiôr di justizie de Catalogne al à ricognossût la pussibilitât di ameti ecezions al model di insegnament par catalan par cui che lu domande. Si trate però di une sentence che e fronte un câs specific, cence meti in discussion il model scolastic catalan. La decision de cort catalane no je però plasude aes fameis che a vevin inviât la cause e che a àn decidût di presentâ ricors denant dal tribunâl suprem spagnûl.

Scozie: sierade la consultazion publiche di Londre sul referendum

Ai 9 di Març si è sierade la consultazion publiche inviade dal guvier britanic in mert al referendum su la autodeterminazion de Scozie. Cun cheste iniziative, l’esecutîf vuidât di David Cameron al veve chê di sintî la opinion dai citadins e dai diviers sogjets interessâts su cuatri ponts, ven a dî: la date miôr par tignî il referendum, cui che al varès di viodi de organizazion dal vôt, cui che al pues votâ e ce domande meti te schede. Di Londre no je rivade inmò nissune declarazion su cemût che e je lade la consultazion e si sa dome che i risultâts a saran comunicâts ca di cualchi setemane.

Bretagne: campagne par vê Facebook par breton

Ai 4 di Març e je stade inviade une campagne internazionâl par sburtâ i gjestôrs di Facebook a zontâ ancje il breton tra lis lenghis che la interface di cheste rêt di comunicazion sociâl e je disponibile. In nancje trê dîs lis adesions a jerin stadis plui di 5 mil, ma il numar al è daûr a cressi zornade dopo zornade. Daûr de iniziative a son l’Ufici de lenghe bretone e Yves-Marie Derbré, un student che za si veve fat notâ pal so impegn pe version par breton di Wikipedia.

Font: Agence Bretagne Presse, 08/03/12

Asturiis: invît a doprâ l’asturian ancje pe campagne eletorâl

La organizazion Iniciativa pol Asturianu e à invidât dutis lis formazions politichis che a parteciparan aes elezions autonomichis dai 25 di Març a doprâ la lenghe proprie des Asturiis ancje pe lôr campagne eletorâl. L’asturian al è un patrimoni di ducj i citadins di cheste comunitât e al è duncje impuartant che i partîts lu doprin intai lôr intervents par radio, par television, sui gjornâi, su lis rêts sociâls, sui manifescj e ancje intant dai comizis. La organizazion e à ancje domandât aes formazions politichis di impegnâsi par ricognossi al asturian un statût di uficialitât dentri de comunitât autonome.

Font: La Voz de Asturias, 08/03/12

Macedonie: domandâts nons albanês pes viis di Skopje

Lis autoritâts di Skopje, capitâl de Macedonie, a àn tacât l’esam des propuestis fatis indenant dai doi principâi partîts albanês (la Union Democratiche pe Integrazion, che e fâs part de coalizion di guvier, e il Partît Democratic dai Albanês, che al è ae oposizion) par che il non di une cincuantine di stradis de citât al vegni dedicât a personaçs o a sîts impuartants pe comunitât albanese, tant che l’eroi nazionâl Skanderbeg o il scritôr Ismail Kadare. Il cambiament dai nons al jentrarès intun procès plui larc che al ponte a mudâ la viere mape dai nons de citât che in buine part e rimonte ancjemò ai agns che la Macedonie e jere part de federazion jugoslave. Lis autoritâts di Skopje a somein prontis a doprâ nons di personaçs albanês, pûr che a vedin un valôr positîf ancje pai macedons.

Font: Balkan Insight, 05/03/12

Bretagne: proteste pe segnaletiche bilengâl, un militant fermât

Al è zaromai di agns che il coletîf breton Aï’ta Trégor al inmanee azions di proteste cuintri di chês aziendis che a davuelzin ativitâts di utilitât publiche, ma che a ufrissin i lôr servizis dome par francês. Intant de ultime azion, metude in at alì dal ufici des puestis di Gwengamp / Guingamp, un dai militants al è stât puartât vie a fuarce de polizie e tignût in stât di fer par une ore. La rispueste de polizie e je stade judicade dal dut disproporzionade sei de bande dal moviment indipendentist Breizhistance, sei dal plui moderât Parti Breton. Il zovin fermât di fat al veve la uniche colpe di vê tacât adesîfs cu la scrite “ancje par breton”. Sei lui che chei altris membris dal coletîf a son stâts denunciâts par dams. Par Breizhistance e pal Parti Breton lis azions di Aï’ta Trégor no puartin nissun dam, ma a son la testemoneance di une rivendicazion plui che juste. La pueste di Gwengamp e jere stade metude a puest di pôc, ma cundut des domandis fatis indenant, lis scritis pal public a jerin restadis dome par francês.

Font: Le Télégramme, 04/03/12; Ouest France, 04/03/12; Agence Bretagne Presse, 07/03/12

Gales: presentât il gnûf plan di politiche linguistiche

Il guvier galês al è presentât un gnûf plan di politiche linguistiche. Al centri de strategjie dal esecutîf a son lis azions par sburtâ i galês a doprâ la lôr lenghe inte vite di ogni dì, dentri de famee, sul lavôr e intai rapuarts sociâi. Tra i obietîfs che il plan al vûl otignî al è chel di incressi lis ocasions pal ûs cuotidian de lenghe, par esempli cul potenziâ la sô presince intes rêts di comunicazion sociâl, ma ancje cul sostignî ancje lis personis che no àn une competence plene de lenghe e cul sburtâ i gjenitôrs a fevelâ ai lôr fîs par galês. L’Ufici pe lenghe galese al è stât sostituît di un comissari pe lenghe che al à il podê di fâ doprâ la lenghe no dome tai uficis publics, ma ancje tes compagniis a capitâl public e ta chês che a garantissin servizis di utilitât publiche. Ancje i gjestôrs telefonics e lis bancjis a saran sburtâts a ufrî i lôr servizis par galês. Lis reazions dai partîts a chest plan a son stadis avonde positivis, ma la Societât pe Lenghe Galese (Cymdeithas yr Iaith Gymraeg) e à comentât che par che il plan al deventi realtât al à di jessi compagnât sei de volontât politiche, sei di risorsis suficientis.

Font: BBC, 01/03/12