Ai 10 di Març, intal Palau Sant Jordi di
Barcelone denant di un public di sù par jù 7 mil personis, e je nassude la
Assemblee Nazionâl Catalane. L’obietîf principâl di chest gnûf sogjet al è chel
di slargjâ il consens pe indipendence framieç dai catalans e di rivâ, dentri
dal 2014, a celebrâ un referendum pe autodeterminazion de Catalogne. Daûr dal
statût che si è dade, la Assemblee Nazionâl Catalane e ponte a jessi une
organizazion trasversâl e no un gnûf partît politic e, par chest, e à decidût
che no podarà presentâsi aes elezions. Ae sô nassite però a jerin presints
ancje i rapresentants di diviers partîts politics (Solidaritat, ERC, CDC, UDC)
che a àn mostrât di jessi a pro o atents ae opzion de indipendence.
Il 2012, in
plui dai apontaments che a coventin par decidi lis incarghis dentri dal
moviment, la Assemblee Nazionâl Catalane e previôt di organizâ des colonis che
a scjavaçaran la Catalogne par sensibilizâ la int sul teme de indipendence e
che po a pontaran su Barcelone dulà che a parteciparan, ai 11 di Setembar, aes
celebrazions pe fieste nazionâl catalane. Il 2013 al varès invezit di viodi la
nassite de Associazion dai Comuns pe Indipendence che po, adun cu la azion dai
partîts che si impegnaran su chest front, e varès di puartâ intal 2014 al
referendum su la indipendence catalane. In câs di risultât positîf, la strade e
sarès po chê de secession unilaterâl sul model dal Cossovo. In dì di vuê i
catalans che a declarin che a votaressin pe indipendence a son il 44,6%,
cuintri di un 24,7% di contraris. Se la bataie si zuie massime su chei che no
àn ancjemò lis ideis claris, al è ancje di dî che in câs di referendum, là che
a valê a son dome sì e no, la percentuâl di favorevui ae indipendence e sarès
maioritarie. Cun di plui, intai ultins agns, al è cressût il numar di personis
– ancje tra chês che a àn o a àn vût un pês istituzionâl significatîf – che a
calcolin di insucès il model des autonomiis dal stât spagnûl e che a viodin
come uniche soluzion chê de indipendence.
Font: Avui, 10-11/03/12;
Gara, 10/03/12
Nessun commento:
Posta un commento