Il model di insegnament a imersion in
vore intal principât de Catalogne si cjate a vê di frontâ l’esam dai tribunâi.
Dut al jere partît de denuncie dai gjenitôrs di trê fruts che a domandavin che
pai lôr fîs si dopràs il spagnûl e no il catalan tant che lenghe veicolâr a
scuele. Ai 8 di Març il tribunâl superiôr di justizie de Catalogne al à
ricognossût la pussibilitât di ameti ecezions al model di insegnament par
catalan par cui che lu domande. Si trate però di une sentence che e fronte un
câs specific, cence meti in discussion il model scolastic catalan. La decision
de cort catalane no je però plasude aes fameis che a vevin inviât la cause e
che a àn decidût di presentâ ricors denant dal tribunâl suprem spagnûl.
Se pe
plui part dai partîts catalans la sentence dal tribunâl superiôr di justizie de
Catalogne e jere stade lete in clâf positive, propit par vie che no rapresentave
une menace pal model scolastic in vore inte comunitât autonome, cumò la
preocupazion e je plui fuarte pe decision che al cjaparà il tribunâl suprem
spagnûl che plui di une volte al à dât fûr sentencis che a proponin une leture
limitative de autonomie catalane. La assessore pe scuele, Irene Rigau
(Convergència Democràtica de Catalunya), e bat però sul fat che lenghe e
educazion a son competencis de Catalogne che no puedin jessi metudis in
discussion di un tribunâl spagnûl. Cun di plui, e zonte la Rigau, ancje il
tribunâl suprem al scugne esprimisi sul câs specific e nol pues intervignî par
modificâ la leç sul insegnament e, di chê strade, il model scolastic a imersion
che al è in vore in Catalogne. La assessore e ricuarde ancje che, cui che lu
domande, al pues za vê un percors scolastic particolâr là che il spagnûl al à
un pês maioritari, ancje se in dì di vuê a domandâlu al è mancul dal 2% dai
gjenitôrs.
Font: Avui, 08-11/03/12;
Vilaweb, 08/03/12
Nessun commento:
Posta un commento