Sud Tirôl: la SVP e piert la maiorance assolude

Domenie ai 27 do Otubar si son davueltis lis elezions pe Provincie Autonome di Bolzan e, pe prime volte di almancul cincuante agns incà, la SVP (Südtiroler Volkspartei) e à pierdût la maiorance assolude intal consei provinciâl. Cul 45,7% dai vôts, di fat, il partît di riferiment de comunitât sudtirolese al à otignût 17 elets, un in mancul des elezions stadis e un in mancul di ce che i coventave par vê la maiorance assolude. A gjavâi vôts e consens a son stâts massime i doi partîts de diestre sudtirolese, ven a dî Die Freiheitlichen che a àn vût il 17,9% des preferencis e 6 elets (un in plui de volte stade) e la Süd-Tiroler Freiheit cul 7,2% des preferencis e 3 elets (un in plui de volte stade). Di marcâ che, massime chest ultin partît, al è impegnât intune bataie pe indipendence sudtirolese che e previôt ancje dai referendums locâi pe autodeterminazion daûr dal model catalan.
Tierce fuarce par numar di vôts e ancje jê in cressite e je la liste dai Verts (Verdi - Grüne - Verc - SEL) che e à cjapât il 8,7% dai vôts e 3 conseîrs (un in plui de volte stade). A completâ il cuadri des listis di stamp autonomist, indipendentist o nazionalitari o vin po la coalizion Bündnis BürgerUnion - Ladins Dolomites - Wir Südtiroler che e à confermât un elet, ma e à vût di fermâsi al 2,1% dai vôts. Par chel che al rivuarde invezit i partîts talians, il PD al à otignût il 6,7% dai vôts e 2 conseîrs intant che la diestre e je colassade cun percentuâls che no passin il 2,5% e un totâl di a pene 3 elets: un par Forza Alto Adige e Lega Nord, un pal MoVimento 5 Stelle e un pe liste L’Alto Adige nel cuore. Intai comuns di lenghe ladine, ancje se in calâ, il partît plui votât al reste la SVP. La sielte di Ladins Dolomites di cori in aleance cun altris partîts no à invezit paiât e la liste e à cjapât sì e no il 10% dai vôts, superade di plui dal 5% dai Freiheitlichen.

Font: Autonome Provinz Bozen Südtirol, 28/10/13