07/08/12

Stât spagnûl: lis organizazions pro saharawi no acetin di ritirâsi

La maiorance des associazions dal stât spagnûl che a son ativis cui lôr volontaris intai cjamps di sfolâts saharawi inte aree di Tinduf (Alzerie) a àn comunicât che no intindin di ritirâ i cooperants cemût che ur domandave il guvier di Madrid. La decision dal esecutîf vuidât di Mariano Rajoy (PP) e je leade ae vicende di trê cooperants – un catalan, une spagnole e une sarde – che a jerin stâts secuestrâts di milizians fondamentaliscj intant che a jerin daûr a judâ lis popolazions saharawi intai cjamps di profugance alzerins e che a son stâts po liberâts ai 18 di Lui.
Par trop che chê aree e sedi malsigure, a àn dite i rapresentants des associazions pro saharawi, no pues jessi la justificazion par cedi ai ricats e par bandonâ disinis di miârs di sfolâts che a àn dibisugne dal jutori internazionâl. Cun di plui, dopo dal secuestri, lis autoritâts de Republiche Arabe Saharawi Democratiche in esili a àn incressût lis misuris di sigurece par difindi i volontaris. Invezit di sburtâ par che i cooperants a sedin ritirâts, a àn zontât lis organizazions pro saharawi, il guvier spagnûl al varès di ativâsi par une azion politiche e diplomatiche che e meti fin ae situazion di injustizie che il popul saharawi al vîf di passe 35 agns, dantji la pussibilitât di esercitâ il so dirit ae autodeterminazion e metint fin ae ocupazion marochine dal Sahara Ocidentâl. Une azion là che la Spagne e varès di davuelzi une funzion di prin plan, propit tant che ex colonizadore di chel teritori e responsabile di no vê garantît ae popolazion dal Sahara Ocidentâl la pussibilitât di decidi di bessole dal so avignî.
Font: Naiz:, 28/07/12

Nessun commento: