Al sarà timp fintremai i 28 di Avrîl, cuant che il test al sarà votât dal Parlament de Catalogne, par mendâ la propueste di riforme de leç di politiche linguistiche dal 1998 che e jere stade concuardade ai 24 di Març di ERC, Junts per Catalunya – partîts che a rapresentin la maiorance di guvier –, PSC e En Comú Podem. Un tant al è stât decidût dopo che Junts per Catalunya, la sere stesse dal acuardi, al veve cambiât la sô posizion domandant di riviodi il test par rivâ a di un consens plui larc framieç dai citadins. Cun chê di rispietâ la sentence dal tribunâl superiôr di justizie che e modifiche il sisteme scolastic a imersion de Catalogne imponint un 25% di insegnament par castilian, lis cuatri fuarcis politichis a vevin concuardât une propueste di leç che e ricognòs ancje il castilian tant che lenghe veicolâr dongje dal catalan e che i lasse ai singui centris educatîfs di decidi in autonomie i progjets linguistics che a àn di aplicâ chest indreçament.
A pene rindût public, il test al veve discjadenât la proteste des organizazions pe lenghe e di cetancj sogjets che ta chescj mês a vevin animât iniziativis e mobilitazions par difindi il sisteme scolastic imersîf par catalan. Une proteste che si è concretizade tun manifest public sotscrit di scritôrs, professôrs, artiscj, gjornaliscj, ativiscj pe lenghe e personalitâts che a difindin il sisteme scolastic imersîf par catalan e a domandin di no cedi denant dai atacs judiziaris cuintri di un model che al favorìs la coesion sociâl e al è poiât de maiorance de societât catalane. Une proteste che e à cjapât ancje la place cu la partecipazion di diviers miârs di personis ae manifestazion convocade ai 2 di Avrîl a Barcelone di un trop di sindacâts de scuele (USTEC-STEs, Intersindical, CGT, COS, Sindicat d’Estudiants dels Països Catalans, Associacions Federades de Famílies d’Alumnes de Catalunya) e sostignude ancje in altris citâts dai Paîs Catalans, tant che Palma, Perpinyà / Perpignan e València, là che lis manifestazions a rivendichin il dirit a vivi ad in plen par catalan.
Nessun commento:
Posta un commento