Dut il marum e la frustrazion che a montavin za di timp in Corsiche pal dinei des istituzions francesis a frontâ lis rivendicazions puartadis indenant de maiorance nazionalitarie chi di sîs agns incà e guvierne la isule, a son sclopâts cun violence dopo dal tentatîf di sassinament cuintri dal militant indipendentist Yvan Colonna te preson di Arle / Arles.
Acusât di vê partecipât al atentât mortâl cuintri dal prefet Claude Erignac intal 1998, Colonna – che si veve simpri declarât inocent par chel fat di sanc – si cjatave zaromai di agns impresonât in regjim di DPS (détenu particulièrement signalé) o sei chel di massime sigurece. Compagn di chei altris doi militants cors acusâts dal sassinament dal prefet, Pierre Alessandri e Alain Ferrandi, al veve bielzà scontât avonde agns di preson di vê dirit a saltâ fûr dal regjim di massime sigurece e di jessi trasferît intune preson corse. Cundut de poie massive che cheste domande e cjatave framieç des istituzions e de popolazion corse, il guvier di Parîs si veve simpri oponût a gjavâur dal regjim di DPS e a trasferîju su la isule. La agression che lu à ridusût a di un stât di muart cerebrâl e à duncje jevât une onde di indignazion framieç dai cors no dome parcè che no si capìs cemût che un presonîr sot control speciâl al vedi podût jessi svicinât di un altri presonîr in regjim di DPS e pacât a muart par cuindis minûts cence l’intervent des vuardiis ma soredut parcè che, se e fos stade rispietade la leç francese, nol varès vût di cjatâsi ta chês cundizions e ta chê preson.
Protagoniscj e animadôrs des protestis su la isule dopo de agression a Yvan Colonna a son stâts i zovins, a partî dai membris des trê organizazions nazionalitariis Ghjuventu Paolina, Consulta di a Ghjuventu Corsa e Ghjuventu Independentista. Domenie ai 6 di Març uns 15 mil personis a àn animât une manifestazion di proteste pes stradis di Corti / Corte, la plui grande viodude di cetancj agns incà, sfilant daûr dal strisson «Statu francese assassinu». Dopo de fin de iniziative grups di manifestants, soredut zovins, si son scuintrâts par dôs oris cu la polizie e si àn vudis disinis di ferîts. La setemane seguitive e je stade segnade di gnovis manifestazions animadis dai students e dal bloc di diviers istitûts superiôrs a Aiacciu / Ajaccio, Bastia, Calvi, Portivechju / Porto-Vecchio e altris localitâts de isule. I presidis, lis manifestazions e i scuintris cu la polizie a son continuâts dilunc vie de setemane massime dongje des prefeturis e des sedis des istituzions statâls su la isule causant ferîts e dams. Par coordenâ la mobilitazion e decidi i pas seguitîfs, ai 9 di Març al è nassût un coletîf che, dongje des trê organizazions zovanîls, al à metût adun ducj i moviments politics de galassie nazionalitarie (Femu a Corsica, Core in Fronte, Corsica Libera, PNC, Eculugia Sulidaria), lis associazions pal jutori ai presonîrs e aes lôr fameis, diviers sindacâts e altris organizazions militantis. La unitât dal mont nazionalitari cors e je stade fate ator di trê rivendicazions: veretât e justizie par Yvan Colonna, libertât pai presonîrs e ricognossiment dal popul cors.
Cheste mobilitazion massive, intune cu lis violencis sclopadis su la isule, a àn puartât lis istituzions francesis a movi cualchi pas par cirî di cuietâ la situazion. Il prin ministri francês Jean Castex al à contatât il president dal esecutîf cors Gilles Simeoni par inviâ un dialic, al à sigurât une investigazion atente su la agression a Colonna e al à decidût di gjavâi sei a lui che a Alessandri e Ferrandi il regjim di DPS, passaç obleât par permeti plui innà il lôr trasferiment in Corsiche. Decisions calcoladis des fuarcis nazionalitaris juste tant che un prin pas, in spiete di un confront complessîf su lis rivendicazions fatis indenant. Cun marum, in diviers a àn comentât che si à otignût di plui di Parîs cuntune setemane di protestis di place e di violencis che no cun sîs agns di confront istituzionâl e mobilitazions democratichis. Il president francês Emmanuel Macron al à invezit dât la incarghe al ministri pal interni, Gérald Dermanin, di confrontâsi cui elets e lis realtâts de societât civîl corse par cont dal stât. Une incarghe che si concretizarà cualchi dì dopo cuntune visite su la isule e une agjende fisse di apontaments sul puest jenfri i 16 e i 18 di Març. In spiete de visite, une gnove mobilitazion popolâr si à davuelte domenie ai 13 di Març a Bastia cun plui o mancul 10 mil personis in place e po cun scuintris dongje de prefeture lâts indenant par cinc oris, l’incedi de agjenzie des jentradis e disinis di ferîts. Iniziativis di proteste, a partî de ocupazion o dal bloc di diviersis scuelis superiôrs, a àn segnât ancje i prins dîs de setemane seguitive, ae vilie de visite dal ministri Dermanin.
Tai trê dîs de sô visite su la isule, l’inviât di Parîs al à incuintrât il president dal esecutîf cors Gilles Simeoni, i membris dal guvier e de Assemblee de Corsiche, i parlamentârs e chei altris elets isolans, rapresentants dal mont economic, associatîf e sociâl locâl, in plui dai rapresentants dal stât e des fuarcis di polizie che a operin inte isule. Cun Simeoni al è stât concuardât di sierâ la visite cuntun document scrit che al fisse i elements di fonde saltâts fûr intant dai incuintris. Dilunc vie de visite, di fat, a son stadis fatis diviersis vierziduris su lis rivendicazions corsis ma cence di un calendari e di impegns precîs de bande dal stât. Cence dismenteâ che, tal framieç, al è intervignût ancje il president francês Macron mostrantsi disponibil, di une bande, a frontâ il teme de autonomie de isule pûr dentri de suaze republicane francese e, di chê altre, sierant la puarte a ricognossi dirits diferents – tant che chel al bilinguisim – rispiet a chei dai citadins dal continent.
Nessun commento:
Posta un commento