Ai 27 di Jugn, il secont turni des elezions regjonâls intal stât francês al è stât segnât di une astension cence precedents (doi tierçs dai eletôrs a son restâts a cjase) e di risultâts negatîfs pai candidâts de estreme diestre (RN) e dal partît dal president Emmanuel Macron (LRM).
Sul front des comunitâts minorizadis, ancjemò une volte al è stât il nazionalisim cors a mostrâsi chel plui in salût. In Corsiche, di fat, trê dai cuatri candidâts che a vevin passât il prin turni, a fasin riferiment a cheste famee politiche. Cul 40,64% dai consens, l’autonomist Gilles Simeoni al è stât confermât ae vuide dal esecutîf cors, superant di vot ponts il candidât di diestre Laurent Marcangeli, unic rapresentant dal front unionist. Il prin al podarà fâ stât su 32 conseîrs inte Assemblee corse e il secont su 17. Par chel che al rivuarde chei altris doi candidâts de aree nazionaliste, Jaen-Christophe Angelini – espression dal PNC, che si presentave in aleance cui indipendentiscj di Corsica Libera restâts fûr dal secont turni par un pugn di vôts – al à cjapât il 15,07% des preferencis e 8 elets, intant che Paul-Félix Benedetti, candidât dai nazionaliscj radicâi di U Rinnovu, al à vût il 12,26% dai consens e 6 conseîrs.
Des trê grandis regjons che a cjapin dentri buine part de Ocitanie storiche, dôs a son restadis intes mans dai candidâts progressiscj e la tierce ta chês de diestre tradizionâl. In Gnove Aquitanie – regjon che e cjape dentri ancje il Paîs Basc setentrionâl – si à vude une conferme pal rapresentant de çampe moderade Alain Rousset, che al à otignût il 39,51% dai vôts. Confermade la presidente in scjadince ancje te regjon aministrative de Ocitanie (che e cjape dentri ancje la Catalogne Nord), Carole Delga, che – ae vuide di une coalizion progressiste – e à cjapât il 57,78% des preferencis. In Provence – Alps – Côte d’Azur, invezit, il rapresentant de diestre “tradizionâl” (LR) Renaud Muselier al à batût la candidade de estreme diestre (RN) che e jere calcolade ae vilie dal vôt come favoride. Al è di dî che ancje tes regjons de Ocitanie e de Gnove Aquitanie si stimave che i rapresentants dal RN a saressin stâts i plui votâts. Tal prin turni lis dôs listis che si presentavin in maniere esplicite come ocitanistis a àn vût pôc plui di un risultâts simbolic: Òc per Provença cul 2,2% e Bastir cul 0,76% dai vôts.
In Bretagne, cul 29,84% dai consens, i eletôrs a àn confermât ae vuide de regjon la çampe moderade rapresentade di Loïg Chesnais-Girard. Di segnalâ dut câs il risultât significatîf ancje pe aleance ecologjiste autonomiste vuidade di Claire Desmares-Poirrier che e à cjapât il 20,22% dai vôts e che e je determinante par garantî une maiorance inte Assemblee regjonâl.
Nessun commento:
Posta un commento