Paîs Catalans: indult parziâl par nûf leaders indipendentiscj

Ai 22 di Jugn il consei dai ministris spagnûl al à indultât nûf dirigjents dal indipendentisim catalan (Oriol Junqueras, Joaquim Forn, Jordi Turull, Josep Rull, Jordi Cuixart, Jordi Sànchez, Raül Romeva, Carme Forcadell e Dolors Bassa) condanâts pal rûl davuelt intal procès di autodeterminazion de Catalogne che al veve puartât al referendum dal prin di Otubar dal 2017. La misure e je individuâl, parziâl e reversibile, ven a dî che l’indult nol met in discussion lis sentencis di condane, al manten la inabilitazion a davuelzi incarghis publichis e, par un periodi variabil che al va dai 3 ai 6 agns, al condizione la jessude de preson ae proibizion di ripeti il “delit” che ju à puartâts ae condane. Come a dî che ogni ativitât politiche a pro de indipendence de Catalogne e riscje di tornâ a puartâju in galere. La decision – presentade dal prin ministri spagnûl Pedro Sánchez come une misure di “utilitât publiche” che e judarà a “vierzi une gnove tape di dialic” – e à jevât no pôc marum framieç de societât spagnole e no je plasude nancje in Catalogne là che si domande invezit une amnistie totâl par ducj i presonîrs politics e i esiliâts.

L’indult al è stât let ancje come une rispueste ae risoluzion fate buine a grande maiorance dal Consei de Europe là che si domande aes autoritâts spagnolis di bandonâ i procediments vierts cuintri des personis impegnadis intal procès pe autodeterminazion de Catalogne o in azions di solidarietât cui presonîrs, di rinunciâ ae persecuzion judiziarie dai esiliâts e di procedi a di une revision radicâl dai reâts di ribelion e di sedizion par impedî che si vedin condanis – judicadis dal dut disproporzionadis – come chês assegnadis ai nûf leaders indipendentiscj. La risoluzion dal Consei de Europe, che i parlamentârs dal PP e dal PSOE a àn cirût fin sul ultin di evitâ, si zonte a di une altre sconfite judiziarie sul plan internazionâl. In chest câs achì, il stât spagnûl al è stât condanât dal tribunâl european dai dirits umans pe condane a un an di preson assegnade al militant indipendentist basc Tasio Erkizia acusât di “apologjie dal terorisim” e vitime invezit de persecuzion politiche e judiziarie che di agns incà e colpìs i rapresentants dal indipendentisim basc.

Font: VilaWeb, 21-22/06/21; Naiz:, 21-22/06/21