Si
scugne lâ indaûr di plui di un secul par cjatâ te Catalogne dal
Nord une manifestazion cussì partecipade come chê dai 29 di Fevrâr
stâts. Cun di fat, tra lis 110 mil (dât de polizie francese) e lis
200 mil personis (pai organizadôrs) si son dadis adun a Perpinyà /
Perpignan par dâi il bon acet al president catalan in esili, Carles
Puigdemont, e ai ex membris dal so guvier Clara Ponsatí e Toni Comín
che, pe prime volte di cuant che la justizie spagnole e à dât fûr
cuintri di lôr dai mandâts di arest par vie dal lôr rûl intal
procès di autodeterminazion, in gracie de imunitât che a àn come
europarlamentârs a àn podût tornâ in Catalogne, ancje se dome te
sô part sot aministrazion francese. La iniziative e je stade
inmaneade dal Consell per la República
– struture rapresentative des istituzions catalanis in esili –
cul jutori di organizazions di aree indipendentiste tant che Òmnium
Cultural e ANC.
Tal so discors,
Puigdemont al à ricognossût che la strade di fâ e je ancjemò
lungje e al à invidât ducj a preparâsi cun determinazion pe lote
definitive e a superâ i erôrs, i dubis e lis debolecis dal passât.
Dome la Republiche – al à zontât – e pues meti fin a di un
regjim monarchic, erêt dal franchisim e alergjic ae catalanitât. Il
president in esili nol à dite une peraule su la taule di confront
tra i guviers catalan e spagnûl rivendicade come un risultât
impuartant di Oriol Junqueras, leader di ERC cumò in preson e
presint inte manifestazion di Perpinyà / Perpignan cuntun video
regjistrât. E je stade invezit une vore critiche cuintri di cheste
iniziative la ministre pe istruzion in esili Clara Ponsatí che e à
presentât la taule dome come un ingjan dal guvier spagnûl par
vuadagnâ timp. Fintremai che a saran indipendentiscj – e à dite –
la Spagne e rispuindarà cun repression, esili e preson. L’at al à
duncje palesât ancjemò une volte la distance che e je tra lis dôs
animis principâls dal indipendentisim catalan, cui moderâts di
Junts per Catalunya
a rapresentâ cumò la part plui dure e i socialdemocratics di ERC a
mostrâsi plui disponibii al dialic cun Madrid. La CUP –
rapresentative dal indipendentisim radicâl di çampe – no à
invezit partecipât al at.
Font:
VilaWeb,
29/03/20;
Naiz:, 29/03/20; Libération, 29/03/20
Nessun commento:
Posta un commento