Ai
29 di Fevrâr il president catalan in esili, Carles Puigdemont, e i
ex membris dal guvier Clara Ponsatí e Toni Comín a tornaran in
Catalogne, ma ta chê dal Nord sot aministrazion francese. I trê a
parteciparan a di une iniziative inmaneade dal Consell
per la República a Perpinyà /
Perpignan là che, in gracie de imunitât che a àn come
europarlamentârs, a puedin vignî cence jessi arestâts cemût che
invezit al sucedarès se a vessin di passâ la frontiere cul stât
spagnûl. I organizadôrs a stimin une partecipazion di almancul 80
mil personis, come a dî la plui grande manifestazion di place mai
viodude a Perpignan. Za une setemane prime in citât e tai paîs
dongje no si cjatave plui un puest par durmî e i biliets dai trens e
dai bus in servizi tra Catalogne dal Sud e dal Nord a jerin cuasi
esaurîts, intant che organizazions tant che l’ANC e l’Òmnium
Cultural a vevin jemplât di bessolis
uns cuatricent corieris.
Ai
22 di Fevrâr a Barcelone si à invezit presentade la gnove
plateforme Independentistes d’Esquerra
che si propon di promovi un progjet di liberazion nazionâl che al
vedi in Puigdemont il so referent e che al ledi a infuartî e a
integrâ la linie di azion metude in cjamp dal president in esili e
dal Consell per la República.
I organizadôrs di chest gnûf sogjet si proponin di superâ lis
divisions cressudis framieç dai partîts indipendentiscj e si
cjataran in assemblee ai 29 di Març par decidi miôr cemût procedi.
Tra i prins a sotscrivi il manifest di partence dai Independentistes
d’Esquerra a son personalitâts
espression de societât civîl (professôrs universitaris,
imprenditôrs, artiscj, sindacaliscj e v.i.) e nons storics de çampe
indipendentiste radicâl (ex militants dal PSAN, di Poble
Lliure e de CUP) o de aree progressiste
catalane (ERC, PSC, ICV, Compromís
e v.i.).
Font:
VilaWeb,
21-22/02/20;
Nació Digital, 22/02/20
Nessun commento:
Posta un commento