Romanie: miârs di ongjarês in marcje pe autonomie

A jerin miârs i ongjarês che ai 27 di Otubar a àn partecipât ae manifestazion par domandâ la nassite di une comunitât autonome pal Székelyföld, o sei la part de Transilvanie là che e vîf la plui part de minorance magjare de Romanie. I ongjarês a son sù par jù il 7% de popolazion de Romanie, a gjoldin di diviersis misuris di tutele linguistiche e culturâl, ma fin cumò no àn ancjemò rivât a otignî ni une leç organiche di tutele e di promozion linguistiche e nancje la nassite di une entitât aministrative che ur permeti di vê un ciert nivel di autoguvier. La manifestazion – une marcje che e à scjavaçât diviersis localitâts dal Székelyföld – e veve chê di sburtâ il guvier rumen a meti man ae cuistion e di riclamâ la atenzion internazionâl su cheste problematiche.
La Aleance Democratiche dai Ongjarês in Romanie (RMDSz), partît di riferiment de comunitât magjare che e vîf ta chest paîs, e à fat savê di jessi daûr a meti jù une propueste di leç pe autonomie dal Székelyföld, intant che il Consei Nazionâl Székely si è augurât che dopo de manifestazion si puedi inviâ in curt une discussion su la autonomie di cheste comunitât cul guvier rumen e cui partîts politics. Par cumò la uniche rispueste rivade dal prin ministri rumen Victor Ponta e je che la domande di autonomie de minorance ongjarese e sarà frontade daûr di ce che e previôt la costituzion rumene e la legjislazion europeane.

Font: Politics.hu, 28/10/13; Balkan Insight, 30/10/13