30/04/13

Paîs Basc: Aske Gunea, gnove resistence popolâr

La buinore dai 19 di Avrîl inte citât basche di Donostia la polizie e à vût bisugne di cuasi dusinte agjents e di plui di trê oris continuadis di intervent par rivâ a arestâ sîs dai vot fantats de organizazion zovanîl indipendentiste Segi condanâts dal tribunâl suprem spagnûl. Un tant al è sucedût par vie che centenârs di personis si son dadis dongje par formâ une sorte di mûr uman in difese dai zovins e il numar nol è stât plui alt dome par vie che cuant che al è stât dât l’alarm, tor sîs e mieze di buinore, tante int che e jere saltade fûr des cjasis par fâi cuintri al arest e à cjatât la aree dal Boulevard za isolade de polizie.
La resistence de int e je stade dal dut pacifiche e si è limitade al ûs dai cuarps tant che scût pai zovins, une vere muraie umane che e à resistût massime tun splaç batiât pe ocasion Aske Gunea, o sei “il pont libar”. Chel istès la polizie, dopo vê slontanât i gjornaliscj, e je intervignude in maniere brutâl in plui di une ocasion e si son contâts diviers ferîts. Ducj i partîts de çampe indipendentiste basche a àn condanât cun fuarce cheste azion de polizie e a àn domandât di meti fin ae persecuzion judiziarie cuintri des organizazions politichis baschis, ma a àn ancje marcât cemût che ce che si à viodût alì dal Aske Gunea al segni la nassite di une gnove stagjon di resistence popolâr no violente. Di dute altre ande invezit i coments dai partîts spagnoliscj.
Font: Gara, 20/04/13

Nessun commento: