Stât spagnûl: mancul libris par basc, catalan e galizian

Daûr dai ultins dâts su la produzion di libris intal stât spagnûl, comunicâts dal istitût statâl di statistiche, al ven fûr che i titui publicâts vie pal 2012 a son stâts pôc mancul di 70 mil, cuntune riduzion dal 6,2% rispiet al an prime. I doi centris editoriâi principâi a restin la aree di Madrid (32,8% dal totâl) e la Catalogne (26,9%). Sul front des lenghis minorizadis, ancje vie pal 2012, il catalan al conte il numar plui alt di titui publicâts, ven a dî 6.747, cundut di une diminuzion di cuasi il 30% rispiet al 2011. I libris par catalan a son il 28,3% di chei publicâts in Catalogne, il 18,7% di chei jessûts intal Paîs Valenzian, e fintremai il 43,9% di chei publicâts intes isulis Baleârs.
I titui jessûts l’an passât par galizian a son stâts invezit 1.322, o sei il 1,9% dal totâl, e ancje ta chest câs si viôt une riduzion di sù par jù il 30% rispiet al 2011. I libris par galizian a rapresentin in ogni câs il 45% di chei publicâts in Galizie. Inmò plui marcade, dilunc vie dal an passât, e je la diminuzion dai titui publicâts in lenghe basche che a son stâts in dut 837, o sei il 29,7% di chei jessûts inte Comunitât Autonome Basche e a pene il 6% di chei de Navare. Di segnalâ che, tra lis diviersis categoriis di tescj publicâts, chei par fruts a rapresentin il 27,6% de produzion par euskara, il 18% di chê par catalan, il 16,6% di chê par galizian e il 5,3% di chê par spagnûl.

Font: INE, 19/03/13