07/08/12

Corsiche: fatis buinis lis liniis di fonde pal svilup de isule

Dopo agns di dibatiments e di polemichis la Assemblee regjonâl corse e à fatis buinis a grande maiorance lis liniis di indreçament dal PADDUC, o sei il Plan plurienâl di svilup de Corsiche che al varès di vuidâ il svilup de isule pai prossims trente agns. Il progjet al à vût i trentenûf vôts a pro dai rapresentants de çampe e dai nazionaliscj cors; i dodis conseîrs di diestre a àn invezit sielzût la strade de astension.
Cun di fat, i contignûts e la metodologjie doprade par imbastî il document a àn cjatât la poie plene di trê dai cuatri grups de çampe (Démocrates socialistes et radicaux, Corse Social Démocrate e Front de Gauche), intant che il cuart (Gauche Républicaine) si à mostrât plui frêt massime su cierts passaçs che a àn cjatât invezit la condivision dai nazionaliscj moderâts di Femu a Corsica e di chei radicâi di Corsica Libera. A diestre, invezit, il document al è stât judicât masse di çampe e masse altermondialist, ancje se al è stât spiegât che tal moment dal vôt finâl a podaressin sielzi di no astignîsi. Intal test si fevele di svilup fondât su identitât, culture e ambient, di rindi couficiâl la lenghe corse, di favorî la produzion rispiet ae rendite, di ufrî alozaments par ducj, di garantî plui ecuilibri tra la part montane de isule e chê dal litorâl, e di sburtâ la solidarietât. Prime dal vie libare definitîf cumò si varà di passâ des liniis di indreçament ae scriture di un progjet che al fronti in detai ducj i temis jevâts.
Font: Alta Frequenza, 26-30/07/12; Corse Matin, 27-28/07/12

Nessun commento: