Trasferî i presonîrs bascs intes presons
plui dongje dal lôr paîs di divignince e aplicâ ancje par lôr la politiche
penitenziarie ordenarie; legalizâ Sortu e meti fin ae politiche di
ilegalizazion dai partîts politics e des organizazions indipendentistis
baschis; svilupâ une politiche di riconciliazion là che si vedi un
ricognossiment di dutis lis vitimis dal conflit; inviâ un dialic tra il guvier
spagnûl e ETA che al puarti ae fin de organizazion armade e al so disarmament;
meti in vore un dialic politic cence prejudiziâls e che al cjapi dentri ducj. A
son chescj i ponts di fonde dal manifest “Madrid – Donostia: pâs e democrazie
pal Paîs Basc” che al è stât presentât ai 19 di Avrîl inte capitâl spagnole.
A
sotscrivi chest document a son stadis 500 personalitâts dal stât spagnûl:
professôrs universitaris, avocats, economiscj, scritôrs e tancj altris che si
son dâts adun par invidâ il guvier di Madrid a saltâ fûr dal so imobilisim e a
impegnâsi par superâ il conflit che par agns al à segnât il Paîs Basc e i stâts
spagnûl e francês. I firmataris dal manifest a ricuardin che une part dai
sogjets interessâts e à za fat pas indenant impuartants come tal câs de gnove
linie inviade de çampe indipendentiste basche e de decision di ETA di meti fin
ae lote armade, intant che l’esecutîf spagnûl vuidât di Mariano Rajoy (PP) al è
restât fer. Come citadins spagnûi che “a amin la pâs, la libertât e la
democrazie” si son duncje sintûts in dovê di fâsi sintî ancje lôr par dimostrâ
che il superament dal conflit e il svilup di un procès pardabon democratic
intal Paîs Basc no je une cuistion che e interesse dome i bascs, ma ducj i
citadins spagnûi.
Font: Gara, 19/04/12
Nessun commento:
Posta un commento