16/05/12

Paîs Basc: presentazion dal “Impegn pe strategjie nazionâl…”

Ai 28 di Avrîl, a Irun, si à vût la firme e la presentazion al public di un document, batiât “Impegn pe strategjie nazionâl…”, sotscrit dai rapresentants de çampe indipendentiste basche, di Eusko Alkartasuna, Aralar, Alternatiba e Abertzaleen Batasuna. Il test al presente cinc obietîfs e cinc principis che chestis fuarcis politichis si impegnin a puartâ indenant adun par superâ il conflit politic e par fâ sù un Paîs Basc libar e solidari. Achì si propon la traduzion integrâl dal document.


JENTRADE

La Çampe indipendentiste, Eusko Alkartasuna, Alternatiba, Aralar e Abertzaleen Batasuna adun, o vin decidût di cjapâ un impegn fer e strategjic par meti adun lis nestris fuarcis tignint però la plu­ralitât sei tant che fonde che obietîf finâl; un impegn par dopleâ i nestris sfuarçs e jessi plui fuarts intal sburtâ la costruzion nazionâl e la trasformazion sociâl; un impegn cuntun obietîf clâr: rivâ a di un Paîs Basc, une Euskal Herria sovrane e solidarie, e cjapâ la strade par fâ sù une Euskal Herria fondade su la pâs, la libertât e la justizie.
O valutìn in maniere positive i cambiaments che si àn vûts intai ultins mês in Euskal Herria e la gnove stagjon politiche che si è inviade in gracie di chescj cambiaments. E o volìn dâi une rispueste positive. Par chest motîf o crodìn che e sedi rivade la ore, cul meti adun lis fuarcis, di sburtâ la costruzion nazionâl e la trasformazion sociâl, ma ancje di frontâ la crisi di sisteme che e colpìs a muart i dirits sociâi e dal lavôr dai citadins e dai lavoradôrs. E je ore di difindi i dirits individuâi e coletîfs des personis che a formin la societât, a partî de avualiance des oportunitâts, de atenzion e de tutele dal planete.
Si e je vere che la liberazion nazionâl si compagne cu la liberazion sociâl, inte situazion di crisi che o sin daûr a vivi, o vin di grampâsi cun plui fuarce di simpri a chest principi. Par chest o rivendichìn il leam e il pês des diviersis lotis.
O sin sigûrs che o superarìn i disacuardis e lis divisions che intai ultins agns si àn vûts tra lis diferentis fuarcis politichis, e che o vin la ocasion de meti adun une union salde di fuarcis indipendentistis e nazionalitaris, di çampe.
Tant che dimostrazion de nestre volontât politiche o volìn declarâ denant de societât basche il nestri impegn intal imbastî une strategjie nazionâl cul dialic e cul lavôr in comun tant che compagns di viaç.

I - OBIETîFS

1. Euskal Herria nazion sovrane in Europe
La Europe che o cognossìn si è struturade daûr des dibisugnis des élites finanziariis e des multinazionâls. Il sisteme neoliberist al profite di chest moment di crisi par cjapânus dentri ancjemò di plui inte sô strente. Lis consecuencis di chestis politichis su la costruzion de Europe a son stadis cetantis e une vore penzis.
Contrari di ce che si à fat fin cumò, si à di lotâ par une Europe sociâl che e rivendiche la sovranitât dai popui che le componin e che e poie chestis rivendicazions; une Europe che e difint la sô diversitât culturâl e che e imbastìs une educazion poiade su cheste diversitât; une Europe che, denant dal progjet centralist e neoliberist, e ponte invezit suntune Europe dai popui costruint un progjet alternatîf che al da prioritât al dirit di decidi dai popui e ae lôr sovranitât.
O rivendichìn il fat che Euskal Herria e je une nazion de Europe e dal mont, e o domandìn par nô chei stes dirits che a gjoldin chês altris nazions de Europe e dal mont, ni di plui ni di mancul, par cirî di disvilupâ un un gnûf model di Europe.

2. Pâs e dirits civîi e politics
O volìn viodi superât il conflit politic e la violence in Euskal Herria e, par rivâ a di un tant, o cjapìn tant che riferiments l’Acuardi di Gernika e lis conclusions de Conference di pâs di Aiete. Il dialic, un dialic cence esclusions, e l’acuardi a àn di jessi i principis che a regolin il procès. Un dialic inte­gradôr, che nol lassi fûr nissun; che al fasi deventâ i citadins protagoniscj, motôr e testemonis dal stes; un dialic che al permeti di costruî une pâs juste, cence vincidôrs ni vinçûts; che e ledi plui innà dai limits che a fissin vuê lis isti­tuzions e la suaze juridiche, e che al cjapi dentri ducj i teritoris che a formin Euskal Herria; un dialic che, su la fonde dai principis di Mitchell, nus indreci su la strade di un acuardi democratic.
O sigurìn l’impegn par sburtâ par une convivence che e partissi de avualiance e o sin daûr a lâ ta cheste direzion, cul lavorâ adun, ancjemò di cuant che si à firmât l’Acuardi di Gernika. O sin daûr a fâ dai pas indenant unilaterâi, però al è il moment che ancje chei altris sogjets cjapâts dentri tal procès a tachin a movisi, su la fonde di ce che si diseve ancje intes conclusions de Conference di pâs di Aiete.
I stâts spagnûl e francês no puedin lâ dilunc a fâ fente di no cognossi lis conclusions di Aiete. No puedin lâ indenant a movisi platâts daûr di leçs di ecezion che a tibiin dirits civîi e politics. Al covente un cambiament intes politichis penitenziariis dai stâts francês e spagnûl se a vuelin pardabon jessi considerâts dai stâts democratics. Chest cambiament al domande che a sedin metudis in libertât chês personis impresonadis che a àn malatiis seriis, che a puedin tornâ i dispatriâts e i depuartâts, che si meti fin ae dotrine Parot, che si riviodi la situazion di chei presonîrs che a àn finît la lôr condane, che si sieri cu la politiche de dispersion cul svicinâ al Paîs Basc lis personis impresonadis tant che prin pas par che i presonîrs e lis presoneris politichis a puedin tornâ cjase mostrant cussì il superament definitîf dal conflit armât.
Te stesse maniere al è urgjent che lis vitimis a sedin ricognossudis e tuteladis; dutis, cence ecezions. Un pas che al covente par ricognossi ducj i patiments e par cognossi dutis lis veretâts.
E je ore che dutis lis parts implicadis a tachin a fâ dai pas indenant. Chescj pas a àn di jessi fats ancje par chel che si riferìs ae normalizazion politiche cul garantî la legalizazion di dutis lis fuarcis e i sogjets politics, par che a sparissin dutis lis formis di violence.
Par chest, daûr de opinion des cinc fuarcis politichis che a firmin chest acuardi, come partîts o vin di dâ chest prin sburt pal dialic, un dialic che sedi bon di superâ i limits istituzionâi e aministratîfs, e che al sedi viert a dutis lis personis di Euskal Herria.

3. Un model economic sovran, just e ecologjic
Tancj dai problemis che vuê si cjatìn a patî – debolece, puaretât, disavualiance, cambiament climatic, e v.i. – a son la consecuence dal sisteme là che o vivìn, e nol è chest sisteme che al pues ufrî une soluzion ai problemis che al prodûs. Chest motîf nus puarte, plui che a proponi cambis intal sisteme, ae dibisugne di lavorâ sul so superament par mieç di alter­nativis veris e di intindi la economie tant che strument par garantî e meti in vore i dirits e no il contrari cemût che al sucêt in dì di vuê. Chest obietîf al compuarte la dibisugne di movisi tant che popul in Europe: la sovranitât e je sante scugne par podê meti in prin plan la solidarietât tra i popui.
O sin convints che la sovranitât economiche e sedi la strade pe costruzion di un model sociâl e alternatîf.

4. La costruzion di Euskal Herria
La costruzion de Euskal Herria dal futûr nus oblee a superâ cheste suaze juridiche che e divît il nestri popul e a fissâ une strategjie adate pai timps gnûfs. Cheste strategjie e à di tignî cont des diferentis realtâts e velocitâts di ogni teritori se si vûl superâ cun sucès la complessitât de situazion dal dì di vuê causade di cheste division.
Euskal Herria se cjate dividude tra doi stâts cun culturis democratichis cetant diviersis. Cun di plui, la part che si cjate intal teritori dal stât spagnûl e à doi implants juridics che a imponin ai diviers teritoris di Euskal Herria realtâts e velocitâts diferentis. Di chê altre bande, intal stât francês, Ipar Euskal Herria al va dilunc a no gjoldi di nissun ricognossiment istituzionâl.
Se si partìs di cheste situazion asimetriche, par superâ la situazion creade vie par ducj chescj agns dal sisteme juridic, o sin obleâts a cirî ponts di incuintri framieç des situazions che a àn causât lis diviersis co­relazions di fuarcis, storiis e realtâts, cussients che o sin un popul cuntune uniche societât formade di personis nazionalitariis e no nazionalitariis.
Cun chescj imprescj e a tacâ de situazion di vuê si impegnìn a fâ deventâ realtât, un pas daûr di chel altri, il nestri progjet strategjic: zazpiak bat, il Paîs Basc unît. La nestre bussule e sarà la difese dal caratar nazionâl di Euskal Herria e dal so teritori storic.

5. Uficialitât e normalizazion dal euskara
L’euskara e la culture basche a son lis carateristichis principâls de identitât di Euskal Herria e, tant che difensôrs dai dirits umans e dai dirits linguistics, o denunziìn che di un pont di viste legâl e sociâl l’euskara al è incjantonât intal cantin des lenghis minorizadis. Cheste situazion e à di jessi comedade. O rivendichìn il ricognossiment, la uficialitât e la normalizazion dal euskara in dute Euskal He­rria, adun cul disvilup legâl e normatîf che al covente par che si puedi doprâlu in libertât e cun normalitât in ducj i setôrs.
Il nestri obietîf al è chel di une Euskal Herria che e fevele par basc formade di citadins e di citadinis plurilinguis e, dilunc di chest troi, o sburtarìn par rivâ a struments eficaçs che nus permetin di lâ indenant pe strade de normalizazion sociâl dal euskara.

II - PRINCIPIS

1. Dirits umans: il dirit di decidi
O rivendichìn il rispiet e la difese di ducj i dirits umans par dutis lis personis. Ducj i dirits par dutis lis personis, i grups e i popui. La democrazie contempora­nie si fonde su la rivendicazion, la difese e il rispiet dai dirits umans, dirits che nus son stâts dineâts dilunc vie de storie e che a van dilunc a jessinus dineâts ancje in dì di vuê. Di une bande nus è stât impedît il dirit di decidi tant che popul; di chê altre bande o vin patît il feriment dai dirits umans in tancj agns di conflit politic.
Cun di plui, lis azions leadis aes politichis neoliberistis che i diviers guviers a àn svilupât a son ladis a colpî la avualiance di oportunitâts che dutis lis personis a àn dirit di vê. A dut chest si à po di zontâ lis leçs, i judizis e lis misuris di ecezion metûts in vore dai diviers guviers dal Stât spagnûl che a àn puartât a limitâ i dirits politics e civîi des personis e dai grups, e a ridusi simpri di plui il sisteme des libertâts.
Par dut chest, par fâ sù une Euskal Herria formade di personis libaris che a vedin garantîts ducj i lôr dirits, si sfuarçarìn par inviâ un dialic cence esclusions cun chei altris sogjets politics, sociâi e sin­dacâi che nus permeti di lâ inte direzion de autode­terminazion.

2. Pluralitât democratiche
La societât di Euskal Herria e je plurâl: cheste e je une carateristiche che nus insiore. La nazion basche che o rivendichìn, le rivendichìn di un pont di viste integradôr, che nol lassi fûr nissun.
Inte nestre propueste o tornìn a marcâ che la avualiance e à di vê di fonde la pluralitât, parcè che la societât e je plurâl e parcè che dome se si acete cheste pluralitât si pues fâ sù une Euskal Herria che e vedi un avignî. O intindìn la nazion basche tant che une comunitât cuntun destin comun che e à di jessi fate sù di dutis lis personis che a vivin e che a lavorin intal Paîs Basc. O pontìn suntune societât che e vedi di fonde i valôrs dal rispiet e de solidarietât, formade di personis li­baris, di là des diferencis di gjenar, etnie, crodincis, orientament sessuâl, divignince, culture o lenghe.

3. Avualiance
Par rivâ a di une Euskal Herria normâl o crodìn che e sedi prioritarie la avualiance reâl jenfri oms e feminis. Il gjenar, la divignince, la etât o lis crodincis des personis nus permetin di vivi la diversitât, e o vin di jessi compagns denant de leç e denant des oportunitâts so­cioeconomichis, culturâls e politichis par podê jessi personis libaris, cence violence ni esclusions.
O sin cussients che i pas indenant sociâi pe femine intal sisteme economic che si poie sul capitalisim a son cuasi impussibii, par cheste reson nus somee sante scugne che la costruzion di Euskal Herria si svilupi ancje a partî dal feminisim.

4. La difese dal principi di democrazie
Il sisteme democratic, in dì di vuê, al è in pericul par vie dal neoliberisim. O crodìn che e sedi la dibisugne di superâ la democrazie rapresentative, e praticâ la democrazie direte e partecipative par sburtâ un cambiament profont de societât.
Si impegnìn a meti in vore struments che a favorissin la partecipazion dai citadins o la democrazie direte intal decidi in ducj chei setôrs di decision o di po­dê là che o sin rapresentâts.

5. Internazionalisim
O difindìn il principi di sovranitât des comunitâts e i dirits nazionâi di Euskal Herria, però o leìn il nestri avignî a chel dal rest dai popui dal mont. O sin internazionaliscj.
Si impegnìn a disvilupâ iniziativis so­lidariis internazionâls eficacis e suazis alter­nativis intal mont, a tacâ de Europe par slargjâsi po al rest de comunitât internazionâl.

CONCLUSION
Si impegnìn a svilupâ un lavôr in comun, fondât sul rispiet mutuâl, par concretizâ i obietîfs e i principis metûts jù ta chest acuardi.

Nessun commento: