L’asturian, in plui di jessi la lenghe
proprie des Asturiis, al è fevelât ancje intune part de comunitât di Castilie e
Leon là che, cul non di leonês, al gjolt ancje di une garanzie di tutele e di
promozion intal statût di autonomie. Intai fats però lis autoritâts de
comunitât no metin in vore misuris di tutele par cheste varietât linguistiche
e, ancje di resint, a àn confermât di no jessi disponibilis a fâlu. Chest
almancul al è ce che al ven fûr des rispuestis dadis ae associazion Faceira che
di agns e je impegnade inte promozion dal leonês.
La associazion culturâl e
domandave in particolâr di cjapâ misuris pe jentrade dal leonês intal sisteme
educatîf, compagn di ce che za si fâs pal galizian intai doi teritoris de
Castilie e Leon là che cheste lenghe e je fevelade. Denant dal dinei dal
esecutîf regjonâl, i rapresentants de associazion a àn fat savê che a puartaran
la cuistion denant dal comitât consultîf dal Consei de Europe che al viôt dal
rispiet de convenzion cuadri pe protezion des minorancis nazionâls, dal moment
che ancje l’asturian - leonês al jentre tra lis lenghis ricognossudis di chest
acuardi internazionâl.
Ta chestis zornadis intant i
rapresentants de Faceira e di altris associazions impegnadis inte difese dal
leonês si son cjatâts cui delegâts di Iniciativa pol Asturianu e a àn
concuardât di infuartî i rapuarts tra di lôr e di lavorâ adun par svilupâ
iniziativis e progjets che a puedin lâ ben sei pal asturian che pal leonês.
Font: Astur News, 03 e
10/04/12
Nessun commento:
Posta un commento