Paîs Catalans: il suprem al impon il 25% di castilian a scuele

Cundut che nol è jentrât intal mert de cuistion limitantsi a sostignî che no jerin i elements par un ricors, il tribunâl suprem spagnûl al à confermât la sentence de cort superiôr di justizie de Catalogne che e impon un 25% di lezions par castilian intal sisteme scolastic catalan alterant cussì in maniere significative il model imersîf in vore te Comunitât. Dut al jere partît intal 2015 cuant che il ministeri pe educazion spagnûl – in chê volte tes mans dal PP – al veve fat ricors cuintri de leç catalane pe educazion. Intal 2020 la magjistrature i veve dât reson in prin grât causant un cuintriricors dal esecutîf catalan.

Danimarcje: domande di compens pe snazionalizazion dai inuit

Sîs inuit – membris de comunitât native de Groenlande – a domandin un risarciment al stât danês pal tratament subît cuant che a jerin piçui. A son i ultins ancjemò in vite di un grup di 22 fruts che tal 1951 a jerin stâts puartâts vie des lôr fameis par jessi menâts sul continent dulà che, daûr des intenzions dal guvier di in chê volte, a varessin vût di jessi trasformâts in “bogns danês”. La isule, che cumò e gjolt di une grande autonomie dentri dal ream di Danimarcje, par buine part dal secul stât e je stade tratade tant che une colonie. L’esperiment fat su chel grup di fruts al veve chê di trasformâju tun esempli pal rest de popolazion native. Par chest si veve domandât a insegnants e predis di selezionâ chei calcolâts plui adats, slontanantju po de lôr famee e de lôr tiere, gjavantjur lenghe e tradizions propriis, e fasintju tirâ sù di fameis danesis.

Irlande: ancje Westminster in ritart cu la leç sul irlandês

A son une cincuantine i grups impegnâts pe lenghe irlandese che a àn sotscrit un apel public par domandâ al guvier britanic che al puarti in Parlament cence altris ritarts une leç su la promozion dal gaelic irlandês tes sîs conteis dal Ulster che a fasin part dal Ream Unît e par vê un incuintri urgjent su chest teme cui rapresentants dal esecutîf. In Jugn il segretari di stât pe Irlande dal Nord, Brandon Lewis, al veve sigurât che se lis istituzions nordirlandesis no vessin fate buine la normative dentri di Setembar, lu varès fat il Parlament di Londre vie pal mês di Otubar. Otubar al è passât, Novembar al è cuasi insom, lis sessions di lavôr in program a Westminster prime de fin dal an a son a pene une grampe e la leç sul gaelic no je stade inmò calendarizade. Un delegât dal esecutîf britanic al à sigurât che chest timp al ven doprât par meti jù un test che al minimizi il risi di emendaments e di un slungjâsi dai lavôrs de aule. Pe organizazion Conradh na Gaeilge però chest rimant continuât al è daûr a causâ une erosion de fiducie tal guvier di Londre, tant plui che lis istituzions britanichis si vevin impegnadis in maniere clare pe normative sul irlandês ancjemò tal 2006 cui acuardis di Sant Andree (Saint Andrews Agreement). I dirits rimandâts – a àn zontât – a son dirits dineâts.

Font: Irish News, 23/11/21

Gales: lenghe e crisi abitative tal pat tra guvier e Plaid Cymru

Il guvier galês vuidât dai Laburiscj al à sotscrit un acuardi trienâl cui nazionalitaris dal Plaid Cymru che al cjape dentri 46 areis di intervent. No si trate di un pat di coalizion ma di un plan di lavôr par rivâ a obietîfs condividûts che al lasse libars i firmataris di movisi in autonomie su chei altris temis. I contignûts dal acuardi a son stâts presentâts ai 20 di Novembar dal prin ministri galês, Mark Drakeford, e dal leader dal Plaid Cymru, Adam Price. Tra i ponts dal plan o cjatìn un intervent radicâl e imediât par frontâ la crisi de secondis cjasis e dai presits dai alozaments, diviersis azions pe transizion ecologjiche, l’inviament di un sisteme sociosanitari gratuit, une riforme de Assemblee nazionâl galese, l’insegnament curicolâr de storie dal Gales, la incressite dai spazis scolastics di e par galês, la difese de microtoponomastiche in lenghe galese.

Gales: in cressi la rêt dai centris a imersion linguistiche

Il guvier galês al à fat savê che si slargjarà la rêt dai centris a imersion in lenghe galese. Si trate di struturis educativis indreçadis massime ai arlêfs des primariis che no àn familiaritât cul galês e che, par mieç di chescj centris, a puedin cjapâ sù chês competencis che i permetaran po di frecuentâ lis scuelis bilengâls cence restâ indaûr. In gracie di une dotazion di 2 milions e 200 mil sterlinis si previôt la creazion di vot centris gnûfs in areis là che fin cumò no ‘nd jere e di infuartî altris struturis za operativis.

Font: Nation Cymru, 22/11/21

Scozie: tal 2022 la prime Setemane mondiâl dal gaelic

Inte Vierte di chest an che al ven si davuelzarà in Scozie la prime Setemane mondiâl dal gaelic (Seachdain na Gàidhlig). Tra i promotôrs principâi de iniziative al è il Bòrd na Gàidhlig, la agjenzie scozese pe lenghe gaeliche. La Setemane si propon di celebrâ la vitalitât dal gaelic e il so rûl inte societât moderne, cul fin di sburtâ la int a doprâ di plui cheste lenghe e di infuartî i leams tra lis comunitâts gaelichis in Scozie e ator pal mont. Il program complet de manifestazion al sarà presentât sul imprin dal 2022.

Font: The National, 21/11/21

Paîs Basc: in disinis di miârs in place pe Republiche Basche

Disinis di miârs di personis a àn jemplât lis stradis di Bilbo / Bilbao ai 20 di Novembar par rivendicâ une Republiche basche formade di citadins libars e compagns intune zornade segnade ancje dal ricuart dai doi militants de çampe indipendentiste Santi Brouard e Josu Muguruza, sassinâts propite ta cheste date dai GAL – i grups paramilitârs spagnûi –, il prin intal 1984 e il secont trê agns plui tart. La partecipazion ae manifestazion inmaneade di EH Bildu – la coalizion de çampe indipendentiste basche – e je lade cetant plui innà di ce che si spietavisi, confermant la capacitât di mobilitazion di cheste aree politiche. Ae iniziative a àn partecipât ancje rapresentancis di altris moviments nazionalitaris tant che il BNG (Galizie), Andecha Astur (Asturiis), la CUP, ERC e Més per Mallorca (Paîs Catalans). La manifestazion e je stade compagnade di une sdrume di bandieris baschis e navaris e di slogans a pro de indipendence e pai presonîrs politics. Intal intervent finâl, il coordenadôr gjenerâl di EH Bildu, Arnaldo Otegi, al à ricuardât cemût i bascs a son stâts bogns di fâi cuintri a dutis lis strategjiis metudis in at par fâju disparî come popul ma che il stât naturâl dai popui nol è la resistence ma la libertât.

Font: Naiz:, 20/11/21; La Vanguardia, 20/11/21

Paîs Basc: Euskaraldia si tignarà tal Novembar dal 2022

La tierce edizion di Euskaraldia, la iniziative che si propon di sburtâ l’ûs sociâl de lenghe basche, si davuelzarà dai 28 di Novembar ai 2 di Dicembar dal 2022. La gnove e je stade comunicade intant de presentazion fate ai 20 di Novembar a Iruñea / Pamplona. Il sproc de gnove edizion al è «Hitzez ekiteko garaia», ven a dî «timp di agjî cu la peraule». L’intindiment al è chel di incidi su lis normis sociâls che a pidiment l’ûs dal euskara proponint compuartaments linguistics gnûfs e di ufrî ae citadinance i imprescj miôr cambiâju. In chest sens, une des prioritâts de prossime edizion e sarà di infuartî i arigune, o sei i spazis dulà fevelâ par basc in maniere naturâl che a restaran in vore ancje dopo che la manifestazion e sarà finide. Pôc mancul di 180 mil personis a àn partecipât ae seconde edizion di Euskaraldia: un sucès che, pai organizadôrs, al pues aumentâ ancjemò di plui. Ancje par chest si à za tacât a lavorâ sui grups locâi che a rapresentin il spinâl de iniziative.

Font: EiTB, 20/11/21; Eusko Jaurlaritza - Gobierno Vasco, 20/11/21

Paîs Catalans: e nas la plateforme unitarie “Bon dia TV”

Lis trê Comunitâts autonomis cjapadis dentri tal spazi linguistic catalan a àn decidût di meti sù une plateforme televisive che e judi a infuartî chest lôr leam. Plui tal specific, la Corporazion Valenziane dai Mieçs di Comunicazion (CVMC), la Corporazion Catalane dai Mieçs Audiovisîfs (CCMA) e l’Ent Public de Radiotelevision des Isulis Baleârs (EPRTVIB) a àn inviât Bon dia TV, une plateforme digjitâl dulà condividi lis lôr produzions audiovisivis par di là dai confins aministratîfs. Par cumò si trate di un spazi là che lis trê televisions publichis – À Punt, TV3 e IB3 – a metin a disposizion i contignûts che a produsin in maniere autonome e te proprie varietât ma, in prospetive, si vûl elaborâ ancje une programazion informative e culturâl unitarie. Un tant al dipent però des risorsis economichis che la gnove iniziative e varà a disposizion e che, in spiete de aprovazion dai belançs dai trê guviers, a son inmò di fissâ. Vuê come vuê la cjadene televisive valenziane e gjolt di finanziaments publics par 66,9 milions di euros, chê catalane par 284 milions e chê baleâr par 33 milions.

Font: El Diario, 19/11/21

Man: iniziative par svicinâ la famee linguistiche gaeliche

Par iniziative de Bunscoill Ghaelgagh de isule di Man, dôs artistis a àn realizât une serie di cartulinis trilengâls pai fruts, adatadis ancje in formât di placât e dedicadis a siet temis diviers, o sei mangjâ, timp, emozions, animâi, colôrs, vistîts e splaze. Lis figuris a son compagnadis dai nons par manx, gaelic scozês e irlandês, ven a dî lis trê lenghis che a fasin part de famee gaeliche. Nassude di un viaç di studi in Irlande dal Nord fat dai fruts de Bunscoill Ghaelgagh intal 2019, cheste iniziative – ancje se piçule – e à un valôr simbolic impuartant. Lis cartulinis, di fat, a saran dopradis dai fruts de scuele a imersion de isule di Man par metisi in contat cun chei des scuelis gaelichis de Scozie e de Irlande par cognossisi miôr e infuartî i leams tra lis lôr lenghis.

Font: IOM Today, 19/11/21

Paîs Basc: lis ikastolas a proponin di slargjâ il model a imersion

Il Parlament de Comunitât Autonome Basche al è daûr a scoltâ in audizion une rie di esperts par tirâ sù dâts e parês pe gnove leç su la educazion che il guvier al ponte a meti adun chest an che al ven. Un dai temis centrâi al è chel dal euskara dal moment che, si ben che tai ultins agns a son aumentâts i students che a frecuentin il model a imersion o chel bilengâl, il nivel di ûs e di cognossince de lenghe si à sbassât. Se i nazionaliscj che a son cumò ae vuide dal guvier basc (PNV) si mostrin a pro di une riforme dal sisteme atuâl fondât su la pussibilitât pes fameis di sielzi tra model A (par castilian cul basc come materie), B (bilengâl) o D (par basc cul castilian come materie), Ikastolen Elkartea – entitât che e ten adun 111 istitûts scolastics a imersion dal Paîs Basc (Comunitât Autonome Basche, Navare e Paîs Basc setentrionâl) – e à proponût invezit di slargjâ il model imersîf doprât des ikastolas a dut il sisteme scolastic basc, sei public che parificât. Une linie – chê di slargjâ il model D a dutis lis scuelis – che e à cjatât in cunvigne ancje EH Bildu (çampe indipendentiste), o sei il secont partît par impuartance dal Paîs Basc.

Font: El Correo, 17/11/21

Paîs Basc: presentât il plan strategjic dal euskara 2021-2024

Ai 16 di Novembar il president dal guvier basc (lehendakari), Iñigo Urkullu, al à presentât al consei consultîf pe lenghe basche la agjende strategjiche dal euskara 2021 – 2024, ven a dî il plan plurienâl di politiche linguistiche fat bon dal esecutîf basc sul principi dal mês. A son trê lis liniis di azions principâls che il plan si propon di rivâi, ven a dî: incressi la cognossince de lenghe basche e aumentâ il so ûs sociâl, cuntune atenzion particolâr ai ambits socioculturâi, economics, digjitâi e de aministrazion publiche; movisi in direzion dal rispiet plen dai dirits linguistics e di une convivence linguistiche normâl; e infuartî la colaborazion interistituzionâl tra i teritoris di lenghe basche. Ogni obietîf al è compagnât di une rie di azions pratichis di meti in cjamp. Par controlâ la progression de agjende strategjiche si à ancje decidût di meti in pîts une comission formade dai rapresentants di ducj i dipartiments e lis agjenziis publichis clamâts a meti in vore il plan.

Font: Eusko Jaurlaritza - Gobierno Vasco, 16/11/21

Paîs Catalans: aument dai fonts pe politiche linguistiche

Il guvier catalan (Generalitat de Catalunya) al à cressût dal 28,3% lis risorsis pal dipartiment pe culture e si svicine al obietîf dal 2% dal belanç metût su chest cjamp. La Catalogne si conferme cussì une des comunitâts che e invistìs di plui in culture, cun finanziaments di setôr che a son plui alts de medie spagnole e ancje di chê europeane. Ta cheste suaze a son cressûts ancje i fonts pe politiche linguistiche che dai 31,2 milions dal 2020 a passin a 38,8 milions. A son invezit di 27,2 milions – il 17,3% in plui dal an prime – lis risorsis par miorâ la acessibilitât ae lenghe catalane e aumentâ i nivei di cognossince framieç de popolazion adulte e dai gnûfs rivâts. In cressi a son ancje i fonts pes produzions audiovisivis dopleadis o sottituladis par catalan, cun 5 milions di euros disponibii. Lis risorsis pe normalizazion dal ocitan aranês a son stadis cressudis dal 16% e chês pe difusion de lenghe dai segns catalane fintremai dal 114%.

Font: Generalitat de Catalunya, 15/11/21

Gales: si invistìs su lis scuelis a imersion, il câs di Caerffili

L’obietîf di incressi il numar des personis buinis di fevelâ par galês al è condividût di diviersis istituzions e, tra chestis, o cjatìn ancje l’esecutîf provinciâl di Caerffili / Caerphilly, une contee dal Gales sudorientâl cun sù par jù 180 mil abitants là che dome une persone su cuatri e fevele la lenghe proprie. La aministrazion provinciâl e à decidût in particolâr di pontâ su la scuele cul aumentâ i istitûts cul sisteme a imersion par galês. Inte suaze dal plan strategjic pe educazion imbastît dal guvier galês, l’esecutîf provinciâl al à programât invistiments par 6,4 milions di sterlinis in doi agns, come a dî cuasi 7 milions e mieç di euros. Dopo dal milion e 800 mil sterlinis za spindûts chest an par completâ la Ysgol Y Castell, chest an che al ven a varessin di rivâ insom i lavôrs par altris trê scuelis, intant che tal Fevrâr dal 2023 e sarà disponibile une cuinte scuele a imersion in maniere di rispuindi al cressi de domande e di stiçâ ancje altris fameis a sielzi chest percors pai lôr fîs.

Font: Nation Cymru, 10/11/21

Ocitanie: mobilitazion pal ocitan a scuele a Castras

La presince de lenghe ocitane te scuele publiche dal stât francês si ricjate a frontâ cetancj problemis, di chel pal reclutament dai insegnants fin ai pidiments e ai berdeis che a rivin dal ministeri pe educazion e di diviersis aministrazions scolastichis locâls. Par riclamâ la atenzion sui problemis specifics de sezion bilengâl de scuele publiche Louis David di Castras / Castres i gjenitôrs dai fruts che le frecuentin a àn inviât une petizion in linie che e à cjatât duarman la poie des associazions dai insegnants e des sezions teritoriâls dal Istitût di Studis Ocitans (IEO), de organizazion Òc-Bi, dal Centri Regjonâl dai Insegnants di Ocitan (CRÈO), e dal Centri Ocitan dal Paîs Castrês. No si trate dut câs dome di une iniziative di proteste ma ancje di propueste. La petizion, di fat, e propon la creazion di un grup di lavôr che al meti adun ducj i atôrs dal insegnament public dal ocitan, la creazion di une seconde sezion bilengâl e la vierzidure di un percors bilengâl ancje tal coleç locâl di maniere di dâi continuitât al insegnament de lenghe proprie.

Font: Jornalet, 08/11/21

Corsiche: gnûf impegn di Core in Fronte pe autodeterminazion

Ai 7 di Novembar il moviment nazionalitari cors Core in Fronte al à tignude la sô assemblee gjenerâl a Corti / Corte. Intant dai lavôrs si à decidût di profitâ dal periodi de campagne eletorâl pes presidenziâls francesis par puartâ tal dibatiment gjenerâl il dirit ae autodeterminazion de Corsiche par mieç di une propueste istituzionâl di modifiche dal titul XII de Costituzion republicane che e lassi vierte la puarte ae pussibilitât de indipendence pe isule. Il teme al rapresente il cûr di un program che al previôt ancje politichis sociâls par superâ lis disavualiancis e l’impuariment che a tocjin la Corsiche, la lote ae speculazion edilizie, e il scuintri totâl cuintri dai monopolis e dai mecanisims mafiôs che a impestin la isule. Temis che a saran frontâts intant di riunions publichis ator par dute la Corsiche, ancje cul fin di infuartî l’inlidrisament popolâr dal moviment.

Font: Corse Net Infos, 07/11/21

Europe: apel pal ricognossiment e la difese dal romani

In ocasion dai 5 di Novembar – Zornade mondiâl de lenghe romani – la presidente dal comitât di esperts su lis tematichis dai Rom e dai Cjaminants dal Consei de Europe (ADI-ROM), Tatjana Anđelić, e à indreçât un apel pal ricognossiment, la tutele e la promozion di cheste lenghe. I Rom, cui lôr 12 milions, no son dome la minorance linguistiche plui gruesse dal nestri continent ma ancje chê plui discriminade. La lôr lenghe, cu lis sôs diviersis varietâts, e je fevelade in cetancj stâts europeans e e rapresente une part integrante dal patrimoni culturâl continentâl. Tra lis finalitâts dal Consei de Europe si à la lote cuintri de discriminazion e la promozion di une societât inclusive che e rispieti la diversitât linguistiche e culturâl. A coventin duncje misuris concretis par che almancul lis gnovis gjenerazions rom a puedin cjapâ cussience e imparâ la lôr lenghe proprie. Par chest fin, il Consei de Europe al à ancje disvilupât un curriculum di riferiment pal romani a disposizion sei des istituzions scolastichis che di chês politichis europeanis.

Font: Council of Europe, 05/11/21

Asturiis: lis rivendicazions de comunitât di lenghe galiziane

Axuntar, la gnove associazion pe normalizazion dal galizian des Asturiis, e à presentât lis sôs propuestis intant di un incuintri cul diretôr gjenerâl de politiche linguistiche dal principât des Asturiis. Tant che asturians di lenghe galiziane i delegâts di Axuntar a rivendichin un procès di normalizazion vêr de lôr lenghe proprie a partî de riforme dal Statût di autonomie che il guvier e il Parlament a son cumò daûr a frontâ. In chest sens, la associazion e domande che tal Statût gnûf si ricognossi che lis lenghis propriis de Comunitât a son l’asturian e il galizian des Asturiis e che chestis dôs lenghis, intune cul castilian, a sedin declaradis uficiâls e che si garantissi il dirit di ducj i citadins di cognossilis e di doprâlis. La normalizazion e la dignitât de lenghe a àn dut câs di partî dal non, cul ricognossiment de forme “galizian des Asturiis” par superâ il stigme vivût di cui che lu fevele, che par agns si à sintût a dî che la sô no jere une varietât galiziane ma une fevele “di transizion”. Lis propuestis fatis indenant a cjapin dentri une leç che e regoli la zonizazion, la tutele e la promozion de lenghe, ma ancje une revision de toponomastiche locâl e des normis grafichis che e tegni cont di chê dal galizian standard.

Font: Nòs Diario, 04/11/21

Paîs Catalans: azion par garantî l’acès a ducj i media par catalan

Il Parlament valenzian (Corts Valencianes) al à fate buine a maiorance une risoluzion che si propon di garantî a dutis lis personis che a vivin intai Paîs Catalans il dirit di viodi e di scoltâ i mieçs di comunicazion che a trasmetin inte lôr lenghe proprie. La iniziative e je stade fate indenant di Unides Podem cu la poie dai socialiscj (PSPV) e dal nazionalitaris di Compromís, intant che i parlamentârs de diestre spagnoliste a àn votât cuintri. Il document al domande che si assegni un gnûf canâl multiplex a ognidune des trê Comunitâts autonomis di lenghe catalane là che a cjatin spazi dutis lis produzions televisivis e cinematografichis par catalan, cu la pussibilitât di integrâlis cun chês par basc e par galizian. Si impegne po l’esecutîf valenzian a sotscrivi acuardis di reciprocitât par garantî pardut la visibilitât des emitentis che a trasmetin par catalan e di meti in cjamp lis iniziativis legjislativis e tecnichis par permetilu. Cun di plui, là che al sarà pussibil, si propon di slargjâ cheste reciprocitât ancje aes tieris di lenghe catalane che a son fûr dal stât spagnûl tant che la Catalogne Nord sot aministrazion francese e la citât sarde dal Alguer.

Font: Levante EMV, 04/11/21

Paîs Catalans: plan pal ûs sociâl dal catalan tes scuelis

Il guvier catalan al à presentât un plan di promozion dal ûs de lenghe proprie tai centris educatîfs. L’intindiment de iniziative al è di incressi l’ûs dal catalan intes scuelis ancje come lenghe de socialitât. I dâts racuelts intai ultins cuindis agns, di fat, a mostrin che la lenghe proprie e ven doprade simpri di mancul intes conversazions framieç dai fruts cuant che a son a scuele e tra i stes students e i insegnants. Plui in detai, dal 2006 al 2021, i arlêfs che si indrecin simpri o cuasi simpri par catalan ai professôrs a son calâts dal 56% al 39%, i insegnants che a doprin la lenghe proprie cui lôr arlêfs a son lâts jù dal 63,7% al 46,8%, e i students che a doprin par solit il catalan cui lôr compagns fûr dal orari di lezion a son passâts dal 67% al 21,4%. Il plan si inviarà in forme sperimentâl in 200 istitûts scolastics par slargjâsi po a cjapâ dentri dutis lis scuelis intal zîr di cuatri agns. Il prin passaç al è chel di une analisi su la situazion linguistiche specifiche di ogni istitût par po definî, su la fonde dai dâts, une strategjie, timps di intervent e obietîfs specifics. Ta cheste suaze si previodin ancje percors di formazion pai insegnants e pal personâl scolastic.

Font: Generalitat de Catalunya, 04/11/21