Gales: lenghe e crisi abitative tal pat tra guvier e Plaid Cymru

Il guvier galês vuidât dai Laburiscj al à sotscrit un acuardi trienâl cui nazionalitaris dal Plaid Cymru che al cjape dentri 46 areis di intervent. No si trate di un pat di coalizion ma di un plan di lavôr par rivâ a obietîfs condividûts che al lasse libars i firmataris di movisi in autonomie su chei altris temis. I contignûts dal acuardi a son stâts presentâts ai 20 di Novembar dal prin ministri galês, Mark Drakeford, e dal leader dal Plaid Cymru, Adam Price. Tra i ponts dal plan o cjatìn un intervent radicâl e imediât par frontâ la crisi de secondis cjasis e dai presits dai alozaments, diviersis azions pe transizion ecologjiche, l’inviament di un sisteme sociosanitari gratuit, une riforme de Assemblee nazionâl galese, l’insegnament curicolâr de storie dal Gales, la incressite dai spazis scolastics di e par galês, la difese de microtoponomastiche in lenghe galese.

Il prin pont al è forsit il plui cjalt intal dibatiment politic e sociâl dal Gales, dal moment che la proliferazion des secondis cjasis e la incressite dai presits intal marcjât imobiliâr no puartin dome tancj zovins galês a vê di bandonâ i lôr paîs parcè che no puedin permetisi apartaments o afits cussì cjârs ma ancje a alterâ i ecuilibris demografics e linguistics des areis dal Gales là che la lenghe proprie e je plui fuarte. Il pat jenfri guvier e Plaid Cymru al previôt, par esempli, di fissâ un tet al numar di secondis cjasis, di incressi il numar des abitazions gjestidis des comunitâts, e di infuartî la autonomie des autoritâts locâls intal cjamp de tassazion dai imobii.

Font: The Guardian, 22/11/21; Nation Cymru, 22/11/21