Danimarcje: domande di compens pe snazionalizazion dai inuit

Sîs inuit – membris de comunitât native de Groenlande – a domandin un risarciment al stât danês pal tratament subît cuant che a jerin piçui. A son i ultins ancjemò in vite di un grup di 22 fruts che tal 1951 a jerin stâts puartâts vie des lôr fameis par jessi menâts sul continent dulà che, daûr des intenzions dal guvier di in chê volte, a varessin vût di jessi trasformâts in “bogns danês”. La isule, che cumò e gjolt di une grande autonomie dentri dal ream di Danimarcje, par buine part dal secul stât e je stade tratade tant che une colonie. L’esperiment fat su chel grup di fruts al veve chê di trasformâju tun esempli pal rest de popolazion native. Par chest si veve domandât a insegnants e predis di selezionâ chei calcolâts plui adats, slontanantju po de lôr famee e de lôr tiere, gjavantjur lenghe e tradizions propriis, e fasintju tirâ sù di fameis danesis.

Cemût che si pues imagjinâ, la iniziative e jere stade un faliment totâl e dopo un pôc i fruts – disvuedâts de lôr identitât e ancje de autostime – a jerin stâts metûts in orfanotrofis groenlandês, dispès cence vê plui contat cu la lôr famee di divignince. Dome l’an passât la prime ministre danese, Mette Frederiksen, e à domandât scuse in forme uficiâl par chest at criminâl. Cumò i ultins sîs sorevivûts a domandin un risarciment economic che, pe sô cuantitât, al à plui un valôr simbolic che no sostanziâl. Lis istituzions danesis no àn ancjemò comentât.

Font: BBC, 23/11/21