Paîs Catalans: inmò maiorance indipendentiste in Catalogne

Lis elezions pal Parlament catalan clamadis dongje dal guvier di Madrid ai 21 di Dicembar a àn tornât a dâi la maiorance aes fuarcis indipendentistis. Cun di fat, cundut di une campagne eletorâl condizionade de sospension dal autoguvier de comunitât autonome e de presince di diviers candidâts in preson o in esili, i citadins catalans a àn assegnât 70 dai 135 puescj disponibii in Parlament ai partîts sovraniscj e, plui in detai, 34 a son lâts a Junts per Catalunya – liste vuidade di Carles Puigdemont (president deponût cumò in esili a Bruxelles) e che si poie massime sul PDeCAT – 32 a ERC (che il so leader Oriol Junqueras si cjate ancjemò in preson preventive) e 4 ae CUP. Il partît plui votât però al è stât Ciudadanos che al à otignût il vôt di un catalan su cuatri e 37 deputâts in Parlament. Il sucès dal partît vuidât di Inés Arrimadas al è rivât massime su la piel dal PP: il partît tradizionâl de diestre spagnoliste al è di fat colât di 11 parlamentârs a 3. A completâ il front unionist a son po i 17 deputâts dal PSC. Catalunya en Comú-Podem – formazion a pro de autodeterminazion ma contrarie a di un percors unilaterâl di indipendence – e à invezit otignût 8 deputâts. I gnûfs elets a jentraran in cjarie dentri dai 23 di Zenâr e a varan po uns cuindis dîs par inviâ la discussion su la presidence.

Paîs Basc: blocât l’aument dal euskara tes scuelis di Pamplone

Une sentence dal tribunâl superiôr di justizie de Navare e boce il mudament dal model linguistic decidût de aministrazion comunâl di Pamplone in dôs scuelis de infanzie de citât. Dopo agns che si domandave di cressi i puescj disponibii cul model a imersion in lenghe basche, il guvier locâl al veve riformât la ufierte scolastiche citadine puartant i puescj disponibii par euskara di 164 a 408 e sbassant di 255 il numar di chei par castilian o par castilian e inglês. Un intervent che però, pe magjistrature, nol a rispietât il percors previodût de leç.

Font: EiTB, 12/12/17

Montenegro: ricognossiment internazionâl pal montenegrin

Ae fin di un percors durât nûf agns, lis autoritâts dal Montenegro a àn otignût un codiç ISO pal montenegrin (CRN). Chest ricognossiment i da un valôr di uficialitât internazionâl a cheste lenghe che, fin cumò, e vignive calcolade une varietât dal serp. La costituzion di chest paîs balcanic za tal 2007 i assegnave al montenegrin il status di lenghe uficiâl, status che si veve po slargjât intal 2011 a dut il sisteme scolastic public cundut che, propit intal censiment di chel an, il 44% de popolazion al declarave di fevelâ par serp a front di un 36% che al indicave il montenegrin come lenghe proprie. Cun chest gnûf passaç, il montenegrin si infuartìs ancje sul plan internazionâl, intant che i partîts di oposizion e diviersis organizazions a denunciin un aument des discriminazions cuintri di cui che al dopre la lenghe serbe.

Font: Balkan Insight, 12/12/17

Irlande: apel pe difese dai dirits dai irlandês dal Nord

Passe dusinte tra personalitâts dal mont academic, dal sport e de culture nordirlandesis a àn sotscrit un apel al prin ministri de Republiche di Irlande, Leo Varadkar, par che al intervegni par tutelâ i dirits de comunitât nazionaliste e republicane dal Nord a front dal faliment dai tentatîfs par meti in vore ad in plen i contignûts dal acuardi di pâs dal Vinars Sant e di chel seguitîf di S. Andree. In dì di vuê – a denunciin i firmataris – la comunitât nazionaliste nordirlandese no gjolt ancjemò dai stes dirits di chê unioniste. Dopo des elezions di Març, i partîts di riferiment des dôs comunitâts – Sinn Féin e DUP – no àn ancjemò rivât a cjatâ un acuardi di guvier. Tra i ponts di scuintri plui dûrs si à, par esempli, la aprovazion di un leç di tutele e di promozion pe lenghe irlandese.

Font: BBC, 11/12/17

Corsiche: maiorance nazionalitarie cence pareli te Assemblee

Tal secont turni des elezions pe gnove Coletivitât Teritoriâl uniche de Corsiche che si son tignudis ai 10 di Dicembar la coalizion nazionalitarie Pè a Corsica e à otignût un risultât cence precedents. Cun di fat, cul 56,5% dai vôts e à otignût 41 dai 63 puescj disponibii inte Assemblee de isule, a front dai 10 elets de diestre regjonaliste, dai 6 de diestre stataliste (Les Républicains) e dai 6 dal partît dal president francês Emmanuel Macron (La République en marche). I cors a àn duncje premiât in maniere clare la azion dal guvier vuidât di Gilles Simeoni che al met adun i nazionaliscj moderâts di Femu a Corsica e i indipendentiscj di Corsica Libera e che, tra i ponts di fonde dal so program, al previôt la couficialitât de lenghe corse, une soluzion pe cuistion dai presonîrs politics e il statût di resident par fâi cuintri ae speculazion edilizie. A front de conferme massive par cheste maiorance l’esecutîf di Parîs nol pues lâ indenant a dineâ lis nestris rivendicazions – al à comentât il president de Assemblee stade, Jean-Guy Talamoni – in câs contrari o varìn di passâ aes mobilitazions popolârs e di denunciâ il compuartament de France ator pes capitâls europeanis. Par intant, un prin impegn pal esecutîf cors al sarà chel di gjestî la metude in vore de Coletivitât Teritoriâl uniche che si inviarà il prin di Zenâr dal 2018 de fusion tra la Coletivitât precedente e i dipartiments de Alte e de Basse Corsiche e che e rapresente un sogjet dal dut gnûf inte architeture istituzionâl francese.

Font: Le Monde, 11/12/17

Ocitanie: diplome universitari ocitan a Bordeaux

La universitât Bordeaux Montaigne (Bordèu Montanha) e à ativât un diplome universitari ocitan specializât in culture, patrimoni artistic e spetacul. I cors a son in program tra il Març e il Lui dal 2018 ancje cu la pussibilitât de frecuence a distance. La iniziative e nas de colaborazion jenfri la universitât e l’ufici public pe lenghe ocitane (ÒPLO).

Font: Jornalet, 10/12/17

Paîs Basc: in 11 mil a Parîs pai dirits dai presonîrs bascs

A jerin almancul 11 mil lis personis che ai 9 di Dicembar a àn sfilât pes stradis di Parîs daûr dal strisson cu la scrite “Bakea Euskal Herrian: orain presoak” (Pâs intal Paîs Basc, cumò i presonîrs). La iniziative e je stade inmaneade dai cussì clamâts “Artesans de pâs” che te Vierte di chest an a vevin facilitât la consegne dal arsenâl di ETA aes autoritâts francesis. L’obietîf de manifestazion al jere chel di sburtâ il guvier di Parîs a meti fin aes misuris ecezionâls in vore cuintri dai presonîrs bascs e, plui in particolâr, di domandâ il trasferiment dai presonîrs intes struturis carcerariis plui dongje dal Paîs Basc, la liberazion di chei che a patissin di malatiis seriis, la concession de libertât condizionâl cui stes criteris in vore pai criminâi comuns e la eliminazion dal status di DPS che al incrès lis misuris punitivis. La manifestazion e gjoldeve de poie di passe un miâr di conseîrs e rapresentants politics elets intal Paîs Basc sot aministrazion francese e a sfilâ in prime linie a Parîs a jerin rapresentants di ducj i partîts politics, gjavât il Front National. Un esempli di condivision e di trasversalitât che i organizadôrs a sperin che si puedi espuartâ ancje te part dal Paîs Basc cjapade dentri intal stât spagnûl.

Font: Naiz:, 09/12/17; EiTB, 09/12/17

Moldova: scuintri sui programs radiotelevisîfs rus

Ai 7 di Dicembar il Parlament moldâf al à fat bon un codiç su lis emissions radiotelevisivis che al previôt che no si puedin mandâ in onde contignûts che a rivin di stâts che no àn ratificât la convenzion europeane su la television transfrontaliere. In buine sostance la norme si propon di eliminâ chê che il Partît Liberâl Democratic, cumò al guvier, al definìs “propagande russe”. In plui di minorancis significativis che a àn il rus come prime lenghe, la plui part de popolazion de Moldova e cognòs ancje il rus e duncje dutis lis emitentis principâls a trasmetin cetancj programs ta cheste lenghe, programs che pe plui part a rivin de Federazion Russe o che si poin su materiâi e fonts di chel paîs. Diviers organisims di control a segnalin cemût che cheste situazion e fasi passâ cence mediazion la linie dal Cremlin su cetancj temis sensibii. Il president de Moldova, il filorus Igor Dodon, al à fat savê daurman che nol firmarà la leç. No sarès però la prime volte che il so “no” al ven superât di un intervent de cort costituzionâl che lu suspint dal mandât il timp che al covente par ratificâ il proviodiment. Di là dai siei contignûts politics, la gnove leç e va però ancje a limitâ l’acès de popolazion di lenghe russe a programs radiotelevisîfs te lôr lenghe. Ancje par chest, il guvier de regjon autonome de Gagauzie al à dite che nol metarà in vore la gnove norme e nol imponarà nissune limitazion ae programazion par rus.

Font: Balkan Insight, 08/12/17

Finlande: comitât pe riforme de legjislazion sui Sami

Il ministeri finlandês pe justizie al à metût sù il comitât che al à di riformâ la leç istitutive dal Parlament sami. Il test de gnove propueste di leç al varà di jessi metût jù dentri dal Avrîl dal 2018 e al varà di tignî cont sei dai oblics costituzionâi e di chei internazionâi in materie di dirits umans, sei de declarazion de ONU sui dirits dai popui natîfs. La iniziative e jere domandade di timp des comunitâts sami che a sperin che cheste riforme ur dedi plui fuarce, massime par chel che al rivuarde l’autoguvier e la pussibilitât di contribuî in maniere determinante intes decisions che a rivuardin i Sami, a partî di chês su la gjestion des tieris e des aghis dulà che a vivin.

Font: The Independent Barents Observer, 05/12/17

Paîs Catalans: Spagne batude sul front judiziari a Bruxelles

Intant che si svicine la date des elezions pal Parlament catalan e che la campagne eletorâl e je condizionade a fuart des misuris repressivis metudis in at dal guvier di Madrid cuintri des istituzions autonomis, la atenzion e reste pontade sui aspiets judiziaris de vicende. Dopo vê confermade la preson preventive cence cauzion par doi dai membris dal guvier catalan – Oriol Junqueras e Joaquim Forn – e pai presidents de ANC, Jordi Sànchez, e dal Òmnium Cultural, Jordi Cuixart, il judiç dal tribunâl suprem spagnûl che al à in man il procediment cuintri dal indipendentisim catalan, Pablo Llarena, al à decidût di ritirâ i ordins europeans di arest e di consegne cuintri dal president catalan Carles Puigdemont e di cuatri membris dal so esecutîf (Antoni Comin, Meritxell Serret, Lluís Puig e Clara Ponsatí) cumò in esili a Bruxelles. La decision e je stade cjapade par pôre che la magjistrature belgjiche, tal câs che e acetàs la estradizion, e limitàs i reâts che i cinc a podevin jessi clamâts a rispuindi. A Bruxelles duncje il câs al è za stât archiviât e lis misuris cautelârs cuintri dai cinc rapresentants catalans a son stadis ritiradis. Intant, par tignî impiade la atenzion de Europe su la Catalogne, ai 7 di Dicembar il distret european de capitâl de Belgjiche al à viodût a sfilâ pes sôs stradis disinis di miârs di catalans – 45 mil daûr des fonts di polizie – che a àn domandât ae Europe di dâsi une sveade e a àn stiçât lis istituzions comunitariis a no voltâsi di chê altre bande. Al è di dî che lis manifestazions no mancjin a Bruxelles, ma al è râr di viodint di cussì partecipadis, massime se si pense di dulà che a rivavin i partecipants.

Font: Naiz:, 04-14/12/17; VilaWeb, 07/12/17

Asturiis: ents locâi a pro de uficialitât dal asturian

In dì di vuê i conseis locâi che a àn cjapât une posizion uficiâl a pro de uficialitât dal asturian a son vot – Avilés, Bimenes, Castrillón, Llena, Mieres, Noreña, Uviéu e Xixón – e a rapresentin passe 650 mil personis, o sei il 62,79% de popolazion des Asturiis. Al è zaromai di agns che si domande une riforme dal statût di autonomie par che al asturian e al galizian fevelât te part plui ocidentâl di cheste comunitât ur vegni ricognossût un status di plene uficialitât dongje dal castilian, ma nissun dai guviers in cjarie fin cumò al à inviât chest procès. Par solit il dinei al jere motivât cu la mancjance di une domande sociâl suficiente. Cumò però, a disin lis organizazions impegnadis pe uficialitât dal asturian, cheste scuse no à plui mani. Cun di fat, dongje dai ents locâi che a rapresentin cuasi doi tierçs de popolazion, a declarâsi a pro de uficialitât a son 31 dai 45 deputâts che a formin il Parlament asturian (socialiscj, Podemos, Izquierda Xunida, Foro). A chest pont, duncje, i tocje al esecutîf decidi se lâ dilunc a blocâ la riforme o fâ sô une rivendicazion che e gjolt de poie de maiorance dai elets.

Font: Asturies.com, 04/12/17

Paîs Basc: lenghe de sanitât, in 188 mil a àn miôr l’euskara

Sul imprin dal 2017 il guvier de Comunitât Autonome Basche al veve inviât une campagne par invidâ i citadins a indicâ cuale lenghe che a vevin miôr di fevelâ cui miedis e cui operadôrs dal servizi sanitari (Osakidetza). L’intindiment al jere chel di garantî il plui pussibil i dirits linguistics ancje te sanitât publiche là che, intai ultins dîs agns, i dipendents cuntune competence suficiente par doprâ l’euskara a son cressûts e a rapresentin sù par jù un tierç dal totâl. In dì di vuê a son 188 mil i citadins che a àn za dât la lôr preference al ûs de lenghe basche. A chest pont, il guvier de CAB al varà di cirî di adatâ il sisteme sanitari in maniere di relazionâ il plui pussibil i citadins che a àn sielzût l’euskara come prime lenghe cui operadôrs sanitaris che a àn il profîl linguistic just.

Font: La Vanguardia, 02/12/17

Corsiche: sucès storic dai nazionalitaris cors tes teritoriâls

Sucès storic de coalizion nazionalitarie Pè a Corsica tal prin turni des elezions dai 3 di Dicembar pe gnove Assemblee isolane. Cun di fat, la coalizion - formade dai nazionaliscj moderâts di Femu a Corsica e dai indipendentiscj di Corsica Libera - e à cjapât il 45,36% dai vôts intant che chês altris listis a son restadis cetant indaûr (diestre regjonaliste al 14,97%; diestre stataliste al 12,77%, LREM al 11,26%, intant che chês altris no àn nancje passât il soiâr dal 7%). Pè a Corsica e à plui che dopleât i vôts cjapâts intes elezions dal 2015 e si prepare duncje a guviernâ la gnove Coletivitât Teritoriâl uniche che si inviarà il prin di Zenâr dal 2018 cu la fusion tra l'ent regjonâl e i doi dipartiments che si divideve la isule. Par Gilles Simeoni, che al vuide la coalizion nazionalitarie, il vôt al è un segnâl une vore fuart su la volontât di autoguvier dai cors che a Parîs no podaran plui fâ fente di no viodi. Il secont turni des elezions al è in program ai 10 di Dicembar.

Font: Le Monde, 04/12/17

Europe: iniziativis a pro dai presonîrs catalans

Une delegazion di 16 deputâts dal Parlament European formade di rapresentants di diviersis areis politichis e à domandât in maniere uficiâl di podê visitâ i rapresentants dal guvier catalan e i presidents des dôs organizazions plui impuartantis dal indipendentisim catalan che si cjatin inmò impresonâts in diviersis struturis carcerariis di Madrid par vie de lôr part intal procès di autodeterminazion de Catalogne. La domande e fâs part di une iniziative inviade dal grup formât di uns 30 europarlamentârs par favorî il dialic tra il guvier di Madrid e lis istituzions catalanis. Par cumò però la visite e je stade impedide des autoritâts spagnolis.

Cossovo: sburt par ricognossi i gorans come minorance bulgare

Dopo vê otignût che te gnove leç su lis minorancis nazionâls fate buine dal Parlament albanês ai 13 di Otubar si ricognossès la esistence di une minorance bulgare, lis autoritâts di Sofia a domandin cumò che ancje il Cossovo al fasi chel stes pas. Al centri de rivendicazion a son i gorans, une comunitât su lis 50/100 mil personis di lenghe slave e di religjon musulmane che e vîf in trente paîs de regjon di Gora a cjaval tra Cossovo, Albanie e Macedonie. Almancul dai agns ’90 dal secul stât incà cheste popolazion e je stade rivendicade prime come part de comunitât serbe, po macedone e cumò bulgare. Sul plan sientific e linguistic la sô partignince no je masse clare e e lasse duncje la puarte vierte a interpretazions variis. La int dal puest si ricognòs intune identitât regjonâl gorane e dome une part e rivendiche la sô partignince a di une comunitât nazionâl plui grande. Diviers di lôr a àn acetât la ufierte di ricevi ancje la citadinance bulgare, massime par vie che cheste ur permeteve di vê libertât di circolazion inte Union Europeane. La Bulgarie però cumò e sburte plui a fuart e e vûl che ancje il Cossovo al procedi al ricognossiment uficiâl dai gorans come minorance bulgare, ricuardant aes autoritâts dal paîs che il guvier di Sofia al podarès dâ une man intal procès di integrazion inte UE. Il ricognossiment però al dipent ancje de volontât dai gorans stes, dal moment che la normative cossovane e previôt che a sedin lôr cuntune racuelte di firmis a lâ ta cheste direzion.

Font: Balkan Insight, 27/11/17

Paîs Catalans: Baleârs, si propon un ufici pai dirits linguistics

Il moviment MÉS per Menorca al à presentât un emendament al progjet di leç di belanç pal 2018 fat indenant dal guvier des Baleârs là che al propon la creazion di un ufici pai dirits linguistics, sul model di chei za in vore in Catalogne e te Comunitât Autonome Valenziane. L’intindiment al è chel di sostignî lis personis che a son stadis discriminadis sul plan linguistic, di fâ informazion sul teme dai dirits linguistics, di tignî di voli la situazion e publicâ rapuarts periodics in proposit e, su la fonde des problematichis vignudis fûr, fâ indenant propuestis normativis che a cirin di superâlis.

Font: La Vanguardia, 28/11/17

Gales: operadôrs dividûts su la sanitât par galês

La organizazion Cymdeithas yr Iaith Gymraeg e à inviât ae gnove ministre galese pe lenghe Eluned Morgan une letare vierte sotscrite di un biel trop di professioniscj e di operadôrs de sanitât che a domandin che intai nivei di tutele minime dal galês si previodi che ducj i servizis sanitaris primaris e di prossimitât a vegnin garantîts ancje par galês. Cun di fat, cemût che si spieghe tal document, plui une persone e je debule o in situazions di emergjence e plui al è impuartant vignîi incuintri cul ûs de lenghe che e à miôr di doprâ. Un concet che al ven ricognossût ancje de sezion galese dal ordin dai miedis (BMA) che però e lamente cemût che, par esempli, in dì di vuê no si vedin avonde miedis di famee cuntune competence linguistiche suficiente par cuvierzi dut il Gales. Par chest a invidin la ministre a meti prime il criteri des cognossincis medichis di chel des competencis linguistichis.

Font: Wales On Line, 27/11/17

Paîs Basc: presentât Euskaraldia par promovi l’ûs de lenghe

Ai 23 di Novembar istituzions de Comunitât Autonome Basche e de Navare e coletîfs impegnâts a pro de lenghe a àn presentât Euskaraldia, une iniziative che si propon di incressi l’ûs sociâl de lenghe basche. Par 11 zornadis, dai 23 di Novembar ai 3 di Dicembar dal 2018, dutis lis aministrazions comunâls e i citadins che a aderissin ae campagne si impegnaran a doprâ la lenghe basche in ogni ocasion pussibile. Nancje inviade la iniziative, a son za uns cuarante i comuns che a àn declarât la intenzion di partecipâ, ma al è timp fintremai Març par aderî. I citadins a podaran invezit dâ la lôr adesion fintremai Setembar. Intant de iniziative, par facilitâ l’ûs dal euskara, a varan intor dai distintîfs che a specifichin se a son in stât di fevelâ la lenghe o pûr se a son dome bogns di capîle ma a àn gust che si ur feveli par basc.

Font: Noticias de Navarra, 24/11/17

Paîs Basc: propueste di acuardi di EH Bildu a PNV e Elkarrekin

EH Bildu, la coalizion de çampe indipendentiste basche, e à presentât un progjet di acuardi nazionâl indreçât al PNV e a Elkarrekin Podemos par fâi cuintri ae “involuzion democratiche” vuidade dal guvier spagnûl di Mariano Rajoy. La propueste e je chê di formâ une maiorance alternative che si poi su trê elements: autoguvier, dirits sociâi e convivence. Denant dal atac cuintri des istituzions catalanis, la coalizion sovraniste basche e sburte par un rapuart di libare adesion e avualiance jenfri Paîs Basc e stât spagnûl che al superi la dimension de autonomie par garantî ad in plen i dirits politics dai bascs. Il progjet al previôt ancje di lavorâ adun par scancelâ la ecezionalitât juridiche che in dì di vuê e viôt ancjemò centenârs di bascs in preson o in esili.

Font: Naiz:, 24/11/17

Macedonie: rinviade la gnove leç linguistiche

In Macedonie si slungje il percors par fâ buine la gnove leç su lis lenghis previodude intal acuardi di guvier tra i Sociâi Democratics e i partîts de comunitât albanese che lu sostegnin. Dopo dal vie libare dât dal Parlament in prime leture, cumò il test al veve di jessi votât une seconde volte ma i emendaments presentâts de oposizion de diestre nazionaliste (VMRO DPMNE) a varessin sprolungjât i lavôrs parlamentârs e ritardât il vôt de riforme dal sisteme judiziari. Une prospetive che no i plaseve masse ae Comission Europeane che, par bocje dal so delegât Johannes Hahn in visite a Skopje ai 20 di Novembar, e à fat capî che la normative su lis lenghis no je une des prioritâts de UE. Il percors de leç al è stât duncje rinviât a dopo de aprovazion des normis sul sisteme judiziari. I albanês a rapresentin un cuart de popolazion de Macedonie: in dì di vuê la lenghe albanese e je duncje couficiâl in ducj i comuns là che cheste comunitât e rapresente almancul il 20% de popolazion. La gnove leç e larès a incressi il status de lenghe ancje là che i albanês no rivin a cheste percentuâl.

Font: Balkan Insight, 24/11/17