05/12/17

Europe: iniziativis a pro dai presonîrs catalans

Une delegazion di 16 deputâts dal Parlament European formade di rapresentants di diviersis areis politichis e à domandât in maniere uficiâl di podê visitâ i rapresentants dal guvier catalan e i presidents des dôs organizazions plui impuartantis dal indipendentisim catalan che si cjatin inmò impresonâts in diviersis struturis carcerariis di Madrid par vie de lôr part intal procès di autodeterminazion de Catalogne. La domande e fâs part di une iniziative inviade dal grup formât di uns 30 europarlamentârs par favorî il dialic tra il guvier di Madrid e lis istituzions catalanis. Par cumò però la visite e je stade impedide des autoritâts spagnolis.
Intant ELEN – la Rêt Europeane pe Avualiance Linguistiche che e ten adun 150 organizazions che a rapresentin 45 comunitâts minorizadis – e à fat bon ae unanimitât un apel par che i presonîrs politics catalans a vegnin liberâts. L’apel si fonde su dôs mozions presentadis des organizazions Plataforma per la Llengua e Acció Cultural del País Valencià par sburtâ la liberazion dai dirigjents catalans impresonâts, par difindi il sisteme scolastic e i mieçs di comunicazion de Catalogne dai atacs che a rivin di Madrid, e par invidâ lis autoritâts europeanis a inviâ une inchieste indipendente su lis violencis dal prin di Otubar.
Font: Jornalet, 30/11/17; ELEN, 15/11/17

Nessun commento: