Alsazie: nuie di fâ pal Consei regjonâl unitari

Nuie di fâ pe nassite dal Consei de Alsazie intal referendum che si è tignût domenie ai 7 di Avrîl. Il gnûf organisim al varès vût di nassi de fusion tra l’atuâl Consei regjonâl de Alsazie e i doi dipartiments dal Alt e dal Bas Ren. Par passâ però, cheste riforme e veve bisugne dal vôt a pro di almancul il 25% dai citadins cun dirit di vôt dai doi dipartiments. Intal Bas Ren, là che al à votât il 37,5% dai citadins, il sì al à otignût tor dal 67% des preferencis, come a dî pôc plui dal 24% dai citadins cun dirit di vôt. Ancjemò piês la situazion intal dipartiment dal Alt Ren là che, cuntune partecipazion di cuasi il 40%, il no al è rivât a plui dal 54% e là che duncje, in rapuart ai citadins cun dirit di vôt, il sì al è stât tor dal 17%, une vore lontan dal minim domandât par inviâ la nassite dal Consei de Alsazie.

Paîs Catalans: si invie la proteste fiscâl pe indipendence

La strade pe indipendence de Catalogne e passe ancje pe proteste fiscâl. A sburtâ par cheste soluzion e je la Associazion dai Comuns pe Indipendence (AMI) che e à comunicât che inte riunion dal esecutîf dai 15 di Avrîl e darà fûr diretivis precisis ai 650 comuns che le componin par che a esercitin la sovranitât fiscâl. Il percors, za inviât di une disine di aministrazions locâls, al previôt che i bêçs des tassis che i comuns a àn di versâ aes cassis dal stât centrâl a vegnin paiâts ae Agjenzie Tributarie Catalane cualchi zornade prime de scjadence. Al sarà po chest organisim a versâju ae agjenzie statâl pes jentradis dentri dai tiermins previodûts. Denant dai dubis jevâts sul fat che in ogni câs i bêçs des tassis catalanis a van a finî intes cassis di Madrid, la Associazion dai Comuns pe Indipendence e à spiegât che si trate di usâ lis aministrazions catalanis a chest passaç e a slargjâ il plui pussibil il sisteme di maniere che cuant che si proclamarà la indipendence si varà za une agjenzie tributarie catalane in vore e in stât di gjestî lis jentradis de Catalogne cence plui passâlis al guvier spagnûl. Ancje la Assemblee Nazionâl Catalane e à fat savê che e batarà la strade de disubidience fiscâl, spiegant ancje ai citadins cuâl che al è il percors miôr par fâlu.

Font: VilaWeb, 05/04/13

Bretagne: campagne di promozion dal insegnament bilengâl

Par dut il mês di Avrîl, intes citâts plui impuartantis de Bretagne, si puedin viodi dai manifescj di cuatri metris par trê che a invidi lis fameis a sielzi pai lôr fîs l’insegnament bilengâl o chel a imersion par breton. Si trate di une campagne istituzionâl finanziade dal Consei regjonâl de Bretagne e svilupade dal Ufici public pe lenghe bretone (OPAB) che e ricuarde che l’ûs dal breton tant che lenghe veicolâr al è disponibil in 430 istitûts e che al è stât sielzût bielzà di passe 14 mil fruts. Par permeti ai gjenitôrs di vê plui informazions sul argoment al è stât ancje metût sù un numar vert che al ven publicizât par mieç di cheste campagne.

Font: Agence Bretagne Presse, 05/04/13

Paîs Basc: denuncie di Herrira pe muart di Xabier López Peña

A son centenârs i bascs sierâts intes presons spagnolis e francesis par vie de lôr partecipazion direte ae lote armade pe indipendence dal Paîs Basc o ancje dome pe lôr ativitât politiche par chest stes fin, cence contâ po ducj chei che pe stesse reson si cjatin dispatriâts. Cundut che par solit si tint a associâ il conflit basc al stât spagnûl, la situazion no je mancul grivie In France. Cun di fat, in dì di vuê, a son 130 i presonîrs bascs intal stât francês là che si cjatin a vivi lis stessis condizions repressivis dai lôr compagns intes presons spagnolis, a tacâ de politiche di dispersion che ju slontane ancje a plui di un miâr di chilometris di cjase e dal tratament disuman tai confronts di chei tra di lôr che si cjatin a vê malatiis une vore seriis. A denunciâ cheste situazion cuntun document inviât aes autoritâts francesis e je la organizazion Herrira dopo de muart in circostancis ancjemò dutis di sclarî dal presonîr Xabier López Peña.

Paîs Catalans: simpri mancul domandis pal spagnûl a scuele

L’implant de scuele catalane che al previôt l’ûs veicolâr de lenghe proprie de Catalogne nol è cambiât e al va dilunc a mantignî la centralitât di cheste lenghe dilunc vie dal percors scolastic sei intai istitûts publics, sei ta chei privâts finanziâts cun fonts publics. Chest il messaç marcât de ministre pe scuele, Irene Rigau, intal rispuindi a di une interogazion fate indenant dal PP intal Parlament de Catalogne. Lis sentencis dai tribunâi spagnûi che tai ultins agns a son intervignudis sul sisteme scolastic catalan, e à zontât la Rigau, a son stadis rispietadis dal moment che lis fameis che a àn domandât pai lôr fîs l’ûs dal castilian tant che lenghe veicolâr a son stadis contentadis. Lis domandis a restin però margjinâls e a son daûr a calâ. Cun di fat, daûr dai dâts comunicâts in Aule de ministre, se intal an scolastic 2011-2012 a domandâ di doprâ il spagnûl tant che lenghe di riferiment pai lôr fruts a jerin stadis 106 fameis, chest an a son stadis a pene 17 in ducj i istitûts publics de Catalogne.

Font: Granada Digital, 03/04/13

Cossovo: inmò nissun acuardi sul destin des areis serbis

Gnûf incuintri ai 2 di Avrîl a Bruxelles tra la delegazion serbe e chê cossovane vuidadis dai doi prins ministris Ivica Dačić e Hashim Thaçi par cirî di cjatâ un acuardi su la gjestion dai comuns dal Cossovo a maiorance serbe. La riunion e à permetût di fâ un pas indenant, ma si è sierade cuntun scuintri verbâl avonde dûr che al à sustât no pôc la responsabile pe politiche foreste de Union Europeane, Catherine Ashton, che e veve di mediâ tra lis parts. Lis areis a maiorance serbe si daran dongje intune gnove realtât aministrative clamade Associazion dai Comuns Serps che e cjape dentri cuatri comuns de aree setentrionâl dal Cossovo e altris sîs sparniçâts intal rest dal paîs. Cheste Associazion e varès di gjoldi di une cierte autonomie e di puartâ cussì ae disparizion des istituzions paralelis finanziadis de Serbie che cumò a guviernin i comuns dongje de frontiere e che no ricognossin la autoritât dal guvier cossovan. Lis dôs delegazions a àn cjatât un acuardi su la costituzion di un cuarp di polizie multietnic che al operi intai comuns de Associazion, ma si son scuintradis su la gjestion dal sisteme judiziari, cui serps che a proponin che i prins doi grâts di judizi a sedin gjestîts dentri de Associazion e i cossovans che invezit a volaressin une integrazion intal sisteme judiziari statâl cu la garanzie di cuotis etnichis. No sec des autoritâts di Belgrât ancje ae presince di reparts militârs cossovans intai comuns a maiorance serbe.

Font: Balkan Insight, 03/04/13

Paîs Basc: in miârs in place pal Aberri Eguna

Miârs di personis si son dadis dongje intes dôs citâts dal Paîs Basc là che ai 31 di Març si son tignudis lis celebrazions principâls pal Aberri Eguna, la Zornade de Patrie Basche. Inte place gnove (Plaza Barria) di Bilbo / Bilbao si è tignude la manifestazion inmaneade dal PNV, partît che cumò al à in man il guvier de Comunitât Autonome Basche. Achì il teme centrâl dai discors uficiâi al è stât chel de crisi economiche e sociâl che e tocje ancje chest blec de Europe. Frontâ cheste situazion e je la prioritât dal guvier basc, al à spiegât il president dal esecutîf Iñigo Urkullu, che al à però rivendicât ancje il dirit a otignî un gnûf status dentri dal stât spagnûl di otignî par mieç di un confront paritari cun Madrid. Se i riferiments ae crisi no son mancjâts, al è stât il teme de indipendence chel plui batût inta chê altre manifestazion pal Aberri Eguna che si è tignude invezit a Iruñea / Pamplona. La celebrazion e je stade coordenade de rêt Independentistak cu la partecipazion maioritarie dai moviments de çampe indipendentiste basche tant che EH Bildu e Sortu. O sin indipendentiscj parcè che o sin realiscj, a àn dite i oratôrs, parcè che o savìn che al è plui facil fâ sù une vere democrazie intun gnûf stât basc che no dentri dai stâts spagnûl e francês. Tancj ancje i riferiments ae situazion dai militants bascs impresonâts, segnâts de emozion pe gnove a pene rivade di Parîs de muart dal presonîr Xabier López Peña.

Font: Gara, 01/04/13

Carelie: si domande di meti ancje la nazionalitât sui documents

Inte Federazion Russe lis popolazions nativis par vie de lôr condizion di minorizazion a gjoldin di cierts vantaçs di nature economiche. Dut câs dispès ce che la leç e previôt al reste dome su la cjarte, massime intes regjons autonomis che a àn mancul risorsis a disposizion. Tant plui che dispès, cui che al varès dirit di gjoldi di chescj jutoris, nol rive a fâsi ricognossi tant che membri di une popolazion native. La cuistion e je stade jevade intant dal congrès federâl rus des popolazions nativis dal Nord, de Siberie e dal Orient lontan. Une strade par superâ chest pidiment, al à zontât il delegât de comunitât dai Veps de Carelie, e sarès chê di tornâ a specificâ sui passepuarts o su chei altris documents identificatîfs la proprie partignince nazionâl, dongje di chê statâl.

Font: Finugor, 29/03/13

Russie: la lenghe dai Komis e fâs un pas indenant su internet

La Academie de Republiche dai Komis pe direzion e pai servizis governatîfs (KRAGSiU) e je il prin istitût di educazion superiôr a creâ une version complete dal so sît internet ancje inte lenghe proprie di chê comunitât de Federazion Russe. Nol è tant che propit un studi svilupât de Academie al veve mostrât cemût che lis lenghis des republichis e des regjons autonomis de Federazion russe, ancje cuant che a àn un ricognossiment uficiâl, a àn une presince margjinâl intai sîts istituzionâi. Sul front de educazion superiôr, dome altris doi istitûts in dute la Federazion, a àn il lôr sît internet intune lenghe de famee ugrofiniche, ven a dî la Academie statâl pedagogjiche de Carelie e la Universitât statâl Petrozavodsk, dutis e dôs cuntune version dal sît ancje par finlandês.

Font: Finugor, 28/03/13

Bosgne: clârs e scûrs pe integrazion tra comunitâts

Ivo Komsic al è il gnûf sindic di Sarajevo, il prin dopo de fin de vuere a no fâ part de comunitât bosgnache. Komsic, rapresentant de Union Sociâl Democratiche e dean de facoltât di filosofie de universitât citadine, al è di fat un membri de comunitât cravuate. Si trate di un segnâl positîf pe integrazion des diviersis comunitâts che a formin la capitâl de Bosgne e, propit ta cheste logjiche, intal so prin discors di sindic al à dite che al lavorarà pe integrazion ancje dai cuartîrs orientâi di Sarajevo, che a fasin part de Republiche Srpska.

Dut câs, propit di cheste part de Bosgne, a rivin brutis gnovis sul front dai rapuarts cu la Federazion di Bosgne e Erzegovine. Cun di fat, la part serbe dal paîs e à decidût di indotâ i siei citadins di codiçs identificatîfs indipendents rispiet a chei de Federazion dopo che lis parts no vevin rivât a cjatâ une posizion condividude su la riforme de leç che e regole chest cantin. I codiçs identificatîfs a àn un valôr impuartant dal moment che a son la fonde par otignî i documents personâi plui impuartants tant che cjarte di identitât, passepuart, tessare sanitarie e cjarte par vuidâ.

Font: Balkan Insight, 28/03/13 e 03/04/13

Galizie: il Parlament al difint la centralitât dal galizian te scuele

I cuatri grups rapresentâts intal Parlament de Galizie – Partît Popolâr (PPdeG), Partît Socialist (PSdeG), Alternativa Galega de Esquerda (AGE) e Bloc Nazionâl Galizian (BNG) – a àn fate buine une mozion unitarie là che a domandin al guvier de Comunitât autonome di difindi la funzion centrâl de lenghe galiziane intal insegnament, cuintri dal procès di margjinalizazion des lenghis couficiâls puartât indenant dal esecutîf spagnûl cul so progjet di leç di riforme scolastiche. I popolârs no àn acetât però di poiâ chei altris ponts previodûts de mozion fate indenant des fuarcis di oposizion là che, tra lis altris robis, si domande di lavorâ par cjatâ un acuardi condividût su la presince dal galizian intes scuelis che al cjapi il puest de cussì clamade leç sul plurilinguisim che, in plui di cjatâ cuintri sei i socialiscj che lis fuarcis nazionalitariis de Galizie, e à vût ancje i judizis negatîfs de magjistrature.

Font: Galicia Hoxe, 27/03/13

Paîs Basc: Ondarroa il paîs là che si fevele di plui par euskara

Al è Ondarroa, inte provincie di Bizkaia, il paîs là che si fevele di plui par basc. Daûr dai dâts di une ricercje curade de associazion Soziolinguistika Klusterra e dal istitût basc di statistiche (Eustat), il 93,6% dai passe 8.800 abitants di chest comun al dopre ogni dì l’euskara. Si trate di une percentuâl une vore plui alte di chê de medie provinciâl, che e je tor dal 31%, e di chê dal rest de comunitât autonome che si sbasse fintremai al 13%. Il dât al è avonde plui alt ancje di chel di localitâts de Bizkaia là che si calcole che la lenghe basche e sedi plui fuarte tant che Gernika e Lekeitio, che a àn un ûs cuotidian de lenghe tor dal 70%. Al è ancje di zontâ che il dât che al ven fûr di cheste ricercje specifiche al è plui alt di chel che si veve otignût cui modei matematics doprâts par inchiestis sociolinguistichis a difusion plui largje.

Font: El Correo, 26/03/13

Gales: invît aes aministrazions locâls a sburtâ il galês

Il ministri pe lenghe galese, Leighton Andrews, al à scrit a dutis lis aministrazions locâls dal Gales par invidâlis a fâ di plui par sburtâ l’ûs de lenghe galese intes lôr comunitâts. Un tant dopo che dai dâts sul ûs de lenghe saltâts fûr dal ultin censiment si à viodût une diminuzion intal ûs de lenghe massime tes areis rurâls là che il galês al jere plui fuart. Se e je vere che la riduzion gjenerâl des risorsis a disposizion e à causât no pôcs problemis, al à spiegât Andrews, chel istès no si pues pensâ par chest di ridusi l’impegn par promovi la lenghe proprie dal Gales. In particolâr, al à zontât il ministri, si à di cirî di incressi lis oportunitâts di doprâ lis competencis intal ûs dal galês sul puest di vore, a tacâ propit dal setôr public.

Font: Caerphilly Observer, 21/03/13

Paîs Catalans: finanziament alternatîf pai progjets pal catalan

La Xarxa Digital Catalana (XaDiCa), organizazion cence finalitât di vuadagn che e lavore par promovi l’ûs dal catalan su internet, e à metût sù une plateforme par racuei fonts par finanziâ piçui progjets che a infuartissin la presince de lenghe catalane su la rêt. La iniziative e à non TotSuma e a distance di nancje un mês de sô partence a son za trê i progjets che a son stâts finanziâts ta cheste maniere. Cui che al fâs lis sôs donazions al à dirit a di un scont su la declarazion dai redits dal 15% de cifre dade, intant che il 5% dai bêçs donâts a vegnin doprâts par cuvierzi i coscj di funzionament de Xarxa.

Font: Generalitat de Catalunya, 19/03/13

Paîs Basc: Korrika 2013, la edizion plui plurâl e partecipade

Si à sierade ai 24 di Març a Baiona / Bayonne, intal Paîs Basc setentrionâl, la edizion numar 18 de Korrika, la corse inmaneade ogni doi agns de AEK (coordenament pe alfabetizazion e pe baschizazion) cun chê di cjapâ sù fonts pe promozion e pal insegnament dal basc e par slargjâ te societât l’ûs di cheste lenghe. La edizion dal 2013, a àn dite i organizadôrs, e je stade la plui partecipade e la plui plurâl cemût che si à viodût ancje de presince di deputâts bascs che a van di Sortu (çampe indipendentiste basche) fintremai al PP (diestre spagnoliste). La corse e je lade indenant cence polsis par undis zornadis e par passe 2.500 chilometris framieç di dutis lis provinciis baschis, o sei Araba, Bizkaia, Gipuzkoa, Lapurdi, Navare e Zuberoa. Come ogni edizion, ancje chest an la Korrika e jere caraterizade di un sproc, o sei “eman euskara elkarri”, ven a dî che la lenghe basche e je di ducj e si pues doprâ par fâ e par fevelâ di dut.

Font: Gara, 24/03/13

Serbie: rom primis vitimis de discriminazion

Ancje in Serbie la Zornade internazionâl pe eliminazion des discriminazions raziâls dai 21 di Març e je stade la ocasion par frontâ cheste tematiche une vore di atualitât intal paîs balcanic. Cun di fat, daûr dal ultin rapuart sul argoment, presentât propit ta chê zornade, al ven fûr che a ricognossi che la cuistion e je une vore penze al è il 60% de popolazion serbe. I dâts publicâts intal rapuart a disin che la comunitât sintude plui lontane dai serps e je chê albanese, i vegnin po daûr cravuats, bosgnacs e rom. E pûr, inte vite di ogni dì, a son propit chescj ultins chei che si cjatin a jessi vitimis dai episodis di violence e di discriminazion plui fuarts. Un fat che al è stât ricuardât ancje de organizazion des Feminis in neri che ai 21 di Març e à inmaneât une manifestazion a Belgrât par dî di no a ogni forme di discriminazion.

Font: Balkan Insight, 22/03/13

Kurdistan: messaç di pâs dal PKK aes autoritâts turchis

In ocasion dal Newroz, la fieste plui impuartante de comunitât curde che e segne il principi dal an gnûf, denant di disinis di miârs di personis che si vevin dadis dongje a Amed / Diyarbakır, capitâl dal Kurdistan turc, al è stât let un messaç di Abdullah Öçalan, là che il leader dal PKK al fevele de partence di une gnove ete là che a fevelâ no saran plui lis armis, ma la politiche. Impresonât aromai di cutuardis agns intun centri di massime sigurece, ta chescj mês Öçalan al è stât impegnât in tratativis cui rapresentants dal guvier di Ankara par cjatâ une soluzion al conflit che, intai ultins trente agns, si calcole che al vedi causât passe 40 mil muarts.

Macedonie: blocs etnics cence precedents pes aministrativis

Intes elezions aministrativis che si son tignudis in Macedonie ai 24 di Març, inte plui part dai comuns la vitorie e je lade al Partît Democratic pe Unitât Nazionâl Macedone (VMRO DPMNE), che al à cumò in man il guvier dal stât, intant che i socialdemocratics si son imponûts in mancul di une disine di aministrazions locâls. Inte aree là che i albanês a son la maiorance, la plui part dai comuns e je lade ae Union Democratiche pe Integrazion (DUI), partît de comunitât albanese aleât dal Partît Democratic pe Unitât Nazionâl Macedone, intant che il Partît Democratic dai Albanês (DPA), cumò ae oposizion a nivel statâl, si è imponût dome intune aministrazion locâl.

Scozie: referendum pe indipendence ai 18 di Setembar dal 2014

Il referendum pe indipendence de Scozie si tignarà ai 18 di Setembar dal 2014. La gnove e je stade comunicade dal prin ministri scozês Alex Salmond e cumò e varà di jessi ratificade dal Parlament: un passaç che però nol varès di dâ nissune sorprese dal moment al è propit il SNP, o sei il prin promotôr dal referendum, a vê la maiorance. Ta chê zornade i citadins scozês, pe prime volte ancje chei di 16 e di 17 agns, a saran clamâts a rispuindi cuntun sì o cuntun no ae domande: “La Scozie aie di deventâ un paîs indipendent?”

Font: BBC, 21/03/13

Irlande: a Galway acès ai servizis par gaelic pidimentât

Dilunc vie dal 2012 inte aree di Gaillimh / Galway, in Irlande, a son cressudis e a àn aromai passât lis cent, lis segnalazions par disservizis o par dificoltâts intal acedi ai servizis publics in lenghe gaeliche. Si trate di un numar ancjemò plui alt di chel che si veve vût intal 2011 e che al rapresente plui dal 14% di dutis lis segnalazions rivadis al ufici dal comissari pe lenghe, Seán Ó Cuirreáin, che nol à platât la sô preocupazion par cheste situazion e che al à fat savê di vê za inviât une inchieste par lâ plui a fonts inte cuistion. Galway al è il centri plui impuartant tra chei cjapâts dentri tal Gaeltacht, o sei lis areis là che il gaelic al à ancjemò une presince significative e là che la normative su la lenghe e je plui fuarte.

Font: Gaelport, 21/03/13