Paîs Catalans: fate buine la declarazion di sovranitât

Ai 23 di Zenâr il Parlament de Catalogne al à fate buine la Declarazion di sovranitât dal popul catalan. La aprovazion dal document, che e rapresente il prin pas intal procès di autodeterminazion de Catalogne, e je rivade cun 85 vôts a pro, 41 contraris e dôs astensions. A votâ a favôr de Declarazion a son stâts CiU, ERC – lis dôs fuarcis politichis plui votadis intes ultimis elezions – e ICV-EUiA. Dai trê deputâts de CUP, formazion de çampe radicâl e indipendentiste catalane, un al à votât a pro e doi si son astignûts par pandi di une bande la volontât di aderî al procès di autodeterminazion e di chê altre la domande di une azion plui radicâl pe indipendence. A votâ cuintri dal document a son stadis invezit lis dôs fuarcis dal front spagnolist, o sei PP e Ciutadans, e il PSC. La decision de dirigjence socialiste di votâ cuintri e à però jevât cetantis contrarietâts dentri dal partît al pont che cinc deputâts socialiscj, pûr di no votâ cuintri, a àn decidût di no partecipâ al vôt.

Paîs Basc: a coventin plui oportunitâts di doprâ l’euskara

L’ûs de lenghe basche al è daûr a infuartîsi, ma e covente une politiche linguistiche ative che e crei plui ocasions par doprâle, intal timp libar, intes relazions interpersonâls e intai mieçs di comunicazion, une politiche che e à di jessi puartade indenant no dome dal guvier basc e dai organisims impegnâts pe promozion dal euskara, ma di ducj. Al è chest in struc il messaç che al è rivât dal ministri pe politiche linguistiche de Comunitât Autonome Basche Patxi Baztarrika, intant de presentazion dai dâts de ricercje sul ûs de lenghe fate inte suaze dal progjet Arrue.

UE: iniziative popolâr par difindi i dirits des minorancis

La idee di une iniziative popolâr e parlamentâr par infuartî il sisteme di tutele des minorancis linguistichis e nazionâls dentri de Union Europeane al è stât lançât dal europarlamentâr socialist ongjarês Csaba Tabajdi intant di une conference inmaneade de Aleance Democratiche dai Ongjarês in Romanie (RMDSz), partît di riferiment de comunitât magjare de Romanie, e de Union Federâl des Nazionalitâts Europeanis (FUEN). Il grup parlamentâr su lis minorancis al è pront a dâ dute la sô poie, al à dite l’europarlamentâr, a di une iniziative popolâr par cjapâ sù un milion di firmis par che la Comission Europeane e meti adun un implant legjislatîf che al garantissi a dutis lis minorancis la no discriminazion, la protezion de diversitât linguistiche e culturâl, e la paritât intai dirits linguistics, tal insegnament des lôr lenghis e tal acès ai servizis publics. Il test de iniziative di leç popolâr al varès di jessi metût jù dentri de prime metât dal 2013 e po al sarà metût a disposizion des organizazions des minorancis ator pe Europe pe racuelte des firmis.

Font: Politics.hu, 24/01/13

Ongjarie: azion par boicotâ i media che a dan acet al razisim

A son vincjecinc lis organizazions pai dirits umans – a tacâ de sezion ongjarese di Amnesty International – che a àn sotscrit un apel aes multinazionâls e aes impresis plui impuartantis che a comprin spazis publicitaris sul cuotidian ongjarês Magyar Hírlap (tant che Vodafone, Ikea, OTP Bank, CIB Bank dal grup Intesa SanPaolo, Magyar Telekom, lis puestis e lis feroviis ongjaresis, e v.i.) par che no lu fasin plui fintremai che il gjornâl nol finirà di publicâ articui e declarazions di stamp razist, antisemitic e omofobic, e nol domandarà scuse par chei za publicâts. Intal cuotidian, juste par fâ un esempli, a àn cjatât spazi articui là che si diseve che “une buine part dai rom no son fats pe coesistence, par vivi tra i oms; chestis personis a son animâi e si compuartin di animâi (...) la uniche robe che a capissin e je la fuarce rude...”. Si trate di declarazions inmò plui pericolosis intun paîs tant che la Ongjarie là che tai ultins agns diviers rom a son stâts sassinâts in atacs di stamp razist e là che lis organizazions di estreme diestre a organizin dispès marcis paramilitârs par spaurî e menaçâ lis comunitâts rom.

Font: ERRC, 23/01/13

Friûl: in linie la prime part dal archivi storic dal MF

Un prime part dal archivi storic dal Moviment Friûl, il sogjet politic nazionalitari furlan plui impuartant dal dopo vuere, e je stade metude in rêt sul sît dal MF, alì de direzion www.archivi.movimentofriuli.it . Si trate di documents ordenâts daûr dal argoment che a àn un interès no dome par cui che si ocupe di nazionalitarisim e di storie politiche, ma ancje par cui che al vûl jentrâ plui a fonts inte evoluzion sociâl e politiche dal Friûl dai agns ’60 dal secul stât incà. La scree dal sît si le à vude in ocasion dal inovâl pai 41 agns de muart di Fausto Schiavi, president dal MF dal 1967 al 1972. La digjitalizazion dal archivi dal moviment e va indenant e intal zîr di un pâr di agns il materiâl al varès di jessi dut disponibil in rêt.

Font: Moviment Friûl, 23/01/13

Cornualie: promessis no mantignudis dai partîts britanics

Si svicine la date des elezions pal Consei de Cornualie (Konsel Kernow), in program ai 2 di Mai di chest an, e ancje ta cheste piçule nazion celtiche si tache a impiâ il scuintri eletorâl. Mebyon Kernow, il principâl partît nazionalist de Cornualie, al invide i eletôrs a viodi tropis des promessis fatis dai partîts che cumò a guviernin il Ream Unît, ven a dî conservadôrs e liberâi democratics, a son stadis pardabon mantignudis. I nazionaliscj cornics a ricuardin che David Cameron, atuâl prin ministri britanic, si veve impegnât a meti sù un ministeri pe Cornualie ma nol à inmò mantignût la promesse. Cun di plui, conservadôrs e liberâi democratics no àn scoltât la domande rivade de Cornualie di inviâ un procès di devoluzion che al puartàs ae nassite di une Assemblee nazionâl sul model di chê galese, al contrari a son daûr a imbastî une circoscrizion eletorâl che e meti la Cornualie adun cu la regjon inglese dal Devon. In dì di vuê, Mebyon Kernow al à 6 dai 123 membris dal Konsel Kernow, ma la sô fuarce di atrat e somee in cressite, ancje in gracie dal disinterès che i partîts plui grues a mostrin pe Cornualie.

Font: Mebyon Kernow, 21/01/13

UE: analiscj rus a previodin la nassite di stâts gnûfs in Europe ocidentâl

Daûr di diviers notiziaris serps, analiscj rus a varessin dât fûr un rapuart su la evoluzion politiche e istituzionâl de Europe di chi al 2035. Lis reazions aes previsions che si cjatin intal document a van dal curiôs al perplès, dal moment che dongje di evoluzions che si fondin su procès za inviâts a ‘nd è altris che si poin su elements avonde dubis. Tra lis previsions che si cjatin intal rapuart o cjatìn la indipendence de Scozie, de Catalogne, dal Paîs Basc, de Corsiche e de Valonie; la unificazion de Irlande; la union tra Serbie, Montenegro e Bosgne, chê tra Paîs Bas e Flandris, e la division in trê tocs dal stât talian.

Font: Naiz:, 21/01/13

Galizie: gnove plateforme sociâl par galizian

Su internet e je rivade une gnove plateforme sociâl che si propon di deventâ la rêt sociâl de Galizie. Vituin – chest il so non – e permet ai utents di comunicâ cui amîs, condividi fotografiis e videos, imbastî events, partecipâ a discussions e creâ blogs. La plateforme sociâl e je disponibile par galizian, ma ancje par spagnûl, portughês e inglês.

Font: Codigo Cero, 18/01/13

Irlande: plui partecipazion publiche tes strategjiis pal gaelic

Intal 2010 il guvier irlandês al à dât fûr il so plan strategjic pal svilup dal gaelic intai 20 agns seguitîfs. Un an plui tart l’esecutîf di Dublin al à decidût di cjapâ dentri intes ativitâts di control, svilup e implementazion dal plan ancje Foras na Gaeilge, Údarás na Gaeltachta e altris agjenziis statâls. Su la cuistion e interven cumò la organizazion Conradh na Gaeilge che ta chestis zornadis e à dât fûr un document cu lis sôs valutazions su lis strategjiis linguistichis dal guvier irlandês. Se si vûl che il plan al rivi ai obietîfs che si à dât, e dîs la organizazion, al covente meti sù un grup di lavôr che al viodi di adatâ la strategjie aes dibisugnis dal teritori. Par chest intal grup a àn di vê un puest di prin plan i rapresentants des comunitâts di lenghe irlandese che a àn di podê intervignî intai procès decisionâi cun percors di partecipazion facilitâts.

Font: Gaelport, 17/01/13

Asturiis: progjet pal insegnament curicolâr dal asturian

Intant dal incuintri tra la assessore pe educazion e pe culture dal Principât des Asturiis, Ana González, e dal ministri spagnûl pe istruzion, José Ignacio Wert, par discuti de propueste di leç di riforme de cualitât educative e je jessude une novitât impuartante pe lenghe asturiane. Cundut de contrarietât manifestade sul implant gjenerâl de leç, la rapresentante dal guvier asturian e à rivât a cjatâ un acuardi suntun emendament al test là che si previôt la presince curicolâr (e duncje obligatorie) de lenghe asturiane in dutis lis scuelis dal Principât.

Font: RTPA, 17/01/13

Cossovo – Serbie: si torne a alçâ la tension tra serps e albanês

Ai 16 di Zenâr il prin ministri serp Ivica Dačić e chel cossovan Hashim Thaçi si vevin cjatâts a Bruxelles par cirî di cjatâ un acuardi su la gjestion dal confin tra i doi paîs, massime chel che al passe pe aree setentrionâl dal Cossovo a maiorance serbe. Cu la mediazion de UE si veve rivât a cjatâ un prin acuardi su la tassazion des marcjanziis in jentrade de Serbie. La propueste e jere chê di creâ un font specific dulà versâ chestis jentradis che a saressin po stadis dopradis dome par finanziâ struturis e ativitâts inte aree dal Cossovo a maiorance serbe. Dut câs la idee di vierzi chest cont intune bancje cossovane e je stade refudade cualchi zornade plui tart dal guvier serp ancje parcè che, intal framieç, si vevin vûts diviers episodis che a vevin tornât a alçâ la tension jenfri serps e albanês. Cun di fat, ai 20 di Zenâr, poliziots serps a vevin sdrumât jù a Preševo / Presheva (citât serbe cuntune fuarte comunitât albanese) un memoriâl dedicât ai veterans dal Esercit di liberazion di Preševo, Medvedja e Bujanovac, une milizie albanese ative par cualchi timp cuintri dal esercit serp. Tes zornadis seguitivis in Cossovo a son stadis vandalizadis disinis di tombis serbis a Klokot / Kllokot e Prizren / Prizreni, e il monument ai muarts inte seconde vuere mondiâl di Vitina / Vitia.

Font: Balkan Insight, 16-25/01/13

Gales: mobilitazions par sburtâ politichis gnovis pal galês

I dâts linguistics jessûts dal censiment gjenerâl dal 2011 a àn jevât une vore di preocupazion in Gales, là che il numar di personis che a àn declarât di doprâ il galês si è sbassât dal 21% al 19% rispiet a dîs agns prime. Cheste riduzion, in cuintritindince rispiet ai agns prime, si le à viodude massime intes areis rurâls là che la lenghe galese e jere plui fuarte. Denant di cheste situazion la Cymdeithas yr Iaith Gymraeg (Societât pe Lenghe Galese), organizazion in prime linie inte difese dai dirits linguistics, e à inviât diviersis iniziativis. Prin di dut al è stât prontât un manifest cu lis azions di podê svilupâ par invertî chest procès. Il document al sarà presentât in curt al prin ministri galês Carwyn Jones, ma ancje ai rapresentants di dutis lis fuarcis politichis presintis inte Assemblee Nazionâl dal Gales. Par fâi cuintri a cheste diminuzion intal numar des personis che a fevelin par galês, la organizazion e à ancje dite che lis risorsis metudis intal ultin belanç pe lenghe a coventaressin cuadruplicadis. Cun di plui, la Cymdeithas e va indenant cu lis mobilitazions sul teritori par sensibilizâ int e istituzions. La ultime azion si è tignude ai 19 di Zenâr alì dal palaç provinciâl di Caerfyrddin / Carmarthen, là che diviers centenârs di personis a àn domandât che si metin in cjamp dutis lis azions pussibilis par permeti ae int di vivi ad in plen par galês.

Font: Cymdeithas ir Iaith Gymraeg, 14-19/01/13

Sardegne: domandadis plui risorsis pe lenghe sarde

Un gnûf implant legjislatîf e plui risorsis pe lenghe sarde. Cheste la domande fate indenant dal assessôr Sergio Milia a chei altris membris dal esecutîf che al vuide la Sardegne. La propueste e diven dal sburt simpri plui fuart che al rive dal bas par une politiche linguistiche plui incisive a pro de lenghe proprie de isule. La cuistion, al spieghe l’assessôr, e je centrâl ancje intune logjiche di difese de autonomie speciâl de Regjon Sardegne. Tra i obietîfs di cheste iniziative si à ancje chel di rivâ a invistî su la lenghe sarde almancul 7/8 milions di euros dal belanç totâl de Regjon che in dì di vuê al è tor dai 7 miliarts.

Font: L’Unione Sarda, 10/01/13

Paîs Basc: passe cent mil personis pai presonîrs politics

Sabide ai 12 di Zenâr passe cent mil personis, almancul 115 mil daûr di diviersis stimis, a àn colassât il centri di Bilbo / Bilbao par chê che e ven calcolade la plui grande manifestazion popolâr inte storie resinte dal Paîs Basc. La iniziative e jere stade clamade dongje de organizazion Herrira par domandâ il rispiet dai dirits dai presonîrs politics bascs e par sburtâ lis autoritâts spagnolis e francesis a impegnâsi intune soluzion pacifiche par risolvi il conflit basc. Plui intal specific si domandave la fin de politiche penitenziarie di ecezion cumò in vore cuintri dai presonîrs bascs che e previôt la dispersion e il slontanament dai presonîrs dai lûcs di divignince, che no ur da dirit ai sconts di pene che la leç e previodarès par cui che al è in preson, e che e pidimente la liberazion di chei presonîrs che a patissin di malatiis terminâls.

Paîs Catalans: prin acuardi su la declarazion di sovranitât

Daûr di ce che a vevin concuardât intes setemanis stadis, CiU e ERC a àn metût jù il stampon de Declarazion di sovranitât dal popul catalan, prin pas intal procès par rivâ ae indipendence de Catalogne. Lis dôs fuarcis politichis plui votadis intes ultimis elezions catalanis a àn presentât il test ai 10 di Zenâr e, te stesse zornade, lu àn zirât ai rapresentants di chei partîts, tant che ICV-EUiA, CUP e PSC, che a podaressin sotscrivilu ancje se cun cualchi modifiche. Il document al è svilupât su sîs ponts: il prin al dîs che la sovranitât i spiete al popul catalan; il secont al fevele dal dirit ae autodeterminazion tant che di at di legjitimitât democratiche; il tierç al bat sul principi de trasparence e sul dirit dai citadins a vê plene informazion sul procès di autodeterminazion; il cuart al impegne a inviâ, intant dal procès, un dialic cul stât spagnûl, cu lis istituzions europeanis e cun chês internazionâls; il cuint al mostre la volontât di restâ inte suaze de Union Europeane; e l’ultin al previôt di bati ducj i percors democratics par rivâ a esercitâ il dirit ae autodeterminazion.

Font: Gara, 11/01/13

Scozie: referendum pe indipendence, prin sì di Westminster

Il Comitât pai Afârs Scozês dal Parlament britanic al à dât la sô poie al acuardi cjatât intal Otubar stât jenfri i guviers di Londre e di Edimburc sul davuelziment dal referendum pe indipendence de Scozie. Vie libare, duncje, al trasferiment parziâl dai podês al Parlament scozês par permetii di fissâ, dentri de suaze za concuardade dai doi esecutîfs, lis regulis pal vôt referendari. Pal Comitât di Westminster, dut câs, chestis regulis a àn di jessi decidudis in maniere di jessi il plui condividudis e justis che si pues. La decision su la indipendence – a disin i membris dal Comitât inte lôr relazion finâl – i spiete dome ai scozês e il rest dal Ream Unît al à di jessi pront a acetâle, se però i scozês a vessin di decidi di restâ inte union, almancul par une gjenerazion no si varà plui di fevelâ di referendum su la indipendence.

Font: BBC, 11/01/13; VilaWeb, 11/01/13

Kurdistan: trê militantis dal PKK sassinadis a Parîs

Il sassinament di trê militantis dal PKK (Partît dai Lavoradôrs dal Kurdistan) a Parîs vie pe gnot jenfri i 9 e i 10 di Zenâr al à jevât la indignazion plui totâl des comunitâts curdis sparniçadis ator pe Europe, ma presintis massime in Gjermanie e in France. A pierdi la vite intal atac a son stadis Sakine Cansiz, cofondadore dal PKK, Fidan Doğan, rapresentante dal Congrès Nazionâl dal Kurdistan, e Leyla Söylemez, zovine ativiste dal moviment. Lis trê a son stadis sassinadis a colps di revolvar cun modalitâts che a son stadis definidis chês di une vere e proprie esecuzion. Intes zornadis seguitivis manifestazions si son davueltis in diviers paîs europeans par pandi la rabie, il dolôr ma ancje la determinazion dai curdis a lâ indenant inte lôr lote. Lis autoritâts francesis, a tacâ dal president François Hollande, a àn fevelât di crimin oribil e a àn sigurât che a fasaran di dut par scuvierzi i siei responsabii. Framieç de comunitât curde e par diviers osservadôrs internazionâi la ipotesi judicade plui probabile e je chê di un atac metût in at par sabotâ lis tratativis di pâs che une part des autoritâts turchis e sarès daûr a imbastî cul PKK.

Font: La Monde, 10/01/13; The Guardian, 10/01/13

Bretagne: petizion par une tv publiche bretone e bilengâl

Ai 14 di Dicembar il Consei regjonâl de Bretagne al veve fate buine cuasi ae unanimitât une mozion là che si sburtave la creazion di une television publiche che e rivàs a dute la Bretagne, duncje ancje ae Loire Atlantiche che dal pont di viste aministratîf e fâs part di une altre regjon, e che si indreçàs a ducj i bretons, ven a dî che in plui dal francês e dopràs ancje la lenghe proprie de Bretagne. Un tant al rive intun moment là che il guvier di Parîs e la direzion de television publiche francese si mostrin disponibii a riviodi l’implant dal canâl France 3 intun sens plui regjonalist. Cumò, a front di cheste situazion, e je stade inviade ancje une petizion in rêt indreçade massime ai citadins de Loire Atlantiche par domandâur che a sburtin ancje lôr par une television publiche bretone e bilengâl.

Font: Agence Bretagne Presse, 10/01/13

Gales: BBC Cymru cence musiche galese moderne

Dal prin di Zenâr di chest an, Radio Cymru, il canâl radiofonic galês de BBC, e à vût di ridusi il spazi des sôs emissions e si è ricjatade a trasmeti dome musiche classiche e imnis tradizionâi al puest de musiche galese moderne. Un tant al è il risultât dal contrast tra la direzion de aziende publiche e il sindacât dai musiciscj galês che al à puartât Radio Cymru a pierdi i dirits di emission di uns 30 mil cjançons. Lis tratativis tra lis parts a van indenant ma, cundut che si à vût un svicinament, par cumò no si à ancjemò cjatât un acuardi. La emitente publiche e à plui o mancul 142 mil scoltadôrs par setemane e cheste situazion e à za tacât a ridusi il lôr numar.

Font: BBC, 09/01/13

Cossovo - Albanie: proponût un referendum pe unificazion

La Aleance Rosse e Nere (AK), un partît albanês nassût di pôc, al à proponût di imbastî un referendum par meti adun Albanie e Cossovo intun stât unic. Une iniziative dal gjenar si scuintre però sei cu la oposizion dai stâts de aree balcaniche, de Union Europeane e dai Stâts Unîts, sei cu la stesse costituzion dal Cossovo che e proibìs la sô unificazion cuntun altri stât. La propueste e somee duncje dome une azion di stamp eletoralistic viodût che in Albanie si larà a votâ pal Parlament ai 23 di Jugn. Si à dut câs di dî che, daûr di une inchieste fate l’an passât, l’81% dai cossovans e il 63% dai albanês a saressin a pro di une union tra i doi stâts.

Font: Nationalia, 09/01/13