Jamalie - Nenetsie: promozion des lenghis nativis ancje in rêt

Il program 2012 – 2015 pe tutele des tradizions, de culture e des lenghis des popolazions nativis de regjon autonome de Jamalie – Nenetsie, intal Nord de Federazion russe, al previôt ancje il svilup di un portâl internet dut dedicât aes popolazions nativis di chest teritori. Intal sît si cjataran spazis di aprofondiment su la culture, la leterature, lis tradizions des popolazions cjapadis dentri tal progjet, ma ancje ricercjis e articui gjornalistics su di lôr, adun cuntun cuadri de lôr situazion educative e artistiche. In plui che par rus, il portâl al sarà disponibil ancje intes lenghis dai nenets, dai khantis e di chei altris popui natîfs de regjon. In Jamalie – Nenetsie, une des autonomiis plui atentis ai dirits des comunitâts minorizadis, i rus a rapresentin la plui part dai residents (61,7%) e lis comunitâts nativis no rivin nancje al 10% de popolazion totâl. Il grup plui numerôs al è chel dai nenets (5,9%) seguît di khantis (1,9%) e komis (1%) che a partegnin ducj ae famee linguistiche uraliche, i prins intal grup samoideic e i seconts inta chel ugrofinic.

Font: Finugor, 21/06/12

Galizie: galizian discriminât inte justizie

Un judiç di Vigo al à refudât une domande che i jere rivade par vie che e jere stade scrite par galizian e al à fat savê che al larà dilunc a fâlu fintremai che il document nol sarà metût jù par castilian. No je la prime volte che un magjistrât si rint responsabil di un fat dal gjenar, e ricuarde A Mesa pola Normalización Lingüística, organizazion in prime linie inte difese dai dirits linguistics. Chest gnûf câs di discriminazion cuintri di une lenghe che in Galizie e gjolt di un status di couficialitât al à puartât A Mesa a denunciâ la vicende denant dal tribunâl superiôr di justizie de Galizie, dal consei gjenerâl dal podê judiziari, dal guvier galizian e di chel spagnûl. “No si pues acetâ – a spieghin i dirigjents de organizazion galiziane – che la aministrazion che e à di viodi dai nestris dirits, ancje chei linguistics, e sedi la prime a dineâju”.

Font: Galicia Hoxe, 21/06/12

Paîs Catalans / Paîs Basc: al rive twitter par catalan e par basc

Cui 5 di Lui a saran a disposizion sul marcjât ancje lis versions di twitter par catalan e par basc. Dopo di diviers mês di campagne, i aministradôrs di twitter a àn vierzût il lôr centri di traduzion ai utents che a vevin chê di dâ il lôr contribût par voltâ cheste rêt sociâl par catalan e par basc. In pôc plui di un mês la operazion e je rivade insom e cun Lui ducj chei che a volaran a varan a disposizion la version di twitter ancje ta chestis dôs lenghis. Adun cun basc e catalan, la configurazion de rêt dai “vuits” e je stade voltade ancje par afrikaans, grêc e ucrain.

Font: El Pais, 20/06/12

Aragon: il guvier dal PP al vûl ridusi la presince des lenghis propriis

La assessore pe culture dal guvier dal Aragon, Dolores Serrat, e à presentât i contignûts dal disen di leç che al larà a cjapâ il puest de leç su lis lenghis fate buine a pene tal 2009. Il test al varès di rivâ al esam dal parlament regjonâl intal mês di Setembar. La leç cumò in vore e calcole l’aragonês e il catalan lenghis propriis dal teritori e a ‘nt garantìs l’ûs intai rapuarts cu lis aministrazions publichis e, in maniere parziâl, ancje tes scuelis. Il guvier regjonâl, cumò intes mans de diestre spagnoliste (PP) e dai lôr aleâts regjonaliscj dal PAR, al à però decidût di limitâ i dirits che la leç su lis lenghis e previodeve, cussì chei che prime a jerin dirits garantîts cumò a dipendaran de volontât des diviersis istituzions. Par esempli i citadins a podaran doprâ lis lôr lenghis propriis par comunicâ cu lis aministrazions locâls, ma chestis no saran obleadis a rispuindi te stesse lenghe. Catalan e aragonês a restaran inte scuele, ma no tant che lenghis veicolârs pal insegnament. Cun di plui, intal test de propueste, e sparìs la peraule “catalan” e al so puest si dopre “lenghe aragonese de aree orientâl dal Aragon”. A sparî a son ancje i doi organisims di riferiment pes lenghis propriis dal paîs, o sei la Academie de lenghe aragonese e la Academie aragonese dal catalan, che a vegnin sostituîts di une sole Academie aragonese de lenghe. La iniziative e à jevât daurman la proteste des associazions ativis intal cjamp de promozion dal catalan, unidis inte organizazion Iniciativa Cultural de la Franja, che e denuncie sei lis limitazions ai dirits di cui che al fevele par catalan o par aragonês, sei la disparizion dal non “catalan” che pûr al è ricognossût di dute la comunitât sientifiche.

Font: VilaWeb, 19/06/12; La Vanguardia, 19/06/12; Europa Press, 18/06/12

Paîs Basc: l’indipendentisim al jes dai tribunâi vincidôr

Il suspiet nol è un argoment juridic suficient par condizionâ l’esercizi dal dirit di associazion. E je cheste la motivazion principâl che e sta daûr de sentence dal tribunâl costituzionâl spagnûl che e ricognòs a Sortu, partît de çampe indipendentiste basche, il dirit di davuelzi la sô ativitât politiche in maniere legâl. Sortu al jere nassût cun chê di cjapâ sù il testemoni di Batasuna, partît metût fûr leç cu la acuse di jessi part de organizazion armade basche ETA. La politiche di ilegalizazion metude in at dal guvier e de magjistrature spagnole cuintri di ducj i sogjets de çampe indipendentiste basche e veve colpît ancje Sortu e i veve impedît di regjistrâsi tant che partît politic legâl e di presentâsi aes elezions. La sentence dal tribunâl costituzionâl e ribalte però il judizi dal tribunâl suprem, organisim che al à cjapât sù la ereditât dai tribunâi speciâi di ete franchiste, e i da a Sortu la pussibilitât di davuelzi ae lûs dal soreli la sô ativitât politiche. La decision e à cjatât il bon acet de grande maiorance dai partîts politics dal Paîs Basc, ma no je stade cjapade par nuie ben dal guvier di Madrid che al è intes mans de diestre spagnoliste dal PP. Cun di fat, sei il ministri pe justizie, sei chel pal interni, a àn dite a clâr di no condividi la decision dal tribunâl costituzionâl.

Montenegro: lis aministrazions no metin in at lis politichis pai rom

Il vicepresident dal Consei Nazionâl dai Rom dal Montenegro, Muhamed Ukovic, al à acusât il guvier centrâl e lis aministrazions locâls dal stât balcanic di no vê fat nuie par miorâ lis condizions di vite dai rom montenegrins. Diviers comuns, par esempli, a àn za cjapât i bêçs par miorâ la situazion abitative dai rom, ma no àn ancjemò spindût un franc par fâlu. Il stes guvier centrâl al varès spindût sì e no il 30% des risorsis che al à a disposizion par chest obietîf. La situazion e je ancjemò piês pai 3 mil sfolâts rom, scjampâts dal Cossovo ancjemò tal 1999, che a vivin pe plui part intal cjamp di Konik, dongje Podgorica. Il Consei de Europe al calcole “disumanis” lis condizions di vite ta chest sît e al à metût a disposizion 3 milions di euros par cjatâ une soluzion abitative divierse pai rom, pal moment però cence nissun risultât.

Font: Balkan Insight, 18/06/12

Stât francês: prin autonomist breton elet intes legjislativis

E je la Bretagne a vignî fûr miôr dal secont turni des elezions legjislativis intal stât francês che si è tignût ai 17 di Jugn. Cun di fat, pe prime volte, un candidât espression dal nazionalisim breton moderât al è stât elet inte Assemblee francese. Si trate di Paul Molac, su posizions une vore dongje de UDB (Union Democratiche Bretone) ma che al coreve pe liste Europe Écologie cu la poie ancje di verts e socialiscj. Elet inte cuarte circoscrizion dal Morbihan cul 52,56% des preferencis, Molac al rive di une lungje militance bretoniste che lu à puartât ancje ae presidence des Div Yez, lis scuelis publichis bilengâls, e dal Consei culturâl de Bretagne. Simpri intes filis di Europe Écologie, cun cuasi il 59% des preferencis, al è stât confermât François de Rugy, un dai deputâts a pro de riunificazion aministrative de Loire Atlantiche cul rest de Bretagne. Nuie di fâ, invezit, pai doi candidâts di Femu a Corsica che a vevin rivât a passâ al secont turni. Jean-Christophe Angelini si è fermât al 46,8% dai vôts, intant che Gilles Simeoni si è plaçât secont inte sfide a trê cui candidâts de UMP e dal Parti Radical de Gauche. Chel istès, sul front dai vôts racuelts, si trate dal miôr risultât dal nazionalisim cors intes legjislativis.

Font: Ministère de l'Intérieur, 17/06/12; Le Monde, 17-18/06/12; Agence Bretagne Presse, 18/06/12; Alta Frequenza, 18/06/12

Irlande: riforme de television publiche, servizis par gaelic adun

Nancje la radiotelevision di stât si gjave fûr de politiche di riduzion des spesis metude in vore intal setôr public irlandês. Cussì Radio Telefís Éireann (RTE), dopo vê ridusût lis paiis dai siei dipendents di plui dal 10%, e je cumò daûr a ridusi il numar dai siei uficis sul teritori. Sul front dai servizis in lenghe irlandese, si calcole di limitâ lis spesis cul meti adun i diviers sogjets che a operin ta chest setôr, o sei Radio na Gaeltachta, TG Ceathair e il servizi di informazion gjornalistiche Nuacht. Pai dirigjents de radiotelevision irlandese cheste unificazion no puartarà a di une riduzion dai servizis par gaelic, ma al varès di infuartîju.

Font: Gaelport, 17/06/12

Sardegne: discriminatori il test di ratifiche de Cjarte europeane pes lenghis

L’assessôr regjonâl pe istruzion de Sardegne, Sergio Milia, al à scrit a ducj i parlamentârs elets inte isule par domandâ che a intervegnin par modificâ il test di ratifiche de Cjarte europeane des lenghis regjonâls o minoritariis che al à di jessi esaminât de Cjamare dai deputâts. Cun di fat, il test cussì cemût che al è al ven judicât discriminatori tai confronts di ciertis lenghis minorizadis feveladis dentri dal stât talian. Par esempli, cundut che il sart e il furlan a sedin lis lenghis minoritariis plui feveladis, – al spieghe il rapresentant de Regjon Sardegne – intal test de ratifiche a son une vore penalizadis a front des lenghis bielzà tuteladis di tratâts internazionâi tant che il todesc dal Sud Tirôl o il francês de Val di Aoste. A mobilitâsi par che la aministrazion regjonâl e fasès sintî la sô vôs su chest teme al jere stât massime il Comitadu pro sa limba sarda.

Font: Italian Network, 14/06/12

Irlande: il gnûf dean di Derry al sburte il gaelic

Il conseîr comunâl dal Sinn Féin, Kevin Campbell, al è stât elet tant che gnûf dean di Doire / Derry, la seconde citât par impuartance de Irlande dal Nord. Par un an a dilunc al varà di vuidâ il Consei comunâl e davuelzi lis funzions di prin citadin. La sô nomine e ven a colâ intun moment une vore impuartant pe citât che, dilunc vie dal 2013, e sarà la capitâl de culture dal Ream Unît. Par disfrutâ di cheste oportunitât une vore impuartante – al spieghe Campbell – la citât e à di lavorâ adun par valorizâ il so patrimoni storic e culturâl unic. Ta cheste logjiche al è impuartant promovi ancje il gaelic irlandês, al à po zontât il dean che al pues svantâ une lungje dade di militance a pro de lenghe. Un segnâl une vore fuart se si pense che Derry, cu la sô storie, e à rapresentât un dai esemplis plui grues de discriminazion, ancje linguistiche, che la comunitât unioniste e à imponût a chê nazionaliste irlandese, cundut che cheste ultime e rapresente la maiorance de popolazion de citât.

Font: Gaelport, 12/06/12

Slovachie: violencis razistis, gnove condane de Cort europeane

Ai 12 di Jugn la Cort europeane pai dirits umans e à condanât lis autoritâts slovachis par no vê perseguît i responsabii di une agression di stamp razist puartade indenant intal Fevrâr dal 2002 cuintri di un grup di rom e par no vê proviodût a nissun gjenar di risarciment pes vitimis. Nol è tant che l’organisim judiziari european al veve condanât la Slovachie pal compuartament de sô magjistrature intal câs di une fantate de minorance ongjarese pacade di doi estremiscj di diestre par vie de sô partignince etniche.

Font: ERRC, 12/06/12

Romanie: tes aministrativis i ongjarês a sielzin la UDMR

Intes elezions aministrativis che si son davueltis ai 10 di Jugn in Romanie e je stade la Union Sociâl Liberâl a otignî i risultâts miôr. La coalizion – che e met adun il Partît Sociâl Democratic, il Partît Nazionâl Liberâl e il Partît Conservadôr – e à sfiliât il 50% dai vôts e concuistât 36 dai 41 conseis provinciâi rumens e plui di un tierç dai comuns dal paîs. Tra i partîts de comunitât ongjarese, une vore numerose in Transilvanie, a imponisi e je stade la UDMR (Union Democratiche Magjare in Romanie). In plui di otignî cuasi 470 mil vôts, o sei il 5,45% su scjale statâl, e à otignût la maiorance in doi conseis provinciâi – chei di Hargita / Harghita e di Kovászna / Covasna – e in 202 comuns, tra chescj o cjatìn la citât di Marosvásárhely / Târgu Mureş e altris centris impuartants tant che Sepsiszentgyörgy / Sfântu Gheorghe, Csíkszereda / Miercurea Ciuc e Székelyudvarhely / Odorheiu Secuiesc, ducj logâts tal cussì clamât Székelyföld là che la popolazion ongjarese e je ancjemò maioritarie. La UDMR e à po concuistât diviersis citadinis ancje te aree dongje dal confin cu la Ongjarie tant che Margitta / Marghita, Nagyszalonta / Salonta e Nagykaróly / Carei. Il Partît Popolâr dai Ongjarês de Transilvanie e il Partît Civic Ongjarês, doi grups di diestre che a vevin vût une poie massive de bande dal guvier di Budapest, no àn rivât a passâ l’un par cent dal vôt e no àn vinçût in nissun centri significatîf. Miôr di lôr al à fat il Forum Democratic dal Todescs de Romanie che al à sfiliât i 70 mil vôts e concuistât vot comuns e tra chescj ancje la citât di Hermannstadt / Sibiu, capitâl de omonime provincie.

Font: Balkan Insight, 11/06/12; Politics.hu, 12/06/12

Stât francês: cors e bretons al secont turni des legjislativis

Intal prin turni des elezions legjislativis intal stât francês che si è tignût ai 10 di Jugn a son pôcs i candidâts espression des nazionalitâts minorizadis che a àn rivât a vuadagnâsi l'acès al secont turni in program ai 17 dal mês. I risultâts miôr si ju à vûts in Corsiche là che i nazionaliscj moderâts di Femu a Corsica, Gilles Simeoni e Jean-Christophe Angelini, a son passâts al secont turni cun passe il 20% des preferencis; ta chês altris dôs circoscrizions de isule i candidâts di Femu a Corsica a àn cjapât tra il 9 e il 10% dai vôts. Si trate dal risultât miôr otignût dal autonomisim cors intes legjislativis. I candidâts indipendentiscj di Corsica Libera invezit a son lâts di un minim dal 3,3% a di un massim dal 8,04%.

Slovens: in curt une taule di lavôr pai problemis de minorance

Il ministeri talian pal interni al à sigurât che in curt al metarà sù une taule di lavôr continuative par frontâ lis cuistions leadis ae minorance slovene che e vîf inte regjon Friûl – Vignesie Julie. La conferme e je rivade dal sotsegretari Saverio Ruperto che ai 8 di Jugn si è cjatât cuntune rapresentance de minorance slovene. Inte taule a saran clamâts dongje rapresentants dal stât, de regjon, dai ents locâi, dal comitât paritetic e des organizazions rapresentativis de minorance. Tra lis primis cuistions di risolvi si à chê de scuele bilengâl di S. Pieri, che si cjate ancjemò intune situazion di precarietât logjistiche, e lis dificoltâts economichis de stampe par sloven, a tacâ dal cuotidian Primorski Dnevnik, là che il sotsegretari Ruperto al à confermât che al covente intervignî cuntun sfuarç plui grant.

Font: Il Piccolo, 09/06/12; Novi Matajur, 13/06/12

Paîs Basc: par Behatokia dirits linguistics inmò pidimentâts

La organizazion Hizkuntz Eskubideen Behatokia (Osservatori sui Dirits Linguistics) ai 7 di Jugn e à presentât a Iruñea / Pamplona il so rapuart sul stât dai dirits linguistics intal Paîs Basc vie pal 2011. Intal document si conferme la impussibilitât di cui che al fevele par euskara a vivi ad in plen doprant cheste lenghe. I problemis che a jerin za stâts segnalâts intai agns passâts a restin ancjemò alì – e à spiegât la diretore de organizazion, Garbiñe Petriati – e si à viodût che, fale cualchi piçul miorament ca e là, intal mont dal lavôr, intai traspuarts e intes relazions sociâls a van dilunc a esisti dai pidiments che a impedissin di doprâ la lenghe basche cun normalitât. La responsabilitât principâl par cheste situazion e je des aministrazions publichis che a son clamadis de leç a garantî i dirits linguistics. Tal câs dai guviers de Comunitât Autonome Basche e de Navare il 2011 al à fintremai viodût dai pas indaûr. Par chest – e à zontât la Petriati – al è impuartant che ducj i citadins a segnalin e a denunciin lis iregolaritâts e lis mancjancis di maniere di dâi plui fuarce e plui imprescj aes organizazions tant che Behatokia par intervignî.

Font: Gara, 08/06/12

Ucraine: prin pas pe couficialitât des lenghis minoritariis

Ai 5 di Jugn il Parlament de Ucraine al à fate buine in prime leture la leç che e garantìs un statût di couficialitât aes diviersis lenghis minoritariis dal paîs inta chês provinciis là che a son feveladis tant che prime lenghe almancul dal 10% de popolazion. Chest al puartarà al ricognossiment dal rus tant che seconde lenghe uficiâl in 13 provinciis, pe plui part logadis intal Sud e intal Est, e tes citâts principâls tant che Kiev e Odessa. Nol sarà però dome il rus a gjoldi di cheste leç, dal moment che l’ongjarês al deventarà lenghe couficiâl inte Transcarpazie (Zakarpats’ka / Kárpátalja) e il rumen inte provincie di Çernivtsi / Cernăuţi. La iniziative, sburtade dal Partît des Regjons che al sosten il president Viktor Janukovič, e viôt però cuintri ducj i principâi partîts de oposizion che a sigurin che a rivaran a fermâ la leç intant dal so secont passaç in Parlament. La tension sul proviodiment e je cussì alte che, cuant che si veve comunicât la sô presentazion in aule, i deputâts di maiorance e di oposizion si vevin cjapâts a pugns.

Font: ABC, 05/06/12; Nationalia, 01/06/12

Paîs Catalans: a Bruxelles pal dirit ae autodeterminazion

Il deputât di ERC, Alfred Bosch, adun cui europarlamentârs Ramon Tremosa di CiU e Raul Romeva di ICV, al à presentât a Bruxelles i contignûts de propueste di leç sul dirit ae autodeterminazion che e sarà presentade tal zîr di cualchi setemane intal Parlament spagnûl. Se la iniziative e ves di lâ sù pai stecs – al à spiegât il rapresentant de Esquerra – almancul o varìn metût ae prove il nivel di democrazie dal stât spagnûl e o fasarìn po apel aes istituzions europeanis. Par Romeva la iniziative e va a rispuindi a di une domande sociâl simpri plui fuarte che e rive dai Paîs Catalans. Tremosa invezit si è dite sigûr che la UE no sierarà la puarte a di une Catalogne indipendente.

Font: VilaWeb, 05/06/12

Galizie: presentade la candidature pal domini .gal

La associazion PuntoGAL e à inviât la candidature par otignî il domini internet .gal al ICANN, l’organisim internazionâl che al guvierne lis direzions su la rêt. Par solit la rispueste e rive tal zîr di un an e duncje, se e ves di jessi positive, intun an e mieç o forsit doi il domini .gal al podarès jentrâ in vore. Pal ricognossiment al covente dimostrâ di vê la capacitât tecniche e economiche par gjestî il domini e di vê la poie de comunitât che si vûl rapresentâ in rêt. La associazion PuntoGAL e à daûr passe un centenâr di sogjets publics e privâts tra i plui impuartants de Galizie, e gjolt de poie dal guvier galizian e di plui di 12 mil internautis. L’obietîf al è chel di dâi un spazi autonom su la rêt a ducj chei che a doprin la lenghe galiziane o che a rapresentin la identitât e la culture de Galizie. Cul domini .gal si varà duncje une visibilitât clare de Galizie ancje dentri di internet. La gjestion dal domini de bande de associazion e permetarà po di mantignî in Galizie i bêçs paiâts pai dominis e di invistîju pe promozion de lenghe galiziane dentri des gnovis tecnologjiis. Par esempli di cuant che, cinc agns indaûr, al è stât ricognossût il domini .cat pai Paîs Catalans a son 55 mil i sîts che si son zovâts di chest identificadôr, cuntune ricjadude impuartante ancje sul plan economic.

Font: Galicia Hoxe, 05/06/12; Xunta de Galicia, 29/05/12

UE: ancje la EFA in difese de deputade curde Leyla Zana

Un grup di europarlamentârs leâts ae Aleance Libare Europeane (EFA) al à domandât ae referente de UE pe politiche foreste di intervignî su la Turchie par che a sedin tornâts ae ativiste curde Leyla Zana i siei dirits civîi e politics. Cundut che e gjolt de imunitât tant che deputade, Leyla Zana e je stade condanade a dîs agns di preson e disprivade dai siei dirits civîi e politics par vie di une schirie di discors fats in difese de comunitât curde e, plui in gjenerâl, cuintri de violazion dai dirits umans de bande des autoritâts turchis. I rapresentants de EFA a domandin ae UE di condanâ cheste sentence judicade une violazion dal dirit di espression e di domandâ al guvier turc di garantî a Leyla Zana ducj i dirits che i son stâts gjavâts.

Font: EFA, 04/06/12

Paîs Basc: i presonîrs politics a intervegnin su la fin dal conflit

Il teme dai presonîrs politics al à un pês une vore impuartant inte suaze dal conflit in at intal Paîs Basc. Ancje par chest e jere une vore di spiete pe conference clamade dongje a Gernika par presentâ lis conclusions dai dibatiment interni che tai ultins mês al à impegnât il Coletîf dai Presonîrs Politics Bascs (EPPK). Il document finâl al è stât comunicât cuntune regjistrazion audio dal moment che i siei autôrs a son sierâts intes presons spagnolis e francesis. Il Coletîf al concuarde cu la decision di ETA di meti fin ae lote armade e al poie la strategjie di unitât e di superament dal conflit inviade de çampe indipendentiste basche dilunc de strade segnade dal acuardi di Gernika e de declarazion di Aiete.