13/06/12

Stât francês: cors e bretons al secont turni des legjislativis

Intal prin turni des elezions legjislativis intal stât francês che si è tignût ai 10 di Jugn a son pôcs i candidâts espression des nazionalitâts minorizadis che a àn rivât a vuadagnâsi l'acès al secont turni in program ai 17 dal mês. I risultâts miôr si ju à vûts in Corsiche là che i nazionaliscj moderâts di Femu a Corsica, Gilles Simeoni e Jean-Christophe Angelini, a son passâts al secont turni cun passe il 20% des preferencis; ta chês altris dôs circoscrizions de isule i candidâts di Femu a Corsica a àn cjapât tra il 9 e il 10% dai vôts. Si trate dal risultât miôr otignût dal autonomisim cors intes legjislativis. I candidâts indipendentiscj di Corsica Libera invezit a son lâts di un minim dal 3,3% a di un massim dal 8,04%.
In Bretagne i candidâts plui votâts ta chest prin turni a son stâts chei dal partît socialist, ma si à di segnalâ ancje cualchi risultât positîf sul front bretonist. Il plui clâr al è chel de cuarte circoscrizion dal Morbihan là che cun plui dal 26% des preferencis Paul Molac – candidât di verts, UDB e socialiscj – al à vuadagnât il secont turni cul risultât plui alt. Secont turni ancje par François de Rugy, poiât di socialiscj e verts, e cuntun clâr orientament pro breton. Risultât interessant ancje par Éloïse Cordier che e je rivade cuasi al 5% cu la poie de UDB e dai indipendentiscj di Breizhistance. Intal Paîs Basc setentrionâl il vôt al à premiât massime i candidâts socialiscj, ma no mancjin i risultâts significatîfs pai candidâts nazionalitaris di EH Bai cundut che nissun di lôr al à concuistât l'acès al secont turni: il risultât miôr al è stât chel di Peio Etcheverry-Ainchart che al à sfiliât il 10% des preferencis, plaçantsi al tierç puest, intant che chei altris candidâts de liste no son mai lâts sot dal 5%. I nazionaliscj moderâts dal PNB invezit a son restâts sot dal 2% dai vôts. Par chel che al rivuarde la Ocitanie, i candidâts dal Partit Occitan che si presentavin in Provence e in Lenghedoc no àn cuasi mai passât l'un par cent des preferencis; il risultât miôr al è stât chel di Gustave Alirol in Alvernie là che al à otignût il 6,27% dai vôts, masse pôc però par passâ al secont turni. In Alsazie, là che il vôt al à premiât massime i candidâts de diestre francese, il partît nazionalitari Unser Land si è presentât cuntun sôl candidât, Denis Lieb, che al à sfiliât il 10% des preferencis cence rivâ però al secont turni. Inte Catalogne Nord, là che no si vevin candidaturis catalanistis fuartis, il secont turni al proponarà une sfide jenfri candidâts socialiscj e de diestre moderade. Par chel che al rivuarde i dipartiments di là dal mâr, di segnalâ il passaç al secont turni di un candidât indipendentist in Gnove Caledonie e di doi candidâts – un indipendentist e un regjonalist – in Martiniche.
Font: Ministère de l'Intérieur, 10-11/06/12; Le Monde, 10-11/06/12; Agence Bretagne Presse, 10-11/06/12; Alta Frequenza, 10-11/06/12; VilaWeb, 11/06/12; 10/06/12; Naiz:, 11/06/12

Nessun commento: