Paîs Basc: gnove strente dal guvier socialist su la çampe abertzale

Il ministri dal interni spagnûl, Alfredo Pérez Rubalcaba, al à presentât lis liniis di fonde de propueste di riforme de leç eletorâl che e varès di rivâ al esam dal Parlament in Mai. Il progjet di riforme al à l’obietîf declarât di strenzi inmò di plui i spazis di partecipazion eletorâl de çampe indipendentiste basche, che intai ultins agns e à viodût dutis lis sôs espressions politichis metudis fûr leç. Cun di fat, in plui di proibî la presentazion di candidaturis che a puedin jessi in cualchi maniere leadis aes formazions politichis za fûr leç o ancje dome ae lôr ativitât politiche, si vûl slargjâ lis pussibilitâts par impugnâ lis candidaturis eletorâls e di meti fûr leç lis listis ancje intal mieç di une campagne eletorâl. Se po la ilegalizazion di une formazion politiche e ves di rivâ dopo des elezions, daûr de propueste di riforme volude dal guvier socialist spagnûl, i elets di cheste liste, se a vuelin restâ in carghe, a varan di fâ une ritratazion publiche des ideis che a àn puartât ae condane de lôr liste e condanâ in maniere esplicite ETA. La çampe indipendentiste basche che zaromai di timp e à inviât un percors pe risoluzion politiche dal conflit e pe fin di ogni forme di violence, sei de bande di ETA che dai stâts spagnûl e francês, e à presentât cheste propueste come une dimostrazion di debolece de bande dal guvier di Madrid e di pôre di confront democratic cu la stesse ezkerra abertzale. Critichis duris ae propueste presentade di Rubalcaba a son rivadis di dutis lis formazions politichis baschis, ancje chês plui moderadis: dal Partît Nazionalist Basc (PNV) si à dite che no si pues, par resons ideologjichis, impedî la esistence di un moviment politic e che e je une barbaritât juridiche dî che la çampe indipendentiste basche e je chel istès di ETA; Eusko Alkartasuna e à fevelât di une riforme che e ponte a imponi la volontât dal nazionalisim spagnûl su chê de maiorance sociâl e politiche dal popul basc; Aralar e Ezker Batua a àn dite che no si pues spietâsi nuie di bon di cheste corse tra socialiscj e popolârs spagnûi par mostrâ di jessi plui dûrs; Alternatiba e à fevelât di aberazion democratiche. Cheste gnove propueste, par altri, e va a cressi inmò plui la tension che si à svilupade intal Paîs Basc daspò de muart di un poliziot francês intant di un scuintri a fûc cun membris di ETA e de aparizion dal cuarp cence vite dal militant basc Jon Anza, là che tancj a pensin che si trati di un episodi di “vuere sporcje”.

Font: Gara, 26/03/10

Scozie: timps luncs par slargjâ a ducj l’acès ae tv par gaelic

Il Bòrd na Gàidhlig, l’organisim di riferiment de politiche linguistiche pal gaelic scozês, al à pandût il so marum pe decision dal BBC Trust di slungjâ ancjemò i timps par permeti di viodi il canâl televisîf par gaelic BBC Alba ancje cul sisteme Freeview. Cun chest sisteme, di fat, si permetarès a ducj di vê acès a chest canâl che la maiorance dai scozês, in dì di vuê, no rive a viodi. La domande e gjolt ancje de poie dal Parlament scozês, ma l’organisim diretîf de BBC al à fat savê che prime di meti lis emissions di BBC Alba ancje su Freeview al podarès passâ fintremai un an.

Font: Bòrd na Gàidhlig, 24/03/10

Paîs Basc: consultazion suntune coletivitât teritoriâl basche in Iparralde

Intal Paîs Basc setentrionâl (Iparralde), sot aministrazion francese, ai 14 e ai 21 di Març si son davueltis une schirie di consultazions popolârs par domandâ ai citadins se a son dacuardi cu la nassite di une coletivitât teritoriâl basche. A inmaneâ lis votazions al è stât il coordenament Batera che si à declarât sodisfat pai risultâts de iniziative. Cun di fat, sui 193.505 citadins che a podevin partecipâ, a son stâts 34.610 (il 17,89%) chei che a son lâts a votâ e, intal 78,22% dai câs, si son declarâts a pro de nassite di chest gnûf sogjet aministratîf. Si trate di un risultât no di pôc, a disin i rapresentants di Batera, se si pense al fat che a inmaneâ lis votazions e je stade une realtât associative, cun ducj i problemis logjistics dal câs, e che i mieçs di comunicazion no àn dât cui sa ce spazi ae iniziative. La partecipazion e je stade une vore variade a seconde dai lûcs, cuntun minim di 5,99% e un massim di 64,96%.

Font: Journal du Pays Basque, 24/03/10

Elezions regjonâls francesis: il cuadri gjenerâl

Ai 14 e ai 21 di Març intal stât francês si son davuelts il prin e il secont turni des elezions regjonâls che cun passe il 54% des preferencis a àn dât la vitorie ae coalizion di çampe, vuidade dai socialiscj, e i àn consegnât dutis lis regjons de “France metropolitane” fûr che la Alsazie. Tra lis novitâts di chestis elezions o cjatìn lis listis di Europe Ecologie là che a jerin dentri i rapresentants di diviers partîts nazionalitaris o autonomiscj. Intal prin turni, chest cartel eletorâl al à vût une medie di passe il 12% di vôts e intal secont turni, cuasi pardut, si è dât dongje cun chês altris fuarcis di çampe di maniere che, in dì di vuê, si cjate inte coalizion di guvier de plui part des regjons. Ta cheste posizion e pues duncje puartâ indenant cun plui fuarce i siei obietîfs che a previodin ancje un aument dal podê des aministrazions locâls, un mudament dai confins regjonâi che a ‘nt rispieti la storie, e la promozion des lenghis minorizadis. Intes filis di Europe Ecologie a son stâts elets ancje 15 membris de Federazion des regjons e dai popui solidaris. Tra di lôr o cjatìn ancje un rapresentant dal Congrès Mondiâl Amazigh (o sei un berber) e un membri dal Moviment Regjon Savoie.

Font: Le Monde, 14 e 22/03/10; EFA, 23/03/10

Elezions regjonâls francesis: nissun nazionalist basc elet

Su la fonde de division regjonâl cumò in vore intal stât francês, il Paîs Basc setentrionâl nol à une sô autonomie teritoriâl, ma al è cjapât dentri te regjon de Aquitanie là che la rapresentance basche e je, duncje, une vore limitade. Chest al rint dificil rivâ a mandâ in consei regjonâl dai rapresentants dai moviments nazionaliscj che, par solit, a corin in maniere disleade dai partîts francês. Al è ce che al è sucedût ancje ta chestis elezions là che Euskadi Europan, la liste leade al Partît Nazionalist Basc, e Euskal Herri Bai, la liste di riferiment de çampe indipendentiste, no àn vût avonde vôts par passâ al secont turni e no àn fat nissune aleance che ur permetès di elei cualchidun. Nuie di fâ nancje par Eusko Alkartasuna che si veve dât dongje te liste Europe Ecologie.

Font: Journal du Pays Basque, 16-18/03/10

Elezions regjonâls francesis: nissun elet nazionalist inte Catalogne Nord

Inte regjon de Lenghedoc – Roussillon, che e cjape dentri ancje la Catalogne Nord, al è stât confermât ae presidence il dissident socialist Georges Frêche cul 54,19% dai vôts. Nissun candidât dai partîts catalaniscj al è stât elet: Convergència Democratica e jere aleade cu la liste socialiste uficiâl che no à rivât a passâ il prin turni; stes al vâl par Esquerra Republicana che e coreve cun Europe Ecologie; Unitat Catalana, invezit, e jere aleade cu la UMP, ma no à cjapât avonde vôts par rivâ a mandâ un dai siei in consei regjonâl.

Font: Món Divers, 22/03/10

Elezions regjonâls francesis: cinc elets dal PO in Ocitanie

Inte Ocitanie, che e je dividude in diviers regjons aministrativis, si à vût il plui impuartant risultât di simpri pal Partit Occitan che al à rivât a elei cinc dai siei membris in cuatri diviers conseis regjonâi: doi te regjon Provence – Alps – Côte d’Azur e un parom intes regjons de Alvernie, de Aquitanie e dai Pireneus di Mieç. Un tant al rive in graciis de adesion dal partît ocitan ae liste Europe Ecologie che po, intal secont turni, si è dade dongje cui socialiscj lant a vinci in dutis e cuatri chestis regjons.

Font: EFA, 23/03/10

Elezions regjonâls francesis: la Alsazie e reste a diestre

La Alsazie e je stade la uniche regjon de “France metropolitane” a restâ intes mans de UMP, il partît dal president francês Nicolas Sarkozy. Cun passe il 46% dai vôts intal secont turni chest partît al à otignût 28 dai 47 conseîrs de assemblee regjonâl alsaziane, cuintri dai 14 de coalizion di çampe e dai 5 de estreme diestre (Front National). Nissun elet pai autonomiscj di Unser Land che, propit sul ultin, invezit di jentrâ te aleance Europe Ecologie, a àn sielzût di dâsi dongje cul MoDem di François Bayrou che nol à rivât a passâ il prin turni eletorâl.

Font: Le Monde, 22/03/10; Món Divers, 15/03/10

Elezions regjonâls francesis: i nazionalitaris a cressin in Bretagne

In Bretagne si à vût, invezit, une situazion avonde particolâr dal moment che al secont turni eletorâl il partît socialist al à sielzût di no fâ aleance cun Europe Ecologie. Si à vût, duncje, une corse a trê là che, dongje di chestis dôs formazions, al jere ancje l’UMP. I socialiscj a àn vût un pôc plui dal 50% dai vôts e 52 dai 83 conseîrs de assemblee regjonâl. L’UMP a ‘nd à vûts 20 (cul 32,36% dai vôts) e Europe Ecologie 11 (cul 17,37% des preferencis). Tra i elets di cheste ultime liste a son ancje cuatri rapresentants de Union Démocratique Bretonne, un in plui rispiet aes elezions regjonâls stadis. Il Parti Breton, che al veve sielzût di partecipâ aes elezions cu la liste nazionaliste “Nous te ferons Bretagne”, nol à rivât a passâ al secont turni ma al à miorât i siei risultâts. Inte regjon aministrative de Bretagne, cul 4,29% di vôts al prin turni, nol à rivât par pôc a passâ il soiâr dal 5% fissât par partecipâ ancje al secont. Intal dipartiment de Loire Atlantiche, che al è cjapât dentri intune altre regjon aministrative, al à vût il 2,62% des preferencis. In dut a son cuasi 60 mil i citadins che a àn dât il lôr vôt a cheste formazion politiche, cuintri dai 32 mil che le vevin votade intes elezions europeanis dal an passât.

Font: Le Monde, 21-22/03/10; UDB, 22/03/10; Parti Breton, 16/03/10; EFA, 23/03/10

Elezions regjonâls francesis: il sucès dai nazionaliscj in Corsiche

I risultâts plui impuartants pai moviments nazionalitariis a rivin de Corsiche dulà che sei i moderâts di Femu a Corsica che i indipendentiscj di Corsica Libera a àn passât il prin turni e, intal secont, a àn miorât i risultâts vûts intal prin. Il sucès plui grues al è chel di Femu a Corsica che daspò dal 18,4% dai vôts otignûts intal prin turni al à vût il 25,89% di preferencis intal secont, puartant inte assemblee corse 11 dai siei rapresentants. Plui limitade, invezit, la cressite di Corsica Libera che e je passade dal 9,36% dal prin turni al 9,85% dal secont e che e à vût 4 elets tra lis sôs filis. In pratiche lis fuarcis nazionalitariis a rapresentin plui di un tierç dal eletorât, a àn 15 dai 51 conseîrs de assemblee corse (cuasi il dopli di chei che a vevin la volte stade) e, in diviersis citâts, a son il prin o il secont partît plui votât. L’UMP, che al guviernave la isule, si ricjate juste cun 12 conseîrs e cuntun pugn di vôts in plui di Femu a Corsica. La vitorie e je lade ae coalizion di çampe cul 36,62% des preferencis e 24 elets: masse pôc, duncje, par garantî un guvier salt ae isule. Par cumò, dut câs, e je stade scartade la ipotesi di une aleance di guvier cui nazionaliscj. Cussì, ai 25 di Març, tant pe elezion dal gnûf president de assemblee che par chê dal gnûf president dal esecutîf, si à vût di spietâ il tierç turni di vôt, o sei chel a maiorance relative. Ae vuide dal esecutîf cors al è il socialist Paul Giacobbi (i nazionaliscj a àn votât adun par Jean Christophe Angelini), intant che president de assemblee corse al è stât elet il comunist Dominique Bucchini (tal prin turni la liste comuniste, po jentrade te aleance di çampe vuidade dai socialiscj, e veve cjapât passe il 10% dai vôts).

Font: Radio Alta Frequenza, 22-25/03/10; Le Monde, 21-22/03/10; Ministeri dal interni francês, 22/03/10

Bulgarie: protestis de minorance macedone

Prime di domandâi al guvier macedon di sotscrivi un tratât di amicizie tra i doi stâts, il guvier di Sofia al à di ricognossi la esistence de lenghe e de nazionalitât macedone e che intal teritori de Bulgarie e esist une minorance che e parten a cheste comunitât nazionâl. A declarâlu a son stâts i rapresentants de organizazion OMO Ilinden Pirin che e rapresente la minorance macedone de Bulgarie. Zaromai di agns cheste organizazion e prove a regjistrâsi tant che moviment politic, ma cheste pussibilitât i ven dineade des autoritâts bulgaris che le piturin di organizazion “separatiste”. Propit pes violazions ai dirits di organizazion di chest grup, la Bulgarie e je stade condanade de Cort europeane pai dirits umans di Strasburc.

Font: Balkan Insight, 18/03/10

Irlande: jessût un setemanâl gnûf dut par gaelic

Ai 26 di Març al è jessût il prin numar di Gaelscéal, un setemanâl di plante fûr in lenghe irlandese. La riviste, cun 32 pagjinis dutis a colôrs, e va a cuvierzi ogni sorte di argoment: des informazions regjonâls a chês internazionâls, de educazion aes gnovis di costum, de economie al sport, cuntune atenzion particolâr par dut ce che al tocje il gaelic irlandês e i teritoris là che la lenghe e je plui fevelade. Il setemanâl al jes ogni vinars e si lu cjate intes ediculis di dute la isule. Il so sît internet al ufrìs contignûts in zonte e, plui indenant, si vûl insiorâlu ancje cun forum, blogs e altris spazis interatîfs pai letôrs e par ducj i interessâts.

Font: Gaelscéal; Gaelport, 18/03/10

Circassie: e torne a alçâsi la tension etniche

Il sassinament di Aslan Zhukov, membri di prin plan de organizazion zovanîl circasse Adyghe Khase, al riscje di fâ sclopâ lis tensions etnichis in at inte Caracie – Circassie, une des republichis caucasichis de Federazion Russe. Lis autoritâts a fevelin di un omicidi leât al ambient di lavôr dal zovin, ma a son in tancj a pensâ che il sassinament al divegni des denunciis sul aument de violence tra lis diviersis comunitâts che Zhukov al veve fat plui voltis. Za di timp i circàs, che a son sù par jù l’11% de popolazion de republiche, a lamentin une condizion di minorizazion e chest omicidi al podarès tornâ a stiçâ la domande par otignî une republiche autonome proprie.

Font: Nationalia, 18/03/10

Sardegne: un blog par cognossi miôr la Limba Sarda Comuna

I procès di normalizazion linguistiche, massime cuant che si cjatisi a svilupâ une varietât standard o a sielzi une grafie, a puartin daûrsi simpri, ce plui ce mancul, une code di polemichis. Chest ancje par vie che tante part de int e sint a fevelâ de cuestion, ma no simpri e rive a cjatâ cun facilitât materiâi che a spieghin lis propuestis linguistichis fatis indenant. Ancje par chest, in Sardegne, cun chê di judâ l’acès aes regulis grafichis e al model linguistic che al ven svilupât cu la Limba Sarda Comuna, si à metût sù un blog che al ufrìs un pôc par volte esemplis e conseis par imparâ a praticâle. Il materiâl si lu cjate alì de direzion internet limbasardacomuna.blogspot.com .

Font: LSC, 16/02/10

Paîs Basc: cjatât il cuarp di Jon Anza, a restin i suspiets di vuere sporcje

A undis mês de sô disparizion al è stât cjatât cence vite il militant basc Jon Anza. Par dut chest timp il so cuarp al sarès restât inte cjamare mortuarie dal ospedâl di Tolose, intal stât francês. La version uficiâl e riferìs che l’om al sarès stât cjatât cence sintiments intun parc de citât ocitane e che, menât in ospedâl, al sarès muart tredis zornadis plui tart pes consecuencis di un infart e cence tornâ mai a cjapâ cussience. Anza nol sarès stât ricognossût par vie che nol veve documents. Dut câs, la version uficiâl e presente cetantis busis e diviers elements pôc clârs o contraditoris, al pont che il stes magjistrât francês che al coordenave la inchieste su la sô disparizion al à declarât che a son ancjemò tantis lis domandis che a restin inmò cence rispueste. Prin di dut, al reste di capî dulà che Jon Anza al sarès stât par undis dîs, ven a dî di cuant che al à cjapât il tren che lu à menât a Tolose par un incuintri cun membris di ETA, là che nol è mai rivât, a cuant che lu àn cjatât cence sintiments pôc lontan de stazion tolosane. Cun di plui, tal so câs, nol sarès stât metût in at nissun dai procediments normâi in vore pai muarts no identificâts e la circolâr de polizie francese mandade in ducj i ospedâi pe sô ricercje no varès vût risultâts. A rindi la situazion ancjemò plui suspiete e je ancje la decision de magjistrature francese di davuelzi la autopsie cence la presince di un miedi di fiducie de famee e di no mostrâ ai parincj i vistîts e i efiets personâi dal om. Pe famee e pal moviment de çampe indipendentiste basche, duncje, a cjapin ancjemò plui fuarce i suspiets che Jon Anza al sedi stât rapît e torturât a muart des fuarcis di polizie spagnolis. L’episodi, di fat, al riclame daurman ae memorie fats similârs di vuere sporcje metûts in at di scuadrons paramilitârs o di reparts speciâi de polizie spagnole. Par sclarî la vicende, ducj i partîts nazionaliscj bascs a àn domandât une inchieste indipendente, fintremai i socialiscj e i popolârs bascs, cundut che a contestin la ipotesi che si trati di un episodi di vuere sporcje, a domandin che a sedin sclarîts ducj i ponts scûrs di cheste vicende.

Font: Gara, 12-14/03/10; El País, 14/03/10

Gales: presentade la gnove leç su la lenghe galese, critichis de Cymdeithas

Il guvier galês, poiât dai laburiscj e dai nazionaliscj galês dal Plaid Cymru, al à presentât i contignûts de gnove leç su la lenghe galese. Tra lis novitâts plui gruessis si à l’oblic pes compagniis privadis che a davuelzin ativitâts di interès public (telecomunicazions, traspuarts, lûs, gas e v.i.) di garantî l’ûs dal galês intai rapuarts cui utents e la nomine di un comissari pe lenghe che al cjaparà sù i compits che fin cumò al veve davuelt l’Ufici pe lenghe galese, ma che al varà ancje la pussibilitât di intervignî in maniere direte in difese dai dirits linguistics dai citadins. Pal prin ministri galês Carwyn Jones si trate di un pas indenant storic. Su la stesse linie ancje i rapresentants dal Plaid Cymru. Lis reazions di liberâi democratics e conservadôrs, invezit, a son stadis plui clipis. Dut câs, par cumò, lis critichis plui duris a son rivadis de Cymdeithas yr Iaith Gymraeg, associazion in prime linie inte bataie pai dirits linguistics. Il guvier galês al à tradît lis promessis su la lenghe galese che al veve fat in campagne eletorâl, in particolâr par chel che si riferìs al status di couficialitât de lenghe e al dirit di gjoldi di servizis ancje par galês: al è ce che a àn scrit i rapresentants de Cymdeithas intune letare indreçade al prin ministri Carwyn Jones. La associazion e à ancje fat savê che in curt e presentarà une liste dai ponts debui che si cjatin inte gnove leç e che e inviarà une mobilitazion par fâi cuintri ai plans dal esecutîf galês. Za cumò e je in linie une petizion dulà che si domande al guvier di rispietâ lis promessis su la lenghe fatis intant de campagne eletorâl. Tra i ponts contestâts de Cymdeithas si à la mancjance di garanziis sul ûs dal galês intes grandis compagniis privadis e su la indipendence dal comissari pe lenghe.

Font: Cymdeithas, 10/03/10; BBC, 04/03/10

Irlande: si torne a lavorâ sul standard dal gaelic

Il ministri irlandês pes politichis di comunitât, pai afârs rurâi e pal Gaeltacht, Éamon Ó Cuív, al à comunicât che si à tacât a lavorâ suntune revision dal standard uficiâl dal gaelic irlandês. A coordenâ cheste operazion e sarà la unitât centrâl pes traduzions dal ministeri (An Lár-Aonad Aistriúcháin). La ultime revision dal standard uficiâl e rimonte aromai al 1958 e si trate cumò di lavorâ massime sul svilup e su la standardizazion de terminologjie plui resinte. Si trate di cjatâ un ecuilibri tra la difese dal status de lenghe e la sô vitalitât – al à spiegât Ó Cuív – par vie che lis lenghis a mudin cu lis gjenerazions e al è impuartant che il nestri standard uficiâl al rispuindi aes dibisugnis de etât moderne.

Font: Gaelport, 10/03/10

Sahara Ocidentâl: gnovis violencis a El-Aaiún

I osservatôrs internazionâi a àn denunciât gnovis violencis cuintri de popolazion civîl e dai militants saharawi inte citât di El-Aaiún, capitâl dal Sahara Ocidentâl. I fats a son capitâts ai 9 di Març cuant che un grup di ativiscj saharawi pai dirits umans a son tornâts in citât daspò di une visite intai cjamps di profugance là che e vîf une buine fete de popolazion saharawi scjampade denant de ocupazion marochine dal lôr paîs. Lis fuarcis di polizie marochine a àn atacât i ativiscj e la popolazion che e jere jessude in strade par dâi il bon acet. I osservatôrs internazionâi a àn fevelât di almancul une disine di ferîts, ma lis informazions a son ancjemò parziâls.

Font: Ambassade RASD Rome, 10/03/10

Irlande: vie libare al trasferiment des competencis su la justizie

Ai 9 di Març la Assemblee de Irlande dal Nord e à votât a grande maiorance l’acuardi sul trasferiment des competencis su la justizie e su la polizie locâl. A votâ a pro a son stâts 88 deputâts: 44 di aree nazionaliste – republicane, 35 di aree unioniste e 9 di altris partîts. I 17 vôts contraris, invezit, a son rivâts dal Ulster Unionist Party. L’acuardi al jere stât cjatât dai rapresentants dal Sinn Féin e dal Democratic Unionist Party ai 2 di Fevrâr daspò di une tratative lungje e ingredeade. Il trasferiment des competencis su justizie e polizie locâl, previodût ancjemò dai acuardis di Sant Andree dal 2006, al jentrarà in vore ai 12 di Avrîl. A cjapâ in man il ministeri de justizie al varès di jessi un rapresentant dal Alliance Party, formazion politiche che no je leade in maniere direte ni al cjamp unionist, ni a chel nazionalist – republican.

Font: BBC, 09/03/10; Món Divers, 10/03/10

Asturiis: ricognossût il dirit a doprâ l’asturian cu la aministrazion autonomiche

Il tribunâl costituzionâl spagnûl al à ricognossût il dirit dai asturians a indreçâsi aes autoritâts autonomichis inte lôr lenghe proprie. Cun di fat, il tribunâl al à refudât la domande di incostituzionalitât che e jere stade jevade cuintri de leç su la promozion e sul ûs de lenghe asturiane. Il câs al jere nassût dal ricors fat indenant di un avocat asturian che si veve viodût a dineâ un permès di lavôr par vie che al jere scrit par asturian. Il tribunâl costituzionâl al à dineât aes autoritâts asturianis la pussibilitât di refudâ lis comunicazions che i rivin dome pal fat di jessi scritis inte lenghe proprie des Asturiis. La leç su la promozion e sul ûs de lenghe asturiane e je dal 1998 e a son zaromai agns che si domande di infuartîle di maniere di ricognossi al asturian il status di couficialitât adun cul castilian.

Font: Nationalia, 09/03/10