Il guvier des Baleârs al à riviodût il stampon de leç su la istruzion eliminant il ricognossiment dal castilian tant che lenghe veicolâr che, in plui des oris di castilian al varès puartât a doprâ cheste lenghe ancje par insegnâ altris materiis. Si torne duncje ae prime version dal test che al met il catalan di lenghe prioritarie. I spietarà in ogni câs a ogni istitût scolastic detaiâ il progjet linguistic di meti in vore. La propueste di leç e jere stade mendade dopo che i socialiscj – fuarce maioritarie tes isulis – a vevin cjatât un acuardi cul PP par inserî come lenghe veicolâr ancje il castilian. Lis pressions unitariis di sindacâts, ents e associazions a pro dal catalan a àn puartât il guvier baleâr a tornâ sui siei pas ancje se la motivazion uficiâl e je che, cundut dal acuardi, il PP nol varès dât la sô poie plene al test.
12/03/22
Paîs Basc: acuardi par promovi l’euskara tal cjamp digjitâl
Il guvier de Comunitât Autonome Basche e la fondazion PuntuEUS a àn presentât lis strategjiis di colaborazion pe dade 2022-2023. I doi obietîfs di fonde concuardâts a interessin il setôr socioeconomic e chel de vite cuotidiane des personis. Tal prin câs, lis prioritâts si riferissin ae promozion dal domini .eus framieç des entitâts privadis che a àn rapuarts direts cul guvier basc, des associazions di categorie e dai lôr associâts, dal setôr dal cumierç e dal acet, e des impresis piçulis e mezanis. Chê altre linie di azion, invezit, si propon di promovi l’euskara tant che lenghe principâl dai utents dal mont digjitâl no dome par mieç de adesion al domini .eus ma ancje indreçantju su configurazions par basc dai navigadôrs e dai dispositîfs eletronics.
Aragon: si slargje il studi dal aragonês te universitât
Ducj i students dal campus di Uesca / Huesca a podaran, za a partî di chest mês di Març, integrâ tal lôr percors di studi specific il cors di lenghe aragonese. Cheste pussibilitât e jere previodude dome par cui che al studiave linguistiche ma cumò la sede distacade de Universitât di Zaragoza e à decidût di permeti a ducj i students, di là de facoltât frecuentade, di meti la introduzion ae lenghe aragonese tal lôr plan di studis. Il cors al ufrìs lis cognossincis di fonde su la lenghe, su la sô evoluzion storiche e su la sô gramatiche, intune cui prins elements di comunicazion scrite e orâl par aragonês.
Font: Heraldo, 20/02/22
01/03/22
UE: lis propuestis di ELEN ae conference sul avignî de Europe
ELEN (European Language Equality Network), la Rêt Europeane pe Avualiance Linguistiche, e à fat indenant vot racomandazions pe conference sul avignî de Europe che si proponin di miorâ la cundizion des lenghis minorizadis dal continent. Lis propuestis, nassudis di un confront tra lis realtâts che a componin la Rêt, a son stadis presentadis ai 17 di Fevrâr intal Parlament european inte suaze di un incuintri cul Intergrup su lis minorancis linguistichis. L’intindiment al è chel di rispuindi al faliment des istituzions europeanis intal garantî i dirits dai citadins europeans che a fevelin lenghis minorizadis, certificât de boçadure de iniziative citadine batiade Minority SafePack. Trê des vot racomandazions a domandin di prontâ dai regolaments comunitaris su lis lenghis menaçadis, sui dirits di cui che al fevele lenghis minorizadis e par sigurâ la avualiance linguistiche digjitâl. Chês altris propuestis a integnin la istituzion di un comissari european pes lenghis, di previodi proceduris di infrazion pai stâts che a discriminin des minorancis linguistichis, di creâ dai canâi di finanziament di pueste pes lenghis minorizadis, di slargjâ l’articul 19 dal tratât di fonde de Union ancje ae discriminazion di nature linguistiche o pe partignince a di une minorance nazionâl, e di imbastî un plan di gjestion de diversitât linguistiche fondât sul Protocol di Donostia.
Bretagne: contrat stât–regjon al esam de Assemblee locâl
Ai 24, 25 e 26 di Fevrâr il Consei de regjon aministrative bretone al è clamât a fâ bon il contrat di plan stât – regjon (CPER) pai agns 2021 - 2027, il belanç pal 2022 e la convenzion su lis lenghis de Bretagne. Si trate, massime tal prin e tal ultin câs, di imprescj di fonde pe planificazion des liniis di azion e des risorsis disponibilis de politiche regjonâl pai prossims agns. Il contrat al à une disponibilitât complessive di passe 970 milions di euros che a valin ancje tant che cofinanziament par atirâ altris risorsis di divignince comunitarie. La aree di invistiment plui impuartante e je chê dal insegnament superiôr, de ricercje e de inovazion che, di bessôl, al passe i 400 milions di euros. Il contrat al è però centrâl ancje par definî obietîfs e risorsis par garantî un slargjament dal insegnament de lenghe bretone. Il test al è stât presentât ae stampe come za definitîf; pai partîts di oposizion chest al disvuede ogni autoritât dal Consei regjonâl. Il grup Breizh a-gleiz – Autonomie, écologie, territoires – che al met adun i elets autonomiscj e nazionalitaris – al lamente la pierdite progressive dal valôr strategjic dal contrat e al segnale che la cifre e ten dentri sei credits riciclâts, sei elements di finanziament ordenaris e duncje, tai fats, i fonts in plui metûts dal stât centrâl a son pôc plui che fruçons.
Paîs Catalans: protestis a un an dal impresonament di Hasel
Ai 15 di Fevrâr dal 2021 il musicist catalan Pablo Hasel al vignive impresonât par vie dai contignûts di une serie di cjançons e di tescj che al veve scrit. La sô condane e il so arest a vevin discjadenât protestis dentri e fûr dai Paîs Catalans, pontant la atenzion par un pôc sul teme de libertât di espression intal stât spagnûl. Lis protestis, in plui di un câs, si vevin sieradis cun scuintris cu lis fuarcis di polizie causant diviers ferîts, ancje seris, tra i manifestants e l’arest di almancul une cincuantine di personis: cuatri di lôr a son ancjemò in preson, altris a son in spiete di procès che, cun dute probabilitât, si fasaran dome tal 2023. A distance di un an, cundut dai impegns cjapâts ta chei dîs soredut des fuarcis progressistis, la riforme dal codiç penâl par chel che al rivuarde i cussì clamâts “delits di opinion” no à mot nancje un pas e la domande di indult par Pablo Hasel e je restade dome une promesse. La normative in vore par limitâ la libertât di espression e l’ûs che indi fâs la magjistrature spagnole a son stâts doprâts une vore ta chescj agns massime par cidinâ la oposizion politiche e culturâl de part indipendentiste e antagoniste des nazionalitâts minorizadis che a vivin dentri dal ream di Spagne. Ai 19 di Fevrâr, in ocasion dal inovâl dal impresonament di Pablo Hasel, centenârs di personis a àn dât vite a gnovis manifestazions di proteste in diviersis localitâts catalanis.
Asturiis: la lenghe e vâl il 5% dal prodot interni sporc
Daûr di un studi coordenât de universitât di Uviéu / Oviedo lis ativitâts economichis leadis aes lenghis propriis des Asturiis – l’asturian e la varietât galiziane fevelade te part plui ocidentâl de comunitât – a rapresentin il 5% dal prodot interni sporc asturian e il 7,3% de ocupazion complessive, une dimension similâr a chê dal compart energjetic o de edilizie. Il setôr che al pese di plui al è chel de educazion ma, a contribuî a chest risultât, a son ancje lis ativitâts culturâls, in primis editorie, musiche e produzions audiovisivis. Cundut che la normative in vore no favorìs plui di tant lis lenghis propriis, il lôr pês economic al è plui fuart di chel che al ven fûr di un studi similâr fat pal catalan intal Paîs Valenzian.
Svezie: gnove menace minerarie pe Tiere dai Sami
Doi esperts internazionâi che a operin su mandât dal Consei pai Dirits Umans de ONU a àn denunciât i efiets negatîfs che il progjet par une gnove miniere di fier dongje di Gállok, te part svedese de Tiere dai Sami, al podarès vê sei pal ambient che pes comunitâts nativis che a vivin alì. Daûr dal studi che a àn puartât indenant, la iniziative minerarie e disviluparès un nivel alt di incuinament e di scarts di smaltî, cun dams grues sul ecosisteme locâl e sui percors migratoris des renis cul risultât di meti a risi il sisteme di vite tradizionâl dai sami. La UNESCO e calcole la Tiere dai Sami la plui grande aree dal mont là che une part impuartante de economie e de vite si fonde sui spostaments stagjonâi dal besteam e la leç svedese e ricognòs l’arlevament des renis un dirit des popolazions sami. La gnove miniere – a disin i esperts de ONU – e je duncje une menace a dut chest, tant plui che lis comunitâts locâls no son nancje stadis consultadis in proposit. La Svezie e à in esam une leç che e previodi l’oblic di sintî i rapresentants dai sami prime di cjapâ decisions che a puedin vê consecuencis su di lôr e su la lôr tiere e, ancje se no je ancjemò in vore, i esperts a invidin lis autoritâts statâls a procedi za ta chê direzion prime de decision finâl che e je fissade pal mês di Març. Intal framieç lis comunitâts locâls a van indenant cu lis lôr protestis e a àn cjatât aleâts ancje fûr de lôr tiere, tra chescj la ativiste climatiche Greta Thunberg che cun altris zovins dai Fridays For Future e à partecipât a di une azion di proteste a Gállok invidant il guvier svedês a meti fin ae colonizazion de Tiere dai Sami e al disfrutament de sô int e de sô nature.
Cornualie: in cressi lis personis che a studiin il cornic
Contrari di ce che al è sucedût pe plui part des lenghis minorizadis, la crisi sanitarie dai ultins doi agns al pâr che e vedi zovât al cornic. Cun di fat, in centenârs di lôr, sei in Cornualie che in altris lûcs ator pal mont, a àn disfrutât des gnovis oportunitâts che si son disvilupadis su la rêt par tacâ a imparâ cheste lenghe celtiche che vie pal secul vincjesim e jere stade dade par muarte. Dongje des lezions sul web curadis di insegnants in cjar e vues, a son nassudis ancje des aplicazions di pueste par studiâ il cornic discjariadis di cualchi miâr di personis. Tra di lôr ancje Indylan, lançade dal Consei de Cornualie e finanziade de Union Europeane. Simpri par iniziative de Assemblee locâl al va indenant il progjet educatîf Go Cornish che al è daûr a cjatâ simpri plui bon acet intes scuelis de Cornualie.
Gales: iniziativis par favorî l’aprendiment de lenghe proprie
Il guvier galês al à fat savê che cul mês di Setembar di chest an i zovins tra i 18 e i 25 agns a varan la pussibilitât di iscrivisi e partecipâ sore nuie ai cors di lenghe dal Centri nazionâl pal aprendiment dal galês. Si trate di cors di nivel diferent adats par dutis lis necessitâts, di cui che nol à nissune cognossince de lenghe a cui che invezit al à dome bisugne di perfezionâ lis sôs competencis. Par dongje si metarà a disposizion ancje un gnûf imprest digjitâl par miorâ la cognossince de lenghe framieç dai fantats tra i 16 e i 18 agns. Lis dôs iniziativis a son pensadis par incressi lis oportunitâts par imparâ il galês in maniere che simpri plui personis a puedin doprâ la lenghe te lôr vite cuotidiane. Par rispuindi ae dibisugne di plui educadôrs cuntune buine competence dal galês, si à previodût ancje l’acès gratuit di ducj i insegnants ai cors di lenghe.
Polonie: preocupazion pal tai dai spazis di todesc a scuele
Il comitât di esperts dal Consei de Europe che al ten di voli il rispiet de Cjarte europeane pes lenghis regjonâls o minoritariis al à pandût il so malcontent pes decisions des istituzions polachis di ridusi lis risorsis pe educazion intes lenghis minoritariis e pe diminuzion dai spazis di insegnament par todesc, limitât cumò a une ore par setemane. Cun di plui, simpri te suaze des misuris previodudis a pro des lenghis minoritariis, la Polonie si veve impegnade par che il todesc nol fos dome materie di studi ma ancje lenghe di insegnament. Invezit, a segnalin i esperts dal Consei de Europe, chest impegn no si à mai concretizât.
Paîs Catalans: i catalans a difindin la imersion linguistiche
Il Centre d’Estudis d’Opinió al à davuelt une inchieste sui ûs linguistics in Catalogne par capî cuale che e je la posizion de int a front de sentence dal tribunâl superiôr di justizie che e à imponût un 25% di insegnament par castilian e che e met in discussion il sisteme a imersion linguistiche in vore di agns in Catalogne. Il risultât al è che il 76% de popolazion e je a pro dal sisteme a imersion, une posizion che però e devente cuasi assolude framieç di chei che a fevelin par catalan (cul 95% di rispuestis a favôr) e che invezit e divît a metât (50% a pro e 50% cuintri) chei che a àn il castilian di prime lenghe. La inchieste e analize ancje il rapuart jenfri simpatiis politichis e model linguistic cul risultât che la maiorance dai simpatizants dai partîts catalans e di chei progressiscj e sosten la imersion linguistiche, intant che i contraris si centris framieç dai partîts de diestre spagnoliste (92% di contraris tra i eletôrs di Vox, 77% tra chei di C’s e 71% tra chei dal PP). Cui che al fevele par catalan, tal 78% dai câs al segnale che la cundizion de lenghe e je lade in piês intai ultins agns e tal 68% che si trate di une lenghe menaçade (intant che tra chei che a fevelin par castilian dome un su cinc al pense che il catalan al sedi une lenghe menaçade). I cjamps là che la lenghe e je sintude plui margjinalizade a son chei de justizie, des aministrazions statâls e des plateformis digjitâls.
Paîs Basc: apel a rispuindi ai atacs judiziaris cuintri dal basc
Ai 5 di Fevrâr centenârs di personis a àn partecipât ae manifestazion clamade adun a Laudio / Llodio di Euskalgintzaren Kontseilua – coordenament che al ten adun lis organizazions plui impuartantis impegnadis pe lenghe basche – par denunciâ la esistence di une strategjie judiziarie cuintri dal euskara. Il pont di partence al è leât a di une sentence che e oblee la aministrazion comunâl di chê citadine alavese a cjapâ a vore une funzionarie che no à lis competencis linguistichis, e tal specific il nivel di cognossince dal basc, domandadis pe sô posizion. Tra lis altris, la sentence e justificave la funzionarie pal fat che la lenghe basche e sarès une vore dificile di imparâ. Magari cussì no – al à spiegât il segretari gjenerâl di Kontseilua, Paul Bilbao – no je la prime volte che i judiçs a cjapin decisions no daûr di criteris juridics, ma su la fonde di prejudizis o di competencis che no àn, sedino di nature linguistiche, pedagogjiche (come tal câs de imersion linguistiche catalane) o altri. Massime tai ultins agns tancj magjistrâts a àn cirût di doprâ lis lôr sentencis par cambiâ la normative linguistiche in vore e par limitâ ancjemò di plui i dirits linguistics dai citadins. Di chi un apel a organizazions pe lenghe, agjents sindacâi, politics e sociâi, istituzions e citadins par dâsi adun e fâi cuintri a cheste strategjie judiziarie di atac ae lenghe e a cui che le dopre.
Paîs Basc: in vore par miorâ la version di Itzuli basc-francês
L’ufici public de lenghe basche (OPLB), che al opere tal Paîs Basc setentrionâl sot aministrazion francese, e il guvier de Comunitât Autonome Basche a àn sotscrit une convenzion che e permet di miorâ il tradutôr automatic neuronâl Itzuli. Si trate di un imprest fondât su la inteligjence artificiâl che al incrès la cualitât des sôs traduzions su la fonde dal ûs e dal nivel dal corpus linguistic che al à a disposizion. La version disvilupade in rapuart cul castilian e funzione za une vore ben, ancje in graciis dal corpus di tescj disponibii come fonde dal lavôr. Dome vie pal mês di Zenâr i son stadis domandadis 2 milions e 300 mil traduzions dal castilian al basc e un milion e mieç dal basc al castilian. Te stesse dade, la version dal basc al francês si è fermade sot des 19 mil traduzions. La convenzion e previôt che l’ufici public de lenghe basche al tiri dongje e al passi ai coleghis dal Paîs Basc meridionâl 5 mil tescj in version bilengâl che a saran po controlâts sul plan dai contignûts, de cualitât e dal gjenar e, in fin, metûts dentri dal machinari par che al puedi deventâ simpri plui precîs.
11/02/22
Paîs Catalans: lis fameis a jentrin te bataie pe scuele di Canet
Ai 4 di Fevrâr lis fameis de scuele “Turó del Drac” di Canet de Mar, là che il tribunâl superiôr di justizie de Catalogne al à imponût un 25% di insegnament par castilian, a àn presentât ae cort une istance par partecipâ ae cause come part coinvolte. L’intindiment al è chel di pandi la volontât maioritarie des fameis di mantignî il sisteme a imersion par catalan in vore te scuele e di domandâ la sospension des misuris che a imponin il castilian intun cuart des oris di lezion. Si trate de prime volte che lis fameis di une scuele a fasin un pas dal gjenar e un tant al diven dal fat che nissun, ni tal dipartiment de educazion e tant mancul la magjistrature, i à permetût di difindi la lôr posizion in mert al cambi di model educatîf imponût ai lôr fîs. Il coletîf dai gjenitôrs al conteste l’ûs politic che al è stât fat dai lôr fruts e nol acete la imposizion di misuris decidudis cence tignî in nissun cont criteris pedagogjics, sociâi e linguistics.
Asturiis: gnove manifestazion pe uficialitât des lenghis propriis
Ai 3 di Fevrâr centenârs di personis a àn manifestât a Uviéu / Oviedo formant une grande “O” ator dal Parlament des Asturiis par reclamâ la uficialitât des lenghis propriis (l’asturian ma ancje il galizian fevelât inte part plui ocidentâl de Comunitât). La mobilitazion, inmaneade de Xunta pola Defensa de la Llingua Asturiana, e je continuade po denant dal palaç de presidence dal guvier. I manifestants a domandin di sblocâ i lavôrs pe modifiche dal Statût di autonomie che, tra lis novitâts, a varessin di previodi ancje il ricognossiment de uficialitât des lenghis propriis dongje dal castilian. Ae maiorance progressiste i mancje un vôt in Parlament par podê procedi cu la riforme e la uniche pussibilitât e je la poie dai conservadôrs dal Foro che però, par garantî il lôr vôt a pro, a son daûr a poni cundizions che no jentrin cu la riforme statutarie.
Galizie: il setôr audiovisîf al reclame un leç par garantî il galego
Te facoltât di siencis de comunicazion de universitât di Sant Jacum di Galizie (USC) e je stade presentade la Iniciativa polo audiovisual en galego cun chê di rivendicâ il rispiet dai dirits de lenghe galiziane dentri de gnove leç gjenerâl su la comunicazion audiovisive che il guvier spagnûl al è daûr a imbastî. In particolâr, dongje dal domandâ il rispiet de diversitât linguistiche dal stât spagnûl, si propon di specificâ lis cuotis di programazion di contignûts produsûts in Galizie e par galego intes televisions e tes plateformis in linie. La iniziative e nas de colaborazion tra A Mesa pola Normalización Lingüística cul grup di studi sui audiovisîfs de universitât e cun diviersis organizazions di categorie o sindacâls dal setôr.
Paîs Basc: prins cors par alenadôrs di balon par euskara
Il guvier de Comunitât Autonome Basche e la federazion provinciâl dal balon de Gipuzkoa a àn presentât un acuardi di colaborazion che, tra lis altris robis, al permet di ufrî i cors UEFA (e tal specific i cors UEFA B e UEFA C) par alenadôrs di balon in lenghe basche. E je la prime volte che chescj cors a vegnin fats in maniere uficiâl intune lenghe minorizade. Il plan di promozion dal euskara intal sport al ponte a sburtâ l’ûs de lenghe basche framieç des categoriis locâls e in particolâr chês zovanîls là che al è plui facil incidi sui ûs linguistics. In dì di vuê si calcole che metât dai fruts e dai fantats tra i 8 e i 18 agns iscrits aes societâts di balon de Gipuzkoa a fevelin par basc. Par favorî l’ûs de lenghe proprie al è duncje impuartant che si ricjatin intun ambient che ju sburte inta cheste direzion e, ta cheste suaze, e je centrâl la funzion dai alenadôrs, dal grup tecnic e de societât stesse.
Galizie: te USC un cuart des oris di docence a son par galego
Daûr dal ultin studi sui ûs linguistics de universitât di Sant Jacum di Galizie (USC) al ven fûr che tal an academic 2021 – 2022 lis oris di insegnament par galizian a son il 23,40% dal totâl. La percentuâl e cres invezit intai masters là che si rive al 33,75%. La situazion dut câs e cambie avonde daûr de facoltât e dal cors di lauree. La situazion miôr e je chê de lauree par mestris di educazion infantîl e primarie, disponibile al 100% par galego. La facoltât cun plui oris di insegnament par galizian e je chê di siencis de comunicazion, là che si è sul 96%. Il studi al mostre ancje une tindince divierse intal ûs de lenghe proprie a seconde de categorie professionâl cui assegniscj di ricercje – prin scjalin de cariere academiche – che a doprin il galizian par cuasi il 44% des lôr oris di docence.
Europe: dirits dai deputâts curdis, Turchie condanade de ECHR
Pal tribunâl european dai dirits umans (ECHR) la Turchie e à violât la libertât di espression dai parlamentârs dal Partît Democratic dai Popui (HDP), moviment di racuelte de comunitât curde, cuant che ur à gjavât la imunitât par podê procedi cuintri di lôr sul plan judiziari. Cundut che e jere stade sostignude tal 2016 cuntun at parlamentâr de coalizion di guvier e di une part de oposizion, pe cort europeane la decision di gjavâur la imunitât ai deputâts dal HDP e va cuintri de Costituzion turche. Fin dal principi i moviments pai dirits umans a vevin acusât il president turc Erdogan di vê imbastît cheste iniziative par cidinâ ducj i siei oposidôrs principâi. La eliminazion de imunitât e à permetût, par esempli, di tignî in preson par passe cinc agns i doi copresidents dal Partît Democratic dai Popui, Selahattin Demirtaş e Figen Yüksekdağ. Su la fonde de sentence dal tribunâl european dai dirits umans, si domande di liberâ i parlamentârs dal HDP ancjemò impresonâts e di sierâ dutis lis causis cuintri di lôr che a restin in pîts.