Il guvier galês al à fat savê che cul mês di Setembar di chest an i zovins tra i 18 e i 25 agns a varan la pussibilitât di iscrivisi e partecipâ sore nuie ai cors di lenghe dal Centri nazionâl pal aprendiment dal galês. Si trate di cors di nivel diferent adats par dutis lis necessitâts, di cui che nol à nissune cognossince de lenghe a cui che invezit al à dome bisugne di perfezionâ lis sôs competencis. Par dongje si metarà a disposizion ancje un gnûf imprest digjitâl par miorâ la cognossince de lenghe framieç dai fantats tra i 16 e i 18 agns. Lis dôs iniziativis a son pensadis par incressi lis oportunitâts par imparâ il galês in maniere che simpri plui personis a puedin doprâ la lenghe te lôr vite cuotidiane. Par rispuindi ae dibisugne di plui educadôrs cuntune buine competence dal galês, si à previodût ancje l’acès gratuit di ducj i insegnants ai cors di lenghe.
Nessun commento:
Posta un commento