Il guvier britanic al à fat savê che chest Avrîl, cu la partence dal gnûf an finanziari, al jentrarà in vore il gnûf acuardi sul finanziament dal sisteme radiotelevisîf public che, tra lis altris, al previôt il bloc par doi agns dal cjanul paiât dai citadins. La television publiche in lenghe galese S4C che fin cumò e vigneve finanziade cun 74 milions e mieç di sterlinis rigjavadis dal cjanul e cuntun contribût diret di 6,8 milions dal ministeri pe culture, pai media e pal sport e ricevarà altris 7 milions e mieç rigjavâts des jentradis tiradis sù cul cjanul. L’acuardi, che al à une durade di cinc agns, al puartarà duncje ae television publiche galese cuasi 89 milions di euros par an. Cheste incressite des risorsis e à cjatât un bon acet de direzion de compagnie televisive ma l’acuardi nol sclarìs cuâl che al sarà il so avignî. In Gales e je simpri plui fuarte la domande par che il guvier di Londre al trasferissi a chel galês lis competencis e lis risorsis par gjestî il sisteme radiotelevisîf nazionâl.
28/01/22
Ucraine: leç su la cjarte stampade e colpìs lis minorancis
Dopo doi agns di transizion, ai 16 di Zenâr e je jentrade in vore in Ucraine la gnove leç su la stampe che e previôt che ducj i cuotidians e lis rivistis a difusion statâl, publicadis su cjarte o in rêt, a vedin di vê ancje une version cui stes contignûts e cu la stesse impagjinazion ancje par ucrain. La misure e je pensade par obleâ la stampe in lenghe russe a sierâ dal moment che nissun editôr al è in stât di sostignî une spese dal gjenar. La stesse misure e sarà metude in vore a partî dal Lui dal 2024 ancje pe stampe a difusion locâl. Chest al vûl dî che, in plui di colpî la comunitât di lenghe russe – che e rapresente cuasi un tierç de popolazion de Ucraine – si larà a meti in zenoglon ancje i mieçs di comunicazion di chês altris minorancis che a vivin dentri dai confins statâi tant che ongjarês, rumens e v.i. E je za in vore di cualchi an une leç che e impon cuotis di ucrain pes radios e pes televisions. In Lui e jentrarà invezit in vore la normative che e previôt che l’ucrain al sedi la uniche lenghe uficiâl ricognossude. Si trate di une serie di leçs che si proponin di dislidrisâ de sfere publiche la lenghe russe e, cun chê, ancje dutis lis lenghis des minorancis.
Stât francês: Pays Unis, aleance regjonaliste-nazionaliste
Sabide ai 15 di Zenâr e je stade presentade al public la gnove plateforme politiche Pays Unis, che si propon di rapresentâ tes prossimis elezions legjislativis francesis dal Jugn dal 2022 la posizion di un trop di moviments di stamp nazionalist o regjonalist. A cheste coalizion a àn aderît par cumò il Parti Breton / Strollad Breizh, il Partît Nazionalist Basc (EAJ-PNB), il Parti Lorrain, Prouvencio Nacioun e Bastir Occitanie. O ricuardìn che, dongje di cheste gnove plateforme, e esist za di agns la Federazion des Regjons e dai Popui Solidaris (RPS) che e ten adun une buine part dai moviments nazionalitaris e autonomiscj che a operin intal stât francês.
Paîs Basc: mobilitazion a Baiona par vê i esams par basc
Une manifestazion une vore partecipade si à tignude ai 14 di Zenâr a Baiona / Bayonne, intal Paîs Basc dal Nord sot aministrazion francese, par rivendicâ il dirit dai students che a frecuentin lis scuelis a imersion di davuelzi i esams finâi par euskara. Une circolâr ministeriâl dade fûr ai 16 di Dicembar e previôt cheste pussibilitât ma no sclarìs par cualis materiis. Si fevele in maniere gjeneriche di materiis di specialitât, cence nissune indicazion precise, e il risultât al è che, a doi mês de date previodude par chestis provis, i students no san ancjemò in ce lenghe che a àn di preparâsi par frontâ i esams. Di chi, duncje, la gnove mobilitazion promovude de rêt des scuelis baschis Seaska e dal coletîf Azterketak Euskaraz!
Paîs Catalans: presentât il program dal Pat Nazionâl pe Lenghe
Ai 12 di Zenâr une rapresentance dal guvier catalan e à presentât il procès che al puartarà al Pat Nazionâl pe Lenghe domandât intal Setembar stât dal Parlament de Catalogne cul vôt a pro dal 85% dai siei membris. In Fevrâr si previôt la prime riunion de taule di coordenament là che si presentarà ai partîts e aes realtâts che a formin il Consei sociâl de lenghe catalane i risultâts di une informative sul stât de lenghe che siet academics di diviersis universitâts a son daûr a meti jù. Po si inviarà un procès partecipatîf indreçât a istituzions, realtâts associativis e citadins che al viodarà moments di presentazion, riflession e racuelte di propuestis de bande di ducj chei che a volaran partecipâ. In Lui si metarà adun dut il materiâl tirât sù e si larà a proponi une sintesi che, une volte disvilupade tal document finâl, e sarà metude a disposizion di ducj par jessi sotscrite. Un procès che si stime di sierâ tal Dicembar di chest an. Il Pat si indrece in primis ae citadinance de Catalogne ma si propon di rivâ a ducj i teritoris di lenghe catalane ancje par vie che, un dai elements di fonde par infuartî la lenghe, al è propit il ricognossiment de sô unitarietât par di là dal confins aministratîfs e statâi.
Asturiis: il bloc dal statût nol diven dal articul su lis lenghis
A blocâ la riforme dal Statût di autonomie des Asturiis nol è il gnûf articul 4, su la uficialitât des lenghis propriis, ma la modifiche de tassazion. A socialiscj, çampe e Podemos i mancje un vôt in Parlament par podê procedi cu la riforme statutarie e la uniche pussibilitât e je chê di otignî la poie dai conservadôrs dal Foro che a àn metût su la taule diviersis domandis e, tra chestis, la eliminazion de impueste di sucession che e je cumò daûr a blocâ la tratative. Al pâr invezit che cu la ultime version fate indenant dai socialiscj si vedin superâts i berdeis sul articul dedicât aes lenghis uficiâls. Il test concuardât al previôt cuatri comis. Il prin al declare asturian e eonaviego lenghis propriis des Asturiis. Il secont al dîs che chestis dôs, intune cul castilian, a son lis lenghis uficiâls des Asturiis e al rimande lis modalitâts pratichis de lôr uficialitât a di une leç di pueste di aprovâ cuntune maiorance dai trê cuints dal Parlament. Intal tierç come si impegnin lis istituzions publichis a garantî l’ûs normâl des lenghis ricognossudis e a promovi lis lenghis propriis garantint i mieçs adats pal lôr disvilup. Il cuart al aferme che nissun al pues jessi discriminât par vie de lenghe che al dopre.
Paîs Basc: in cressi i cors par euskara te UPNA
In Navare al va dilunc a cressi il numar dai students che a fasin il lôr percors scolastic intal model a imersion par basc (passâts dal 22,7% dal 2011 al 26,1% dal 2021) e che a fasin l’esam di acès ae universitât inta cheste lenghe (cuntun aument dal 47% in dîs agns). A front di chest cuadri la Universitât Publiche de Navare (UPNA) e à decidût di incressi i percors di studi par euskara. In dì di vuê a son za disponibii ad in plen par basc i cors di lauree par insegnants e par mestris di scuele infantîl e primarie. La facoltât di economie e je cumò al 50% di cors par euskara, inzegnarie mecaniche e industriâl e passe il 40%, inzegnarie eletriche e eletroniche, telecomunicazions, biomediche, agroalimentâr, lavôr sociâl, sociologjie e storie a son tra il 20 e il 30%. Cumò la universitât e à decidût di rindi disponibil ad in plen il cors di lauree in lavôr sociâl e, di chest an, cui che si iscrîf al pues studiâ dutis lis materiis ancje par basc. Si fasarà po un sfuarç impuartant par incressi la presince de lenghe proprie tai cors di infermerie, psicologjie e fisioterapie. Cun di fat si à viodût che la maiorance dai students che a fevelin par basc si centrin tes facoltâts di educazion, siencis de salût, umanis e sociâls, che a son po i setôrs professionâi là che a àn ancje plui pussibilitâts di doprâ cheste lenghe.
Irlande: vandalisim in cressi cuintri dai segnâi bilengâi tal Nord
Dal 2015 a vuê a son plui di 300 i ats di vandalisim fats cuintri de segnaletiche bilengâl par gaelic e inglês in Irlande dal Nord cuntun dam complessîf di cuasi 40 mil sterlinis. A voltis i responsabii a cuvierzin lis scritis o i nons par irlandês cu la vernîs, altris voltis a brusin o a tirin jù di plante fûr lis tabelis. Doi tierçs di chestis azions si centrin dal distret dal Mid Ulster là che la segnaletiche bilengâl e je plui frecuente. A preocupâ al è massime il fat che chescj ats vandalics a son daûr a cressi simpri di plui e si è passâts dai cinc episodis dal 2015 ai cent dal an passât. Lis organizazions pai dirits linguistics a invidin lis autoritâts a no cjapâ sot gjambe chestis azions e a perseguîlis come delits di odi cuintri di cui che al fevele par gaelic o si ricognòs te identitât irlandese.
Paîs Catalans: pat cuintri dai atacs al sisteme educatîf catalan
Il sisteme educatîf de Catalogne si fonde sul principi de no discriminazion linguistiche dai arlêfs, sul dirit - dovê dai students di completâ il lôr percors scolastic cuntune buine competence scrite e orâl di catalan e castilian, e sul dirit di jessi istruîts par catalan. Fin cumò, chescj trê principis a àn permetût al sisteme educatîf catalan di garantî une coesion sociâl che in dì di vuê e je menaçade dal intervent de magjistrature spagnole. Par chest il guvier catalan (Generalitat de Catalunya) al à fat bon un acuardi che si propon di difindi di ogni sorte di atac judiziari e politic il personâl che al lavore tal sisteme scolastic de Catalogne. Il pat al previôt ancje di intervignî sul plan politic, aministratîf e penâl cuintri di chei sogjets che a vessin di atacâ personis e coletîfs impegnâts inte difese de lenghe catalane.
Gales: campagne par rindi la lenghe proprie acessibile a ducj
La organizazion pai dirits linguistics Cymdeithas yr Iath e à inviât une campagne par sburtâ il guvier galês a impegnâsi par che la lenghe proprie e deventi un mieç di comunicazion cuotidian acessibil par dute la popolazion. L’esecutîf al à chê di rivâ a di un milion di personis in stât di fevelâ par galês dentri dal 2050 ma – e dîs la associazion – in dì di vuê a son bariduris sociâls, economichis e gjeografichis che a impedissin a cetancj citadins di vê acès ae lenghe. Par chest a coventin politichis ativis centradis sul ûs cuotidian dal galês intes comunitâts, tai puescj di vore e tai servizis publics, in maniere di superâ i limits che a pidimentin a une part de popolazion di imparâ e di doprâ la lenghe ma ancje par superâ il prejudizi che al piture il galês come alc di no inclusîf. La Cymdeithas e invide ducj i citadins a sostignî cheste gnove campagne e a sburtâ il guvier galês a lâ ta cheste direzion.
28/12/21
Paîs Catalans: in miârs in place par difindi il model imersîf
Miârs di personis – pe polizie locâl almancul 35 mil – a àn manifestât ai 18 di Dicembar a Barcelone par difindi il model di imersion linguistiche, daûr dal sproc “Ara i sempre, l’escola en català” (Cumò e simpri, la scuele par catalan). Organizade de plateforme Som Escola, la manifestazion e je partide di place Tetuan par rivâ fin li dal Arc di Trionf, là che si à let il manifest che al à sierade la iniziative. La proteste e je la rispueste ae sentence ratificade dal tribunâl suprem che e impon un 25% di castilian obligatori intes scuelis catalanis. A vierzi la manifestazion, che e veve il vert come colôr identificatîf, a jerin i rapresentants di Som Escola, dai sindacâts di categorie e di diviersis entitâts impegnadis pe lenghe. Daûr di lôr i rapresentants istituzionâi e politics, tant che il president dal guvier catalan (Generalitat), Pere Aragonès, e i delegâts di ERC, Junts per Catalunya, CUP e En Comú - Podem. Il pont finâl de manifestazion al è stât la leture di un manifest in difese dal model di imersion là che si à marcât che a àn di jessi “i professioniscj de educazion e no i magjistrâts chei che a àn di definî cuâl che al à di jessi il model che al garantìs lis competencis linguistichis dai students”.
Stât francês: il ministeri al autorize la imersion linguistiche
Ai 16 di Dicembar il ministeri francês pe educazion al à publicât une circolâr là che si declare che l’insegnament des lenghis minorizadis nol va cuintri de sentence de cort costituzionâl che, cul boçâ l’articul de cussì clamade leç Molac (leç organiche su la valorizazion e la promozion des lenghis minorizadis) che al permeteve il model a imersion dentri dal sisteme scolastic public, e meteve a risi la continuazion di chest model di insegnament. Il test al fisse obietîfs, cundizions e limits dal model a imersion. Il ministeri si impegne a sostignî la promozion e la difese des lenghis minorizadis inte scuele pûr che, ae fin dal percors educatîf, i students a dimostrin il stes nivel di cognossince de lenghe francese e di chê minorizade. Il timp dedicât a ogni lenghe al podarà cambiâ daûr des necessitâts o dal progjet educatîf di ogni istitût. Ta cheste suaze, il model imersîf al devente duncje une strategjie pussibile parcè che al permet chest risultât e si adate a chest implant organizatîf. Une altre cundizion fissade e je che il model a imersion al sedi opzionâl e che i gjenitôrs a dedin un consens informât pe iscrizion dai lôr fîs ai istitûts che lu ufrissin. La circolâr e autorize ancje a tignî une part dai esams finâi inte lenghe minorizade, ancje se no specifiche par cualis materiis. La gnove e je stade cjapade cun sodisfazion des organizazions impegnadis pes lenghis minorizadis che ta chescj mês a jerin stadis protagonistis di cetantis mobilitazions cuintri dal atac puartât al insegnament imersîf ancje se a stimin che, in ogni câs, la uniche strade par meti in sigurece chest risultât e sedi chê di une riforme costituzionâl.
Bretagne: si domande un plan urgjent pe lenghe proprie
Lis trê rêts pal insegnament de lenghe bretone – Diwan, Div Yezh e Divaskell –, la organizazion Kelennomp! e il coordenament des associazions culturâls Kevre Breizh a àn dât fûr un comunicât unitari là che a domandin un plan urgjent pe lenghe proprie. In dì di vuê la spese pe lenghe e rapresente il 0,5% dal belanç anuâl de regjon aministrative Bretagne. Dut câs – a disin lis organizazions firmatariis – par tutelâ e rilançâ il breton al covente un invistiment che al sedi almancul il dopli di chel atuâl. Pal 2022 a domandin duncje une integrazion finanziarie di no mancul di 4 milions di euros. Ancje il stât però al à di fâ la sô part e, par chest, si domande che te gnove convenzion stât – regjon si definissin in maniere clare obietîfs e risorsis par garantî un slargjament dal insegnament de lenghe bretone. Par mantignî il numar atuâl di personis buinis di fevelâ par breton – a zontin – si à di rivâ almancul a 50 mil students che a frecuentin la filiere scolastiche bilengâl.
Paîs Basc: e cres la poie par un sôl model scolastic a imersion
Un unic model educatîf inclusîf, cul euskara tant che lenghe veicolâr, che al cjapi il puest dal sisteme scolastic atuâl fondât su la pussibilitât pes fameis di sielzi tra model A (par castilian cul basc come materie), B (bilengâl) o D (par basc cul castilian come materie). La propueste e je stade fate indenant ai 16 di Dicembar de plateforme Batuz Aldatu che e met adun un centenâr di agjents sociâi e che e cjape dentri lis realtâts plui impuartantis dal sisteme educatîf (tant che Ikastolen Elkartea, Hik Hasi, EHIGE e v.i.) e pal euskara (a partî di Kontseilua e AEK), e la maiorance sindacâl basche (ELA, LAB, Steilas, ESK, Hiru e v.i.). La iniziative e je stade pensade tant che contribût pe gnove leç su la educazion che il Parlament de Comunitât Autonome Basche al è daûr a meti adun e che e varès di jessi fate buine chest an che al ven.
Paîs Basc: gnove mobilitazion a Iruñea pe educazion par basc
E je stade une vore partecipade la manifestazion che ai 16 di Dicembar e à scjavaçât lis stradis di Iruñea / Pamplona, dal palaç dal comun a chel dal Parlament de Navare, par rivendicâ il dirit ae educazion in lenghe basche e, plui tal detai, par che si garantissi la presince di almancul une scuele de infanzie a imersion in ducj i cuartîrs pamplonês. Daûr di cheste gnove mobilitazion al è il coordenament Haur Eskoletako Gurasoak fondât dai gjenitôrs dai fruts che a frecuentin lis scuelis citadinis. Des 16 scuelis de infanzie comunâls a pene une e ufrìs il model imersîf par basc, intant che altris trê a figurin come bilengâls ma a àn il castilian come lenghe dominante. A son cuartîrs, come chei meridionâi de citât, là che l’euskara nol è presint in nissune forme. Cundut di une domande fuarte pal insegnament par basc, a son areis de citât là che si àn cuatri scuelis de infanzie e dutis e cuatri par castilian. Cumò la aministrazion comunâl – che e je tes mans de diestre regjonaliste e spagnoliste – e je fintremai daûr a modificâ il profîl professionâl pal insegnament dal euskara, in maniere di ridusi il numar di chei abilitâts e justificâ cussì il tai dai puescj disponibii par basc. Lis fameis a àn domandât ancje un intervent uficiâl al guvier de Navare che al à la ultime peraule su la distribuzion des scuelis ma fin cumò nol è intervignût par fâi cuintri ae margjinalizazion di chês par basc.
Paîs Catalans: la Bressola e bat in tribunâl il comun di Perpignan
Il tribunâl aministratîf di Montpelhièr / Montpellier i à dât reson ae Bressola e blocât l’acuist dal convent di Sante Clare de bande dal comun di Perpinyà / Perpignan. La rêt Bressola – che te Catalogne dal Nord sot aministrazion francese e garantìs l’insegnament par catalan a 1.300 fruts – e veve za cjatât l’acuardi cui proprietaris e versât la prime part dal paiament par meti sù tal sît un istitût superiôr pal insegnament imersîf dal catalan. La aministrazion locâl, vuidade de diestre ultranazionaliste francese, sul imprin no veve contestât la iniziative ma al ultin moment util e veve esercitât il so dirit di prelazion sul acuist dal imobil motivant il so intervent cu la difese dal patrimoni storic de citât. Il tribunâl al à però dât tuart al comun par vie che lis argomentazions puartadis indenant par esercitâ la prelazion no jerin motivadis. La Bressola e à duncje tornât a inviâ la operazion pal acuist dal ex convent e inviâ la gnove scuele che, une volte a bon, i darà acet a tresinte arlêfs des secondariis.
Ocitanie: dôs iniziativis editoriâls di e par fruts e fantats ocitans
Fruts e fantats a son i protagoniscj di dôs iniziativis editoriâls digjitâls inviadis ta chescj dîs in Ocitanie. I arlêfs dal istitût “Fabre” di Rodés / Rodez a àn inviât la version par ocitan di Vikidia, la enciclopedie libare indreçade ai fruts tra i 8 e i 13 agns che si ispire a Wikipedia e che e je nassude tal 2015. Si trate di un progjet che par cumò al è disponibil in pocjis lenghis e ancjemò di mancul ta chês minorizadis. I students de scuele “Gaston Fèbus” a àn invezit metût sù un sît di atualitât par ocitan. La specificitât di cheste iniziative e je chê e je indreçade ai zovins e, tal stes timp, che e je scrite propite di lôr. Dutis e dôs a son viertis a ducj i fantats e i fruts di lenghe ocitane che a vuelin partecipâ.
Galizie: gnove campagne pe promozion de lenghe proprie
Il guvier galizian (Xunta) al à lançât la campagne “Saca o galego que levas dentro”, o sei tire fûr il galizian che tu âs dentri. L’intindiment al è di cressi framieç de citadinance la centralitât de lenghe proprie pe identitât galiziane e, di chê strade, sburtâ il so ûs. La campagne, partide des citâts di Coruña e Ferrol, e puartarà tes placis des citâts principâls de Galizie une struture mobile che e propon su trê dai cuatri lâts dai spiei là che la int e puedi rifletisi compagnade dal sproc de iniziative. La idee e je chê di fâ capî che ducj a puedin jessi protagoniscj de rinassince e de normalizazion de lenghe. Il zûc di spiei e di sprocs al permet ancje di fotografâsi e fâ zirâ la campagne su lis rêts sociâls. Une seconde part de iniziative e sarà invezit centrade su zûcs pai plui piçui che a ziraran pai parcs des citâts galizianis.
Paîs Catalans: progjet par sburtâ il catalan tal cjamp juridic
Disevot istituzions e entitâts dal principât di Catalogne e di Andorra – a partî dai dipartiments di justizie dai doi guviers – a àn sotscrit une convenzion par sburtâ l’ûs dal catalan in ambit juridic par mieç de creazion di un portâl di imprescj linguistics e repertoris specialistics a disposizion dai professioniscj dal setôr e di ducj che a àn a ce fâ cul lengaç juridic. Compendium.cat al metarà adun risorsis e fuarcis des entitâts publichis, des universitâts e des associazions di categorie che a àn a ce fâ cun chest setôr. Il fin al è di favorî l’ûs e la cualitât dal lengaç juridic catalan, e dâi visibilitât a imprescj e risorsis che cumò a son sparniçâts e no simpri facii di cjatâ tant che dizionaris, frasaris e manuâi juridics, ma ancje modei di documents specialistics precompilâts. L’acuardi al è viert al contribût e ae adesion di ducj chei ents che a volaran zontâsi.
Cornualie: il program Go Cornish al tache a jentrâ tes scuelis
La scuele de infanzie “Treloweth” a Rysrudh / Redruth e je la prime a adotâ il program Go Cornish che si propon di ufrî a ducj i fruts la oportunitât di imparâ alc de lenghe corniche (kernewek) e di scuvierzi alc di plui sul patrimoni culturâl che le compagne. Il program al è organizât in trê nivei di dificoltât, al met a disposizion diviersis risorsis pensadis par adatâsi a varis components dal curriculum di studi e al è disponibil in forme gratuite. Un dai obietîfs dal progjet, volût e sostignût dal Consei de Cornualie, al è di fâ cressi framieç dai fruts, des fameis e dai insegnants la cussience de impuartance de lenghe proprie e di fâlu cuntun sisteme che al sedi divertent e acessibil par ducj. Il progjet al è stât cjapât sù cun entusiasim dai fruts de scuele, braurôs di incressi la lôr cognossince de lenghe proprie de Cornualie e di podêle insegnâ ancje ai lôr gjenitôrs che te grande maiorance no àn nissune cognossince di cornic.