Dopo doi agns di transizion, ai 16 di Zenâr e je jentrade in vore in Ucraine la gnove leç su la stampe che e previôt che ducj i cuotidians e lis rivistis a difusion statâl, publicadis su cjarte o in rêt, a vedin di vê ancje une version cui stes contignûts e cu la stesse impagjinazion ancje par ucrain. La misure e je pensade par obleâ la stampe in lenghe russe a sierâ dal moment che nissun editôr al è in stât di sostignî une spese dal gjenar. La stesse misure e sarà metude in vore a partî dal Lui dal 2024 ancje pe stampe a difusion locâl. Chest al vûl dî che, in plui di colpî la comunitât di lenghe russe – che e rapresente cuasi un tierç de popolazion de Ucraine – si larà a meti in zenoglon ancje i mieçs di comunicazion di chês altris minorancis che a vivin dentri dai confins statâi tant che ongjarês, rumens e v.i. E je za in vore di cualchi an une leç che e impon cuotis di ucrain pes radios e pes televisions. In Lui e jentrarà invezit in vore la normative che e previôt che l’ucrain al sedi la uniche lenghe uficiâl ricognossude. Si trate di une serie di leçs che si proponin di dislidrisâ de sfere publiche la lenghe russe e, cun chê, ancje dutis lis lenghis des minorancis.
Nessun commento:
Posta un commento