Asturiis: il bloc dal statût nol diven dal articul su lis lenghis

A blocâ la riforme dal Statût di autonomie des Asturiis nol è il gnûf articul 4, su la uficialitât des lenghis propriis, ma la modifiche de tassazion. A socialiscj, çampe e Podemos i mancje un vôt in Parlament par podê procedi cu la riforme statutarie e la uniche pussibilitât e je chê di otignî la poie dai conservadôrs dal Foro che a àn metût su la taule diviersis domandis e, tra chestis, la eliminazion de impueste di sucession che e je cumò daûr a blocâ la tratative. Al pâr invezit che cu la ultime version fate indenant dai socialiscj si vedin superâts i berdeis sul articul dedicât aes lenghis uficiâls. Il test concuardât al previôt cuatri comis. Il prin al declare asturian e eonaviego lenghis propriis des Asturiis. Il secont al dîs che chestis dôs, intune cul castilian, a son lis lenghis uficiâls des Asturiis e al rimande lis modalitâts pratichis de lôr uficialitât a di une leç di pueste di aprovâ cuntune maiorance dai trê cuints dal Parlament. Intal tierç come si impegnin lis istituzions publichis a garantî l’ûs normâl des lenghis ricognossudis e a promovi lis lenghis propriis garantint i mieçs adats pal lôr disvilup. Il cuart al aferme che nissun al pues jessi discriminât par vie de lenghe che al dopre.

Ta cheste version dal test, al è stât decidût di doprâ la forme eonaviego al puest di galizian. Une sielte che no plâs aes organizazions impegnadis par cheste varietât fevelade te fasse plui ocidentâl des Asturiis e che e je stade contestade ancje de Real Academia Galega che, tune letare uficiâl aes istituzions politichis asturianis, e lamente sei l’ûs di un non che al riscje di rindi plui dificil il gjoldiment dai dirits linguistics di cheste part de comunitât di lenghe galiziane, massime a nivel statâl (baste viodi ce che al è sucedût cul batiâ valenzian il catalan fevelâ tal Paîs Valenzian), sei il fat che si vueli limitâ il gjoldiment dai dirits ricognossûts dome al teritori là che si fevele par galizian e no slargjâlu a dut il teritori de Comunitât autonome.

 

Font: Real Academia Galega, 11/01/22; Asturies.com, 14/01/22