Gales: sbassadis lis investigazions dal comissari pe lenghe

Intal prin mês dopo de sô nomine tant che gnûf comissari pe lenghe galese, Aled Roberts, al varès investigât a pene il 26% des denunciis di violazion dai dirits linguistics rivadis ae sô atenzion. Tai prins doi mês di ativitâts lis denunciis no investigadis a àn tocjât percentuâls che no si vevin mai viodudis. A segnalâ cun preocupazion cheste situazion e je la organizazion pe lenghe Cymdeithas yr Iaith che e à ancje riferît che, daûr di chest compuartament, a saressin i indreçaments rivâts dal guvier. Si trate di une situazion une vore serie par vie che chê dal comissari e varès di jessi une figure indipendente rispiet al guvier, ma soredut parcè che cuant che aes denunciis no i ven daûr une investigazion si fâs passâ il messaç che cui che al viole la normative linguistiche nol riscje nuie e si fâs pierdi fiducie tal lavôr dal comissari. Roberts si à difindût spiegant che tai siei prins cuatri mês di ativitât a son stadis investigadis il 48% des denunciis e, ta chei altris câs, si àn vudis sigurazions de bande dai sogjets responsabii des violazions che a varessin proviodût a metisi in regule.

Font: Nation Cymru, 02/09/19

Asturiis: gnûf organisim pe politiche linguistiche

Il gnûf esecutîf des Asturiis al à decidût di recuperâ il non di direzion gjenerâl di politiche linguistiche pe struture de aministrazion regjonâl clamade a ocupâsi dal asturian e dal galizian fevelât te part plui ocidentâl de Comunitât. Il cambi dal non nol vûl jessi dome une modifiche di nature lessicâl ma un segnâl di atenzion par cheste tematiche. Cun di fat la decision e je stade compagnade ancje de creazion di un consei pe politiche linguistiche che, in gracie dal contribût di diviers esperts, al varà une funzion propositive e consultive su lis liniis di azion e su lis ativitâts di meti in cjamp.

Font: Asturies.com, 02/09/19

Galizie: campagne pe lenghe e cuintri de violence di gjenar

Il guvier galizian (A Xunta) al à svilupât un program di ativitâts che si propon di meti adun la promozion de lenghe galiziane cu la sensibilizazion cuintri de violence di gjenar. La campagne, che e je stade batiade «Nós contra a violencia», e ponte a rivâ a ducj i citadins ma e je indreçade massime sui zovins là che al è plui facil intervignî sui prejudizis di gjenar e ancje linguistics. Il program al cjape dentri iniziativis che a pontin a sensibilizâ i citadins par mieç de musiche, dal teatri e di altris ativitâts artistichis, ma ancje produzions editoriâls in stât di jessi dopradis come materiâl didatic dentri des scuelis.

Font: Lingua.gal, 30/08/19

Bretagne: la int e volarès un referendum su la riunificazion

La maiorance dai bretons – cun percentuâls che a van dal 58 al 60% – e volarès che la cuistion de riunificazion de Bretagne storiche tune uniche regjon aministrative e fos al centri di un confront public viert. La soluzion miôr e sarès chê di un referendum su la union dal dipartiment de Loire Atlantiche cul rest de Bretagne: une ipotesi che e cjate dacuardi il 63% des personis che a vivin inte Loire Atlantiche e il 68% dal rest dai bretons. Se si ves di votâ daurman, il 47% dai bretons al disarès di sì ae riunificazion a front di un 31% di contraris, intant che inte Loire Atlantiche i contraris a saressin a pene il 25%. Ducj chescj dâts a rivin di un scandai che i siei risultâts a son stâts presentâts ae stampe ai 29 di Avost. Tra lis domandis proponudis si ‘ndi veve une ancje sul sens identitari là che l’87% des personis sintudis si à identificât come breton, une percentuâl che e reste maioritarie ma che si ferme al 59% inte Loire Atlantiche.

Font: ABP, 29/08/19; FranceBleu, 29/08/19

Corsiche: Corsica Libera no mole sul “statût di resident”

Il moviment indipendentist Corsica Libera al à dât fûr un comunicât une vore dûr cuintri de speculazion imobiliâr che e menace la isule. Cun di fat a son simpri di plui i invistidôrs forescj che a comprin imobii o proprietâts ator pe Corsiche cul efiet di une incressite dai coscj che e impedìs a cetancj residents di vê acès a cjasis o terens tal lôr stes paîs. Ancjemò ai 24 di Avrîl dal 2014, cuntune largje maiorance, la Assemblee de Corsiche e veve votât il cussì clamât “statût di resident” che al favorive la int dal puest intal acuist di tieris o imobii. La norme no je stade ancjemò ratificade dal guvier francês e no à duncje valôr di leç, chel istès Corsica Libera e vise che i acuiscj fats di invistidôrs forescj dopo di chê date a son a risi. Di là dal vie libare di Parîs, pe int de isule il proviodiment al è legjitim e cui che al à cjolt proprietâts lu à fat savint di lâ cuintri de volontât dai cors. Di chi l’invît dal moviment indipendentist a lassâ pierdi lis speculazions imobiliârs parcè che, chê dai espropris, no je une pussibilitât di escludi.

Font: Alta Frequenza, 28/08/19

Bretagne: scuintri tra Regjon e associazions sul plan pe lenghe

Tune conference stampe che si à tignude ai 28 di Avost i rapresentants dal coletîf Rouedad ar brezhoneg, che al met adun une cincuantine di associazions impegnadis pe lenghe bretone, al à riclamât il consei regjonâl de Bretagne ai siei impegns e al à presentât un plan di intervent pe lenghe che al cjape dentri plui di otante misuris concretis di meti in vore. Ancjemò tal Dicembar dal an passât il consei regjonâl si veve impegnât a incressi vie pal 2019 misuris e risorsis pal breton e al veve fatis buinis lis liniis di indreçament par une gnove politiche linguistiche che a varessin vût di cjapâ sostance tun plan di azion. Dal moment che lis risorsis no son cressudis e che il plan no si lu à ancjemò viodût, Rouedad ar brezhoneg al à presentât la sô propueste – svilupade propit a partî des liniis fatis buinis de Regjon – e al à invidât il guvier locâl a dâsi une niçade. L’invît però nol è plasût al esecutîf breton che al à refudât lis acusis di inazion, al à lamentât la scjarsetât di risorsis a sô disposizion e al à ricuardât la pression fate sul guvier francês in difese dal sisteme scolastic bilengâl e a imersion. La reazion de Regjon e à lassât plui che perplessis lis associazions ancje parcè che no à nancje cjapât in considerazion lis propuestis fatis indenant e no à ufiert nissun gnove sul plan di politiche linguistiche.

Font: ABP, 28-30/08/19; Le Télégramme, 29/08/19

Stât francês: al reste il laç di Parîs su lis scuelis a imersion

Cu la partence dal an scolastic gnûf, intal stât francês si torne a proponi il probleme de assegnazion di insegnants e risorsis aes scuelis a imersion parificadis che a ufrissin ai fruts di cinc comunitâts minorizadis – ocitans, catalans, bretons, bascs e alsazians – un insegnament intes lôr lenghis propriis. Cun di fat, a front di une domande che e cres, lis assegnazions de bande dal stât centrâl a tindin a restâ fermis o fintremai piês. L’an passât a jerin stâts uns 15 mil i students che a vevin frecuentât chestis scuelis, 4 mil di lôr dome tal Paîs Basc setentrionâl (Ipar Euskal Herria) là che l’aument di iscrits par chest an al è di passe 200 fruts. Seaska, la federazion des scuelis baschis a imersion, e veve segnalât la dibisugne di trente insegnants e, dopo di un scuintri avonde dûr cul ministeri, e à otignût che in plui dai dîs assegnâts sul imprin a rivassin altris dîs professôrs. Cun chest an, la rêt di scuelis a imersion alsazianis (ABCM-Zweisprachigkeit) e varès di rivâ a dodis istitûts cu la zonte di une gnove scuele de infanzie ma di Parîs nol è rivât nancje un contrat in plui pai insegnants e chest al impedìs di vierzi altris classis. Inmò plui penze la situazion des Calandretas ocitanis là che, dome par restâ te aree di Montpelhièr / Montpellier, cu la concession di a pene doi insegnants in plui, si à di refudâ alc come 300 gnovis iscrizions intes scuelis de infanzie.

Font: Le Monde, 27/08/19

Montenegro: a van indenant lis tensions tra minorancis

E reste alte la tension in Montenegro tra lis diviersis minorancis e tra chestis e il stât centrâl. Daûr dal ultin censiment, dome il 45% de popolazion si ricognòs come montenegrin intant che si à un 29% che si declare di nazionalitât serbe e un 5% albanese. I contrascj tra lis comunitâts che a vivin ta cheste regjon no mancjin duncje di tocjâ ancje chest paîs balcanic. Dopo des critichis jevadis cuintri de decision des autoritâts statâls di sanzionâ i organizadôrs di doi events par vie di un ûs judicât strumentâl des bandieris albanesis e serbis, cumò a alçâ la temperadure e je stade la scree te aree di Tuzi – teritori a maiorance albanese tacât de capitâl Podgorica – di un monument a Dede Gjon Luli, nazionalist e combatent albanês vivût a cjaval tra i secui XIX e XX. Rapresentants dal Front Democratic, moviment di oposizion vicin ae comunitât serbe, a àn let chest episodi come une provocazion dal moment che – a disin – Dede Gjon Luli al rivendicave pe Albanie, ancje cu lis armis, la fasse meridionâl dal Montenegro là che e vîf la minorance albanese. I membris de oposizion a acusin il guvier centrâl di lassâ man libare ae comunitât albanese par vie che e poie l’esecutîf in cjarie.

Font: Balkan Insight, 26/08/19

Irlande: gnovis risorsis par sburtâ il gaelic tra i zovins

Il guvier irlandês al à decidût di assegnâ un contribût di 80 mil euros pal 2019 e di 100 mil pal 2020 ae organizazion Conradh na Gaeilge par parâ indenant e infuartî il progjet Gluaiseacht che si propon di rindi plui cussients i zovins su la impuartance de lenghe gaeliche e di invidâju a davuelzi une funzion ative dentri dal moviment pal irlandês. L’an passât il progjet al à permetût di svilupâ passe 120 laboratoris là che a àn partecipât plui di 10 mil students. L’obietîf par chest an al è chel di rivâ a coinvolzi almancul 19 mil zovins e di rivâ a 26 mil cun chest an che al ven. Intant dai incuintris cui students si met l’acent ancje su la impuartance che une buine cognossince de lenghe e pues vê sul plan ocupazionâl, baste pensâ che il guvier irlandês si è impegnât a previodi che almancul il 20% des gnovis assunzions intai ents publics a sedin dedicadis a personis cuntun buine competence linguistiche dal irlandês.

Font: CnaG, 23/08/19

Gales: pas indaûr dai diplomâts tai esams di galês

Daûr dai dâts uficiâi, ae fin dal an scolastic 2018-2019, i students galês che a àn passât i esams pal diplome a son stâts il 62,8%, in cressi dal 1,2% rispiet al an prime. I dâts si riferissin aes provis che a coventin par otignî il certificât gjenerâl di educazion secondarie (GCSE). Dut câs se si va a cjalâ plui in detai i risultâts dai esams, si pues viodi che i vôts a son cressûts intes materiis sientifichis ma a son calâts ta chês linguistichis – umanistichis. Rispiet al an prime si à un câl tra il 4,1 e il 4,8% dai risultâts positîfs (A*, A, B e C) intai esams di lenghe e leterature inglese. Par chel che al rivuarde la leterature galese si à un aument dal 0,4%, intant che pe lenghe galese si à un câl dal 0,3%. A preocupâ di plui e je però la situazion dal galês intes scuelis là che al è insegnât come lenghe seconde: achì di fat i vôts positîfs a son colâts di cuasi il 12%. Lis organizazions dai students galês e chês pe lenghe a domandin al guvier dal Gales di frontâ daurman la situazion par capî ce che nol à funzionât. Al è di capî se il probleme al è leât ae riforme progressive dai esams, partide tal 2015 e sierade chest an, o se al è alc di sistemic.

Font: BBC, 22/08/19

Cravuazie: gnovis agressions cuintri de minorance serbe

No si fermin in Cravuazie lis agressions e i atacs cuintri di membris de comunitât serbe che, cun passe 180 mil personis, e je la plui grande minorance nazionâl dal paîs. Tor de metât di Avost nazionaliscj cravuats a àn fate iruzion in doi bars là che a trasmetevin une partide de Stele Rosse di Belgrât e a àn ferît cinc personis, dutis membris de minorance. Si trate dome dai ultins episodis di une rie di violencis che, tal Jugn di chest an, a àn viodût ancje la muart di Radoje Petkovič, vicepresident dal Consei de Minorance Nazionâl Serbe di Kastav, par vie des feridis patidis intant de agression de bande di un veteran di vuere cravuat. Dongje di tornâ a denunciâ cheste situazion, il president dal Consei Nazionâl Serp, Boris Milosevič, al à invidât lis istituzions cravuatis a no minimizâ chestis vicendis o cirî di fâlis passâ par violencis causadis di ultras di societâts sportivis.

Font: Balkan Insight, 22/08/19

Paîs Catalans: la OCB e sburte a fâ di plui pal catalan tes isulis

I rapresentants de organizazion Obra Cultural Balear si son cjatâts cu la gnove presidente dal guvier des isulis, la socialiste Francina Armengol, e i àn domandât un impegn clâr, fuart e uficiâl a pro de lenghe catalane lamentant che la legjislature passade e jere stade masse debule tal promovi la lenghe proprie. La realtât associative e à ancje ricuardât cemût che il catalan al vedi une gruesse impuartance pe coesion sociâl permetint a cui che al ven di fûr di integrâsi miôr te societât des Baleârs. I dirigjents de Obra Cultural Balear a àn ancje sigurât che a daran la lôr poie plene al guvier locâl se al decidarà di rivendicâ spazis plui larcs di autoguvier.

Font: 20minutos, 21/08/19

Gjermanie: il Brandeburc si ative pal bas todesc

Il guvier dal stât todesc dal Brandeburc al à metût sù une taule di lavôr alì dal ministeri pe culture che e cjape dentri ancje rapresentants des realtâts associativis impegnadis pal bas todesc cun chê di dâi un sburt aes ativitâts a pro di cheste varietât linguistiche. L’intindiment al è chel di meti in vore ancje pal bas todesc i impegns cjapâts cu la ratifiche de Cjarte europeane pes lenghis regjonâls o minoritariis che, par chel che al rivuarde la Gjermanie, e cjape dentri ancje danês, frison, romanès e serbian (o lusazian). Par chel che al rivuarde la educazion, in dì di vuê a son cuatri lis scuelis primariis là che si àn lezions par bas todesc e l’intindiment al è chel di slargjâ cheste ufierte. Tra lis azions in program si à ancje la introduzion progressive di cartelonistiche bilengâl. In plui che sostignî progjets specifics a pro de diversitât linguistiche, tal 2015 il ministeri pe culture dal Brandeburc al à tacât a finanziâ la associazion brandeburghese pal bas todesc e cul an passât al à assegnât un contribût ancje pal Consei federâl dal bas todesc.

Font: RTL.DE, 21/08/19

Paîs Basc: pal Comun di Iruñea si à masse basc tes scuelis

Ai 19 di Avost a son stât sù par jù 900 i frutins tra i 0 e i 3 agns che a àn tacât un gnûf an scolastic intes undis scuelis infantîls de capitâl de Navare, Iruñea / Pamplona. Il gnûf sindic de citât, Enrique Maya, espression de diestre regjonaliste e spagnoliste (Navarra Suma), al à profitât de ocasion par declarâ che la sô aministrazion e intint di imbastî un gnûf model linguistic pes scuelis comunâls. La sô posizion, di fat, e je contrarie a chê de aministrazion di prime che e pontave a slargjâ in maniere progressive la istruzion in lenghe basche. Par Maya, za cumò la ufierte scolastiche par euskara e sarès plui alte de domande, ma nol à presentât nancje un dât par sostignî la sô tesi. Lis sôs declarazions a son stadis contestadis des oposizions che a ricuardin cemût che, dopo agns di margjinalizazion dal basc, la ufierte linguistiche atuâl e rispuint ae domande des fameis. In dì di vuê, Iruñea / Pamplona e à trê scuelis infantîls dutis par castilian cun 264 puescj, cuatri centris che al castilian a zontin ativitâts scolastichis par inglês cun 212 puescj a timp plen e 85 a mieze zornade, e cuatri scuelis cun model linguistic basc che a àn 367 puescj a timp plen e 44 a mieze zornade.

Font: Noticias de Navarra, 20/08/19

Montenegro: scuintri sul ûs des bandieris des minorancis

Lis autoritâts statâls montenegrinis a àn fat savê che a sanzionaran i organizadôrs di dôs manifestazions là che si varessin davueltis azions contrariis ae leç. Intun câs, a finî sot acuse, a son stadis lis cjançons patriotichis e lis bandieris serbis dopradis intant di un conciert inmaneât par tirâ sù fonts pe ricostruzion di sîts religjôs de glesie ortodosse serbe in Cossovo. Il secont câs al è invezit leât al ûs di bandieris de Albanie intune manifestazion tradizionâl che si davuelzeve te aree di Tuzi, teritori a maiorance albanese che si cjate tacât de capitâl Podgorica. Daûr dal ultin censiment, il 29% de popolazion dal Montenegro si declare di nazionalitât serbe e il 5% albanese. La leç e permet l’ûs des bandieris di chestis comunitâts, ma dome associât cun chê montenegrine. Cun di plui, pes autoritâts dal paîs balcanic, lis manifestazions culturâls no puedin jessi dopradis par alimentâ il nazionalisim. Lis sanzions menaçadis dal guvier a àn però jevât critichis duris e acusis di violazion dai dirits nazionâi sei de aleance eletorâl de minorance albanese (che par altri e poie l’esecutîf montenegrin), sei dal ministri pai forescj de Serbie.

Font: Balkan Insight, 19/08/19

Galizie: “O que arde” ancje al Festival dal Cine di New York

Dopo de partecipazion al festival di Canas / Cannes – là che al à ancje vinçût la sezion “Un certain regard” – il luncmetraç in lenghe galiziane “O que arde” (Chel che al bruse) al va dilunc a cjatâ un bon acet sul plan internazionâl. Cun di fat, il film dal regjist Óliver Laxe al è stât selezionât par partecipâ chest Autun al cartelon principâl dal Festival dal Cine di New York (NYFF), une des rassegnis di riferiment pal setôr cinematografic american. “O que arde” al è dut zirât in Galizie e al fronte il teme dai fûcs intai boscs che a son une des plaiis di cheste tiere.

Font: Cultura Galega, 08/08/19

Gales: campagne par incressi il pês dal galês sul web

La organizazion pai dirits linguistics Cymdeithas yr Iaith Gymraeg e à chê di saborâ la produzion e la promozion di contignûts online par galês. Cun di fat, in dì di vuê, lis rêts sociâls e i materiâi che si cjatin su internet a son centrâi pes abitudins linguistichis dai plui zovins. Dal moment che al è l’inglês a fâ di paron inta chest mont digjitâl, nol covente spiegâ cuâi che a son i risis ancje pal galês. La Cymdeithas e ponte in primis a fâ il pont su la acessibilitât dai contignûts digjitâi par galês su la rêt e su lis capacitâts che za a son par produsiju. I passaçs seguitîfs a saran chei di creâ e di sostignî gnovis plateformis che a incressin la presince dal galês su internet, e po di fâ cognossi a singui e grups i materiâi e i imprescj za disponibii e chei che a son daûr a jessi svilupâts.

Font: BBC, 07/08/19

Finlande: societât dividude su la utilitât dal svedês

Daûr di une inchieste davuelte par cont de radiotelevision publiche finlandese YLE, pôc mancul de metât dai citadins de Finlande e calcole utile la cognossince dal svedês. Par solit cheste valutazion positive e rive di chei che la lenghe le cognossin miôr e che duncje a son in stât di doprâle in maniere produtive. In ogni câs, cemût che si pues imagjinâ, lis percentuâls plui altis si lis cjate tes regjons sudorientâls là che e vîf une impuartante minorance di lenghe svedese e framieç dai eletôrs dal Partît dal Popul Svedês che si presente come referent par cheste comunitât. Il gnûf guvier de Finlande, formât di une coalizion di centri çampe (Partît Sociâl Democratic, Verts, Aleance di Çampe, Partît dal Popul Svedês e Partît dal Centri), al ponte dut câs a infuartî la cognossince de lenghe ancje fûr des areis là che la minorance e je presinte o che a àn plui contats cu la Svezie. Par chest si pense a tornâ a meti in vore l’oblic di passâ un esam di svedês par cjapâ il diplome des superiôrs, oblic che al jere stât abolît intal 2005.

Font: YLE, 05/08/19

Gales: liniis vuide dal guvier britanic pe comunicazion par galês

Il guvier britanic, par mieç dal segretari di stât pal Gales, al à publicât des liniis vuide su la maniere che lis struturis statâls a àn di gjestî la comunicazion indreçade ae comunitât di lenghe galese. Il document al è stât svilupât in colaborazion cul ufici dal comissari pe lenghe galese e al è pensât par sburtâ ducj i dipartiments o lis agjenziis governativis a infuartî lis azions za previodudis dai plans di politiche linguistiche. Daûr des liniis vuide, dutis lis comunicazions e lis ativitâts indreçadis ancje a citadins di lenghe galese a varan di jessi svilupadis ancje ta cheste lenghe, si va de documentazion sui sîts internet istituzionâi ai materiâi a stampe, des consultazions publichis aes campagnis, par rivâ ai incuintris o ai events inmaneâts ator pal Gales. In pratiche, la filosofie dal document e je che dutis lis informazions che a àn une rilevance pai citadins galês a varessin di jessi rindudis disponibilis ancje te lôr lenghe proprie e che lis iniziativis a àn di jessi pensadis fin dal principi daûr dal impat che a puedin vê su la comunitât di lenghe galese.

Font: Gov. UK, 05/08/19

Corsiche: il stât dal nazionalitarisim cors sot esam a Corti

Di là dai contribûts impuartants puartâts des organizazions nazionalitariis di diviersis comunitâts minorizadis che a àn partecipât ae manifestazion, chest an a clamâ l’interès des Ghjurnate Internazionale di Corti a son stadis massime lis dinamichis internis dal panorame nazionalitari cors. Se di une bande il guvier de Coletivitât teritoriâl e il confront cul stât centrâl a mantegnin unide la coalizion Pè a Corsica formade dai nazionaliscj moderâts di Femu a Corsica, dal PNC e dai indipendentiscj di Corsica Libera, di chê altre bande a restin lis divisions sul cemût frontâ lis prossimis elezions aministrativis in program intal Març dal 2020.