Europe: passe 1,2 milions di firmis par “Minority Safepack”

Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane, e je stade un sucès. Cun di fat, par che la Comission Europeane e cjapi in man une iniziative citadine e covente la poie di almancul un milion di personis ator pe Union e ai 3 di Avrîl, date che e finive la racuelte des firmis, chês cjapadis sù a son stadis passe un milion e 215 mil. I stâts là che il quorum di firmis che si vevisi proponûts di cjapâ sù par Minority Safepack al è stât superât a son undis: Ongjarie (là che lis firmis racueltis a son stadis plui di mieç milion!), Romanie, Slovachie, Bulgarie, Cravuazie, Slovenie, Lituanie, Letonie, Danimarcje, Spagne e Italie. Ta chest ultin stât l’obietîf al jere stât fissât a 55 mil firmis e a ‘nd è stadis tiradis sù plui di 60 mil, pe plui part in Sud Tirôl, Val di Aoste e Friûl. I stâts a àn cumò trê mês par convalidâ lis firmis e la Comission Europeane a ‘nd à altris trê par presentâsi denant dal Parlament par riferî su la iniziative. Dopo dal agrât a ducj i citadins e aes organizazions che a àn poiât la iniziative, il president de FUEN, Loránt Vincze, al à celebrât la nassite di chel che al à clamât un vêr moviment european pai dirits des comunitâts minorizadis.

Font: FUEN, 04-05/04/18

Paîs Catalans: confermât in Catalogne il model a imersion

La volontât dal guvier di Madrid di colpî il model scolastic a imersion in vore in Catalogne par cumò no à rivât a concretizâsi. Di fat, lis normis pes preiscrizions pal an scolastic 2018-2019 publicadis ai 3 di Avrîl su la gazete uficiâl de Catalogne a confermin il stes sisteme dai agns stâts. Daûr de leç su la educazion de comunitât autonome dutis lis materiis a son insegnadis par catalan fale lis oris di lenghe castiliane; dongje vie a son po ancje istitûts privâts che a ufrissin l’insegnament par castilian. Cundut des menacis simpri plui frecuentis de diestre spagnoliste di savoltâ chest sisteme, il stes esecutîf spagnûl al à vût di ricognossi che no si pues cambiâ il model linguistic par mieç dal articul 155 de Costituzion spagnole che in chest moment i permet a Madrid di controlâ il guvier catalan. Il PP al à presentade une propueste di leç che e previôt un model cul 25% des oris par catalan, il 25% par castilian, il 25% tune lenghe foreste e un altri 25% a sielte dal singul istitût, ma il so pês intal Parlament catalan al è cussì piçul che al è impussibil che la leç e passi.

Font: El País, 04/04/18

Paîs Catalans: la magjistrature spagnole e smicje ai CDR

I Comitâts di Difese de Republiche (Comitès de Defensa de la República), metûts in pîts a nivel locâl ator pe Catalogne par sostignî il procès di autodeterminazion de Catalogne e par svilupâ azions solidariis cui presonîrs politics, a son simpri di plui sot atac de bande des istituzions spagnolis. Il tribunâl suprem al è daûr a investigâju te suaze de inchieste cuintri dal indipendentisim catalan intant che tai rapuarts de guardia civil si ju piture di organizazion violente. Massime dopo des protestis pal arest in Gjermanie dal (ex) president catalan Carles Puigdemont cheste etichete di violents e je stade saborade dai mieçs di comunicazion e dai partîts spagnûi cundut che i membris dal Comitâts a vedin operât simpri cun sistemis no violents. Ai 2 di Avrîl e je intervignude ancje la avocature de Audiencia Nacional, l’organisim che al à cjapât il puest dai tribunâi speciâi di ete franchiste, visant di vê prontis azions judiziaris cuintri dai Comitâts pai reâts di ribelion, malversazion e delits cuintri dal ordin public. Un tant al sarès leât ai blocs stradâi metûts in at in diviersis localitâts de Catalogne de bande dai Comitâts. La dì dopo une vincjine tra lis principâls organizazions de societât civîl catalane a àn dât fûr un comunicât unitari là che a pandin dute la lôr preocupazion pes azions di criminalizazion metudis in at cuintri dai Comitâts.

Font: VilaWeb, 03-04/04/18

Gales: plui tutele pe lenghe proprie tes universitâts

Cul principi di Avrîl a son deventâts operatîfs i gnûfs nivei linguistics garantîts intes universitâts dal Gales che a jerin stâts previodûts cu la legjislazion dal 2016. A son 25 i centris educatîfs interessâts di chestis misuris. Tra lis novitâts si à il dirit di comunicâ e di ricevi i documents uficiâi de universitât par galês, ma ancje di gjoldi di un servizi di tutorât e di consulencis ta cheste lenghe. Gnovis misuris a jentraran po in vore cul prin di Otubar di chest an che al ven. In diviers câs, chestis azions a jerin za stadis inviadis ma no gjoldevin di une poie legjislative.

Font: BBC, 03/04/18

Irlande: tensions a Derry tra republicans e PSNI

Lis manifestazions par ricuardâ l’inovâl dal riviel de Pasche dal 1916 a àn tornât a piâ lis tensions in Irlande dal Nord. Intal lunis di Pasche, intant di une parade inmaneade di grups republicans dissidents a Doire / Derry, zovins cu la muse taponade a àn tirât bombis molotov e pieris cuintri di mieçs de polizie nordirlandese (PSNI). Puartevôs de polizie a àn declarât di vê cirût une mediazion par permeti ae iniziative di davuelzisi in maniere regolâr ma di vêsi cjatâts denant di un refût totâl e di vê duncje declarade la parade fûr leç. Plui de proibizion però, a scjaldâ i spirts a jerin stât i arescj fats de polizie in ocasion di une altre manifestazion republicane che si veve tignude tai dîs prime a An Lurgain / Lurgan. La manifestazion di Doire / Derry si è davuelte distès cu la partecipazion di cualchi centenâr di personis e, cundut dai incidents, no si àn vûts ni ferîts, ni arescj.

Font: BBC, 02/04/18

Letonie: il president al ratifiche la riforme des scuelis russis

Ai 2 di Avrîl il president de Letonie, Raimonds Vejonis, al à ratificât la leç che e oblee ancje lis scuelis de minorance russe a doprâ il leton come lenghe veicolâr pe plui part des materiis. La firme e je rivade dopo che il Parlament al veve votât il test ancje in tierce leture e cundut des protestis e des mobilitazions di place che la comunitât russofone e à imbastît intai ultins mês. La riforme si inviarà za cul prossim an scolastic par jentrâ po a regjim intal 2020. In chê volte il rus al restarà come lenghe veicolâr dome pes oris di lenghe e di leterature russe e pes materiis di aree storiche – umanistiche. Cun cheste leç al va duncje a disparî il model a imersion in vore in diviersis scuelis de minorance russe, comunitât che e rapresente cuasi il 40% de popolazion totâl.

Font: TASS, 02/04/18

Paîs Basc: mobilitazion des ikastolas in Ipar EH

Dopo des primis azions di proteste za metudis in at, si tignarà ai 4 di Mai la manifestazion principâl inmaneade di Seaska – la federazion des scuelis in lenghe basche (ikastolas) dal Paîs Basc francês (Ipar Euskal Herria) – par domandâ al guvier di Parîs che al garantissi lis risorsis par rispuindi ae incressite di students. Daûr di dâts uficiâi, intai ultins 13 agns, l’aument dai iscrits intes scuelis baschis al è stât dal 80% intes primariis e tes secondariis di prin grât e dal 46% tai liceus. Cundut dai impegns cjapâts, lis autoritâts scolastichis e il guvier francês no àn sigurât mieçs economics suficients par garantî lis infrastruturis e il personâl par rispuindi a cheste incressite. Dome tal Setembar di chest an i iscrits in plui a saran 230 e, cui ritarts za ingrumâts intai agns stâts, a coventaressin altris 25 insegnants. I incuintris tra i rapresentants de rêt des scuelis baschis e de aministrazion centrâl no àn ancjemò puartât nissun risultât, cussì Seaska e à decidût di passâ ae mobilitazion di place. Cun di plui, a zontin i siei rapresentants, cuntune organizazion scolastiche autonome si podarès gjestî miôr lis specificitâts dai sisteme scolastic a imersion.

Font: MediaBask, 30/03 e 02/04/18

Cossovo: gnovis tensions cu la minorance serbe

E reste alte la tension in Cossovo dopo che ai 26 di Març la polizie di stât e à arestât il responsabil dal ufici serp pal Cossovo, Marko Djurič, intant di une visite fate te aree a maiorance serbe di Mitrovica. La operazion e je stade fate cuntun displei di fuarcis e cuntun ûs de violence fûr di misure. Prime de sô espulsion, il diplomatic al è stât menât inte capitâl Pristina dulà che al è stât fat sfilâ in manetis denant dai gjornaliscj e dai citadins. Lis autoritâts a àn justificât l’arest e la espulsion cul fat che la sô visite no sarès stade autorizade, ma a àn ricognossût che la operazion no je stade gjestide te maniere juste. La vicende e je stade doprade de minorance serbe par domandâ lis dimissions dal ministri cossovan pal interni, Flamur Sefaj, e par riclamâ lis missions de UE e de NATO in Cossovo al lôr dovê di prevignî i atacs cuintri de comunitât e dai siei rapresentants. I aministradôrs dai comuns a maiorance serbe, ae unanimitât, a àn po fat savê che se tal zîr di trê setemanis il guvier cossovan nol tacarà a meti in pîts la Assemblee dai comuns serps previodude dai acuardis sotscrits di Cossovo e Serbie a Bruxelles intal 2013 a proviodaran a fâlu di bessôi. Une ipotesi che membris dai guvier di Pristina a àn za fat savê che, se metude in at, e puartarès drets in preson i aministradôrs serps.

Font: Balkan Insight, 28-30/03/18

Scozie: inviât il gnûf plan linguistic pal gaelic

Il gnûf plan linguistic pal gaelic al è stât lançât ai 28 di Març intal Parlament scozês cun chê di sburtâ l’ûs di cheste lenghe celtiche simpri plui a larc. Si trate di un plan cuincuenâl, za rivât ae sô tierce edizion, svilupât dal Bòrd na Gàidhlig – la agjenzie pe lenghe gaeliche scozese – ae fin di un lunc procès di consultazions che al à cjapât dentri organizazions di comunitât, ents publics, realtâts associativis e citadins. Lis azions prioritariis dal plan a son siet: iniziativis indreçadis ai fruts e ai fantats par che a cjapin sù cheste lenghe; incressi il contribût dal gaelic ae economie scozese; sburtâ la domande e la ufierte de educazion ta cheste lenghe; aumentâ i percors di formazion lavorative par gaelic; sostignî l’ûs de lenghe tes fameis; slargjâ e infuartî i plans linguistics specifics dai ents publics; e promovi il valôr sociâl, economic e culturâl dal gaelic. Sodisfats pai contignûts dal plan a son ancje i rapresentants de agjenzie economiche des Highlands e des isulis che a marchin cemût che il gaelic al vedi une influence positive su setôrs tant che lis industriis creative e alimentâr, il turisim, la valorizazion dal patrimoni storic e la educazion.

Font: Bòrd na Gàidhlig, 28/03/18

Paîs Catalans: ofensive judiziarie cuintri dal indipendentisim

Lis divisions internis al indipendentisim che ai 23 di Març a vevin impedît la elezion di Jordi Turull ae presidence dal guvier catalan (cu la astension dai 4 parlamentârs de CUP, JxCat e ERC a jerin rivâts dome a 64 vôts a front dai 65 contraris ae sô elezion), a son passadis dibot in secont plan denant de gnove ofensive repressive metude in at des autoritâts spagnolis. Ta chê stesse zornade, di fat, il judiç dal tribunâl suprem Pablo Llarena, che al coordene la inchieste cuintri dal indipendentisim catalan, al à decidût di sierâ la fase investigative e di rinviâ a judizi 25 dai 28 imputâts, 13 di chescj pal reât di ribelion che al previôt fin di 30 agns di preson, e al à fat impresonâ altris cinc di lôr. Dongje o in zonte a chest reât, i imputâts a son acusâts di disubidience e di malversazion (par vie des spesis che il guvier catalan al varès fat par ativitâts che la magjistrature e calcole leadis al procès di indipendence).

Galizie: mancul dal 5% dai programs tv par fruts par galizian

Ai 20 di Març la organizazion A Mesa pola Normalización Lingüística e à presentât une ricercje su la presince dal galizian inte programazion televisive dedicade ai fruts e ai fantats. Daûr dal studi al ven fûr che tai dîs di vore a pene il 4,6% dai programs televisîfs pe infanzie a son par galizian intant che, sul finî de setemane, la percentuâl e va jù al 2,7%. La presince dal galizian – e denuncie A Mesa – e je mancul in dì di vuê di ce che e jere vincj agns indaûr. Cheste situazion – e zonte la organizazion – intune cul tratament dal galizian inte istruzion, si insuaze intun cuadri plui gjenerâl di esclusion, subordenazion e margjinalizazion de lenghe proprie de Galizie. Dongje dal studi, A Mesa e à presentât ancje une serie di misuris par cambiâ cheste situazion tant che, par fâ cualchi esempli, la incressite de ufierte par galizian inte television publiche (TVG), il dopleament par galizian dai programs par fruts disponibii par spagnûl o in altris lenghis, e meti a disposizion gnovis licenzis pal digjitâl vie tiere che a favorissin canâi in galizian.

Font: Praza, 21/03/18

Gales: dirits linguistics, no dal guvier ai pas indenant te sanitât

Membris di ducj i grups politics rapresentâts inte Assemblee Nazionâl dal Gales a àn sotscrit un document là che si racomande di mendâ il decret sui nivei linguistics standard in maniere di garantî i servizis sanitaris di base par galês. Une racomandazion che e je stade però boçade de ministre Eluned Morgan che si à refudade di acetâ lis mendis al document. Une decision, la sô, che e à cjatât daurman la condane de organizazion pai dirits linguistics Cymdeithas yr Iath che le à acusade di lâ cuintri sei de lenghe galese che di ducj i pazients che le doprin.

Font: Cymdeithas, 21/03/18

Paîs Basc: a cressin i fonts e il pês di Euskarabidea

Tal zîr di trê agns, Euskarabidea – l’Istitût navarês pe lenghe basche – al à vût i finanziaments cressûts dal 247%. Cun di fat, dai 2,8 milions di euros assegnâts dal guvier de Navare tal 2015 si à passâts ai 6,9 dal 2018. L’aument des risorsis, cemût che e à spiegât la delegade dal esecutîf Ana Ollo, al è part di un percors che al ponte a infuartî chest istitût come organisim autonom di riferiment pes politichis linguistichis dal guvier. In dì di vuê Euskarabidea al conte suntune plante organiche di 63 personis che a lavorin in trê sedis e che, in curt, si daran adun te gnove sede unitarie alì de ex Cjase dal Sport di Iruñea / Pamplona.

Font: El Diario Norte, 19/03/18

Paîs Catalans: in miârs a Barcelone a pro de scuele catalane

Sabide ai 17 di Març miârs di personis a àn partecipât a Barcelone ae manifestazion clamade adun dal coordenament Som Escola e dal sindacât maioritari USTEC in difese dal sisteme scolastic a imersion in vore in Catalogne che, simpri plui dispès, si cjate sot atac de bande dal guvier spagnûl che lu acuse di discriminâ il castilian. Une tesi e une menace che e cjate cuintri ducj i partîts de Catalogne, fale lis dôs espressions de diestre spagnoliste, o sei Ciudadanos e PP. Ae manifestazion a àn partecipât invezit rapresentants di ducj chei altris partîts (dai indipendentiscj anticapitaliscj de CUP fintremai i sociâi democratics spagnoliscj dal PSC), des dôs organizazions principâls de militance catalaniste – Òmnium Cultural e ANC – e di cetancj sindacâts.

Font: EFE, 17/03/18

Paîs Basc: il 16% des pagjinis web par euskara

A son stâts presentâts ta chestis zornadis a Bilbo / Bilbao i dâts racuelts dal Osservatori PuntuEUS su la presince de lenghe basche su internet. In dut a son 26.663 i sîts web dal Paîs Basc che a àn contignûts par euskara, ven a dî il 16% dal totâl. Chei che a doprin il domini .eus a son invezit sù par jù 8.100. Tra chescj il 90% al dopre la lenghe basche e il 43% al parten a aziendis. Sul plan teritoriâl, il domini .eus al rapresente il 42% dai sîts internet de Gipuzkoa, il 31% de Bizkaia, l’11% de Araba, il 5% de Navare e il 2% dal Paîs Basc francês.

Font: EiTB, 16/03/18

Macedonie: leç sul albanês, gnûf no dal president

Il president de Macedonie, Gjorge Ivanov, al à decidût pe seconde volte di no firmâ la gnove leç su lis lenghis che il Parlament de Republiche balcaniche al à tornât a fâ buine ai 14 di Març dopo che Ivanov si veve refudât di firmâle une prime volte. Il proviodiment, che al è ae fonde dal acuardi di guvier tra il partît sociâl democratic e i moviments principâi de comunitât albanese, si propon di slargjâ la uficialitât dal albanês ancje tai comuns là che i membris di cheste comunitât a son mancul dal 20% de popolazion. Pal president macedon la leç no je juste e e va cuintri de Costituzion. La diestre nazionaliste, cumò ae oposizion, e à cirût di impedî che la leç e fos fate buine presentant uns 35 mil emendaments in aule e cun manifestazions di proteste fûr dal palaç dal Parlament. Dopo de seconde boçadure de bande dal president al è pussibil che par superâ il scuintri istituzionâl in at e vedi di intervignî cuntune sentence la cort costituzionâl.

Font: RFE/RL, 15/03/18

Paîs Catalans: plui risorsis ai ents locâi valenzians pal catalan

Il guvier de Comunitât Valenziane al à publicât i bants che a assegnin un milion e 120 mil euros ai ents locâi pe promozion de lenghe catalane. Si trate di risorsis che a son daûr a cressi in maniere significative dal 2015 incà. I fonts a coventin par puartâ indenant e par infuartî i sportei e chei altris uficis che a ufrissin servizis linguistics, ma ancje pe tabelonistiche e pe segnaletiche, par cors di formazion linguistiche pal personâl, par campagnis di promozion e di sensibilizazion sul catalan.

Font: València Extra, 14/03/18

Sápmi: lançât il Font pal Cine dai Popui Artics (AIFF)

Inte suaze de conference sul cine dai popui natîfs che si à tignude te prime metât di Març a Kautokeino, te tiere dai Sami (Sápmi), al à stât inviât il Font pal Cine dai Popui Artics (AIFF) che si propon di sostignî lis produzions e coproduzions cinematografichis e televisivis di cualitât che a cjapin dentri i popui natîfs des regjons artichis di Canadà, Federazion Russe, Finlande, Norvegje e Svezie, dal Alaska e de Groenlande. L’intindiment al è ancje di infuartî la colaborazion tra lis realtâts che a operin za ta chest setôr e di creâ gnovis oportunitâts di lavôr pai zovins des comunitâts nativis intal setôr dal cine, dal digjitâl e dai mieçs di comunicazion. A metilu sù a son stâts l’Istitût cinematografic sami internazionâl, il Font pai media dal Canadà, la Societât di svilup cinematografic dal Nunavut, la Associazion dai autôrs di cine de Groenlande e la organizazion russe Archy, intant che i prins finanziaments a rivin dal guvier norvegjês.

Font: The Independent Barents Observer, 14/03/18

Svezie: in piês la situazion de minorance finlandese

Di cualchi an incà a van dilunc a cressi ancje in Svezie la intolerance e i compuartaments agressîfs, ofensîfs e discriminatoris cuintri dai grups minoritaris. Il fenomen al somee leât al aument dai flus migratoris, ma al colpìs ancje lis minorancis nazionâls storichis dal paîs tant che i finlandês di Svezie (Sverigefinnar) che a rapresentin il 7% de popolazion totâl. Un rapuart jessût di resint al piture un cuadri avonde neri. Inte scuele a cressin i episodis di intolerance e fintremai di atac cuintri dai students e dai insegnants che a doprin il finlandês fûr dal orari di lezion de bande di altris students e ancje di altris professôrs. Dongje de incressite di episodis di cheste fate, il probleme plui grues al è chel de mancjance di percors educatîfs par finlandês. Dome par fâ un esempli, dai 6 mil fruts di Göteborg che a àn tant che prime lenghe il finlandês, dome 177 a àn la pussibilitât di ricevi une educazion ta cheste lenghe. Daûr dal rapuart al mancje personâl finlandês cualificât sei te scuele che in altris cjamps tant che la assistence. Un tant al diven par altri propite de mancjance di percors formatîfs adats e dal no rispiet des misuris di tutele e di promozion des lenghis minorizadis. L’unic cjamp là che invezit la situazion e somee lâ in miôr al è chel de presince de lenghe intai mieçs di comunicazion e la maniere che chescj ultins a fevelin de minorance.

Font: The Guardian, 13-14/03/18

Irlande: cundut de domande, no cressin lis scuelis gaelichis

Il 2018 al è stât proclamât an dal gaelic (Bliain na Gaeilge) ma, magari cussì no, nol puartarà buinis gnovis pal insegnament di cheste lenghe intes scuelis de Irlande. Des passe 3 mil scuelis primariis sparniçadis ator pal teritori de Republiche juste il 8,3% a àn il gaelic tant che lenghe veicolâr e in buine part si cjatin intes areis de isule là che l’irlandês al à ancjemò une presince significative (Gaeltacht). Inchiestis e ricercjis davueltis intai ultins agns a mostrin che cuasi un cuart dai gjenitôrs al volarès che i siei fîs a studiassin intune scuele cul gaelic come lenghe veicolâr (Gaelscoil), ma la domande e je masse alte rispiet ae ufierte. Dome par rispuindi ae domande atuâl a coventaressin inviadis almancul uns dusinte scuelis gaelichis intai prossims dîs agns. Chest percors, che par deventâ al à bisugne di timp, al varès di jessi compagnât de introduzion di classis a imersion almancul intun pocjis des scuelis cul inglês veicolâr, in maniere di garantî a dutis lis fameis che lu domandin un percors educatîf par gaelic pai lôr fruts. An Foras Pátrúnachta, la entitât che e gjestìs la plui part des scuelis gaelichis, e à duncje invidât cun fuarce la politiche irlandese a impegnâsi su chest front e à cjapâlu dentri intal progjet di svilup batiât Project Ireland 2040 che al fisse lis liniis di indreçament pai prossims vincj agns.

Font: Irish Times, 13/03/18