27/03/18

Paîs Catalans: ofensive judiziarie cuintri dal indipendentisim

Lis divisions internis al indipendentisim che ai 23 di Març a vevin impedît la elezion di Jordi Turull ae presidence dal guvier catalan (cu la astension dai 4 parlamentârs de CUP, JxCat e ERC a jerin rivâts dome a 64 vôts a front dai 65 contraris ae sô elezion), a son passadis dibot in secont plan denant de gnove ofensive repressive metude in at des autoritâts spagnolis. Ta chê stesse zornade, di fat, il judiç dal tribunâl suprem Pablo Llarena, che al coordene la inchieste cuintri dal indipendentisim catalan, al à decidût di sierâ la fase investigative e di rinviâ a judizi 25 dai 28 imputâts, 13 di chescj pal reât di ribelion che al previôt fin di 30 agns di preson, e al à fat impresonâ altris cinc di lôr. Dongje o in zonte a chest reât, i imputâts a son acusâts di disubidience e di malversazion (par vie des spesis che il guvier catalan al varès fat par ativitâts che la magjistrature e calcole leadis al procès di indipendence).
In chest moment, duncje, a àn di rispuindi di ribelion e di malversazion Carles Puigdemont (president dal guvier catalan destituît des autoritâts spagnolis, arestât ai 25 di Març in Gjermanie), Oriol Junqueras (vicepresident destituît, impresonât za di timp), Joaquim Forn (conseîr pal interni destituît, impresonât za di timp), Jordi Turull (conseîr pe presidence destituît, impresonât ai 23 di Març), Raül Romeva (conseîr pai forescj destituît, impresonât ai 23 di Març), Toni Comín (conseîr pe sanitât destituît, in esili in Belgjiche), Dolors Bassa (conseiere pes politichis sociâls destituide, impresonade ai 23 di Març), Clara Ponsatí (conseiere pe educazion destituide, in esili in Scozie), e Josep Rull (conseîr pal teritori destituît, impresonât ai 23 di Març). A saran processâts par ribelion invezit Jordi Sànchez (ex president de ANC, in preson za di mês), Jordi Cuixart (president dal Òmnium Cultural, in preson za di mês), Carme Forcadell (za presidente dal Parlament catalan, impresonade ai 23 di Març), Marta Rovira (segretarie gjenerâl di ERC, che ai 23 di Març e à comunicât di jessi lade in esili in Svuizare). Pai reâts di disubidience e malversazion a laran a procès Meritxell Borràs (conseiere pal guvier destituide), Lluís Puig (conseîr pe culture destituît, in esili in Belgjiche), Carles Mundó (conseîr pe justizie destituît), Santi Vila (conseîr pes ativitâts economichis destituît), Meritxell Serret (conseiere pe agriculture, in esili in Belgjiche). Par finî, a àn di rispuindi di disubidience Lluís Corominas (za membri de presidence dal Parlament), Lluís Guinó (za membri de presidence dal Parlament), Anna Simó (za membri de presidence dal Parlament), Ramona Barrufet (za membri de presidence dal Parlament), Joan Josep Nuet (za membri de presidence dal Parlament), Anna Gabriel (za deputade de CUP, in esili in Svuizare), e Mireia Boya (za deputade de CUP).
La decision di processâ 25 dirigjents indipendentiscj par reâts che a àn pôc a ce viodi cu la realtât dai fats (chel di ribelion, par esempli, al previôt l’ûs de violence cuant che invezit de bande dai imputâts no si à vude nissune azion violente) e di impresonâ Jordi Turull, Raül Romeva, Josep Rull, Dolors Bassa e Carme Forcadell e à jevât protestis in dute la Catalogne cun miârs di personis in place za la sere dai 23 di Març (là che la polizie e à ferît passe vincj manifestants). Sul plan istituzionâl, dopo di une prime azion di proteste unitarie des fuarcis sovranistis za ai 23, sabide ai 24 di Març il president dal Parlament catalan, Roger Torrent, al à let un document cuintri de repression e pal svilup di un front democratic unitari che al à za metût adun Junts per Catalunya, ERC, Catalunya en Comú e CUP. Protestis di place spontaniis cun miârs di personis si son davueltis ancje domenie dopo che si à savût che, su la fonde dal ordin di cature european, la polizie todescje e veve fermât il president catalan in esili Carles Puigdemont. Sot sere e vie pe gnot si àn vût ancje scuintris cu la polizie cuntun centenâr di ferîts e cualchi arest.
Font: Vilaweb, 22-25/03/18; Ara, 22-25/03/18; Naiz:, 22-25/03/18

Nessun commento: