Lussemburc: misuris par infuartî il lussemburghês

Il consei dai ministris dal Lussemburc al à dât il vie libare a di un progjet di leç che si propon di valorizâ la lenghe proprie e di infuartî la sô presince inte societât. Tra lis misuris previodudis si à la nomine di un comissari pe lenghe che al varà di ocupâsi di racuei e di centralizâ lis informazions sul ûs dal lussemburghês de bande des scuelis, dai citadins e des istituzions dal paîs. Il progjet al cjape dentri ancje un centri linguistic par dâ informazions sul lussemburghês e par promovi iniziativis culturâls e events leâts a cheste lenghe. Il test al varà cumò di passâ pe cjamare dai deputâts pe sô aprovazion definitive. Il Lussemburc al ricognòs cheste varietât gjermaniche come lenghe nazionâl in zonte dal todesc standard e dal francês.

Font: Wort, 17/11/17

Paîs Catalans: indipendentiscj dividûts aes elezions dai 21D

Un dai risultâts otignûts dal guvier di Madrid cul clamâ dongje elezions autonomichis in Catalogne ai 21 di Dicembar al è di marcâ lis divisions che si àn dentri des fuarcis politichis impegnadis pe indipendence de Catalogne. Cun di fat, si ben che si è daûr a lavorâ par definî dai ponts condividûts intal program, la aree indipendentiste si presentarà aes elezions cun almancul trê listis diferentis: di une bande al è il PDeCAT che al propon un secont esecutîf vuidât di Carles Puigdemont e al cîr di dâ dongje fuarcis ator de liste Junts per Catalunya; o vin po ERC che e à decidût di no continuâ la esperience di Junts pel Sí ma di presentâsi par so cont; e, par finî, e je la CUP che e manten la sô candidature autonome ancje se vierte a altris sogjets de aree libertarie e radicâl dal indipendentisim.

Paîs Basc: sì ae leç sul ûs dal basc tes aministrazions de Navare

Ai 15 di Novembar il guvier de Navare al à fat bon il decret che al regole l’ûs de lenghe basche intes aministrazions e intai ents publics de comunitât autonome. L’intindiment dal proviodiment, che al è il risultât di un procès lunc di compartecipazion, al è di rispuindi al dirit dai citadins di jessi assistûts ancje par euskara. Il decret al ten cont des trê areis linguistichis che e je dividude la Navare e al previôt che te aree bascofone a sedin garantîts ducj i dirits linguistics che a divegnin de couficialitât dal euskara, che te aree miste si garantissi ai citadins il dirit di sielzi la lenghe che a àn miôr, e che te aree no bascofone si vedin dai spazis di comunicazion ancje par basc. La responsabile des relazions citadinis e istituzionâls dal guvier, Anna Ollo, e à spiegât che si ponte cussì a dâi une rispueste concrete ai passe 80 mil citadins de Navare che in chest moment no puedin jessi seguîts dai ents publics inte lôr lenghe proprie. Par vê une idee de situazion atuâl baste pensâ che dai 160 mil dipendents publics de Navare a son a pene 160 i puescj là che si domandave la cognossince de lenghe basche. Il câs piês al è chel dal servizi sanitari regjonâl là che dome par 1 dai 6.142 puescj si previôt il bilinguisim come competence par lavorâ. Il decret al previôt duncje ancje une planificazion dal personâl che e tegni cont dai profîi linguistics.

Font: Naiz:, 15/11/17

Gales: indipendence di S4C a risi cul acuardi cu la BBC

La organizazion pe lenghe Cymdeithas yr Iaith Gymraeg si mostre preocupade pal gnûf acuardi in program tra la television in lenghe galese S4C e la radiotelevision publiche britaniche BBC che al puartarès cheste ultime a incressi la sô influence sei sul plan aministratîf che editoriâl. L’acuardi al previôt, par esempli, che plui de metât dal personâl de emitente galese al lavori dai studis de BBC e che il so segnâl al sedi emetût de television britaniche. Di cheste strade, e dîs la Cymdeithas, la BBC e varà il control totâl de television galese, un obietîf che il guvier conservadôr di Londre al è daûr a lavorâi parsore di vot agns incà. Pe organizazion galese, la uniche strade par evitâ che S4C e pierdi la sô indipendence e je chê de devoluzion al Gales dal setôr radiotelevisîf.

Font: Cymdeithas yr Iaith Gymraeg, 14/11/17

Irlande: Gaeilge24 cun passe 30 mil students

A son stâts passe 30 mil i students che ai 14 di Novembar a àn aderît a Gaeilge24, une sorte di sfide proponude de organizazion Conradh na Gaeilge che e previôt che cui che al partecipe al vedi di fevelâ pardut, cun ducj e par une zornade interie par irlandês. La iniziative si propon di incressi la cussience linguistiche dai students e, tal stes timp, di impegnâju a slargjâ l’ûs de lenghe proprie te comunitât là che a vivin. No je une azion di pôc se si pense che, ancje cuant che al ven studiât a scuele, l’irlandês nol à vite facile fûr di chel ambient. I students a rivin di 320 scuelis diferentis sparniçadis ator pe isule e, pe prime volte, dutis lis 32 conteis de Irlande a àn almancul un istitût che al partecipe.

Font: CnaG, 13/11/17

Finlande: Pirita Näkkäläjärvi nomenade “Sami dal an”

Il premi dedicât al Sami dal an in Finlande al è stât assegnât a Pirita Näkkäläjärvi, responsabile dal servizi informatîf in lenghe sami de radiotelevision publiche YLE tra il 2012 e il 2016. Il ricognossiment si propon di dâi une visibilitât a nivel statâl ae culture di cheste comunitât minorizade e ai siei rapresentants plui vivarôs. Par Pirita Näkkäläjärvi, premiâ une operadore de informazion al pues judâ a mostrâ trops che a son ancjemò i pidiments par fâ rivâ a ducj i citadins finlandês la vôs dai sami. Sul plan formâl – e à dite la zovine – i sami a àn plene libertât di espression, ma te realtât si àn inmò tancj tentatîfs par cidinâju e un ûs sistematic de disinformazion cuintri di cheste comunitât, cence che il guvier al fasi nuie par impedîlu.

Font: The Independent Barents Observer, 12/11/17

Paîs Basc: te CAB al cres l’ûs dal basc in ambient scolastic

Ai 10 di Novembar a son stâts presentâts i risultâts dal progjet Arrue dedicât al ûs dal euskara in ambient scolastic inte Comunitât Autonome Basche che al elabore i dâts sociolinguistics cjapâts sù tal 2015. L’ûs complessîf de lenghe de bande dai fruts tra i 9 e 10 agns al sfilie il 60%, o sei un 3% in plui rispiet a cuatri agns prime, intant che tra i fantacins sui 13-14 agns al è dal 42,3%, in aument dal 2,4% rispiet ae inchieste precedente. Se si cjale plui in detai i doi risultâts si viôt che cuasi l’80% dai fruts des cuartis de primarie a doprin l’euskara in classe cui lôr professôrs, il 68,2% lu dopre cui compagns in aule, e il 40,9% cui chei altris scuelârs intant dai moments di ricreazion. Pai fruts plui grancj si à un ûs dal 70% cui professôrs in classe, dal 38,3% cui compagns in aule e dal 23,6% cui students tai spazis ricreatîfs de scuele.

Font: La Vanguardia, 10/11/17

Paîs Catalans: Baleârs, cors di catalan pai dipendents publics

Il gnûf plan di formazion de lenghe catalane imbastît de scuele de aministrazion publiche des Baleârs (EBAP) al previôt sù par jù un miâr di puescj intai cors di catalan pal personâl des aministrazions publichis des isulis. I cors disponibii a interessin i nivei A2, B1, B2, C1, C2 e lengaç aministratîf. I numars di puescj par ogni nivel a van dai 90 ai 150 a seconde de domande specifiche e des frecuencis dai cors precedents. Par facilitâ la partecipazion ai cors dal personâl in ativitât su lis diviersis isulis, par cierts nivei di certificazion a son in program ancje cors telematics o cun mancul presincis obligatoriis.

Font: La Vanguardia, 09/11/17

Aragon: plan par promovi l’aragonês ancje a Zaragoza

La aministrazion comunâl di Zaragoza si à indotade di un plan di promozion dal aragonês. Ta cheste citât, di fat, a vivin 7 mil des 25 mil personis che a fevelin la lenghe proprie dal Aragon. Une des liniis di azion decidudis e previôt la promozion de lenghe par mieç di une programazion di apontaments dentri des fiestis locâls ma ancje cu la istituzion di une Zornade de lenghe aragonese. Sul plan educatîf, si à za inviât in cuatri centris civics citadins dai cors par imparâ la lenghe come prin pas par une scuele municipâl par insegnâ l’aragonês. Une tierce aree di intervent e je chê de visibilitât de lenghe ator pe citât, prin di dut cul doprâ l’aragonês intun pocjis des campagnis di comunicazion dal comun, e po cun segnaletiche bilengâl in 16 stradis plui leadis ae aree di presince tradizionâl de lenghe.

Font: El Periodico de Aragón, 08/11/17

Paîs Catalans: rapuart su la politiche linguistiche de Catalogne

La direzion gjenerâl di politiche linguistiche dal guvier de Catalogne e à publicât il rapuart anuâl su la politiche linguistiche che, dongje des azions metudis in at dal esecutîf, al ufrìs un panorame detaiât su la cognossince e sui ûs dal catalan e di chês altris lenghis feveladis intal principât. La informative e presente ancje indicadôrs gnûfs sul stât di salût de lenghe tant che l’ûs intal setôr comerciâl e ta chel digjitâl, o su la interazion jenfri nivel di cognossince dal catalan e distribuzion de popolazion imigrade. Intal rapuart si marche la impuartance di lâ indenant cui cuatri as principâi di intervent fissâts dal guvier, o sei cognossince, coesion, consum e cooperazion, cuntun acent particolâr su la formazion par catalan des personis nassudis fûr de Catalogne. Sezions di pueste a son po dedicadis al ocitan, fevelât massime te Val di Aran, e ae lenghe dai segns catalane.

Font: Generalitat de Catalunya, 06/11/17

Tatarstan: proteste par domandâ il tatar curicolâr a scuele

Ai 6 di Novembar si à vude une manifestazion di proteste a Kazan, capitâl dal Tatarstan, par domandâ l’insegnament curicolâr dal tatar intes scuelis di cheste republiche autonome de Federazion Russe. Cundut che la Costituzion di chest teritori e previôt pal tatar un status di couficialitât adun cul rus, il so insegnament intes scuelis nol è obligatori e in tancj di lôr a studiin dome par rus. Intant de manifestazion un dai ativiscj pe lenghe al è stât arestât de polizie.

Font: RadioFreeEurope-RadioLiberty, 06/11/17

Gales: cambiât il ministri pe lenghe galese

Il prin ministri galês, il laburist Carwyn Jones, al à decidût un rimpast di guvier che, tra lis altris novitâts, al à puartât a cambiâ ancje il responsabil pe lenghe galese. Al puest di Alun Davies e je cussì rivade Eluned Morgan. La gnove e à cjatât il bon acet de organizazion pe lenghe Cymdeithas yr Iath Gymraeg che e à invidât la ministre a cambiâ direzion rispiet a cui che al jere prime di jê e a rinunciâ ae eliminazion de figure dal comissari pe lenghe par pontâ invezit a infuartî la normative cumò in vore. Cun di plui si le invide a sveltî il procès par superâ l’insegnament dal galês come lenghe seconde par rivâ a di un model scolastic unic cul galês veicolâr.

Font: BBC, 03/11/17; Cymdeithas yr Iaith Gymraeg, 03/11/17

Irlande: autoguvier simpri plui a risi tal Nord

Il segretari di stât pe Irlande dal Nord, James Brokenshire, al à fat savê che il guvier britanic al è daûr a imbastî la leç finanziarie par cheste part dal Ream Unît e che le fasarà buine dentri de fin dal mês. La misure, che e rapresente il prin pas in direzion de pierdite dal autoguvier e de aministrazion direte di Londre su lis sîs conteis nordirlandesis, e je stade motivade cu la dibisugne di garantî la continuitât dai servizis publics gjestîts fin cumò des istituzions de Irlande dal Nord a front de incapacitât dal DUP e dal Sinn Féin di formâ un guvier condividût. I acuardis di pâs a previodin di fat che a formâ l’esecutîf de Irlande dal Nord a sedin i partîts plui votâts des dôs comunitâts che si divît cheste part de isule, o sei chê unioniste e chê nazionaliste irlandese. Dopo di une crisi istituzionâl che si strissinave di Zenâr incà, ai 30 di Otubar al scjadeve il tiermin par cjatâ un acuardi di guvier. Par Brokenshire e jere duncje sante scugne evitâ di cjatâsi cence belanç pal 2018, ma chest nol vûl dî che lis tratativis no vedin di lâ indenant e se tes prossimis zornadis si ves di cjatâ un acuardi, Londre e je pronte a lassâ che al sedi il gnûf guvier locâl a prontâ la finanziarie. Un dai ponts là che DUP e Sinn Féin no rivin a cjatâ un acuardi e je la leç su la lenghe irlandese, sostignude de plui part dai partîts nordirlandês ma che e je contrastade dai unioniscj che no vuelin che l’ûs dal irlandês al sedi garantît in ducj i servizis publics. I republicans dal Sinn Féin a ricuardin però che la leç pal irlandês e jere previodude ancje dai acuardis di pâs e che duncje il guvier di Londre al à di clamâ i siei aleâts dal DUP a rispietâ chest impegn.

Font: Irish News, 01/11/17

Gales: si sbassin lis venditis dai libris par galês

Daûr dai dâts comunicâts dal Consei dal libri galês dal 2011 al 2017 la vendite di libris in lenghe galese e je lade indenant a calâ. Chei par fruts a son passâts di 234 mil a 196 mil cuntune diminuzion dal 16% a front di un aument dal 63% di chei par inglês che, chel istès, a restin une vore distants rispiet a chei par galês, cun 36 mil copiis vendudis intal 2017. Inmò plui marcât il câl intai libris par grancj, là che si à passâts di 145 mil a 118 mil, o sei il 18% in mancul. Ta chest câs però ancje chei par inglês a àn vendût di mancul e a son lâts jù dai 152 mil dal 2011 ai 130 mil di chest an (-14%). Pai operadôrs dal setôr al è un efiet des politichis di austeritât che a àn ridusût lis disponibilitâts economichis dai citadins e lis risorsis par cui che al lavore ta chest cjamp. Dongje di vendi mancul libris, di fat, ancje il numar des librariis dal Gales si à sbassât dal 15% intai ultins dîs agns. Par finî, un dât di segnalâ al è che, dopo di un ciert interès pai libris digjitâi (e-books), tai ultins agns i letôrs a son tornâts a chei su cjarte.

Font: BBC, 30/10/17

Macedonie:sucès di SDSM e DUI tes aministrativis

Il secont turni des elezions aministrativis in Macedonie che si à tignût ai 29 di Otubar al à confermât la tindince za viodude dôs setemanis prime intant dal prin turni e al à premiât i doi partîts di guvier. Intes areis a maiorance macedone la vitorie e je lade fûr di dubi ai sociâi democratics (SDSM) dal prin ministri Zoran Zaev che dopo des 39 aministrazions concuistadis intal prin turni a àn vinçût 18 dai 35 comuns ancjemò di assegnâ, intant che la diestre (VMRO DPMNE) dal ex premier Nikola Gruevski e à otignût tra prin e secont turni a pene 5 comuns. Inte part dal paîs a maiorance albanese a fâ di paron e je stade la Union Democratiche pe Integrazion (DUI), cumò aleade dai sociâi democratics al guvier, che e à vinçût 11 ents locâi a partî de citât di Tetovo. Chei altris doi partîts di riferiment de comunitât albanese – BESA e la Aleance pai Albanês – a àn invezit di contentâsi di une aministrazion parom.

Font: Balkan Insight, 30/10/17

Ocitanie: partîts aranês preocupâts pes menacis al autoguvier

Ai 30 di Otubar si à dade dongje in forme urgjente e straordenarie la comission pai afârs istituzionâi dal Consei Gjenerâl di Aran formade dai puartevôs dai trê grups politics presints inte assemblee di cheste valade ocitane cjapade dentri tal principât di Catalogne. I membris de comission a àn criticât la metude in vore dal articul 155 de costituzion spagnole, l’impresonament e la persecuzion judiziarie dai rapresentants dal guvier e des istituzions catalanis. Lis azions decidudis dal guvier spagnûl a àn lassât il Consei Gjenerâl di Aran cence di un interlocutôr istituzionâl par svilupâ la leç sul trasferiment di competencis e su la incressite dal autoguvier de valade. La comission e à duncje decidût di blocâ il procès in spiete di viodi ce che al sucedarà cu lis elezions autonomichis dai 21 di Dicembar. Par evitâ pas indaûr intal procès si à ancje proponût di formalizâ un acuardi istituzionâl tra dutis lis fuarcis politichis aranesis.

Font: Conselh Generau d’Aran, 30/10/17

Aragon: al cres l'aragonês a scuele, ma la lenghe e je a risi

L’insegnament dal aragonês a scuele al finìs vincj agns. Si jere tal an scolastic 1997-1998 cuant che, in gracie di un acuardi tra il guvier teritoriâl e lis aministrazions locâls, intes scuelis di cuatri localitâts dal Aragon 250 students e 4 insegnants a tacavin a confrontâsi cu la lenghe proprie. In dì di vuê l’aragonês al è studiât di plui di un miâr di fruts des primariis e des secondariis, i insegnants a son 20 e al è cressût ancje il numar des localitâts là che si insegne la lenghe, cence dismenteâ la sô presince ancje in diviers centris pe infanzie. Magari cussì no cheste incressite de presince de lenghe tes scuelis si compagne cul so calâ te societât. Daûr dai dâts analizâts di resint de associazion aragonese di sociologjie al ven fûr che in dîs agns l’ûs de lenghe proprie tal Aragon al è passât dal 18,6% al 5,3%.

Font: El Periódico de Aragon, 28/10/17 e 01/11/17

Paîs Basc: za plui di 25 mil iscrits ai euskaltegis de CAB

Tra Setembar e Otubar, intant de prime fase di iscrizion, a son stadis 25.080 lis personis che si àn notadis intai euskaltegis de Comunitât Autonome Basche, intant che si stime che altris 10 mil a podaressin iscrivisi di chi ae Vierte di chest an che al ven. Plui de metât des iscrizions intai centris di insegnament de lenghe basche pai adults si le à vude in Bizkaia (13.340), intant che in Gipuzkoa si son notâts in 7.637 e in Araba in 4.103. Doi tierçs dai iscrits a son feminis. Inte leç finanziarie pal 2018 il guvier de Comunitât Autonome Basche al à proponût di incressi sei lis risorsis pai centris, sei i jutoris pes personis che ae fin dai cors a vegnin promovûts.

Font: 20 minutos, 27/10/17

Castilie e León: Fala Ceibe al domande plui impegn pal Bierzo

Il coletîf Fala Ceibe al domande aes istituzions e ai partîts politics de Galizie di incressi il lôr impegn par difindi l’insegnament e l’ûs dal galizian intal Bierzo, regjon leonese là che e vîf une comunitât che e fevele cheste lenghe. Si domande in particolâr une azion plui fuarte par convinci il guvier di Castilie e León a ricognossi tal so statût la couficialitât dal galizian. Cun chest ricognossiment al sarès plui sempliç rivâ al ûs de lenghe proprie tes istituzions provinciâls e tes aministrazions locâls, ae incressite dal so ûs intes scuelis dal teritori e al ûs dal bilinguisim inte toponomastiche. Fala Ceibe al invide l’esecutîf galizian a meti in vore ancje azions diretis tant che la promozion unitarie e in forme bilengâl dai sîts turistics che si cjatin tra Galizie e León, o la publicazion de publicitât istituzionâl par galizian sui mieçs di comunicazion dal Bierzo.

Font: Galicia Confidencial, 24/10/17

Ocitanie: proteste de Calandreta in difese dai contrats assistûts

Calandreta, la rêt des scuelis a imersion par ocitan, e à manifestât ai 21 di Otubar a Bordèu / Bordeaux par protestâ cuintri de decision dal guvier francês di taiâ i contrats assistûts, ven a dî contrats sostignûts in part di risorsis publichis par vie de lôr utilitât sociâl. Intal stât francês lis scuelis intes lenghis minorizadis a son ricognossudis, ma no son parificadis ad in plen cun chês publichis e duncje, par podê funzionâ, a àn di zovâsi di chest gjenar di contrats. Il tai decidût dal guvier di Parîs al riscje cussì di meti a risi la ativitât di chestis scuelis. Lis protestis e lis mobilitazions che si vevin vudis in Setembar ator pe Bretagne a vevin permetût di rivâ a di une moratorie par mantignî i contrats assistûts pai lavoradôrs des Diwan, o sei lis scuelis a imersion par breton. Ancje su la fonde di chest precedent, i ocitans a domandin une misure similâr pes lôr scuelis a imersion. In dì di vuê, Calandreta e cjape dentri 62 scuelis e 4 coleçs.

Font: Jornalet, 23/10/17