Stât spagnûl: il PP si infuartìs tes elezions gjenerâls

Intal stât spagnûl lis elezions politichis dai 26 di Jugn no àn cambiât plui di tant il cuadri complessîf che al jere jessût dal vôt dai 20 di Dicembar dal 2015, o sei la fin dal bipartitisim che si veve formât dopo de colade dal franchisim e un fruçonament dal vôt che al rint dificil formâ un guvier. Chel istès lis gnovis elezions a àn puartât cualchi novitât. Il PP, in plui di restâ la formazion plui votade, al infuartìs la sô posizion e al passe di 123 a 137 elets. Il PSOE si manten al secont puest, ma al va jù di 90 a 85 deputâts. No si à duncje il sorpàs a çampe di Unidos Podemos che, cundut de aleance jenfri Podemos e Izquierda Unida, al à di “contentâsi” di 45 elets. In calâ la formazion conservadore Ciudadanos che e passe di 40 a 32 deputâts.

Stât francês: fissâts i nons des gnovis regjons

Cui 25 di Jugn si à sierade la sielte dai nons de gnovis regjons jessudis de riforme teritoriâl metude in vore intal stât francês, ancje se la ultime peraule i spiete al Consei di Stât che dentri dal prin di Otubar al decidarà se fâ bogns o no i nons sielzûts a nivel locâl. Sîs regjons a àn mantignût i confins che za a vevin e cun chei ancje il lôr non, altris dôs a àn decidût juste di meti adun i nons des lôr parts (Borgogne – Francje Contee, e Alvernie – Rhône-Alpes), intant che la fusion tra Alte e Basse Normandie e à puartât ae nassite di une regjon che nissun al à vût dubis intal clamâ Normandie. Plui ingredeade la sielte dai nons par chês altris regjons. La union di Alsazie, Lorene, Champagne e Ardenis e je stade batiade Grand-Est, cence nissun riferiment duncje ai nons tradizionâi. Stesse logjiche ancje pe union tra Nord, Pas-de-Calais e Picardie che e je deventade Hauts-de-France. Il leam identitari al è invezit evident par dôs des grandis regjons che a cjapin dentri la part sudocidentâl dal stât francês. La union jenfri Lenghedoc – Roussillon e Misdì – Pireneus e je deventade Ocitanie pirenaiche mediteranie. Il riferiment ae Ocitanie volût de maiorance dai citadins clamâts a dî la lôr sul non gnûf no je plasude par nuie ae diestre republicane e a chê nazionaliste ma al à vût la poie ancje de maiorance dai conseîrs regjonâi che i àn zontât la adietivazion “pirenaiche mediteranie” par slizerî un tic il so impat. Par contentâ i catalans dal Roussillon si à invezit prometût un impegn concret a difindi lis carateristichis linguistichis e identitariis de Catalogne setentrionâl. De fusion tra Aquitanie, Limusin e Poitou-Charente e je nassude invezit la Gnove Aquitanie, là che l’adietîf al varès di fâ riferiment al gnûf avignî unitari di chest teritori.

Font: Libération, 27/06/16

Ream Unît: prins efiets de Brexit su lis nazionalitâts internis

Il 52% dai citadins britanics che ai 23 di jugn a àn partecipât al referendum par decidi se restâ o no dentri de Union Europeane al à votât par che il Ream Unît si gjavi fûr de Union. Daûr dal dât complessîf si platin però risultâts une vore diferents a seconde de comunitât teritoriâl clamade al vôt. Cussì, se in Ingletiere, in Cornualie e in Gales al à vinçût il front a pro de jessude de Union, in Irlande dal Nord, in Scozie e a Gjibraltar i votants a jerin in maiorance par restâ dentri de Union. Plui in detai, i vôts pro Europe a son stâts il 56% intes sîs conteis de Irlande cjapadis dentri tal Ream Unît, il 62% in Scozie e cuasi il 96% te enclave britaniche di Gjibraltar. Chescj risultâts a àn stiçât une rieste di reazions che i lôr efiets ultins a restin ancjemò ducj di capî. Un dai fronts plui cjalts al è propit chel de tignude dal Ream Unît cussì cemût che lu cognossìn.

Paîs Catalans: ofensive cuintri dai indipendentiscj

Il tribunâl superiôr di justizie de Catalogne al à decidût di rinviâ a judizi l’ex president dal guvier catalan Artur Mas, la ex presidente vicjarie Joana Ortega e la ex assessore pe istruzion Irene Rigau cu la acuse di disubidience e abûs aministratîf. Il riferiment al è al referendum pe indipendence de Catalogne dai 9 di Novembar cuant che, daûr de acuse, i trê rapresentants dal guvier catalan a varessin tignût un compuartament di colaborazion ative cui organizadôrs de consultazion. La decision e je stade cjapade cun sodisfazion dai rapresentants de diestre spagnoliste, intant che pal front indipendentist al è vergognôs che si calcoli di delit permeti ai citadins di esprimi la lôr opinion.

Ocitanie: fieste pai 25 agns di autoguvier aranês

La setemane dai 17 di Jugn e je stade fieste grande inte Val di Aran, piçule aree di lenghe ocitane cjapade dentri intal principât di Catalogne. Ai 17 di Jugn dal 1991, 151 agns dopo de sô abolizion de bande des autoritâts spagnolis, al tornave a nassi il Consei gjenerâl, orghin di autoguvier de valade. La fieste pai 25 agns di chest inovâl e cole intun moment une vore particolâr, viodût che l’avignî di chest toc di Ocitanie al è leât ad in dopli al procès di indipendence che si à inviât in Catalogne. Nol è un câs, di fat, che propit intal Zenâr dal an passât il Parlament catalan al vedi fate buine la leç sul regjim speciâl de Val di Aran che i ricognòs ancje a chest teritori il dirit ae autodeterminazion, che e incrès i siei spazis di autoguvier e che e rint l’ocitan aranês lenghe couficiâl de Catalogne. Cundut che la leç no je ancjemò in vore ad in plen, cheste suaze normative i permet ae Val di Aran di jessi la part di Ocitanie cul plui alt nivel di autoguvier.

Font: Jornalet, 17/06/16; VilaWeb, 17/06/16

Ocitanie: sierât il vôt popolâr pal non de regjon centrâl

Tra i diviers nons proponûts par batiâ la gnove Regjon nassude il prin di Zenâr di chest an de fusion jenfri Lenghedoc - Roussillon e Misdì – Pireneus, i passe 200 mil citadins che a àn partecipât al vôt in rêt a àn sielzût in grande maiorance “Ocitanie”. Cheste propueste, di fat, e à vût il 45% di preferencis a front di un 10/12% di vôts cjapâts di chês altris opzions. Par decidi però se cheste propueste e deventarà pardabon il non istituzionâl de regjon, a coventin ancjemò doi passaçs. Prin, ai 24 di Jugn, la assemblee regjonâl e fasarà indenant la sô propueste che nol è dite che e sedi chê votade dai citadins e po, dentri dal prin di Otubar, il guvier francês al decidarà se acetâle o pûr no.

Font: Jornalet, 16/06/16

Serbie: i partîts des minorancis si svicinin al guvier

Riza Halimi, president dal Partît pe Azion Democratiche che al rapresente une buine part de minorance albanese de Serbie, si è cjatât cul prin ministri serp Aleksandar Vučič inte suaze de prime serie di incuintris dal esecutîf di Belgrât cui partîts di riferiment des minorancis nazionâls dal paîs tant che la Aleance dai Ongjarês in Voivodine e la Comunitât Democratiche Bosgnache. Vučič si è confrontât cun Halimi massime sul avignî de Agjenzie di coordenament par Bujanovac, Medveđa e Preševo / Presheva o sei l’organisim che si ocupe de minorance albanese che e vîf te aree sudocidentâl de Serbie. Il prin incuintri tra lis parts si è sierât in maniere positive cu la disponibilitât dal Partît pe Azion Democratiche a cooperâ cul esecutîf di Belgrât e cun chê dal guvier di nomenâ pe prime volte un membri de comunitât albanese ae vuide de Agjenzie.

Font: Balkan Insight, 10/06/16

Ucraine: acuardi cun Budapest par judâ la minorance ongjarese

Ai 9 di Jugn il guvier ongjarês al à sotscrit un acuardi di svilup economic cu la federazion des organizazions de minorance magjare che e vîf inte regjon de Transcarpazie, in Ucraine sudocidentâl. La intese, che si poie suntune disponibilitât economiche di 96 milions di euros, e je pensade par judâ lis ativitâts economichis gjestidis di membris de minorance ongjarese ancje par mieç di prestits vantazôs. L’intindiment principâl de iniziative al è di evitâ che i ongjarês de Transcarpazie a sbandonin la lôr tiere par resons economichis.

Font: Politics.hu, 10/06/16

UE: 180 puescj par operadôrs linguistics irlandês

Di chi al 2021 a saran 180 i puescj di vore a disposizion dentri des istituzions europeanis par tradutôrs, interpretis e personâl cuntune buine paronance de lenghe gaeliche irlandese. L’irlandês al è stât ricognossût dome intal 2007 tant che lenghe uficiâl e di lavôr de Union Europeane ma, viodude la situazion di minorizazion che al va dilunc a patî te stesse Irlande, une deroghe ae normative comunitarie e à blocât i efiets pratics di cheste decision. Tal Dicembar dal an passât il Consei de Europe al à fat bon un regolament che al fisse ca di cinc agns, intal 2021, la fin di cheste deroghe. Par rivâ prontis par chê scjadince lis istituzions europeanis a àn duncje di tacâ daurman a meti in vore in maniere progressive ducj chei servizis previodûts par une lenghe uficiâl. Cussì, za cul prin tacâ di Jugn, si à inviât il percors di assunzion par 62 tradutôrs. Po, a man a man, il personâl di lenghe gaeliche al cressarà fintremai lis 180 unitâts.

Font: Business World, 10/06/16

Ream Unît: nuie galês tal Parlament britanic

Il president de Cjamare dal Parlament britanic, Chris Grayling, al à dite di no ae domande rivade di un grup di deputâts laburiscj par gjavâ il bant sul ûs de lenghe galese almancul intant dai lavôrs de comission parlamentâr che e viôt des cuistions leadis al Gales. Par Grayling i citadins no acetaressin lis spesis leadis al servizi di traduzion che l’ûs dal galês al domandarès e che la uniche pussibilitât par permeti di doprâ in aule cheste lenghe e je di vê a ce fâ cun cualchidun che al fevele dome par galês e no ancje par inglês. Pai rapresentants laburiscj si trate di une posizion che no à nissun rispiet pal galês e par cui che lu fevele, là che si cjatin ancje personis che a son stadis monolengâls fin al moment di tacâ scuele e che par lôr il galês al reste la prime lenghe. Dal moment che la reson principâl dal dinei e sarès chê de spese masse alte, i rapresentants dal Plaid Cymru a àn invezit domandât a Grayling, ma cence vê rispueste, di fâi cognossi a dut il Parlament lis cifris in cuistion.

Font: BBC, 09/06/16

Bosgne: condane par discriminazion de Cort pai dirits umans

Il tribunâl european pai dirits umans al à condanât par discriminazion lis istituzions de Bosgne. Daûr de Costituzion, la presidence statâl e à di jessi formade di un membri par ognidune des trê comunitâts che a formin la federazion, ven a dî bosgnacs, cravuats e serps. Pe comission eletorâl centrâl però, par candidâsi pe presidence, si à ancje di rivâ di chê aree de federazion dulà che la proprie comunitât e je maioritarie. Par chest la comission e à boçât par dôs voltis la candidature di Ilijaz Pilav che, cundut che come bosgnac al varès podût rapresentâ cheste componente dentri de presidence, al jere a stâ te Republika Srpska, o sei la part de federazion a maiorance serbe. La cort europeane e à judicât invezit discriminatorie cheste decision des autoritâts de Bosgne. No je la prime volte che lis istituzions dal paîs balcanic a vegnin condanadis par discriminazion. Lis voltis stadis il tribunâl european pai dirits umans lis veve condanadis par no vê permetût di candidâsi pe presidence e nancje pal parlament federâl, citadins bosgnacs di divignince rom o ebraiche o che si vevin refudât di declarâsi membris des trê comunitâts fondativis de federazion.

Font: Balkan Insight, 09/06/16

Asturiis: il guvier al promôf asturian e galizian a scuele

Dopo doi agns che no lu faseve, il guvier des Asturiis al à tornât a inviâ une campagne informative par sburtâ i gjenitôrs a sielzi pai lôr fîs percors scolastics che a cjapin dentri ancje la lenghe asturiane. Il materiâl informatîf al è stât dât fûr in dutis lis scuelis primariis e secondariis des Asturiis in plui di jessi disponibil sul sît internet dal assessorât pe educazion. La lenghe asturiane e je cjapade dentri intal curriculum scolastic e il so insegnament si veve inviât inmò tal 1984 a partî di une disine di scuelis. In dì di vuê a son 335 i istitûts che a ufrissin la pussibilitât di studiâle, ma a àn di jessi lis fameis a decidi se gjoldi di cheste oportunitât o pûr no. Dongje dal asturian, la campagne e promôf ancje la varietât galiziane che si fevele te part plui ocidentâl des Asturiis.

Font: Galicia Hoxe, 09/06/16

Paîs Basc: proiezions linguistichis positivis pe CAB

Ca di vincj agns, tal 2036, inte Comunitât Autonome Basche il 49,5% al fevelarà par euskara, il 16,7% al varà une cognossince passive di cheste lenghe e il 33,8% al fevelarà par castilian a front di une situazion che, in dì di vuê, e viôt il 36,4% te prime categorie, il 19,3% te seconde e il 44,3% te tierce. Cheste proiezion si le cjate tal document là che il guvier de Comunitât Autonome Basche al fisse lis prioritâts de politiche linguistiche pai prossims vincj agns. La prime di chestis prioritâts e je di mantignî almancul lis azions metudis in cjamp fin cumò. Cun di fat, ancje se no si ves di rivâ a fâ di plui e miôr, il lavôr fat massime sui fruts dai agns ‘80 incà al à permetût di formâ simpri plui zovins par euskara al pont che za in dì di vuê, se si cjale ae popolazion sot dai 25 agns, il 73,2% al è in stât di fevelâ par euskara, il 15,5% lu capìs ma no lu fevele e a pene l’11,3% al fevele dome par castilian.

Font: El Diario, 08/06/16

Gales: galês e timp libar, masse comuns no fasin nuie

Lis aministrazions locâls galesis a son clamadis de normative a slargjâ lis ativitâts par galês intal cjamp sportîf e tal timp libar, ma dispès no rispietin chescj oblics. Al è il câs dai cors par nadâ là che plui de metât dai comuns dal Gales al ufrìs lis lezions dome par inglês. A denunciâ cheste situazion e je la organizazion Cymdeithas yr Iaith Gymraeg che e invide la comissarie pe lenghe galese a inviâ une inchieste uficiâl par vê un cuadri plui in detai de situazion e par meti in vore lis azions che a coventin par fâ rispietâ la leç.

Font: Local Gov, 06/06/16

Bretagne: sît unic pe editorie par breton

Cul mês di Otubar, inte suaze dal salon dal libri di Karaez / Carhaix, al sarà screât il portâl Lenn (lei) che si propon di meti adun i diviers editôrs che a publichin par breton. In dì di vuê a son une vincjine lis cjasis editoris che a stampin libris in lenghe bretone par une produzion complessive tor dai 120/130 titui par an. Il portâl al à chê di judâ a superâ la visibilitât dispès limitade di chestis publicazions, di ufrî un panorame il plui larc pussibil su dutis lis novitâts editoriâls par breton e di permeti a ducj chei che a vuelin lei ta cheste lenghe di cjatâ intun sît unic i libris disponibii e lis informazions par consultâ o par cjoli lis diviersis publicazions.

Font: Le Telegramme, 01/06/16

Ream Unît: prin spot televisîf par cornic

Lis lenghis si fasin cognossi ancje par mieç dai messaçs publicitaris, tant plui se si cjatin intune condizion di minorizazion fuarte. Par chest e à vût un rivoc no di pôc la decision di une imprese di gjelâts de Cornualie di trasmeti, su diviersis des televisions privadis britanichis plui impuartantis e in prime serade, un spot di trente seconts dut fevelât par cornic. E je la prime volte che cheste piçule lenghe celtiche e ven doprade par une publicitât televisive che e rive tes cjasis di dut il Ream Unît. La campagne publicitarie e previôt ancje la pussibilitât di discjariâ dal sît internet de aziende un manualut minim di fraseologjie par cornic. La idee di fonde de iniziative e je che par esaltâ l’ûs di ingredients sans e locâi e la lavorazion artesanâl dal prodot nol è nuie di miôr dal doprâ la lenghe carateristiche dal lûc.

Font: The Guardian, 20/05/16

Paîs Basc: primis consultazions popolârs su la indipendence

Ai 5 di Jugn i citadins di 34 comuns de Comunitât Autonome Basche – 32 inte provincie di Gipuzkoa, un in Bizkaia e un in Araba – a son stâts clamâts a partecipâ aes primis consultazions popolârs su la indipendence. Svilupadis sul model catalan, lis votazions a son stadis metudis in pîts dal coletîf Gure Esku Dago fûr dai canâi istituzionâi, in maniere di evitâ lis proibizions metudis de legjislazion spagnole. I citadins a jerin clamâts a rispuindi a di une domande une vore semplice, o sei: “Vuelistu jessi citadin/e di un stât basc indipendent?” Cundut che no jere une consultazion uficiâl e che organizazion e partecipazion a vevin une fonde volontarie, la medie dai votants e je stade tor dal 30% cun pontis che in cualchi comun a àn passât il 60%. La grande maiorance dai votants, o sei plui dal 90%, si è declarade a pro di un stât basc indipendent. Une vore sodisfats i organizadôrs de iniziative che a viodin chestis consultazions tant che il prin pas par svilupâ une mobilitazion indipendentiste trasversâl che e cjapi dentri dut il Paîs Basc.

Font: Naiz:, 05-06/06/16

Europe: GUE, EFA e ELEN adun par une diretive su lis lenghis

Inmaneât dai grups de Çampe Unitarie Europeane (GUE) e dai Verts – Aleance Libare Europeane (EFA) cu la colaborazion de Rêt Europeane pe Avualiance Linguistiche (ELEN), il prin di Jugn si è tignût intal Parlament european un ‘seminari che si proponeve di tirâ dongje fuarcis par svilupâ une diretive europeane su lis lenghis. Chê de diretive e je une strade che e permetarès di fat ancje di vierzi proceduris di infrazion cuintri di chei stâts che no le metin in vore o che a van a pidimentâ i dirits linguistics. Si trate di une cuistion che si insuaze ta chê plui gjenerâl dai dirits umans là che duncje, cemût che al à ricuardât il segretari de Rêt Davyth Hicks, “la discriminazion linguistiche e je une forme di razisim”. Al incuintri a àn partecipât ancje eurodeputâts dai Paîs Catalans, dal Paîs Basc, dal Gales, de Irlande e de comunitât ongjarese de Romanie. I indreçaments jessûts dal ‘seminari a saran cumò zirâts ancje al comitât pes libertâts civîls dal Parlament, al Consei de Europe, ae OSCE e ae ONU.

Font: Jornalet, 03/06/16

Paîs Catalans: il volontariât pe lenghe al passe lis 100 mil cubiis

Di cuant che al è stât inviât intal 2003 a son passe 100 mil lis cubiis linguistichis che si son formadis in Catalogne te suaze dal volontariât pe lenghe. Il program, gjestît dal Consorzi pe normalizazion linguistiche par cont de direzion gjenerâl pe politiche linguistiche dal guvier catalan, si propon di incressi lis capacitâts linguistichis cul meti dongje une persone usade a fevelâ cun competence par catalan cuntune che invezit e je daûr a imparâ la lenghe e e à bisugne di praticâle. Il volontariât pe lenghe al previôt che la cubie si cjati almancul une ore par setemane in situazions informâls par un minim di dîs setemanis a dilunc. Ta cheste maniere si jes di une logjiche di stamp scolastic par doprâ invezit la lenghe par argoments di vite cuotidiane. Vie pal 2015 lis cubiis gnovis a son stadis 10.022.

Font: Generalitat de Catalunya, 02/06/16

Svezie: pas indenant pal ricognossiment dal elfdalian

La autoritât internazionâl che e gjestìs la regjistrazion dai codiçs ISO e à cjapât dentri tra lis lenghis ricognossudis e indotadis di un codiç di pueste ancje l’elfdalian, une varietât linguistiche fevelade te provincie di Dalarna, in Svezie. Si trate di un lengaç che al diven dal norvegjês antîc e che al à carateristichis origjinâls, a mieze strade tra lis lenghis gjermanichis nordorientâls, tant che il svedês, e chês nordocidentâls, tant che il norvegjês. Lis autoritâts de Svezie lu calcolin però dome un dialet dal svedês. Il ricognossiment di un codiç ISO specific, che al ven doprât par classificâ lis lenghis in areis tant che Internet, al devente cumò un element in plui par fâ ricognossi l’elfdalian tant che lenghe minoritarie e otignî cussì la tutele des autoritâts statâls. Fevelât di uns 3 mil personis, cun chest an al è stât metût tra lis materiis di insegnament de scuele de infanzie dal comun di Älvdalen là che a vivin la plui part dai siei locutôrs.

Font: The Local, 02/06/16