Il
52% dai citadins britanics che ai 23 di jugn a àn partecipât al
referendum par decidi se restâ o no dentri de Union Europeane al à
votât par che il Ream Unît si gjavi fûr de Union. Daûr dal dât
complessîf si platin però risultâts une vore diferents a seconde
de comunitât teritoriâl clamade al vôt. Cussì, se in Ingletiere,
in Cornualie e in Gales al à vinçût il front a pro de jessude de
Union, in Irlande dal Nord, in Scozie e a Gjibraltar i votants a
jerin in maiorance par restâ dentri de Union. Plui in detai, i vôts
pro Europe a son stâts il 56% intes sîs conteis de Irlande cjapadis
dentri tal Ream Unît, il 62% in Scozie e cuasi il 96% te enclave
britaniche di Gjibraltar. Chescj risultâts a àn stiçât une rieste
di reazions che i lôr efiets ultins a restin ancjemò ducj di capî.
Un dai fronts plui cjalts al è propit chel de tignude dal Ream Unît
cussì cemût che lu cognossìn.
Nancje
une setemane dopo dal vôt, la prime ministre scozese Nicola Sturgeon
(SNP) si è cjatade cul president de Comission Europeane, Jean-Claude
Juncker, cun chel dal Parlament, Martin Schulz, e cui rapresentants
dai grups principâl di chê assemblee par manifestâ la intenzion de
Scozie
di restâ dentri de Union e par tacâ a resonâ su lis stradis
pussibilis par rivâ a chest obietîf. Par cumò dut câs nissun di
lôr al à mostrât une vere disponibilitât a sostignî il percors
di separazion de Scozie dal Ream Unît, massime par vie des pressions
fatis dal president francês François Hollande e dal prin ministri
spagnûl Mariano Rajoy, spaurîts dal efiet che l’esempli scozês
al podarès vê par realtâts in moviment tant che Catalogne e
Corsiche. Chel istès, a vuê, la ipotesi che e cjate plui poie in
Scozie e je chê di un gnûf referendum su la indipendence che il
Parlament scozês al à za tacât a resonâi parsore, ma che la sô
organizazion e dipendarà une vore dai gnûfs ecuilibris politics che
il risultât de consultazion dai 23 di Jugn al è daûr a definî.
Inmò
plui ingredeade la situazion in Irlande
dal Nord
là che la jessude de Union Europeane e invertìs il procès di
svicinament sociâl, economic e politic in vore tra la part
meridionâl e chê setentrionâl de isule e e torne a jevâ lis
tensions che a vevin alimentât par agns a dilunc la lote armade. A
front di une maiorance a pro de Union Europeane e dal pericul che si
torni a militarizâ il confin tra Nord e Sud, i rapresentants dal
Sinn Féin a àn proponût di zovâsi dal articul dai acuardis di pâs
dal 1998 (acuardis dal Vinars Sant) che al previôt la pussibilitât
di un referendum su la riunificazion de isule. Une propueste boçade
dibot de segretarie di stât pe Irlande dal Nord, Theresa Villiers,
che e à palesât cussì sei la posizion dal guvier conservadôr
britanic, sei de aree unioniste nordirlandese.
In
Gales,
là che a vinci a son stâts i partidants de jessude de Union
Europeane, i nazionalitaris dal Plaid Cymru a àn dite che il vôt
dai 23 di Jugn al à cambiât dut sul plan dai rapuarts internazionâi
ma ancje par chei internis. E je rivade la ore, a àn zontât, di
meti su la taule la pussibilitât de indipendence. Il prin ministri
galês, il laburist Carwyn Jones, nol concuarde cun cheste soluzion,
ma al è dacuardi cul fat che il risultât dal referendum al puarte a
riviodi ancje i ecuilibris dentri dal Ream. A front dal risi simpri
plui fuart che il Gales al vegni trasformât intune sorte di
provincie inglese, Jones al sburte par une revision dal implant
statâl in sens simpri plui federâl e cuntune incressite dal
autoguvier galês.
Un
regjim separât di adesion ae Union Europeane e je la propueste
rivade invezit di Fabian Picardo, ministri in cjâf di Gjibraltar,
là che a domandâ la jessude de Union nol è stât nancje il 5% de
popolazion. Une ipotesi une vore dificile di meti in vore sul plan
pratic, ma che e evitarès la crevadure dal Ream Unît. Cun di fat,
ta chest piçul teritori britanic logât inte penisule iberiche, la
maiorance de popolazion e vûl restâ intal Ream Unît, ma no à
nancje voie di isolâsi dal rest de Europe. Adun cu la Irlande dal
Nord, Gjibraltar al sarès l’unic teritori britanic a vê un confin
vie tiere cun stâts membris de Union Europeane.
Font:
BBC,
24-30/06/16; The Guardian,
24-30/06/16;
El País, 30/06/16
Nessun commento:
Posta un commento