Cossovo e Gjibraltar: gnûfs membris de FIFA

Ai 13 di Mai, intant dal so congrès anuâl, la FIFA e à ricognossût lis federazions dal Cossovo e di Gjibraltar tant che gnûfs membris di chê che e je la plui grande organizazion dal balon a nivel mondiâl. Lis dôs scuadris a podaran duncje partecipâ aes cualificazions pai mondiâi che si tignaran tal 2018 inte Federazion Russe. La decision e je stade cjapade cundut che la FIFA no varès di ricognossi tant che membris sogjets aministratîfs che no àn une plene sovranitât. Tal prin câs il pidiment principâl al diven dal fat che a son inmò tancj i stâts che no ricognossin la indipendence dal Cossovo. Tal secont la situazion e je ancjemò plui in contrast cu la filosofie declarade de FIFA, dal moment che Gjibraltar al è un teritori britanic di oltrimâr. Chel istès Gjibraltar al veve za otignût il ricognossiment de UEFA, la federazion europeane dal balon intal 2013. Un ricognossiment che cumò al ven domandât ancje des Isulis dal Cjanâl che a son une dipendence direte de corone britaniche cence jessi part dal Ream Unît. Si trate di une bataie dute politiche, dal moment che la regule di no ricognossi stâts sovrans tant che membris e je stade violade plui voltis sei de UEFA che de FIFA. Al è il câs, par esempli, di Scozie, Gales e Irlande dal Nord, ma ancje des isulis Føroyar che a dipendin de corone danese, di Puerto Rico, di teritoris britanics di oltrimâr tant che Bermuda, Montserrat e Anguilla e de isule di Aruba che e dipent de corone neerlandese. Altris comunitâts autonomis là che za di timp e je une nazionâl di balon, tant che Paîs Basc e Catalogne, no son stâts invezit ricognossûts.

Font: Jornalet, 15/05/16

Ocitanie: campagne par difindi l’ocitan tes scuelis de Provence

Cu la riforme des scuelis superiôrs che e jentrarà in vore cul prossim an scolastic intal stât francês, i cors di ocitans a saran gjavâts di trê istitûts de Provence (Manòsca / Manosque, Aurenja / Orange e Chastèu Arnós / Château-Arnoux). La organizazion Iniciativa per Occitània e à cussì inviât une campagne par che l’insegnament de lenghe proprie al vegni mantignût in dutis lis scuelis là che za al jere e che i siei spazis a vegnin slargjâts. La campagne e previôt une petizion in rêt, une letare par sensibilizâ su la cuistion i aministradôrs locâi e azions sul teritori. La prime e je in program ai 31 di Mai denant dal liceu di Manòsca.

Font: Jornalet, 12/05/16

Irlande: 43 deputâts dal Nord impegnâts pal gaelic

A son 43 i deputâts de Assemblee de Irlande dal Nord che si àn impegnâts a puartâ indenant vie pe legjislature a pene tacade i ponts previodûts de campagne a pro dal gaelic (#GaelVóta) inmaneade de organizazion Conradh na Gaeilge. Plui in detai si trate di 28 elets dal Sinn Féin, 12 dal SDLP, 2 di People before Profit Alliance e 1 dal Alliance Party. A lôr duncje, prin di dut, si ur domande di lavorâ par che il program a pro de lenghe irlandese al vegni metût dentri intal program di guvier e al puedi deventâ realtât. A son trê i ponts principâi dal program, o sei: invistî almancul 2,6 milions di sterlinis in plui par meti in vore un plan strategjic par incressi l’ûs de lenghe irlandese e infuartî i puescj di vore ta chest setôr; promovi il gaelic inte vite sociâl; svilupâ un sisteme scolastic che al garantissi l’insegnament dal irlandês e che al incressi la presince des scuelis a imersion.

Font: CnaG, 11/05/16

Paîs Catalans: gnûf plan dal guvier par catalan e aranês

Il guvier catalan (Generalitat) al à fat bon il plan linguistic pe 11^e legjislature. Il document si svilupe dilunc di trê liniis di azion primariis che a previodin 79 obietîfs e 750 misuris operativis. La prime linie e je dedicade ae scuele e e ponte a infuartî un model educatîf plurilengâl cul catalan tant che lenghe veicolâr. La seconde e interven su la promozion de cognossince e dal ûs dal catalan in ducj i cjamps de vite, su la internazionalizazion de culture catalane, su la cooperazion cun chês altris tieris di lenghe catalane, ma ancje su la cognossince e il svilup dal ocitan aranês e de lenghe dai segns catalane. La tierce linie di azion e ponte invezit a infuartî l’ûs di catalan e aranês tai mieçs di comunicazion.

Font: Generalitat de Catalunya, 11/05/16

Paîs Catalans: tes Baleârs a tornin i aiûts pe stampe par catalan

Il guvier des Baleârs al à dât fûr un bant par judâ la stampe cuotidiane par catalan, sei su cjarte che in digjitâl, cuntun contribût complessîf par chest an di 180 mil euros. Si torne cussì a finanziâ cheste linie di spese che e jere stade previodude pe ultime volte intal 2010. Dai cjamps di azion previodûts de leç di normalizazion linguistiche, al spieghe l’esecutîf des isulis, chel sui mieçs di comunicazion al jere stât il plui trascurât ta chescj agns. I fonts a laran sei par cuotidians za in vore, sei par gnûfs progjets editoriâi.

Font: Menorca Info, 11/05/16

Corsiche: lenghe corse, riunion tra guvier centrâl e de isule

Ai 10 di Mai une delegazion dal gnûf guvier nazionalitari cors si è cjatade a Parîs cui ministris francês pe educazion e pe culture. L’incuintri, che al veve al centri lis politichis pe lenghe corse, nol à però lassâts par nuie contents i rapresentants de isule che si batin par rivâ a di un statût di couficialitât pal cors. I doi ministris francês, di fat, a àn dome confermât impegns che si vevin za cjapâts e che a rivuardin dome la educazion. Trê i intervents prometûts, ven a dî: meti sù un grup di vincj professioniscj cu la incarghe di formâ i professôrs des primariis e svilupâ cussì l’insegnament bilengâl; abilitâ professôrs des secondariis par che a insegnin par cors altris materiis curicolârs; e promovi la culture corse intal sisteme educatîf. Pont, chest ultin, che al reste però disleât di azions concretis. Simpri in teme di istruzion, la delegazion corse e domandave la sperimentazion dal sisteme a imersion intes scuelis de infanzie, là che al covente sveltî i timps par meti in vore il bilinguisim dal moment che in dì di vuê a pene il 30% dai istitûts al opere cun chest model.

Font: Corse Net Infos, 10/05/16

Macedonie: 20 mil albanês in place cuintri dal guvier

Passe 20 mil personis a àn partecipât, lunis ai 9 di Mai a Skopje, ae manifestazion “pe justizie” clamade dongje des organizazions di oposizion de comunitât albanese de Macedonie. La iniziative e je stade inmaneade a un an di distance dal scuintri a fûc di Kumanovo, là che a àn pierdût la vite dîs milizians albanês e vot poliziots macedons. La vicende, che inmò in dì di vuê e presente clâfs di leture contraditoriis, e je puartade di une part de minorance albanese tant che esempli des violencis, des discriminazions e des injustiziis patidis di cheste comunitât. Al centri de manifestazion e je la domande di justizie pai membris de comunitât albanese arestâts par diviers episodis di sanc capitâts tai ultins agns; par lôr si domande la istituzion di un tribunâl specific che al garantissi la imparzialitât dal judizi. Sot acuse la aleance tra il partît nazionalist macedon VMRO-DPMNE e chel albanês Union Democratiche pe Integrazion che di agns a controlin l’esecutîf de Macedonie. La coalizion di guvier e je acusade di jessi deventade aromai un vêr regjim che al dopre brois e violencis cuintri di ogni forme di oposizion e che al dinee i dirits de comunitât albanese che e rapresente un cuart de popolazion de Macedonie.

Font: Balkan Insight, 10/05/16

Ream Unît: risultâts eletorâi in Scozie, Gales e Irlande dal Nord

Ai 5 di Mai si son tignudis lis elezions pes assembleis legjislativis di Scozie, Gales e Irlande dal Nord, in plui che par diviers comuns inglês.

In Scozie, pe tierce volte di file, i eletôrs a àn premiât il Scottish National Party (SNP). I indipendentiscj a àn cjapât il 46,5% dai consens, in cressite dal 1,1% rispiet aes elezions stadis, ma par vie dal sisteme eletorâl scozês si cjatin cun 63 deputâts, sîs in mancul de volte stade e doi sot dal vê la maiorance assolude in Parlament. Chel istès il partît vuidât di Nicola Sturgeon al guviernarà la Scozie pal tierç mandât di file: al reste dome di capî se cuntun guvier di minorance o cuntune aleance cui Verts, che a condividin cun lôr une posizion progressiste e indipendentiste, e che ta chestis elezions a àn cressût sei la percentuâl di vôts, sei il numar di deputâts che al è passât di 2 a 6. Sconfite cence precedents invezit pai Laburiscj che a pierdin il 9,2% di vôts (cumò a son al 22,6%) e 13 elets. Il Labour, che in Scozie al veve simpri vût un consens une vore alt, cui siei 24 parlamentârs si ricjate superât fintremai dai Conservadôrs che a otegnin il 22% dai vôts (+8,1%) e 31 deputâts, 16 in plui de volte stade. Come numar di elets, i Verts a passin denant dai Liberâi Democratics che a mantegnin i lôr 5 elets, ma a pierdin un tic di consens (7,8%, cuntune pierdite di vôts dal 0,1%). Di segnalâ la partecipazion al vôt, ma dome tes listis proporzionâls, di doi moviments de çampe radicâl indipendentiste – Solidarity e RISE – che si son fermâts tor dal 0,5% dai consens.

In Gales invezit i Laburiscj a rivin a tignî bot e, si ben che a pierdin il 7,6% dai vôts, cul lôr 34,7% a rivin a elei inte Assemblee Nazionâl 29 deputâts, un in mancul des elezions passadis e doi sot de maiorance assolude. Sucès impuartant dai nazionalitaris galês dal Plaid Cymru che cun 12 elets (un in plui de volte stade) e cuntun consens dal 20,5% (in cressite dal 1,3%) a deventin il secont grup de Assemblee passant denant dai Conservadôrs che a van jù di 14 a 11 deputâts e a pierdin il 3,9% dai vôts (21,1%). La sorprese principâl des elezions e rive però dai populiscj antieuropeans dal UKIP che cuntun 12,5% di vôts a jentrin pe prime volte te Assemblee Nazionâl dal Gales e lu fasin cun 7 deputâts. I Liberâi Democratics si ricjatin invezit cuntun sôl dai cuatri elets che a vevin e cuntune pierdite di consens dal 2,9% (7,7% dai vôts).

Par chel che al rivuarde la Irlande dal Nord il Democratic Unionist Party (DUP) al piert un tic di teren (-0,8%), ma cul 29.2% di vôts e 38 elets si conferme come prime fuarce politiche te Assemblee nordirlandese. Conferme ancje pal Sinn Féin che cul 24% di consens e 28 deputâts al rapresente il secont partît de Irlande dal Nord e il prin tra l’eletorâl nazionalist irlandês. Contrari però di ce che al sucêt inte Republiche di Irlande, là che il Sinn Féin al va dilunc a cressi, intal Nord al à pierdût il 2,9% dai vôts e un elet. In flession ancje il secont partît nazionalist, o sei il Social Democratic and Labour Party (SDLP), che si ferme al 12% dai vôts (il 2,2% in mancul de volte stade) e al va jù di 14 a 12 deputâts. I rive devant l’Ulster Unionist Party (UUP) cul 12.6% dai consens (-0,7%) e 16 elets. Cul 7% dai vôts (-0,7%) e 8 deputâts l’Alliance Party si conferme cuinte fuarce politiche de Assemblee nordirlandese. I vôts e i elets pierdûts dai partîts de aree nazionaliste, o sei Sinn Féin e SDLP, si son spostâts sui Verts, che a son passâts di 1 a 2 elets e che a àn plui che dopleât i vôts (2,7% cuntun aument dal 1,8% rispiet aes elezions stadis), e sul gnûf sogjet politic de çampe radicâl irlandese (un dai pôcs presint sei intal Sud che intal Nord de isule) People before Profit Alliance che al jentre pe prime volte inte Assemblee nordirlandese cun 2 deputâts (2% di vôts, in cressite dal 1.2%). A completâ il cuadri dai elets o vin la conferme di un rapresentant de Traditional Unionist Voice e un deputât indipendent.

Font: BBC, 06-07/05/16

Corsiche: fin des azions militârs ancje pal FLNC – 22 di Otubar

Nassude tal 2002 di une division dentri dal Front di Liberazion Nazionâl de Corsiche (FLNC), za di timp la fazion clamade “22 di Otubar” no puartave indenant operazions armadis cundut che no veve mai proclamât une tregue. Ai 3 di Mai, intant di une conference stampe clandestine, un puartevôs de organizazion al à comunicât in maniere uficiâl la fin des azions militârs. La decision e je stade cjapade par infuartî il procès di pâs inviât intal 2014 cu la fin de lote armade proclamade de rame principâl dal grup armât cors (FLNC - UC) e par judâ il guvier de isule, cumò tes mans di une aleance nazionalitarie, a svilupâ une soluzion politiche pal conflit cors. Il FLNC - 22 di Otubar al à po invidât dutis lis fuarcis de isule a impegnâsi tal procès di autodeterminazion e pe liberazion dai presonîrs politics.

Font: Le Monde, 03/05/16

Galizie: ai 17 di Mai manifestazion rivendicative a S. Jacum

In ocasion de Zornade de leterature galiziane, la plateforme pai dirits linguistics Queremos Galego e à decidût di clamâ dongje ai 17 di Mai une manifestazion a Sant Jacum di Galizie (Santiago de Compostela). La manifestazion, a àn dite i rapresentants de organizazion, e vûl jessi sei une fieste popolâr par celebrâ la lenghe, sei un at di rivendicazion e di proteste massime cuintri des politichis metudis in at dal guvier galizian par pidimentâ l’ûs de lenghe proprie te scuele e te societât.

Font: Galicia Hoxe, 02/05/16

Cossovo: censiment separât pes comunitâts serbis

Daûr dai dâts dal ultin censiment, o sei chel dal 2011, la popolazion cossovane e je pal 91% di lenghe albanese, pal 3,4% serbe e pal rest rom, bosgnache, turche o di altris minorancis. Si trate di un dât falsât dal fat che intes comunitâts serbis il censiment al jere stât boicotât. Cumò però il guvier di Pristina al propon un progjet di leç par davuelzi un censiment separât des comunitâts serbis plui gruessis. Se la propueste, che e gjolt de poie de agjenzie europeane pes statistichis Eurostat, e ves di deventâ operative e interessarà i Comuns di Mitrovica Nord, Leposavić / Leposaviq, Zvečan / Zveçan e Zubin Potok.

Font: Balkan Insight, 02/05/16

Bretagne: par Ai’ta! la Regjon e à di fâ la politiche linguistiche

Al è aromai plui che clâr che lis istituzions statâls no àn nissune intenzion di impegnâsi par garantî i dirits linguistics des comunitâts minorizadis, par chest e à di jessi la aministrazion regjonâl a deventâ protagoniste ta chest cjamp. Di chest resonament e partìs la iniziative indreçade ae presidence de Regjon Bretagne dal coletîf pai dirits linguistics Ai’ta! cun chê di sburtâ il guvier regjonâl a impegnâsi pe lenghe proprie. In plui di cressi i invistiments pe politiche linguistiche, Ai’ta! i domande ae Regjon di tornâ a viodi lis convenzions cul stât centrâl o cun altris sogjets publics in maniere di aumentâ la presince de lenghe bretone intal sisteme scolastic e te radiotelevision publiche, e di otignî la presince di segnaletiche bilengâl su la viabilitât principâl, tes stazions feroviariis, tes puestis e tai museus. A son po azions che la aministrazion regjonâl e pues inviâ daurman tant che une presince paritarie dal breton in Consei e tai uficis regjonâi, e une campagne par sensibilizâ i fruts sui temis de lenghe e de culture de Bretagne.

Font: Agence Bretagne Presse, 01/05/16

Irlande: elezions tal Nord, 4 partîts e 70 candidâts pal gaelic

La organizazion pe lenghe Conradh na Gaeilge e à puartât indenant une campagne a pro dal gaelic (#GaelVóta) indreçade ai partîts e ai candidâts in corse tes elezions dai 5 di Mai in Irlande dal Nord. Trê i impegns principâi che si domandave aes fuarcis politichis di cjapâ sù, ven a dî: un invistiment di 2,6 milions di sterlinis in plui par svilupâ un plan strategjic par incressi l’ûs de lenghe irlandese e infuartî i puescj di vore ta chest setôr; la promozion dal gaelic inte vite sociâl de bande dal ministeri nordirlandês pes comunitâts; il svilup di un sisteme scolastic che al garantissi l’insegnament dal irlandês e che al incressi la presince des scuelis a imersion. L’impegn a sostignî chestis politichis al è rivât di cuatri partîts te lôr totalitât – Sinn Féin, SDLP, People before Profit Alliance, Cross-Community Labour Alternative – e di passe 70 candidâts a titul personâl.

Font: CnaG, 29/04/16

Paîs Catalans: autodeterminazion, sì al referendum tal Nord

Il tribunâl di Perpinyà / Perpignan al à declarât che un referendum su la autodeterminazion al fâs part de libertât di espression e che duncje cui che si propon di imbastîlu nol davuelç une ativitât ilegâl. Cun cheste motivazion la magjistrature e à refudât la domande di dissoluzion fate indenant de prefeture dal dipartiment dai Pireneus orientâi cuintri dal Comitât pe autodeterminazion de Catalogne Nord, o sei la regjon catalane sot aministrazion francese. La prefeture, che e je stade condanade a paiâ lis spesis legâls, e veve presentât denuncie intal 2014 cuant che il comitât al voleve inmaneâ une consultazion popolâr come chês inviadis intal principât di Catalogne. Dopo de sentence il Comitât al à fat savê che al è pront a lâ indenant cul progjet di referendum e che intal framieç al à racuelt avonde donazions par organizâ lis operazions di vôt. Par cumò no si à savût nuie su la date che però e varès di jessi vie pal 2017.

Font: VilaWeb, 29/04/16; Jornalet, 29/04/16

Paîs Catalans: STEI al vûl plui azions pal catalan tes Baleârs

Il sindacât dai insegnants STEI al à domandât al guvier des Baleârs misuris concretis di discriminazion positive par incressi la presince e l’ûs de lenghe catalane tai istitûts scolastics, tes aministrazions publichis, tai mieçs di comunicazion e te societât. Tant che esemplis concrets di azions di podê meti in vore, il sindacât al propon une gnove normative par garantî l’insegnament al cent par cent par catalan, ma ancje cors di formazion in servizi pai professôrs, materiâi didatics adats a dutis lis tapis educativis e scambis scolastics cun chês altris comunitâts di lenghe catalane.

Font: Periódico de Ibiza y Formentera, 29/04/16

Europe: bandieris proibidis al Eurovision, bascs come i teroriscj

Il festival european de cjançon Eurovision si conferme simpri di plui une manifestazion indreçade a esaltâ une vision dal continent centrade sui stâts e sul monolinguisim inglês a dam de pluralitât e de diversitât des comunitâts nazionâls e des lenghis che lu componin. L’inglês di fat al devente simpri di plui la uniche lenghe de manifestazion, tes cjançons, te presentazion e fintremai tes scritis ametudis su lis bandieris dal public che al partecipe ae finâl. E propit la diretive interne su lis bandieris ametudis in sale dade fûr chest an de organizazion e à jevât scjas. Te liste des bandieris che il public nol pues puartâ, in plui di chês cun publicitâts, cun simbui o scritis che a puedin risultâ ofensivis, a son elencadis ancje chês che a àn scritis che no sedin par inglês o che a rapresentin comunitâts locâls, autonomis o regjonâls. Come a dî: nuie stât, nuie bandiere. Proibizion però ancje par chês realtâts aministrativis che la lôr statualitât no je ricognossude di ducj tant che Cossovo, Transnistrie o Palestine. Il piês però si lu à tocjât là che, te liste des bandieris metudis come esempli di proibî, si à metût dongje chê basche (ikurriña) cun chê dal stât islamic. Lis reazions duris rivadis dal Paîs Basc, ma ancje de Catalogne, de Corsiche e di altris nazions cence stât a àn puartât i organizadôrs a scusâsi. Pecjât che, ancje se la imagjin de bandiere basche cumò e je stade gjavade de liste dai esemplis, la proibizion di metile fûr intant de manifestazion e reste.

Font: Naiz:, 28 e 29/04/16; VilaWeb, 29/04/16

Lussemburc: lussemburghês prime lenghe a cjase e a scuele

Su la fonde dai ultins dâts comunicâts dal istitût statâl di statistiche Statec, intai lûcs di lavôr dal Lussemburc la lenghe plui fevelade e je il francês. Cun di fat, a doprâlu sul puest di vore al è il 68% des personis. I vegnin daûr il lussemburghês (60%) e il todesc (34%). Tes scuelis invezit e je la lenghe proprie dal granducât a jessi la plui doprade. Il lussemburghês al è il plui fevelât ancje par chel che al rivuarde il rest de vite cuotidiane (cjase e timp libar). La seconde lenghe plui fevelade fûr dal lavôr e de scuele e je il portughês – o sei chê de comunitât imigrade plui numerose – intant che il francês si ricjate al tierç puest.

Font: Luxemburger Wort, 27/04/16

Polonie: prin incuintri dal president Duda cu lis minorancis

Ai 26 di Avrîl il president polac Andrzej Duda si è cjatât pe prime volte cui rapresentants des diviersis comunitâts di minorance ricognossudis a nivel statâl. La plui part des minorancis ricognossudis in Polonie e je rapresentade di popolazions che a son maiorance tai stâts dongje tant che lituans, cecs, slovacs, rus, ucrains, bielorùs e todescs, ma ancje di comunitâts nativis o che a àn un leam storic cun cheste tiere tant che karaims, lemko, rom, ebreus, armens e tatars. Il president nol à fat riferiment ae situazion penze che si cjatin a patî diviers ativiscj e rapresentants di grups minoritaris par vie di un nazionalisim polac simpri plui agressîf, ma al contrari al à piturât une Polonie là che no si àn conflits leâts ae partignince etniche – nazionâl. Intal so intervent Duda nol à fevelât di azions di tutele pes minorancis, ma dome de dibisugne di infuartî in ducj i citadins il sens di partignince ae Polonie.

Font: Polskie Radio dla Zagranicy, 26/04/16

Paîs Basc: ai 4 di Jugn mobilitazion pal euskara in Navare

La organizazion Kontseilua e à clamât dongje une manifestazion pai prossims 4 di Jugn a Iruñea / Pamplona cun chê di rivendicâ une politiche linguistiche plui eficace pe lenghe basche. L’invît al partecipâ al è in primis a ducj chei che a son impegnâts intal moviment sociâl a pro dal euskara, ma ancje a ducj chei che a vuelin la pussibilitât di podê doprâ in dutis lis ocasions cheste lenghe. Dal sigûr la situazion e je miorade dopo che il guvier de Navare al è passât de diestre regjonaliste e spagnoliste a di une aleance progressiste – nazionalitarie, ma si spietavisi alc di plui. Di chi la decision di dâsi adun in place par mostrâ la volontât de int di vê politichis linguistichis plui fuartis pal basc.

Font: Naiz:, 25/04/16

Ream Unît: protestis cuintri dal tai dai fonts statâi pal cornic

Dal 2003 indenant, o sei di cuant che i jere stât ricognossût il status di lenghe minoritarie, il guvier britanic al veve assegnât al Consei de Cornualie un contribût anuâl di 150 mil sterlinis par judâ la presince dal cornic intes istituzions, te educazion, te societât e te economie. Cun chest an però l’esecutîf di Londre al à scancelât i contribûts. Denant des protestis dal Consei de Cornualie, il guvier britanic al à rispuindût che l’acuardi su la devoluzion fat bon l’an passât al è compagnât di un finanziament complessîf di un miliart e 700 milions di sterlinis pai prossims cuatri agns e che se lis istituzions de Cornualie a vuelin invistî su la lenghe a puedin tirâ fûr i bêçs di li. La spiegazion no à però convint ni lis autoritâts locâls e nancje un trop di 18 parlamentârs che a àn presentât une mozion par che il guvier al riviodi la sô posizion. La iniziative e je stade poiade di 16 deputâts scozês dal SNP, di un galês dal Plaid Cymru e di un laburist.

Font: BBC, 21/04/16; Parliament UK, 27/04/16; Mebyon Kernow, 28/04/16