Pontade 09 08 (08/04/08) - 1

Macedonie: macedons discriminâts tai stâts dongje

Intant dal incuintri a Strasburc cul referent de Comission europeane pai dirits umans, Thomas Hammarberg, il president de Macedonie, Branko Crvenkovski, al à denunciât la situazion di discriminazion che a patissin lis minorancis macedonis in Grecie e in Bulgarie, ducj e doi stâts membris de Union Europeane. Une situazion ben diferente di chê che si à in Macedonie – al à ricognossût il diplomatic svedês – dulà che e je sigurade la tutele des minorancis sedino albanesis, turchis, serbis, arumenis o rom. Baste pensâ che la Macedonie e je l’unic stât european là che al è un Comun che al à il romanès tant che lenghe uficiâl.
Font: Eurolang, 29/02/08

Pontade 08 08 (25/03/08) - 5

Romanie: e cres la domande di autoguvier dai ongjarês

La indipendence autoproclamade dal Cossovo e à mot cetantis reazions, massime framieç des nazions cence stât e des comunitâts minorizadis europeanis. Ancje l’eurodeputât László Tőkés, membri de minorance ongjarese de Romanie, lu à citât tant che esempli di tignî cont tune interviste publicade che al è pôc sul cuotidian “Ziua”. Dut câs, plui che di indipendence, Tőkés al à fevelât di autoguvier dal Székelyföld, la regjon de Transilvanie là che la popolazion ongjarese dai székely e ja la maiorance. Pal eurodeputât de minorance magjare si podarès pensâ a di une forme di autonomie par dute la Transilvanie, su model de Vojvodine serbe, e ta chê suaze une forme di autoguvier plui fuart pal Székelyföld. Tőkés al à ancje pandût la sô sodisfazion pal svilup dal Magyar Polgari Part (Partît Civic Magjâr), il gnûf sogjet politic ongjarês che ai 14 di Març al è stât metût dentri in maniere uficiâl de Cort di apel di Bucarest intal regjistri dai partîts de Romanie. Ai 15 di Març, zornade che i ongjarês di dut il mont a memorein i erois de rivoluzion dal 1848, si son davueltis diviersis cerimoniis ancje intes diviersis provinciis de Transilvanie là che e je fuarte la comunitât magjare. Intant di chês manifestazions, diviers rapresentants politics de minorance a àn tignût discors là che a rivendichin la autonomie de regjon.
Font: Divers.ro, 17/03/08; Mon Divers, 10/03/08

Pontade 08 08 (25/03/08) - 4

Lusazie: simpri mancul tutele dal guvier todesc

Un grup di inteletuâi al à publicât ta chestis zornadis un apel che al è stât batiât “Memorandum par domandâ che il popul serbian al puedi continuâ a vivi”. I serbians, o sorabis, a vivin te regjon storiche de Lusazie, a cjaval jenfri la Sassonie e il Brandeburc, e a son la uniche minorance slave autoctone dentri dal stât todesc. Tal document si lamente che par vie di un conflit di competencis jenfri guvier federâl e i doi lands, i finanziaments pe minorance a son blocâts, daspò che tai ultins agns a jerin lâts simpri al mancul. Intal test si domande di meti fin a cheste situazion e di proviodi daurman a fissâ lis comptencis su chest cantin tra il guvier federâl e lis autonomiis di maniere di evitâ che la situazion si ripeti. Za di agns i serbians a denunciin che la tutele de lôr comunitât e je daûr a sbassâsi e che e jere plui alte cuant che e jere la Republiche Democratiche Todescje che no cumò.
Font: Provincie di Trent - Minorancis Linguistichis, 14/03/08; Nationalia, 14/03/08

Pontade 08 08 (25/03/08) - 3

Galizie: normalizazion linguistiche a planc inte scuele

Il decret di normalizazion linguistiche intes scuelis de Galizie fat bon ancjemò intal Jugn dal an passât dal esecutîf de Comunitât autonome al è inmò che al spiete di jessi metût in vore. Lu disin A Mesa pola Normalización Lingüistica e altris associazions impegnadis pai dirits linguistics dai galizians che a acusin l’assessorât pe educazion di no vê fat nuie par meti in vore il proviodiment. Cun di fat, no si à fat nissune azion par fâ cognossi il decret e par formâ i professôrs par che a puedin proviodi ai intervents di normalizazion linguistiche. Cun di plui, no si à nancje metude sù la direzion che e varès di stâ daûr e coordenâ lis azions previodudis de norme.
Font: Galiza Hoxe, 13/03/08

Pontade 08 08 (25/03/08) - 2

Frisie: il guvier neerlandês nol rispiete la Cjarte europeane

Cundut che i Paîs Bas a sedin stâts un dai prins stâts a firmâ e a ratificâ la Cjarte europeane pes lenghis regjonâls o minoritariis tal 1998, a dîs agns di distance si è ancjemò lontans dal meti pardabon in vore i siei contignûts. La cuestion si à palesade a clâr intant de ultime visite dal comitât european di esperts che al viôt dal rispiet de Cjarte. Tune interviste ae agjenzie di stampe Eurolang, Gerrit Ybema, che al è a cjâf dal comitât neerlandês pe aplicazion de Cjarte, al à spiegât trop che al sedi inmò di lavorâ. Par chel che al rivuarde la scuele, par esempli, la plui part des primariis e à juste une ore a setemane di frison, e ogni tant nancje chê. Si salve dome une rêt di cuindis istitûts trilengâi là che si doprin frison, olandês e inglês. Tal cjamp de radiotelevision, Omrop Fryslân e ven tratade come une des tredis emitentis regjonâls neerlandesis e no come la uniche emitente frisone, cun dutis lis diferencis dal câs. Dispès lis autoritâts centrâls no considerin la lenghe e la culture de Frisie tant che part de diviersitât europeane – al zonte Ybema – ma dome come folclôr regjonâl, e propit cheste mentalitât e je il prin pidiment pal rispiet dai dirits linguistics dai frisons.
Font: Eurolang, 12/03/08

Pontade 08 08 (25/03/08) - 1

Frisie: pas indenant pai frisons in Gjermanie

In Gjermanie, il guvier centrâl al à confermât il ricognossiment uficiâl dai frisons dal Saterland tant che minorance. Cheste decision e permetarà di une bande di meti in vore ad in plen i principis de Cjarte europeane pes lenghis regjonâls o minoritariis ancje par cheste minorance, e di chê altre di liberâ il moviment politic “Die Friesen” dal soiâr dal 5% dai vôts che al vâl par ducj chei altris partîts par vê une rapresentance.
Font: EFA, 04/03/08

Pontade 07 08 (11/03/08) - 9

Paîs Basc, Paîs Catalans, Galizie: risultât des elezions politichis

Lis elezions politichis intal stât spagnûl, che a àn dât la maiorance al PSOE vuidât di José Luis Rodríguez Zapatero, a son stadis segnadis de emozion jevade dal atentât mortâl atribuît a ETA che vinars stât al à causât la muart di un sindacalist leât al PSE, Isaías Carrasco. Ancjemò une volte, duncje, il vôt pes politichis spagnolis al è stât compagnât di une atentât, ancje se di nature e di pês une vore diviers rispiet a chel dal 2004. Cun di plui al è di dî che ta chestis elezions, plui che no tai agns stâts, si à vût un sburt ae polarizazion dal vôt su socialiscj e popolârs, tun confront che al à lassât pôc spazi par ducj chei altris.

Par chel che al rivuarde in particolâr il Paîs Basc, là che la campagne eletorâl e jere stade segnade de repression violente cuintri de çampe indipendentiste, i rapresentants di cheste aree politiche a vevin invidât i citadins bascs a no lâ a votâ. Chest par vie che i jere stât impedît ai doi partîts di riferiment de çampe indipendentiste (ANV e EHAK) di partecipâ aes elezions e che intai ultins mês a jerin stâts arestâts passe dusinte dirigjents e militants de aree nazionalitarie basche. I socialiscj, i popolârs, ma ancje i nazionaliscj moderâts (tant che il PNV) a vevin invezit domandât ai bascs di lâ ducj a votâ par rispuindi al atentât. Inte Comunitât Autonomiche Basche e in Navare la medie de astension e je stade dal 33,3%, come a dî che un basc su trê nol è lât a votâ. Une percentuâl plui alte di cuasi il 10% rispiet al 2004. In Gipuzkoa, la aree là che e je plui fuarte la çampe indipendentiste basche, la astension e à fintremai passât il 41%: une rispueste plui chê clare al procès di ilegalizazion di cheste aree politiche. Pal rest, in Hegoalde (Paîs Basc spagnûl), i socialiscj a son cressûts sù par jù dal 4,5%, ancje in graciis de emozion pal atentât di vinars, e a àn otignût 11 parlamentârs; i popolârs a àn pierdût pôc mancul dal 1% e a àn vût 5 elets; il PNV al à pierdût cuasi il 5% des preferencis e al à otignût in dut 6 parlamentârs (un in mancul dal 2004). Risultâts negatîfs ancje pai nazionaliscj bascs di Eusko Alkartasuna (che a àn pierdût l'unic parlamentâr che a vevin) e par Aralar; la coalizion basche NafarroaBai e à mantignût un elet intal parlament di Madrid.

Par chel che al rivuarde la Catalogne, i socialiscj a àn otignût 26 dai 47 puescj a disposizion e propit chest risultât al à contribuît al sucès dal PSOE su scjale statâl (di fat, 4 dai 5 elets in plui dai socialiscj a rivin propit dal Principât). Se o cjalìn ai partîts de aree nazionaliste catalane, l'unic risultât positîf al è chel dai moderâts di Convergència i Unió che a otegnin in dut 11 parlamentârs, un in plui dal 2004. ERC e patìs un colp dûr cu la pierdite di 5 dai 8 parlamentârs che e veve elet tal 2004. Iniciativa per Catalunya Verds e manten il deputât che e veve. Intal Paîs Valenzian, invezit, a son i popolârs a cuistâ teren, i socialiscj a tegnin bot, e la division jenfri Esquerra Unida e la gnove coalizion Bloc-Iniciativa-Verds ur fâs pierdi l'unic deputât che a vevin. Intes Isulis Baleârs socialiscj e popolârs si dividin a miezis i vot puescj a disposizion e a lassin a bocje sute Unitat per les Illes, la gnove coalizion che e cjapave dentri buine part dal panorame nazionalitari des isulis.

In Galizie il Bloc Nacionalista Galego al difint i risultâts e i 2 parlamentârs che al veve vût tal 2004; i socialiscj a otegnin 1o deputâts e i popolârs 11.

Par chel che al rivuarde i partîts di stamp autonomic, la Coalicion Canaria e cjape 2 deputâts, un in mancul dal 2004, e la Chunta Aragonesista e piert l'unic parlamentâr che e veve.
Font: Gara, 10/03/08; Vilaweb, 10/03/08; Galiza Hoxe, 10/03/08; El Paìs, 10/03/08; El Mundo, 10/03/08

Pontade 07 08 (11/03/08) - 8

Irlande dal Nord: Paisley si dimetarà in Mai

Ian Paisley al à comunicât che in Mai si dimetarà di prin ministri dal guvier nordirlandês e di dirigjent dal Democratic Unionist Party. Paisley, che in Avrîl al fasarà 82 agns, al à rapresentât tai ultins 40 agns la ale plui radicâl dal unionisim, ven a dî chê contrarie a cualsisei colaborazion o condivision di podês cu la comunitât nazionaliste e republicane nordirlandese. Sot de sô vuide il Democratic Unionist Party, di formazion margjinâl che al jere, al è deventât il partît de comunitât unioniste de Irlande dal Nord. Propit par vie di cheste posizion di prin plan tal panorame politic locâl, Paisley si à cjatât a vuidâ l’esecutîf nordirlandês compartecipât, là che a son dentri ancje i rapresentants dal Sinn Féin, il partît di riferiment dai republicans irlandês. La colaborazion inviade cui republicans, che Paisley al à spiegât come la uniche strade par fermâ la riunificazion irlandese, e i bogns rapuarts cul vice prin ministri – Martin McGuinness, om dal Sinn Féin e ex comandant dal IRA – a saressin daûr dal marum che di cualchi timp si respire inte dirigjence dal DUP (che al veve segnât la sô incressite politiche e eletorâl massime su la asse cuintri dai republicans). Cheste, intune cui problemis judiziaris dal fi, e sarès duncje la reson che e à puartât Paisley a decidi di tirâsi di bande. Il so puest intal partît al varès di jessi cjapât dal so vice Peter Robinson, che al ocupe il puest di ministri pes financis intal guvier nordirlandês. Si spiete cumò di viodi se, cu lis dimissions di Paisley, al cambiarà alc intai rapuarts tra unioniscj e republicans e se si varan consecuencis sul lunc e faturôs procès di pâs in Irlande dal Nord.
Font: Ireland News, 04/03/08; BBC News, 04/03/08

Pontade 07 08 (11/03/08) - 7

Groenlande: il prin ministri danês a pro de incressite dal autoguvier

La Danimarcje no si cjate a vê di rispuindi dome ae domande di plui autoguvier che e rive des isulis Fær Øer, ma ancje a chê de Groenlande. Cun di fat, il prin ministri dal guvier autonom de isule artiche, Hans Enoksen, al à comunicât che in Novembar si davuelzarà un referendum là che i abitants de Groenlande a saran clamâts a dî se a vuelin incressi l’autoguvier de isule, che e gjolt di une fuarte autonomie politiche bielzà dal 1979. Cumò, il prin ministri danês, Anders Fogh Rasmussen, al à declarât di jessi dacuardi cul fat che la Groenlande e vedi plui autoguvier. Cun di plui, cheste Vierte, i doi prins ministris si cjataran par discuti de compartecipazion sul disfrutament dal teritori groenlandês.
Font: Mon Divers, 03/03/08

Pontade 07 08 (11/03/08) - 6

Gales: campagne par promovi l’ûs dal galês tal public

Il guvier galês e il Bwrdd yr Iaith Gymraeg (Welsh Language Board, o sei l’Ufici pe lenghe galese) a àn imbastît une campagne, che e je stade batiade “Mae Gen Ti Ddewis”, cun chê di incressi l’ûs dal galês intai rapuarts cui ents publics e cu lis societâts a capitâl public. Lis stradis previodudis di cheste campagne a son dôs, ven a dî sburtâ la int a doprâ di plui la sô lenghe proprie cuant che e à a ce fâ cul public, e stiçâ i ents publics a comunicâ miôr ai citadins che i lôr servizis a son ancje par galês. Ce che al covente – a àn spiegât i promotôrs de campagne – al è informâ di plui. Tai lûcs là che si lu à za fat, par esempli tai uficis di ciertis conteis (Carmarthenshire, Denbighshire) o te societât Welsh Water, l’ûs de lenghe galese al è za cressût dal 50%.
Font: Welsh Language Board, 28/02/08

Pontade 07 08 (11/03/08) - 5

Galizie: intervents su lenghe e lavôr

Il guvier galizian al à metût a disposizion 10 milions di euros par poiâ ativitâts di informazion e orientament pal lavôr che a laran a universitâts, sindacâts, associazions di catogorie e altris ents impegnâts pal interès public. Pe prime volte, tra i criteris previodûts par dâ fûr chestis risorsis, si ten cont ancje dal ûs de lenghe galiziane intai progjets proponûts.
Denant dal probleme de discriminazion linguistiche sul puest di vore, l’esecutîf galizian al à invezit previodût dai intervents di pueste intal so plan anuâl des ispezions sul lavôr. Cun di fat, i ispetôrs dal lavôr a varan ancje di controlâ che no si vedin violazions intal dirit dai lavoradôrs di doprâ il galizian sul puest di vore. Il guvier al à po sigurât che al concuardarà cui sindacâts lis azions di meti in vore tes aziendis là che si àn violazions.
Font: Galiza Hoxe, 20- 28/02/08

Pontade 07 08 (11/03/08) - 4

Paîs Catalans: te Franja la lenghe e ten, ma e mancje la tutele

L’ûs dal catalan inte Franja de Ponent, la regjon catalanofone dal Aragon, al reste avonde bon, ma i dirits linguistics di chei che lu fevelin a van dilunc a no jessi ricognossûts de leç. Al è chest il risultât dal studi puartât indenant dal sociolic Natxo Sorolla su la fonde dai ultins dâts sociolinguistics tirâts sù ta chê zone. Il 90% de popolazion de Franja e fevele ancjemò par catalan avonde dispès, ma dome il 30% al è bon di scrivilu e il 20% lu dopre par indreçâsi a cualchidun che nol cognòs. Par dâi plui fuarce ae lenghe, duncje, a coventin misuris di politiche linguistiche che a permetin di fâ dal catalan la lenghe normâl par cualsisei ativitât.
Font: Galiza Hoxe, 26/02/08

Pontade 07 08 (11/03/08) - 3

Scozie: e cres la voie di autoguvier

Nol è dite che il Ream Unît si dividi tal zîr di cualchi an, ma dal sigûr Scozie e Ingletiere a mostrin di volê formis di autoguvier simpri plui fuartis. A dîlu a son doi studis elaborâts dal Institute for Public Policy Research, un innomenât istitût di ricercje che al à vût la incarghe dal prin ministri britanic Gordon Brown di studiâ il procès di devoluzion de Scozie. Daûr dal prin studi, al somee che la voie di indipendence no vedi concuistât inmò la maiorance dai scozês, ma che la plui part de int e domandi che il Parlament scozês al vedi inmò plui podês di chei che al à in dì di vuê. Il secont studi, invezit, al segnale il marum dai inglês pal procès di devoluzion in vore in Scozie. In particolâr, si lamentin par vie che i inglês no puedin dî la lôr intai cjamps di competence dal Parlament scozês, cuant che invezit i parlamentârs scozês a puedin votâ su lis cuestions inglesis frontadis intal Parlament britanic. Chest par vie che no esist une Assemblee nazionâl inglese e, duncje, dutis lis cuestions de Ingletiere a vegnin discutudis intal Parlament britanic. Se i guviers britanics a saran bogns di regolâ cheste situazion, la strade che si fâs indenant e je chê di formis di autoguvier simpri plui fuartis, ancje se simpri dentri de suaze dal Ream Unît. In câs contrari, a fasin intindi i doi studis, si larà ae roture dal stât.
Font: Daily Express, 25/02/08; Mon Divers, 26/02/08

Pontade 07 08 (11/03/08) - 2

Irlande dal Nord: in miârs in place pal gaelic

A àn partecipât in miârs ai 16 di Fevrâr ae manifestazion che si è davuelte a Belfast par domandâ une leç organiche a pro dal gaelic irlandês. Il guvier britanic le veve imprometude inmò prin di tornâi i podês ae Assemblee nordirlandese, ma il disen di leç al è ancjemò ret e fer. Intant de iniziative, coordenade de organizazion Pobal che e met adun lis associazions impegnadis pe lenghe irlandese, si à ancje domandât azions par poiâ l’Irish Language Broadcast Found e il cuotidian gaelic Lá Nua. In Irlande, lis sîs conteis dal Nord a son chês là che l’ûs dal gaelic al è cressût di plui, ma a son ancje chês là che a mancjin misuris seriis di promozion de lenghe e di difese dai dirits di cui che le fevele. I risultâts otignûts fin cumò, di fat, a divegnin massime dai sfuarçs di autoorganizazion de comunitât nazionaliste nordirlandese. A poiâ la manifestazion in place a jerin ancje i dirigjents dal Sinn Féin, il partît di riferiment de comunitât republicane irlandese.
Font: An Phoblacht, 21/02/08

Pontade 07 08 (11/03/08) - 1

Bulgarie: UE in difese dai dirits dai macedons

Intant de sô visite in Bulgarie, il comissari european pai dirits umans, Thomas Hammarberg, al à domandât al guvier dal paîs balcanic di ricognossi il partît politic OMO Ilinden PIRIN che al à chê di rapresentâ la minorance macedone in Bulgarie. Il Consei de Europe – al à dite Hammarberg – al è une vore preocupât pal compuartament de Bulgarie che, su la cuestion, e je za stade riclamade de Cort europeane pai dirits umans. Cun di fat, a restin inmò fuartis lis resistencis in Bulgarie pal ricognossiment dai macedons tant che une vere minorance nazionâl.
Font: OMO Ilinden PIRIN, 14/02/08

Pontade 06 08 (19/02/08) - 13

Cossovo: proclamade la indipendence

Contrari di tantis gnovis che si riferissin a nazionalitâts minorizadis europeanis, chê de proclamazion unilaterâl de indipendence dal Cossovo e cjate une vore di spazi su buine part dai mieçs di comunicazion. La decision e je stade cjapade intant de riunion straordenarie dal Parlament di Pristina che si è tignude domenie ai 17 di Fevrâr. La plui part dai stâts membris de Union Europeane e à decidût di cjapâ at de decision cossovare, come che a àn fat ancje i Stâts Unîts che za di timp si vevin declarâts a pro de indipendence dal Cossovo de Serbie. Il guvier serp, invezit, al calcole di ilegâl la decision cjapade a Pristina. Stesse posizion e rive ancje de Federazion Russe, che e à domandât ae ONU di declarâ nule la proclamazion. Tra i stâts che a àn dite di jessi cuintri de indipendence a son ancje la Spagne e la Grecie. Al reste cumò di viodi cualis che a podaran jessi dutis lis consecuencis de decision dal Parlament cossovâr. Une prime problematiche e je chê des minorancis che a vivin ta chê regjon balcaniche, a tacâ di chê serbe che e rapresente ancjemò sù par jù il 7-8% de popolazion, cundut che tancj di lôr a fossin za scjampâts intant dai bombardaments de Nato dal 1999 o par vie dai atentâts e dai atacs de vuerilie cossovare. Une part dai serps che a son restâts, massime te zone di Mitrovica, e ponte suntune separazion dal Cossovo par tornâ a dâsi dongje cu la Serbie, ma par tancj di lôr cheste soluzion e je impussibile di rivâi. Cundut des sigurazions rivadis des autoritâts cossovaris che i dirits des minorancis a saran rispietâts, plui di cualchidun tra i serps, ma ancje tra i rom, al pense di bandonâ il paîs. Di là de situazion interne, il câs dal Cossovo al rapresente un precedent no di pôc pe Europe e dal Paîs Basc ae Cecenie plui di cualchidun si domande parcè che ce che al vâl pai cossovârs nol pues valê ancje par chei altris popui tibiâts dal continent. E subite daspò de proclamazion de indipendence ancje lis regjons de Abkhazie e de Ossezie a àn domandât di jessi ricognossûts indipendents de Gjeorgje.
Font: plusôr agjenziis di stampe, 16-17-18/02/08

Pontade 06 08 (19/02/08) - 12

Paîs Basc: suspindudis lis ativitâts di ANV e EHAK

Tes ultimis setemanis e je lade indenant cun inmò plui fuarce la azion repressive cuintri de çampe indipendentiste basche, che si è disvilupade massime su doi fronts, ven a stâi chel di cirî di impedî la ativitât dai moviments che a rapresentin cheste aree politiche e chel di impresonâ i rapresentants principâi dal indipendentisim basc.
La Avocadure di stât e la publiche acuse a vevin domandât al Tribunâl Suprem di suspindî la ativitât dai doi partîts di riferiment de ezkerra abertzale, ven a dî EHAK - PCTV (Partît Comunist des Tieris Baschis) e EAE – ANV (Azion Nazionaliste Basche), come prin pas intal procès par metiju fûr leç come che si veve za fat cun Batasuna. Dut câs, contrari des previsions, il Tribunâl Suprem al veve judicât disproporzionade cheste misure, ancje se al veve decidût di blocâ ogni misure di finanziament public pai doi sogjets politics e di impedî a ANV di partecipâ aes elezions politichis dai 9 di Març. Chel che il Tribunâl Suprem nol veve fat, lu à fat invezit il judiç de Audiencia Nacional, Baltasar Garzón, di agns in prime linie inte bataie cuintri dal indipendentisim basc. Garzón al à decidût di suspindî par trê agns la ativitât dai doi partîts, di sierâ dutis lis lôr sedis e i edificis di lôr proprietât, di blocânt ducj i conts e lis financis, di sierâ i lôr sîts internet e chei altris mieçs di comunicazion, di impedîur di clamâ adun o di partecipâ a cualsisedi manifestazion publiche. Ta cheste maniere – al à spiegât Garzón – no si intint meti fûr leç dai partîts, ma dome impedî che a vegnin doprâts par fâ dai delits. I “delits” che si riferìs il judiç, in realtât a son la ativitât politiche a pro de indipendence e de soluzion politiche dal conflit basc. Daspò vê imbastît il teoreme, cence provis reâls e cun diviersis contradizions internis, che al dîs che Batasuna e ETA a son la stesse robe, Garzón cumò al dîs che EHAK e ANV, ancje se no son Batasuna, a son stâts ocupâts di Batasuna che ju controle e a ‘nt decidît la linie politiche. Par justificâ cheste sô teorie, il judiç al spieghe, par esempli, che i trê sogjets politics a àn la stesse politiche cuintri de TAV, che ex dipendents di Batasuna a son stâts cjapâts sù a vore ta chei partîts, o che cierts manifescj si somein…
Al è simpri Garzón daûr de vierzidure di un gnûf procès cuintri dai rapresentants principâi de çampe indipendentiste basche e di une gnove ondade di arescj di indipendentiscj. Tai ultins vot mês a son stâts 322 i ativiscj politics arestâts, di chescj 151 a son ancjemò in preson. Daspò dal arest di Arnaldo Otegi e di buine part de dirigjence di Batasuna inmò in libertât, ta chestis ultimis zornadis a jerin stâts impresonâts ancje Pernardo Barrena e Patxi Urrutia. A chescj arescj, dut câs, a ‘nd è rivâts subite daûr altris cutuardis (11 di chescj za in preson e 3 libars su cauzion), tra di lôr al è ancje Karmelo Landa, om di prin plan dal panorame abertzale basc. Par ducj lôr la acuse e je di jessi membris di ETA o di vê colaborât cu la organizazion armade basche. Chest dome par vie de lôr ativitât politiche, daûr dal teoreme di Garzón che fâ ativitât politiche cun Batasuna o imbraçâ lis armis al è compagn. Cuintri di lôr di fat a son dome regjistrazions di conferencis stampis, declarazions su la stampe o partecipazion a manifestazion publichis. Denant di cheste gnove azion repressive, ancje i partîts bascs plui moderâts a àn jevât la lôr proteste. Pai ultins arestâts al è stât imbastît un gnûf procès di grup batiât “Sumario 11/08” Dut câs, i arescj no si àn vût dome intal stât spagnûl, ma ancje ta chel francês là che la polizie e à arestât Jean-Noël Etxeberri, un dai dirigjents dal moviment nazionalitari basc Abertzalean Batasuna, ma ancje Jacó Morio, ativist dal partît indipendentist ocitan Anaram Au Patac e redatôr di Radio País, emitente ocitane guascone. Ancje par lôr e je la acuse di vê colaborât cun ETA.
Denant di cheste gnove ondade repressive, si son davueltis diviersis protestis. Ai 10 di Fevrâr si è davuelte une manifestazion cun miârs di personis a Bilbo / Bilbao che e je stade dispierdude des cjariis de polizie autonomiche. Ai 14 di Fevrâr si è tignude invezit une zornade di siopar compagnade di diviersis manifestazions di place. Intant de proteste a son stâts arestâts 24 manifestants. Pal sindacât nazionalitari LAB la adesion al siopar e je stade significative, cundut de massive disinformazion su la proteste e des menacis ai lavoradôrs par che no partecipassin.
Font: Gara, 07-08-09-11-13/02/08; EiTB24, 08-09-14/02/08; Deia, 13-14/02/08; Mon Divers, 07/02/08

Pontade 06 08 (19/02/08) - 11

Galizie: 75 mil galizians cence tutele fûr dai confins de Comunitât

Il galizian, in plui di jessi la lenghe proprie de Comunitât autonome de Galizie, al è fevelât ancje tune cincuantine di comuns des Asturiis e de Castilie – Leon. Daûr di un studi fat dal avocat Carlos Bello Stout a saressin 75 mil lis personis che a fevelin par galizian ta chescj comuns. Chês che in dì di vuê a àn une competence passive de lenghe e a podaressin svilupânt ancje un ûs atîf a son invezit 150 mil. Dut câs, in dutis e dôs lis regjons, no si àn politichis ativis a pro dal galizian e duncje la lenghe e riscje di disparî tal zîr di cualchi gjenerazion se no si inviarà une politiche linguistiche serie. Za cumò il galizian al è daûr a pierdi teren sei tra i zovins, sei tai centris plui grues. Tal studi di Bello Stout si lamente ancje che lis associazions galizianis plui ativis tal cjamp de difese dai dirits linguistics si mostrin pôc atentis a cheste situazion.
Font: A Peneira Dixital, 11/02/08

Pontade 06 08 (19/02/08) - 10

Corsiche: si à sfantade la Unione Naziunale

Ta chestis zornadis si à sfantade in Corsiche la coalizion Unione Naziunale che e meteve adun il partît indipendentist Corsica Nazione Indipendente e i autonomiscj dal Partît de Nazion Corse e di A Chjama Naziunale e che e jere la tierce fuarce de Assemblee corse cui siei vot deputâts. I cinc deputâts dai doi partîts autonomiscj si son dâts dongje tun grup gnûf batiât Unione Naziunale – PNC – A Chjama e vuidât di Edmond Simeoni. I trê deputâts di CNI, vuidâts di Jean-Guy Talamoni, si son cussì ricjatâts a fâ grup di bessôi. Lis divergjencis a jerin za in vore di timp – al à spiegât Talamoni – e a son leadis aes posizions diferentis in mert ae lote armade e ae indipendence de isule. Cun di fat, CNI si mostre solidarie cu la lote armade che invezit e ven condanade di chei altris doi moviments.
Intant, ai 12, ai 13 e ai 14 di Fevrâr, si àn davuelts alì de “Università di Corsica” a Corti i “Scontri internaziunali di a ghjuventù in lutta” inmaneâts de organizazion zovanîl corse Ghjuventù Indipendentista. Ae manifestazion a àn partecipâts grups indipendentiscj rivâts da Irlande (Ogra Sinn Fein), dal Paîs Basc (Segi), dai Paîs Catalans (JERC e Maulets) e de Sardegne (iRS).
Font: Ghjuventù Indipendentista, 11/02/08; Nationalia, 11/02/08

Pontade 06 08 (19/02/08) - 9

Alsazie: iniziativis dal Consei gjenerâl a pro de lenghe proprie

Il Consei gjenerâl dal Alt Ren (Oberrhein / Haute Rhin) al à sotscrit trê acuardis par sburtâ lis varietâts todescjis alsazianis feveladis te regjon. La aministrazion regjonâl e à firmât doi acuardis cul Comitât federâl pe lenghe e pe culture regjonâls de Alsazie e cul Centri di documentazion pedagogjiche cun chê di svilupâ materiâi audiovisîfs pes scuelis su la storie e l’avignî des varietâts linguistichis alsazianis. Il Consei al metarà po i bêçs par meti fûr dute la segnaletiche dal Ecomuseu de Alsazie ancje par todesc standard e intes varietâts linguistichis locâls. Cun di fat, la presince dal alsazian – a àn declarât i rapresentants dal Consei – e jude il svilup turistic e economic de regjon.
Font: Mon Divers, 10/02/08