19/02/08

Pontade 06 08 (19/02/08) - 12

Paîs Basc: suspindudis lis ativitâts di ANV e EHAK

Tes ultimis setemanis e je lade indenant cun inmò plui fuarce la azion repressive cuintri de çampe indipendentiste basche, che si è disvilupade massime su doi fronts, ven a stâi chel di cirî di impedî la ativitât dai moviments che a rapresentin cheste aree politiche e chel di impresonâ i rapresentants principâi dal indipendentisim basc.
La Avocadure di stât e la publiche acuse a vevin domandât al Tribunâl Suprem di suspindî la ativitât dai doi partîts di riferiment de ezkerra abertzale, ven a dî EHAK - PCTV (Partît Comunist des Tieris Baschis) e EAE – ANV (Azion Nazionaliste Basche), come prin pas intal procès par metiju fûr leç come che si veve za fat cun Batasuna. Dut câs, contrari des previsions, il Tribunâl Suprem al veve judicât disproporzionade cheste misure, ancje se al veve decidût di blocâ ogni misure di finanziament public pai doi sogjets politics e di impedî a ANV di partecipâ aes elezions politichis dai 9 di Març. Chel che il Tribunâl Suprem nol veve fat, lu à fat invezit il judiç de Audiencia Nacional, Baltasar Garzón, di agns in prime linie inte bataie cuintri dal indipendentisim basc. Garzón al à decidût di suspindî par trê agns la ativitât dai doi partîts, di sierâ dutis lis lôr sedis e i edificis di lôr proprietât, di blocânt ducj i conts e lis financis, di sierâ i lôr sîts internet e chei altris mieçs di comunicazion, di impedîur di clamâ adun o di partecipâ a cualsisedi manifestazion publiche. Ta cheste maniere – al à spiegât Garzón – no si intint meti fûr leç dai partîts, ma dome impedî che a vegnin doprâts par fâ dai delits. I “delits” che si riferìs il judiç, in realtât a son la ativitât politiche a pro de indipendence e de soluzion politiche dal conflit basc. Daspò vê imbastît il teoreme, cence provis reâls e cun diviersis contradizions internis, che al dîs che Batasuna e ETA a son la stesse robe, Garzón cumò al dîs che EHAK e ANV, ancje se no son Batasuna, a son stâts ocupâts di Batasuna che ju controle e a ‘nt decidît la linie politiche. Par justificâ cheste sô teorie, il judiç al spieghe, par esempli, che i trê sogjets politics a àn la stesse politiche cuintri de TAV, che ex dipendents di Batasuna a son stâts cjapâts sù a vore ta chei partîts, o che cierts manifescj si somein…
Al è simpri Garzón daûr de vierzidure di un gnûf procès cuintri dai rapresentants principâi de çampe indipendentiste basche e di une gnove ondade di arescj di indipendentiscj. Tai ultins vot mês a son stâts 322 i ativiscj politics arestâts, di chescj 151 a son ancjemò in preson. Daspò dal arest di Arnaldo Otegi e di buine part de dirigjence di Batasuna inmò in libertât, ta chestis ultimis zornadis a jerin stâts impresonâts ancje Pernardo Barrena e Patxi Urrutia. A chescj arescj, dut câs, a ‘nd è rivâts subite daûr altris cutuardis (11 di chescj za in preson e 3 libars su cauzion), tra di lôr al è ancje Karmelo Landa, om di prin plan dal panorame abertzale basc. Par ducj lôr la acuse e je di jessi membris di ETA o di vê colaborât cu la organizazion armade basche. Chest dome par vie de lôr ativitât politiche, daûr dal teoreme di Garzón che fâ ativitât politiche cun Batasuna o imbraçâ lis armis al è compagn. Cuintri di lôr di fat a son dome regjistrazions di conferencis stampis, declarazions su la stampe o partecipazion a manifestazion publichis. Denant di cheste gnove azion repressive, ancje i partîts bascs plui moderâts a àn jevât la lôr proteste. Pai ultins arestâts al è stât imbastît un gnûf procès di grup batiât “Sumario 11/08” Dut câs, i arescj no si àn vût dome intal stât spagnûl, ma ancje ta chel francês là che la polizie e à arestât Jean-Noël Etxeberri, un dai dirigjents dal moviment nazionalitari basc Abertzalean Batasuna, ma ancje Jacó Morio, ativist dal partît indipendentist ocitan Anaram Au Patac e redatôr di Radio País, emitente ocitane guascone. Ancje par lôr e je la acuse di vê colaborât cun ETA.
Denant di cheste gnove ondade repressive, si son davueltis diviersis protestis. Ai 10 di Fevrâr si è davuelte une manifestazion cun miârs di personis a Bilbo / Bilbao che e je stade dispierdude des cjariis de polizie autonomiche. Ai 14 di Fevrâr si è tignude invezit une zornade di siopar compagnade di diviersis manifestazions di place. Intant de proteste a son stâts arestâts 24 manifestants. Pal sindacât nazionalitari LAB la adesion al siopar e je stade significative, cundut de massive disinformazion su la proteste e des menacis ai lavoradôrs par che no partecipassin.
Font: Gara, 07-08-09-11-13/02/08; EiTB24, 08-09-14/02/08; Deia, 13-14/02/08; Mon Divers, 07/02/08


2 commenti:

Unknown ha detto...

Un forest ch'al cjacare la mê lenghe al mi é plui cjâr che un compaesan ch'a no l'ûl cjacarâle.
Chiste masime a é kurde. Nissun nol cjacare mai di lôr. No sono tal stès câs di ducj chei âltris nomenâts in te colone di sinistre dal blog?

triku ha detto...

Magari cussì no, i Curdis no son simpri "di mode".
Par esempli, se ju gasave Saddam a jerin des puaris vitimis che a judavin a justificâ l'atac angloamerican, se ju bombarde la Turchie a son dai "teroriscj" di colpî.
O pûr, in dì di vuê, trops in Italie si visino di Abdullah Ocalan, che te sô cature il stât talian al à vût une part no di pôc?

Par chel che mi rivuarde, Internazionalitari - sei come trasmission radiofoniche, sei come blog - e je nassude par ocupâsi dome di ce che al sucêt in Europe (la uniche ecezion e je chê dai Saharawi, parcè che in Europe a àn in pîts un front di lote impuartant). Cumò o soi daûr a viodi se o rivi a zontâ alc ancje di fûr di cheste suaze. Se ancje lu fasarai, magari cussì no al sarà un spazi piçul. Par fâlu ben no bastarès une redazion interie, figurìnsi une persone sole tai siei ritais di timp.