Pontade 07 08 (11/03/08) - 8

Irlande dal Nord: Paisley si dimetarà in Mai

Ian Paisley al à comunicât che in Mai si dimetarà di prin ministri dal guvier nordirlandês e di dirigjent dal Democratic Unionist Party. Paisley, che in Avrîl al fasarà 82 agns, al à rapresentât tai ultins 40 agns la ale plui radicâl dal unionisim, ven a dî chê contrarie a cualsisei colaborazion o condivision di podês cu la comunitât nazionaliste e republicane nordirlandese. Sot de sô vuide il Democratic Unionist Party, di formazion margjinâl che al jere, al è deventât il partît de comunitât unioniste de Irlande dal Nord. Propit par vie di cheste posizion di prin plan tal panorame politic locâl, Paisley si à cjatât a vuidâ l’esecutîf nordirlandês compartecipât, là che a son dentri ancje i rapresentants dal Sinn Féin, il partît di riferiment dai republicans irlandês. La colaborazion inviade cui republicans, che Paisley al à spiegât come la uniche strade par fermâ la riunificazion irlandese, e i bogns rapuarts cul vice prin ministri – Martin McGuinness, om dal Sinn Féin e ex comandant dal IRA – a saressin daûr dal marum che di cualchi timp si respire inte dirigjence dal DUP (che al veve segnât la sô incressite politiche e eletorâl massime su la asse cuintri dai republicans). Cheste, intune cui problemis judiziaris dal fi, e sarès duncje la reson che e à puartât Paisley a decidi di tirâsi di bande. Il so puest intal partît al varès di jessi cjapât dal so vice Peter Robinson, che al ocupe il puest di ministri pes financis intal guvier nordirlandês. Si spiete cumò di viodi se, cu lis dimissions di Paisley, al cambiarà alc intai rapuarts tra unioniscj e republicans e se si varan consecuencis sul lunc e faturôs procès di pâs in Irlande dal Nord.
Font: Ireland News, 04/03/08; BBC News, 04/03/08

Pontade 07 08 (11/03/08) - 7

Groenlande: il prin ministri danês a pro de incressite dal autoguvier

La Danimarcje no si cjate a vê di rispuindi dome ae domande di plui autoguvier che e rive des isulis Fær Øer, ma ancje a chê de Groenlande. Cun di fat, il prin ministri dal guvier autonom de isule artiche, Hans Enoksen, al à comunicât che in Novembar si davuelzarà un referendum là che i abitants de Groenlande a saran clamâts a dî se a vuelin incressi l’autoguvier de isule, che e gjolt di une fuarte autonomie politiche bielzà dal 1979. Cumò, il prin ministri danês, Anders Fogh Rasmussen, al à declarât di jessi dacuardi cul fat che la Groenlande e vedi plui autoguvier. Cun di plui, cheste Vierte, i doi prins ministris si cjataran par discuti de compartecipazion sul disfrutament dal teritori groenlandês.
Font: Mon Divers, 03/03/08

Pontade 07 08 (11/03/08) - 6

Gales: campagne par promovi l’ûs dal galês tal public

Il guvier galês e il Bwrdd yr Iaith Gymraeg (Welsh Language Board, o sei l’Ufici pe lenghe galese) a àn imbastît une campagne, che e je stade batiade “Mae Gen Ti Ddewis”, cun chê di incressi l’ûs dal galês intai rapuarts cui ents publics e cu lis societâts a capitâl public. Lis stradis previodudis di cheste campagne a son dôs, ven a dî sburtâ la int a doprâ di plui la sô lenghe proprie cuant che e à a ce fâ cul public, e stiçâ i ents publics a comunicâ miôr ai citadins che i lôr servizis a son ancje par galês. Ce che al covente – a àn spiegât i promotôrs de campagne – al è informâ di plui. Tai lûcs là che si lu à za fat, par esempli tai uficis di ciertis conteis (Carmarthenshire, Denbighshire) o te societât Welsh Water, l’ûs de lenghe galese al è za cressût dal 50%.
Font: Welsh Language Board, 28/02/08

Pontade 07 08 (11/03/08) - 5

Galizie: intervents su lenghe e lavôr

Il guvier galizian al à metût a disposizion 10 milions di euros par poiâ ativitâts di informazion e orientament pal lavôr che a laran a universitâts, sindacâts, associazions di catogorie e altris ents impegnâts pal interès public. Pe prime volte, tra i criteris previodûts par dâ fûr chestis risorsis, si ten cont ancje dal ûs de lenghe galiziane intai progjets proponûts.
Denant dal probleme de discriminazion linguistiche sul puest di vore, l’esecutîf galizian al à invezit previodût dai intervents di pueste intal so plan anuâl des ispezions sul lavôr. Cun di fat, i ispetôrs dal lavôr a varan ancje di controlâ che no si vedin violazions intal dirit dai lavoradôrs di doprâ il galizian sul puest di vore. Il guvier al à po sigurât che al concuardarà cui sindacâts lis azions di meti in vore tes aziendis là che si àn violazions.
Font: Galiza Hoxe, 20- 28/02/08

Pontade 07 08 (11/03/08) - 4

Paîs Catalans: te Franja la lenghe e ten, ma e mancje la tutele

L’ûs dal catalan inte Franja de Ponent, la regjon catalanofone dal Aragon, al reste avonde bon, ma i dirits linguistics di chei che lu fevelin a van dilunc a no jessi ricognossûts de leç. Al è chest il risultât dal studi puartât indenant dal sociolic Natxo Sorolla su la fonde dai ultins dâts sociolinguistics tirâts sù ta chê zone. Il 90% de popolazion de Franja e fevele ancjemò par catalan avonde dispès, ma dome il 30% al è bon di scrivilu e il 20% lu dopre par indreçâsi a cualchidun che nol cognòs. Par dâi plui fuarce ae lenghe, duncje, a coventin misuris di politiche linguistiche che a permetin di fâ dal catalan la lenghe normâl par cualsisei ativitât.
Font: Galiza Hoxe, 26/02/08

Pontade 07 08 (11/03/08) - 3

Scozie: e cres la voie di autoguvier

Nol è dite che il Ream Unît si dividi tal zîr di cualchi an, ma dal sigûr Scozie e Ingletiere a mostrin di volê formis di autoguvier simpri plui fuartis. A dîlu a son doi studis elaborâts dal Institute for Public Policy Research, un innomenât istitût di ricercje che al à vût la incarghe dal prin ministri britanic Gordon Brown di studiâ il procès di devoluzion de Scozie. Daûr dal prin studi, al somee che la voie di indipendence no vedi concuistât inmò la maiorance dai scozês, ma che la plui part de int e domandi che il Parlament scozês al vedi inmò plui podês di chei che al à in dì di vuê. Il secont studi, invezit, al segnale il marum dai inglês pal procès di devoluzion in vore in Scozie. In particolâr, si lamentin par vie che i inglês no puedin dî la lôr intai cjamps di competence dal Parlament scozês, cuant che invezit i parlamentârs scozês a puedin votâ su lis cuestions inglesis frontadis intal Parlament britanic. Chest par vie che no esist une Assemblee nazionâl inglese e, duncje, dutis lis cuestions de Ingletiere a vegnin discutudis intal Parlament britanic. Se i guviers britanics a saran bogns di regolâ cheste situazion, la strade che si fâs indenant e je chê di formis di autoguvier simpri plui fuartis, ancje se simpri dentri de suaze dal Ream Unît. In câs contrari, a fasin intindi i doi studis, si larà ae roture dal stât.
Font: Daily Express, 25/02/08; Mon Divers, 26/02/08

Pontade 07 08 (11/03/08) - 2

Irlande dal Nord: in miârs in place pal gaelic

A àn partecipât in miârs ai 16 di Fevrâr ae manifestazion che si è davuelte a Belfast par domandâ une leç organiche a pro dal gaelic irlandês. Il guvier britanic le veve imprometude inmò prin di tornâi i podês ae Assemblee nordirlandese, ma il disen di leç al è ancjemò ret e fer. Intant de iniziative, coordenade de organizazion Pobal che e met adun lis associazions impegnadis pe lenghe irlandese, si à ancje domandât azions par poiâ l’Irish Language Broadcast Found e il cuotidian gaelic Lá Nua. In Irlande, lis sîs conteis dal Nord a son chês là che l’ûs dal gaelic al è cressût di plui, ma a son ancje chês là che a mancjin misuris seriis di promozion de lenghe e di difese dai dirits di cui che le fevele. I risultâts otignûts fin cumò, di fat, a divegnin massime dai sfuarçs di autoorganizazion de comunitât nazionaliste nordirlandese. A poiâ la manifestazion in place a jerin ancje i dirigjents dal Sinn Féin, il partît di riferiment de comunitât republicane irlandese.
Font: An Phoblacht, 21/02/08

Pontade 07 08 (11/03/08) - 1

Bulgarie: UE in difese dai dirits dai macedons

Intant de sô visite in Bulgarie, il comissari european pai dirits umans, Thomas Hammarberg, al à domandât al guvier dal paîs balcanic di ricognossi il partît politic OMO Ilinden PIRIN che al à chê di rapresentâ la minorance macedone in Bulgarie. Il Consei de Europe – al à dite Hammarberg – al è une vore preocupât pal compuartament de Bulgarie che, su la cuestion, e je za stade riclamade de Cort europeane pai dirits umans. Cun di fat, a restin inmò fuartis lis resistencis in Bulgarie pal ricognossiment dai macedons tant che une vere minorance nazionâl.
Font: OMO Ilinden PIRIN, 14/02/08

Pontade 06 08 (19/02/08) - 13

Cossovo: proclamade la indipendence

Contrari di tantis gnovis che si riferissin a nazionalitâts minorizadis europeanis, chê de proclamazion unilaterâl de indipendence dal Cossovo e cjate une vore di spazi su buine part dai mieçs di comunicazion. La decision e je stade cjapade intant de riunion straordenarie dal Parlament di Pristina che si è tignude domenie ai 17 di Fevrâr. La plui part dai stâts membris de Union Europeane e à decidût di cjapâ at de decision cossovare, come che a àn fat ancje i Stâts Unîts che za di timp si vevin declarâts a pro de indipendence dal Cossovo de Serbie. Il guvier serp, invezit, al calcole di ilegâl la decision cjapade a Pristina. Stesse posizion e rive ancje de Federazion Russe, che e à domandât ae ONU di declarâ nule la proclamazion. Tra i stâts che a àn dite di jessi cuintri de indipendence a son ancje la Spagne e la Grecie. Al reste cumò di viodi cualis che a podaran jessi dutis lis consecuencis de decision dal Parlament cossovâr. Une prime problematiche e je chê des minorancis che a vivin ta chê regjon balcaniche, a tacâ di chê serbe che e rapresente ancjemò sù par jù il 7-8% de popolazion, cundut che tancj di lôr a fossin za scjampâts intant dai bombardaments de Nato dal 1999 o par vie dai atentâts e dai atacs de vuerilie cossovare. Une part dai serps che a son restâts, massime te zone di Mitrovica, e ponte suntune separazion dal Cossovo par tornâ a dâsi dongje cu la Serbie, ma par tancj di lôr cheste soluzion e je impussibile di rivâi. Cundut des sigurazions rivadis des autoritâts cossovaris che i dirits des minorancis a saran rispietâts, plui di cualchidun tra i serps, ma ancje tra i rom, al pense di bandonâ il paîs. Di là de situazion interne, il câs dal Cossovo al rapresente un precedent no di pôc pe Europe e dal Paîs Basc ae Cecenie plui di cualchidun si domande parcè che ce che al vâl pai cossovârs nol pues valê ancje par chei altris popui tibiâts dal continent. E subite daspò de proclamazion de indipendence ancje lis regjons de Abkhazie e de Ossezie a àn domandât di jessi ricognossûts indipendents de Gjeorgje.
Font: plusôr agjenziis di stampe, 16-17-18/02/08

Pontade 06 08 (19/02/08) - 12

Paîs Basc: suspindudis lis ativitâts di ANV e EHAK

Tes ultimis setemanis e je lade indenant cun inmò plui fuarce la azion repressive cuintri de çampe indipendentiste basche, che si è disvilupade massime su doi fronts, ven a stâi chel di cirî di impedî la ativitât dai moviments che a rapresentin cheste aree politiche e chel di impresonâ i rapresentants principâi dal indipendentisim basc.
La Avocadure di stât e la publiche acuse a vevin domandât al Tribunâl Suprem di suspindî la ativitât dai doi partîts di riferiment de ezkerra abertzale, ven a dî EHAK - PCTV (Partît Comunist des Tieris Baschis) e EAE – ANV (Azion Nazionaliste Basche), come prin pas intal procès par metiju fûr leç come che si veve za fat cun Batasuna. Dut câs, contrari des previsions, il Tribunâl Suprem al veve judicât disproporzionade cheste misure, ancje se al veve decidût di blocâ ogni misure di finanziament public pai doi sogjets politics e di impedî a ANV di partecipâ aes elezions politichis dai 9 di Març. Chel che il Tribunâl Suprem nol veve fat, lu à fat invezit il judiç de Audiencia Nacional, Baltasar Garzón, di agns in prime linie inte bataie cuintri dal indipendentisim basc. Garzón al à decidût di suspindî par trê agns la ativitât dai doi partîts, di sierâ dutis lis lôr sedis e i edificis di lôr proprietât, di blocânt ducj i conts e lis financis, di sierâ i lôr sîts internet e chei altris mieçs di comunicazion, di impedîur di clamâ adun o di partecipâ a cualsisedi manifestazion publiche. Ta cheste maniere – al à spiegât Garzón – no si intint meti fûr leç dai partîts, ma dome impedî che a vegnin doprâts par fâ dai delits. I “delits” che si riferìs il judiç, in realtât a son la ativitât politiche a pro de indipendence e de soluzion politiche dal conflit basc. Daspò vê imbastît il teoreme, cence provis reâls e cun diviersis contradizions internis, che al dîs che Batasuna e ETA a son la stesse robe, Garzón cumò al dîs che EHAK e ANV, ancje se no son Batasuna, a son stâts ocupâts di Batasuna che ju controle e a ‘nt decidît la linie politiche. Par justificâ cheste sô teorie, il judiç al spieghe, par esempli, che i trê sogjets politics a àn la stesse politiche cuintri de TAV, che ex dipendents di Batasuna a son stâts cjapâts sù a vore ta chei partîts, o che cierts manifescj si somein…
Al è simpri Garzón daûr de vierzidure di un gnûf procès cuintri dai rapresentants principâi de çampe indipendentiste basche e di une gnove ondade di arescj di indipendentiscj. Tai ultins vot mês a son stâts 322 i ativiscj politics arestâts, di chescj 151 a son ancjemò in preson. Daspò dal arest di Arnaldo Otegi e di buine part de dirigjence di Batasuna inmò in libertât, ta chestis ultimis zornadis a jerin stâts impresonâts ancje Pernardo Barrena e Patxi Urrutia. A chescj arescj, dut câs, a ‘nd è rivâts subite daûr altris cutuardis (11 di chescj za in preson e 3 libars su cauzion), tra di lôr al è ancje Karmelo Landa, om di prin plan dal panorame abertzale basc. Par ducj lôr la acuse e je di jessi membris di ETA o di vê colaborât cu la organizazion armade basche. Chest dome par vie de lôr ativitât politiche, daûr dal teoreme di Garzón che fâ ativitât politiche cun Batasuna o imbraçâ lis armis al è compagn. Cuintri di lôr di fat a son dome regjistrazions di conferencis stampis, declarazions su la stampe o partecipazion a manifestazion publichis. Denant di cheste gnove azion repressive, ancje i partîts bascs plui moderâts a àn jevât la lôr proteste. Pai ultins arestâts al è stât imbastît un gnûf procès di grup batiât “Sumario 11/08” Dut câs, i arescj no si àn vût dome intal stât spagnûl, ma ancje ta chel francês là che la polizie e à arestât Jean-Noël Etxeberri, un dai dirigjents dal moviment nazionalitari basc Abertzalean Batasuna, ma ancje Jacó Morio, ativist dal partît indipendentist ocitan Anaram Au Patac e redatôr di Radio País, emitente ocitane guascone. Ancje par lôr e je la acuse di vê colaborât cun ETA.
Denant di cheste gnove ondade repressive, si son davueltis diviersis protestis. Ai 10 di Fevrâr si è davuelte une manifestazion cun miârs di personis a Bilbo / Bilbao che e je stade dispierdude des cjariis de polizie autonomiche. Ai 14 di Fevrâr si è tignude invezit une zornade di siopar compagnade di diviersis manifestazions di place. Intant de proteste a son stâts arestâts 24 manifestants. Pal sindacât nazionalitari LAB la adesion al siopar e je stade significative, cundut de massive disinformazion su la proteste e des menacis ai lavoradôrs par che no partecipassin.
Font: Gara, 07-08-09-11-13/02/08; EiTB24, 08-09-14/02/08; Deia, 13-14/02/08; Mon Divers, 07/02/08

Pontade 06 08 (19/02/08) - 11

Galizie: 75 mil galizians cence tutele fûr dai confins de Comunitât

Il galizian, in plui di jessi la lenghe proprie de Comunitât autonome de Galizie, al è fevelât ancje tune cincuantine di comuns des Asturiis e de Castilie – Leon. Daûr di un studi fat dal avocat Carlos Bello Stout a saressin 75 mil lis personis che a fevelin par galizian ta chescj comuns. Chês che in dì di vuê a àn une competence passive de lenghe e a podaressin svilupânt ancje un ûs atîf a son invezit 150 mil. Dut câs, in dutis e dôs lis regjons, no si àn politichis ativis a pro dal galizian e duncje la lenghe e riscje di disparî tal zîr di cualchi gjenerazion se no si inviarà une politiche linguistiche serie. Za cumò il galizian al è daûr a pierdi teren sei tra i zovins, sei tai centris plui grues. Tal studi di Bello Stout si lamente ancje che lis associazions galizianis plui ativis tal cjamp de difese dai dirits linguistics si mostrin pôc atentis a cheste situazion.
Font: A Peneira Dixital, 11/02/08

Pontade 06 08 (19/02/08) - 10

Corsiche: si à sfantade la Unione Naziunale

Ta chestis zornadis si à sfantade in Corsiche la coalizion Unione Naziunale che e meteve adun il partît indipendentist Corsica Nazione Indipendente e i autonomiscj dal Partît de Nazion Corse e di A Chjama Naziunale e che e jere la tierce fuarce de Assemblee corse cui siei vot deputâts. I cinc deputâts dai doi partîts autonomiscj si son dâts dongje tun grup gnûf batiât Unione Naziunale – PNC – A Chjama e vuidât di Edmond Simeoni. I trê deputâts di CNI, vuidâts di Jean-Guy Talamoni, si son cussì ricjatâts a fâ grup di bessôi. Lis divergjencis a jerin za in vore di timp – al à spiegât Talamoni – e a son leadis aes posizions diferentis in mert ae lote armade e ae indipendence de isule. Cun di fat, CNI si mostre solidarie cu la lote armade che invezit e ven condanade di chei altris doi moviments.
Intant, ai 12, ai 13 e ai 14 di Fevrâr, si àn davuelts alì de “Università di Corsica” a Corti i “Scontri internaziunali di a ghjuventù in lutta” inmaneâts de organizazion zovanîl corse Ghjuventù Indipendentista. Ae manifestazion a àn partecipâts grups indipendentiscj rivâts da Irlande (Ogra Sinn Fein), dal Paîs Basc (Segi), dai Paîs Catalans (JERC e Maulets) e de Sardegne (iRS).
Font: Ghjuventù Indipendentista, 11/02/08; Nationalia, 11/02/08

Pontade 06 08 (19/02/08) - 9

Alsazie: iniziativis dal Consei gjenerâl a pro de lenghe proprie

Il Consei gjenerâl dal Alt Ren (Oberrhein / Haute Rhin) al à sotscrit trê acuardis par sburtâ lis varietâts todescjis alsazianis feveladis te regjon. La aministrazion regjonâl e à firmât doi acuardis cul Comitât federâl pe lenghe e pe culture regjonâls de Alsazie e cul Centri di documentazion pedagogjiche cun chê di svilupâ materiâi audiovisîfs pes scuelis su la storie e l’avignî des varietâts linguistichis alsazianis. Il Consei al metarà po i bêçs par meti fûr dute la segnaletiche dal Ecomuseu de Alsazie ancje par todesc standard e intes varietâts linguistichis locâls. Cun di fat, la presince dal alsazian – a àn declarât i rapresentants dal Consei – e jude il svilup turistic e economic de regjon.
Font: Mon Divers, 10/02/08

Pontade 06 08 (19/02/08) - 8

Gales: pe Cymdeithas il guvier nol manten lis promessis sul cuotidian par galês

Pe associazion Cymdeithas yr Iaith Gymraeg l’esecutîf galês – formât dai Laburiscj e dal Plaid Cymru – no à mantignût une des promessis presentadis intal program di guvier, ven a dî chê di garantî dut il jutori che al covente par meti in pîts un cuotidian par galês. Chel di un cuotidian di plante fûr par galês al è un progjet che si cîr di inviâ za di timp e, ancje su la fonde des promessis de coalizion di guvier, al someave aromai che il 2008 al fos l’an just par partî. Dut câs ai 5 di Fevrâr il ministri galês pal patrimoni culturâl, Rhodri Glyn Thomas, al à comunicât che il guvier al varès metût a disposizion pal progjet 200 mil euros, a front di une cifre tra i 600 mil e il milion di euros che e coventarès par inviâ il progjet e sburtâlu tal prin an di ativitât. Di chi duncje la proteste de Cymdeithas, la associazion che di agns e je in prime linie pai dirits linguistics dai galês e che ta cheste sô bataie e je stade protagoniste di cetantis azions che a àn fat scjas e che e à vût un grum dai siei membris impresonâts pes lôr azions di disobedience civîl.
Font: Cymdeithas, 08/02/08

Pontade 06 08 (19/02/08) - 7

Galizie: il judiç Grande-Marlaska al domande scuse pal “dialet” galizian

Il judiç Fernando Grande-Marlaska, bielzà cognossût intal stât spagnûl pe sô funzion di prin plan te persecuzion dai indipendentiscj bascs, al à vût di domandâ scuse e di modificâ l’at uficiâl là che al veve doprât la peraule “dialet” par indicâ il galizian. Il document al faseve riferiment ae domande di zovâsi di un tradutôr galizian – castilian fate indenant di cuatri fantats galizians acusâts di vê brusât la fotografie dal re di Spagne intant di une des manifestazions inmaneadis in diviersis bandis dal stât spagnûl par protestâ cuintri de monarchie. L’at nol è scjampât ai voi dai grups nazionalitaris galizians che a àn jevât la proteste denunciant “il tratament denigratori e di dispresit palês par une des lenghis couficiâls des comunitâts autonomis che in dì di vuê a formin il stât spagnûl”. Grande-Marlaska al à vût duncje di spesseâ a cambiâ il test dal document e domandâ scuse justifincantsi cul dî che si à tratât dome di un erôr.
Font: Galiza Hoxe, 05-07/02/08

Pontade 06 08 (19/02/08) - 6

Gales: partecipazion popolâr pe legjislazion linguistiche

Al è zaromai di timp che in Gales si domande la revision de ultime leç su la lenghe proprie di chê nazion che e rimonte a uns cuindis agns indaûr. La Assemblee nazionâl galese, che e je vuidade di une coalizion formade dai Laburiscj e dai nazionaliscj galês dal Plaid Cymru, e à cussì decidût di tornâ a meti man inte legjislazion su cheste materie. Prin di fâlu e à crodût just di scoltâ ancje la opinion dai citadins e e à sielzût il model “wiki”. E je nassude cussì wikideddfu, un sît che al permet a ducj di partecipâ par dâ conseis su cemût cambiâ la legjislazion in vore, par proponi stampons di leçs o ancje dome di articui di leç, par segnalâ i problemis che si à vûts ta chescj agns inte politiche linguistiche galese e proponi des soluzions. Ta cheste maniere no saran dome i esperts e i operadôrs dal setôr a puartâ un contribût, ma ancje i citadins. Par partecipâ al è timp fin al mês di Mai, po la peraule i passarà ae Assemblee legjislative galese. Intal sît metût su si cjate ancje il studi presentât ai 5 di Fevrâr par inviâ un Gales che al sedi pardabon bilengâl, là che si segnale che a ‘nd è ancjemò diviers câs di discriminazion dal galês.
In mert ae gnove leç di politiche linguistiche galese, si à ancje di segnalâ che ai 4 di Fevrâr il Guvier al à sintût lis propuestis rivadis de Mudiadau Dathlu’r Gymraeg, une organizazion di racuelte che e met adun tredis associazions ativis intal cjamp de difese dai dirits linguistics dai galês. La puartevôs de organizazion, Catrin Dafydd, e à fevelât di incuintri positîf e e à dite che cun chest pas si vûl inviâ un dialic tra associazions e istituzions par sburtâ indenant la legjislazion linguistiche dal Gales.
Font: Wikideddfu, 06/02/08; Nationalia, 07/02/08; Galiza Hoxe, 13/02/08; Cymdeithas, 04/02/08

Pontade 06 08 (19/02/08) - 5

Bretagne: atac ae lenghe bretone intes scuelis

E monte la proteste in Bretagne daspò de comunicazion dal diretôr scolastic di Rennes, Jean-Baptiste Carpentier, che cul prossin an scolastic al sarà gjavât l’insegnament de lenghe bretone e dal gallo (varietât neolatine fevelade tes regjons orientâls de Bretagne) in cutuardis istitûts superiôrs dal teritori. Si trate di un atac come no si lu veve mai viodût prime cuintri des lenghis propriis de Bretagne al denuncie la Federazion Sindacâl Unitarie che e domande al Consei regjonâl e a chês altris istituzions bretonis di intervignî daurman par impedî che cheste menace e deventi realtât. Za in dì di vuê la ufierte di classis di breton e je cetant plui basse di chel che al coventarès – e zonte la organizazion sindacâl – cun di fat a jerin za in pîts lis domandis par inviâ l’insegnament e l’ûs dal breton in altris tredis istitûts superiôrs de Bretagne. Cun cheste decision de dirigjence scolastiche di Rennes si riscje di sdrumâ jù ogni pussibilitât di continuitât dal ûs de lenghe bretone inte scuele, tun moment decisîf pe formazion linguistiche dai fruts.
Font: Agence Bretagne Presse, 02/08; Ligue Bretonne des Droits de l’Homme, 02/08

Pontade 06 08 (19/02/08) - 4

Galizie, Paîs Basc, Paîs Catalans: acuardi di promozion linguistiche

Dai 6 ai 9 di Fevrâr si è davuelte a Parîs la edizion 2008 di Expolangues, manifestazion che di vincjecinc agns e clame adun inte capitâl francese esperts, insegnants e studiôs di lenghis. Chest an dentri de esposizion a son rapresentadis ancje un pocjis di lenghis minorizadis, tant che catalan, galizian, basc, asturian e alsazian. La manifestazion e je stade ancje la ocasion pai guviers de Catalogne, de Comunitât Autonome Basche e de Galizie par sotscrivi un gnûf acuardi di colaborazion par promovi la pluralitât linguistiche.
Font: Galiza Hoxe, 07/02/08; Nationalia, 07/02/08

Pontade 06 08 (19/02/08) - 3

Fær Øer: referendum costituzionâl tal 2010

Contrari des previsions che a fevelavin di continuitât intal guvier des isulis Fær Øer, daspò des ultimis elezions che a àn puartât a di un pas indenant pai partîts che a sburtin pe indipendence de Danimarcje si à formât une gnove aleance di guvier che e met adun il Partît Republican (indipendentist), il Partît Socialdemocratic e il Partît dal Centri. La presidence dal gnûf guvier e je lade al socialdemocratic Jóannes Eidesgaard, ma cuatri dai siet ministris a partegnin al Partît Republican che tes elezions di Zenâr al à cjapât la maiorance relative. Intal acuardi di guvier si previôt ancje di davuelzi un referendum dentri dal 2010 par sintî la popolazion in mert al sisteme miôr di autoguvier pes isulis. Intant il ministri pai forescj Høgni Hoydal, che al vuide ancje i republicans, al à za tacât a movisi par puartâ indenant la adesion des Fær Øer in forme indipendente a diviers sogjets sorenazionâi tant che la Associazion Europeane dal Cumierç Libar (là che a son dentri Islande, Norvegje, Svuizare e Liechtenstein), la Unesco e la Organizazion Mondiâl pal Cumierç.
Font: Mon Divers, 06/02/08

Pontade 06 08 (19/02/08) - 2

Romanie: nassût un altri partît ongjarês

I ongjarês de Romanie a àn metût sù un partît politic gnûf, che si met in alternative ae Aleance Democratiche dai Ongjarês in Romanie che, ta chescj agns, al à fat di moviment di racuelte dal vôt magjâr de Transilvanie. Si trate dal Partît Civic Ongjarês e un dai siei obietîfs di fonde al è chel di otignî la autonomie de regjon dal Székelyföld. I székely a son une comunitât cun carateristichis un tic diviersis rispiet al rest de popolazion ongjarese che e vîf in Romanie e al è za di agns che a domandin une regjon autonome. Il partît al da, duncje, vôs a cheste domande popolâr.
Font: Divers.ro, 30/01/08; Mon Divers, 31/01/08