Lis elezions che si son tignudis ai 5 di Mai in Scozie a vevin chê di decidi la gnove composizion dai 32 conseis provinciâi che la lôr competence e je centrade su la gjestion di une serie di servizis pes comunitâts locâls. Chel istès, il vôt al veve un valôr che al leve plui innà di cheste dimension e al jere tignût di indicadôr ancje par temis plui gjenerâi tant che il procès di autodeterminazion de Scozie.
I citadins a àn ancjemò une
volte premiât il SNP – il Partît Nazionâl Scozês – che, cul 34,1% des
preferencis, nol reste dome il partît plui votât ma al va dilunc a cressi,
cuntun +1,8% di vôts rispiet aes elezions provinciâls dal 2017. I siei 453
elets, 22 in plui de volte stade, a son plui di un tierç dal totâl dai conseîrs
provinciâi. Al secont puest, ma cuntun distac significatîf, si son plaçâts i
Laburiscj cul 21,7% dai vôts (+1,6%) e 282 elets (+20), che a son passâts di
gnûf denant dai Conservadôrs. I Tories
a son il partît che al à pierdût di plui: il lôr 19,6% di preferencis al segne
un câl dal 5,8% rispiet al 2017 intant che i elets a son passâts di 277 a 214.
In cressi, invezit, i Liberâi Democratics cul 8,6% dai vôts (+1,7%) e 87 elets
(+20) e i Verts cul 6% des preferencis (+1,8%) e 35 conseîrs (+16). Il sucès
dai nazionaliscj scozês al à infuartît la domande par un secont referendum su
la indipendence. La prime ministre scozese Nicola Sturgeon – espression dal SNP
– e à prometût che si tornarà a votâ pe indipendence prime de fin di chest an
che al ven ancje se a Londre no vuelin savênt. La sconfite dai Conservadôrs,
che a son ae vuide dal guvier britanic, e la vitorie dal Partît Nazionâl Scozês
e dai Verts, siei aleâts di guvier, a son duncje letis ancje come une poie
popolâr par un altri referendum.
Font:
BBC, 06-08/05/22
Nessun commento:
Posta un commento