La sere dai 18 di Març il ministri pal interni francês, Gérald Dermanin, e il president dal esecutîf cors, Gilles Simeoni, a àn sotscrit un verbâl che al ten dentri i impegns cjapâts e lis posizions manifestadis des parts intant dai incuintris vûts dal inviât di Parîs cui elets e i rapresentants de societât civîl isolane intant de mission di trê dîs inmaneade par cirî di tornâ a puartâ la calme dopo dal tentatîf di sassinament dal militant indipendentist Yvan Colonna (muart cualchi dì plui tart, ai 21 di Març).
Intal document si fevele dal impegn a vierzi un procès di discussion tra il stât e la Corsiche cu la partecipazion dai elets e des realtâts associativis de isule che al varès di inviâsi a Parîs la prime setemane di Avrîl e che si confide di rivâ a sierâ dentri de fin dal an. Il confront al varès di cjapâ dentri ducj lis problematichis jevadis de societât corse sul plan sociâl, economic e culturâl, cuntune atenzion particolâr pe evoluzion istituzionâl in direzion di un Statût di autonomie che al varès di tignî cont des pussibilitâts ufiertis de Costituzion republicane ma ancje di esemplis in vore par altris isulis de aree mediteranie o atlantiche. Une strade condizionade però des declarazions dal president francês Emmanuel Macron che a batin suntune «Corsiche dentri de Republiche» e sul «refût di creâ dôs categoriis di citadins». Par che si riferìs ae agression mortâl a Yvan Colonna, si à garantît che in plui de investigazion za in vore si proviodarà a rindi publics i risultâts de inchieste ordenade dal prin ministri. Gjavât il regjim di DPS (détenu particulièrement signalé), il test sotscrit al spieghe che Pierre Alessandri e Alain Ferrandi (acusâts cun Colonna di formâ il comant che al veve copât il prefet Erignac) a saran trasferîts intal zîr di cualchi setemane tal centri di detenzion cors di Borgo. Su la liberazion di chei altris presonîrs politics, guvier e presidence no vuelin “interferî” cu lis decisions des autoritâts judiziariis. Si trate di prospetivis – si zonte tal document – che a puedin però concretizâsi dome se su la isule e tornarà la calme. Simeoni (Femu a Corsica) al à comentât che la robe plui impuartante e je vê un document uficiâl che al fisse la partence di un procès. No le pensin cussì i rapresentants di chei altris moviments nazionalitaris (Core in Fronte, Corsica Libera, PNC) che a calcolin la posizion di Parîs masse fumose e a domandin impegns clârs pe liberazion dai presonîrs, sul ricognossiment dal popul cors e sul so dirit a di un nivel di autoguvier che al previodi ancje il podê legjislatîf e la couficialitât de lenghe corse. Su la stesse linie il coletîf nassût ai 9 di Març che si prepare a lâ indenant cu lis mobilitazions.
Nessun commento:
Posta un commento