Scozie: si infuartìs la maiorance parlamentâr indipendentiste

Lis elezions pal Parlament scozês dai 6 di Mai a àn infuartît la posizion dal SNP e a àn garantît al front indipendentist une clare maiorance parlamentâr. Il Partît Nazionâl Scozês al à otignût 64 deputâts, un in plui des elezions stadis e a pene un in mancul de maiorance assolude in Parlament. Il scuintri si à zuiât massime tes 73 circoscrizions eletorâls che e je dividude la Scozie là che il vôt si à polarizât di une bande sul SNP e di chê altre sul candidât dal front unionist che al ufrive plui pussibilitât di sucès: propit achì i Nazionaliscj scozês a àn vût il 47,7% dai consens e sfiliât il milion e 300 mil preferencis. Divierse invezit la situazion pal vôt sul listin nazionâl là che cundut dal 40% di preferencis, par vie dal mecanisim di compensazion cul vôt des circoscrizions, il SNP al à otignût dome 2 dai 56 puescj disponibii. Tal listin il Partît Nazionâl Scozês al à vût un câl di consens dal 1,4% rispiet aes elezions stadis: vôts che a son lâts a finî su Alba, il gnûf partît indipendentist vuidât dal ex leader dal SNP Alex Salmond, che però cul 1,7% des preferencis nol à vût nancje un elet. La maiorance indipendentiste e je dut câs sigurade dai 8 parlamentârs otignûts dai Verts, doi in plui de volte stade. Il moviment aleât di guvier dal SNP al à concuistât plui dal 8% dai vôts intal listin nazionâl.

Par chel che al rivuarde i partîts unioniscj, i Conservadôrs a son stâts la seconde fuarce plui votade cul 23,5% di consens intal listin nazionâl e a àn confermât i 31 deputâts de volte stade (5 tes circoscrizions e 26 tal listin); i Laburiscj a àn sfiliât il 18% dai vôts intal listin e otignût 22 parlamentârs (2 tes circoscrizions e 20 tal listin), doi in mancul di chei che a vevin; e i Liberâi Democratics a àn cjapât pôc plui dal 5% des preferencis intal listin e 4 deputâts (ducj i cuatri tes circoscrizions), un in mancul de volte stade. Cun chescj risultâts si larà ae conferme di Nicola Sturgeon tant che prime ministre scozese. Un secont referendum su la indipendence de Scozie, e à dite, nol è une cuistion di “se” ma dome di “cuant”. Prime si lavorà adun cul guvier britanic par saltâ fûr de crisi sanitarie e po, dentri de prime metât de legjislature, si inviarà il percors legjislatîf par davuelzi la consultazion.

Font: BBC, 07-10/05/21